СИЗ миннәтдар, тәшәккүр етмәји баҹаран бирисиниз? Һәр биримиз бу суалын үзәриндә дүшүнмәлијик. Мүгәддәс Китабда пејғәмбәрлик олунмушду ки, бизим дөврүмүздә әксәр инсанлар «нанкор» олаҹаг (2 Тим. 3:2). Бәзи адамлар елә дүшүнүр ки, һамы онлара борҹлудур, онлар үчүн нә исә етмәлидир, онлара нәсә вермәлидир, јәгин сиз дә белә адамлара раст ҝәлмисиниз. Белә адамлар елә дүшүнүр ки, онлара верилән вә едилән шејләрә ҝөрә миннәтдарлыг билдирмәмәлидирләр. Јәгин разылашарсыныз ки, бу ҹүр инсанларын әһатәсиндә олмаг хош дејил.

Амма Јеһова хидмәтчиләринә «шүкүр едәнләрдән» олмағы бујуруб. Биз «һәр шејә ҝөрә тәшәккүр» етмәлијик (Кол. 3:15; 1 Салон. 5:18). Үстәлик, миннәтдар олмаг өз хејримизәдир. Ҝәлин ҝөрәк һансы саһәләрдә.

Бу һисси јетишдирмәли олдуғумуз сәбәбләрдән бири одур ки, миннәтдарлыг башгаларына севинҹ ҝәтирмәклә јанашы, өзүмүз барәдә позитив дүшүнмәјә көмәк едир. Нәјә ҝөрә? Миннәтдар олсаг, башгаларынын ҝөзүндә дәјәрли олдуғумузу ҝөрә биләҹәјик. Ҝәлин нүмунәјә нәзәр салаг: әҝәр кимсә сизин үчүн нә исә едирсә, демәли, сизи буна лајиг билир, сизи дүшүнүр. Бу ҹүр диггәт ҝөрәндә јәгин ки, өзүнүзү јахшы һисс едирсиниз. Буну Рутун нүмунәсиндән дә ҝөрмәк олар. Буәз Рута сәхавәт ҝөстәрмишди. Шүбһәсиз, киминсә онун гејдинә галдығыны билмәк Рута чох хош тәсир бағышламышды (Рут 2:10—13).

Хүсусилә дә, Аллаһа миннәтдар олмалыјыг. Әлбәт ки, Јеһованын бәхш етдији вә бәхш етмәјә давам етдији руһани вә физики немәтләр барәдә вахташыры дүшүнүрсүнүз (Ган. 8:17, 18; Һәв. 14:17). Лакин Аллаһын сизә вә јахынларыныза вердији немәтләр һагда өтәри јох, дәриндән дүшүнүн. Јараданын сәхавәти барәдә дүшүнмәк Она миннәтдарлығынызы артыраҹаг вә Онун сизи нә гәдәр чох севдијинә, Онун үчүн нә гәдәр дәјәрли олдуғунуза әминлијинизи мөһкәмләндирәҹәк (1 Јәһ. 4:9).

Амма Јеһованын сәхавәти вә вердији немәтләр һагда дүшүнмәклә кифајәтләнмәјин, хејирхаһлығына ҝөрә Она миннәтдарлығынызы билдирин (Зәб. 100:4, 5). Миннәтдарлыг ифадә етмәк инсанын хошбәхтлијиндә мүһүм рол ојнајыр.

Миннәтдарлығын хејримизә олдуғу диҝәр саһә онун достлуг телләрини мөһкәмләндирмәсидир. Һәр кәс өзүнү дәјәрли һисс етмәк истәјир. Кимәсә хејирхаһ әмәлинә ҝөрә сәмими миннәтдарлыг билдирәндә достлашырыг (Ром. 16:3, 4). Үстәлик, миннәтдар инсанлар башгаларына көмәк етмәјә даһа чох мејилли олур. Онлар өзләринә олунан хејирхаһлығы дәјәрләндирир вә бу онлары гаршылыг вермәјә тәшвиг едир. Башгаларына көмәк етмәк хошбәхтлик ҝәтирир. Ејнилә Иса Мәсиһин дедији кими: «Вермәк алмагдан даһа чох хошбәхтлик ҝәтирир» (Һәв. 20:35).

Калифорнија Университетинин миннәтдарлыг үзрә арашдырма лајиһәсинин директор мүавини Роберт Еммонс белә фикир гејд етмишди: «Миннәтдар бахыша саһиб олмаг үчүн вермәклә алмаг арасындакы бағлылығы ҝөрмәк ҝәрәкдир». Бу фактдыр ки, јашамаг вә хошбәхт олмаг үчүн инсанын инсана бир чох саһәләрдә еһтијаҹы вар. Мәсәлән, кимсә бизи гида илә тәмин едир, јахуд тибби јардым ҝөстәрир (1 Кор. 12:21). Јахшылыг билән инсан башгаларынын онун  үчүн етдикләрини ҝөрүр. Сиз адәтән башгаларынын сизин үчүн етдикләринә ҝөрә миннәтдарлығынызы билдирирсиниз?

Миннәтдарлыг јетишдирмәјин даһа бир сәбәби вар: бу хүсусијјәт диггәтимизи мәнфи јох, мүсбәт шејләрә јөнәлтмәјә көмәк едир. Мүәјјән мәнада, зеһнимиз филтрә бәнзәјир. Бу филтр сајәсиндә диггәтимизи әтрафымызда баш верән мүәјјән мәгамлара ҹәмләјир, диҝәр мәгамлара исә әһәмијјәт вермирик. Миннәтдар оланда биз јахшы шејләри ҝөрмәјә, пис шејләрә исә даһа аз фикир вермәјә мејилли олуруг. Нә гәдәр чох миннәтдар олсаг, бир о гәдәр јахшы шејләри ҝөрә биләҹәјик, нәтиҹәдә, даһа миннәтдар инсан олаҹағыг. Диггәтимизи миннәтдар ола биләҹәјимиз шејләрә ҹәмләсәк, һәвари Булусун нөвбәти мәсләһәтинә әмәл едә биләҹәјик: «Рәббә хидмәтдә һәмишә севинин» (Филип. 4:4).

Миннәтдарлыг һисси мәнфи фикирләри дәф едир. Чәтин ки, инсан ејни вахтда һәм миннәтдар, һәм дә гысганҹ, мәјус вә аҹыглы олсун. Миннәтдар инсан һәмчинин мадди шејләрә даһа аз өнәм верир. О, әлиндә олана ҝөрә шүкр едир вә даһа чох шеј әлдә етмәјә чалышмыр (Филип. 4:12).

Баша дүшүрүк ки, Шејтан бу ахырзаманда үзләшдијимиз чәтинликләрин бизи мәјус етмәсини вә руһдан салмасыны истәјир. Мәнфи дүшүнҹәли, дејинҝән олмағымыз онун үрәјинҹә олар. Бу ҹүр әһвал-руһијјәдә олсаг, хош хәбәрин мүждәчиси кими о гәдәр дә бәһрә ҝәтирмәјәҹәјик. Миннәтдарлыг һисси мүгәддәс руһунун бәһрәси илә бағлыдыр, мәсәлән, ҝөтүрәк севинҹи вә иманы. Аллаһын бизә вердији бүтүн јахшы немәтләрә ҝөрә севинирик, һәмчинин Онун бүтүн вәдләринә иман ҝәтиририк. Бу да биздә миннәтдарлыг һисси доғурур (Гал. 5:22, 23).

Јеһованын Шаһиди олараг, јәгин ки, бу мәгаләдә миннәтдарлыгла бағлы дејиләнләрлә разысыныз. Бунунла белә, разы оларсыныз ки, миннәтдар, никбин бахыша саһиб олмаг һеч дә һәмишә асан дејил. Гој бу сизи руһдан салмасын. Сиз миннәтдарлыг хүсусијјәтини јетишдирә вә ону горуја биләрсиниз. Неҹә? Һәр ҝүн вахт ајырыб һәјатынызда миннәтдар ола биләҹәјиниз шејләр барәдә дүшүнүн. Буну даһа чох етдикҹә, миннәтдарлыг билдирмәк ичиниздән ҝәләҹәк. Беләҹә, һәјатын чәтинликләринә көкләнән инсанлардан даһа хошбәхт олаҹагсыныз. Аллаһын вә инсанларын етдији јахшылыглар — сизи руһландыран, сизә севинҹ бәхш едән шејләр барәдә дүшүнүн. Һәтта бунлары бир јерә гејд етмәјә башлаја биләрсиниз. Һәр ҝүн миннәтдарлыг дујдуғунуз ики-үч шеји јаза биләрсиниз.

Арашдырмалар ҝөстәрир ки, «инсан һәмишә миннәтдарлыг билдирәндә бејниндәки нејронларын импулслары дәјишир вә мүсбәт импулслар јараныр». Миннәтдар инсан даһа хошбәхт олур. Одур ки, алдығыныз немәтләр һагда дүшүнүн, һәјатыныздакы мүсбәт шејләрдән зөвг алын вә һәмишә миннәтдар олун! Јахшы шејләрә етинасыз јанашмајын, әксинә, «Јеһоваја шүкүр един, чүнки кәрамәтлидир». Бәли, «һәр шејә ҝөрә тәшәккүр един» (1 Салн. 16:34; 1 Салон. 5:18).