«Ҝөзәтчи гүлләси»нин сон сајларыны диггәтлә охумусунузса, ашағыдакы суаллара ҹаваб вермәјә чалышын.

Аллаһын бизә гаршы шәфгәтли олдуғуна даир Мүгәддәс Китабда һансы сүбутлар вар?

Гәдим Исраил халгы Мисирдә көлә оланда Аллаһ онларын әзабларыны ҝөрүрдү вә ағры-аҹыларыны дујурду (Чых. 3:7; Әшј. 63:9). Аллаһын бәнзәриндә јарадылдығымыз үчүн биздә дә шәфгәт һисси вар. Өзүмүзү Аллаһын мәһәббәтинә лајиг билмәјәндә белә, О бизә шәфгәтлә јанашыр (wp18.3 с. 8, 9).

Иса Мәсиһин тәлимләри гәрәзи ашмаға неҹә көмәк едир?

Иса Мәсиһин јашадығы дөврдә әксәр јәһудиләрдә гәрәз һисси вар иди. Мәсиһ тәвазөкарлығын ваҹиблијини вурғулајыр, ирги ајры-сечкилији мүһакимә едирди. О, давамчыларыны бир-биринә баҹы-гардаш кими јанашмаға тәшвиг едирди (w18.06 с. 9, 10).

Јеһованын Муса пејғәмбәрә Вәд едилмиш дијара ҝирмәјә изин вермәмәсиндән һансы дәрси ҝөтүрүрүк?

Муса пејғәмбәрин Јеһова илә сых мүнасибәти вар иди (Ган. 34:10). Сәһрада 40 иллик сәјаһәтләринин сонуна јахын Исраил халгы икинҹи дәфә су гытлығына ҝөрә ҝилејләнмәјә башламышды. Аллаһ Муса пејғәмбәрә бујурду ки, гајаја «су вер» десин. О исә бунун әвәзинә гајаја вурду. Јеһованын Муса пејғәмбәрә гәзәбләнмәсинә сәбәб Онун ҝөстәришләринә әмәл етмәмәси вә ја мөҹүзәјә ҝөрә шәрәфи Она вермәмәси ола биләрди (Сај. 20:6—12). Бу бизә Јеһоваја итаәт етмәјин вә Онун адыны уҹалтмағын ваҹиблијини хатырладыр (w18.07 с. 13, 14).

Нә үчүн инсаны заһири ҝөрүнүшүнә ҝөрә мүһакимә етмәклә јаныла биләрик?

Адәтән инсанларын башгалары һагда фикир формалашдырмасына нөвбәти үч хариҹи фактор тәсир едир: ирги вә миллијјәти, мадди вәзијјәти вә јашы. Инсанлара ајры-сечкилик етмәјән Аллаһымызын ҝөзү илә бахмағы өјрәнмәк олдугҹа ваҹибдир (Һәв. 10:34, 35; w18.08 с. 8—12).

Јашлы мәсиһиләр һансы үсулларла башгаларына көмәк едә биләрләр?

Тәјинаты дәјишмиш јашлы мәсиһиләр һәлә дә Аллаһын ҝөзүндә дәјәрлидирләр вә башгаларына чох саһәдә көмәк едә биләрләр. Мәсәлән, онлар мәсиһиләрин иманда олмајан һәјат јолдашлары илә мараглана, гејри-фәаллара көмәк едә, Мүгәддәс Китаб дәрси кечә вә хидмәтләрини ҝенишләндирә биләрләр (w18.09 с. 8—11).

Тәлим вәсаитләримизә нәләр дахилдир?

Тәлим вәсаитләримизә визит картлар вә дәвәтнамәләр, сәккиз әдәд ҝөзәл тәртиб олунмуш буклет, һәмчинин «Ҝөзәтчи гүлләси» вә «Ојанын!» журналы дахилдир. Бундан башга, брошүрләр, ики әсас дәрс вәсаити вә «Мүгәддәс Китабы өјрәнмәк нәјә ҝөрә ваҹибдир?» видеосу да дахил олмагла дөрд фајдалы видео тәлим вәсаитләримиздәндир (w18.10 с. 16).

Мәсиһиләр Мәсәлләр 23:23 ајәсиндә дејилдији кими һәгигәти алмаг үчүн нә едә биләр?

Биз һәгигәти алмаг үчүн пул өдәмирик. Бунунла белә, она саһиб олмаг үчүн вахт вә ҝүҹ сәрф етмәлијик (w18.11 с. 4).

Һушә пејғәмбәрин арвады Ҝүмәрлә рәфтарындан нә өјрәнирик?

Ҝүмәр дәфәләрлә зина етсә дә, Һушә ону бағышлады вә онунла евли галды. Әҝәр мәсиһинин һәјат јолдашы зина едәрсә, ҝүнаһсыз тәрәф һәјат јолдашыны бағышлаја биләр. Ҝүнаһсыз тәрәф зина етмиш һәјат јолдашы илә ҹинси мүнасибәтини бәрпа едәндә Мүгәддәс Китабын бошанмаг үчүн вердији әсас гүввәдән дүшүр (w18.12 с. 13).