1, 2. Нәјә ҝөрә ҝөјләр һәјатына дирилмә бүтүн мәсиһиләри марагландырмалыдыр?

БУ ҜҮН Јеһованын хидмәтчиләринин әксәријјәти јер үзүндә јашамаг үмидинә саһибдир. Лакин мәсһ олунмуш мәсиһиләрин јер үзүндә галан һиссәси ҝөјләр һәјатына дириләҹәкләринә үмид едир. Онлар үчүн ҝөјдә һәјатларынын неҹә олаҹағы чох мараглыдыр. Бәс нәјә ҝөрә јер үзүндә јашамаг үмидинә малик оланлар үчүн дә бу мараглы олмалыдыр? Ҝөрәҹәјимиз кими, ҝөјләр һәјатына дирилмә јер үзүндә әбәди јашамаға үмид едәнләр үчүн дә бол немәтләрә јол ачыр. Буна ҝөрә дә саһиб олдуғумуз үмиддән асылы олмајараг, ҝөјләр һәјатына дирилмә һамымыз үчүн әһәмијјәт кәсб етмәлидир.

² Исанын биринҹи әсрдәки бәзи шаҝирдләри Аллаһын илһамы илә ҝөјләр һәјатына дирилмә үмиди барәдә јазмышды. Һәвари Јәһја гејд етмишди: «Инди биз Аллаһын өвладларыјыг, амма ҝәләҹәкдә неҹә олаҹағымыз һәлә бәлли дејил. Бирҹә ону билирик ки, О зүһур едәндә биз Онун кими олаҹағыг» (1 Јәһ. 3:2). Демәли, мәсһ олунмушлар руһани бәдән алыб ҝөјә галхандан сонра неҹә олаҹагларыны билмирләр. Амма онлар бу мүкафатларыны аланда Јеһованы һәгиги мәнада ҝөрәҹәкләр. Мүгәддәс Китабда ҝөјләр һәјатына дирилмә һәр тәфсилатына гәдәр јазылмаса да, һәвари Булусун јаздыгларына әсасән мүәјјән тәсәввүрүмүз јарана биләр. «Мәсиһ бүтүн һөкумәтләри, һакимијјәтләри вә игтидары», о ҹүмләдән «ахырынҹы дүшмән олан өлүмү» мәһв едәндә мәсһ олунмушлар онун јанында олаҹаг. Һәр шеј Исаја  табе едиләндән сонра о вә һакимијјәт шәрикләри Јеһоваја табе олаҹаглар (1 Кор. 15:24—28). Бу неҹә дә мөһтәшәм олаҹаг! *

3. 1 Коринфлиләрә 15:30—32 ајәләриндән ҝөрүндүјү кими, Булусун дирилмәјә олан иманы она неҹә көмәк етмишди?

³ Булусун дирилмәјә иманы она мүхтәлиф сынагларын өһдәсиндән ҝәлмәјә көмәк етмишди. (1 Коринфлиләрә 15:30—32 ајәләрини охујун.) О, коринфлиләрә јазмышды: «Һәр ҝүн өлүмлә үз-үзә дурурам». Һәмчинин о јазмышды ки, Ефесдә вәһши һејванларла гарпышыб. Ола билсин, о, Ефес аренасында һәгиги һејванларла вурушмасыны нәзәрдә тутурду (2 Кор. 1:8; 4:10; 11:23). Јахуд, ола билсин, Булус она дүшмән кәсилән јәһудиләрин вә башгаларынын онунла вәһши һејван кими даврандыгларыны нәзәрдә тутурду (Һәв. 19:26—34; 1 Кор. 16:9). Истәнилән һалда, Булус һәјати тәһлүкәләрлә үзләшмишди. Амма буна бахмајараг, о, ҝәләҹәјә никбин бахышыны горуја билмишди (2 Кор. 4:16—18).

4. Дирилмә үмиди бу ҝүн мәсиһиләрә неҹә ҝүҹ верир? (Үз габығындакы шәклә бахын.)

⁴ Биз чох тәһлүкәли бир дөврдә јашајырыг. Бәзи баҹы-гардашлар ҹинајәткарлығын гурбаны олуб. Диҝәрләри мүһарибә шәраитиндә јашајыр, һәјатлары гашла-ҝөз арасындадыр. Бир башгалары исә фәалијјәтимизин мәһдудлашдырылдығы вә ја гадаған олундуғу әразиләрдә јашајыр. Хидмәт етдикләринә ҝөрә онлар истәнилән вахт азадлыгларыны вә ја һәјатларыны итирә биләрләр. Һәр шејә рәғмән, бүтүн бу баҹы-гардашларымыз Јеһоваја ибадәтдән галмыр. Онлар бизим үчүн бөјүк өрнәкдир. Әминдирләр ки, һал-һазырда һәјатларыны итирсәләр дә, Јеһова онлара ҝәләҹәкдә гат-гат ҝөзәл һәјат бәхш едәҹәк. Буну билмәк онлара горхуја үстүн ҝәлмәјә көмәк едир.

5. Һансы јанлыш дүшүнҹә дирилмәјә олан иманымызы зәифләдә биләр?

⁵ Булусун дөврүндә бәзиләри белә дүшүнүрдү: «Әҝәр өлүләр дирилмирсә, “ҝәлин јејиб-ичәк, онсуз да сабаһ өләҹәјик”». Булус баҹы-гардашлары хәбәрдар едирди ки, өзләрини бу ҹүр јанлыш дүшүнҹәдән горусунлар. Әслиндә, бу ҹүр дүшүнҹә Булусун јашадығы дөврдән дә әввәл вар иди. Бәлкә дә, о, исраиллиләрин јанлыш дүшүнҹәсини әкс етдирән Әшија 22:13 ајәсини ситат ҝәтирмишди. Исраиллиләр Аллаһа мәһәббәтләрини мөһкәмләндирмәк әвәзинә, зөвг-сәфа далынҹа гачырдылар. Исраиллиләр, бир нөв, «беш ҝүнлүк дүнјадыр» принсипи илә јашајырды. Бу дүшүнҹә һәтта бу ҝүн дә инсанлар арасында ҝениш јајылыб. Амма Мүгәддәс Китабда јазылдығы кими, онларын бу әһвали-руһијјәси башларына бәла ачды (2 Салн. 36:15—20).

6. Дирилмә үмиди дост сечимимизә неҹә тәсир етмәлидир?

⁶ Тәбии ки, Јеһованын өлүләри дирилдәҹәји бизим дост сечимимизә дә тәсир етмәлидир. Коринфдәки гардашлар еһтијатлы олмалы идиләр ки, дирилмәни инкар едән инсанларла отуруб-дурмасынлар. Бу бизә дә аиддир. Фикри-зикри кеф чәкмәкдә олан инсанларла достлуг етмәјин ахыры јахшы гуртармајаҹаг. Бу ҹүр инсанлар мәсиһи бахышымызы вә давранышымызы корлаја биләр. Һәтта онлар мәсиһини Аллаһын нифрәт етдији әмәлләрә сүрүкләјә биләрләр. Она ҝөрә дә Булус бәрк-бәрк тапшырмышды: «Ајылын, салеһ ишләр ҝөрүн, ҝүнаһ ишләмәјин» (1 Кор. 15:33, 34).

7. 1 Коринфлиләрә 15:35—38 ајәләринә әсасән, дирилмә илә бағлы бәзиләриндә һансы суаллар јарана биләр?

⁷ 1 Коринфлиләрә 15:35—38 ајәләрини охујун. Башгаларында дирилмәјә шүбһә јаратмаг истәјән инсан соруша биләр: «Өлүләр неҹә дириләҹәк? Онларын нә ҹүр бәдәни олаҹаг?» Јахшы олар ки, Булусун бу суаллара неҹә ҹаваб вердијинә бахаг. Чүнки бу ҝүн инсанларын өлүмдән сонракы һәјатла бағлы мүхтәлиф фикирләри вар. Бәс Мүгәддәс Китабда бу һагда нә дејилир?

8. Ҝөјләр һәјатына дирилмәни баша дүшмәјә һансы нүмунә көмәк едә биләр?

⁸ Инсан өләндә бәдәни чүрүјүр, амма Каинаты һеч нәдән хәлг едән Аллаһ өлән инсаны дирилдиб, она мүнасиб бәдән вермәјә гадирдир (Јар. 1:1; 2:7). Булус нүмунә әсасында ҝөстәрди ки, инсаны дирилтмәк үчүн Аллаһа инсанын әввәлки бәдәни лазым дејил. Ҝөтүрәк ади битки тохумуну. Тохум торпаға әкиләндән сонра ҹүҹәрир вә јени битки јараныр. Јетишән битки балаҹа тохумдан тамамилә фәргләнир. Булус бу нүмунә илә ҝөстәрди ки, Јарадан дирилән инсана мүнасиб билдији бәдәни верә биләр.

9. 1 Коринфлиләрә 15:39—41 ајәләриндә бәдән мүхтәлифлији илә бағлы нә дејилир?

⁹ 1 Коринфлиләрә 15:39—41 ајәләрини охујун. Булус гејд едир ки, јарадылышда бөјүк мүхтәлифлик мөвҹуддур. Мәсәлән, мал-гаранын, гушларын, балыгларын бәдәни бир-бириндән фәргләнир. О, сәмада ҝүнәш вә ајын да бир-бириндән фәргләндијини дејир, һәмчинин гејд едир ки, «улдуз да улдуздан ҹалалы илә фәргләнир». Дүздүр, биз бу фәрги ади ҝөзлә ҝөрә билмирик, амма алимләр онлара мүхтәлифликләринә ҝөрә фәргли-фәргли адлар вериб. Мәсәлән, гырмызы нәһәнҝ улдузлар, ағ ҹыртдан улдузлар вә ҝүнәш типли сары улдузлар. Бундан әлавә, Булус дејир: «Сәмави варлыглар  вә јердәки варлыглар вардыр». Һансы мәнада? О мәнада ки, јер үзүндә јашајанларын ҹисмани бәдәни вар, ҝөјдә јашајанларын исә мәләкләрдә олдуғу кими руһани бәдәни вар.

10. Ҝөјләр һәјатына дириләнләр һансы бәдәни алаҹаг?

¹⁰ Ҝөрүн сонра Булус нә јазыр: «Еләҹә дә дирилмә. Чүрүјән бәдән әкилир, чүрүмәз бәдән галхыр». Билдијимиз кими, инсан өләндә бәдәни чүрүјүр вә торпаға гајыдыр (Јар. 3:19). Бәс неҹә ола биләр ки, инсан «чүрүмәз бәдән»дә дирилсин? Булус јер үзүндә јашамаг үчүн дирилән инсанлары, мәсәлән, Илјасын, Әлјәсәнин вә Исанын дирилтдији инсанлары нәзәрдә тутмурду. О, ҝөјләр һәјаты үчүн руһани бәдәндә дирилән инсанлардан данышырды (1 Кор. 15:42—44).

11, 12. Иса өләндән сонра һансы бәдәндә дирилди вә ејни шеј мәсһ олунмушларла неҹә баш верир?

¹¹ Иса јер үзүндә јашајанда онун ҹисмани бәдәни вар иди. Амма дириләндә о, «һәјат верән руһани варлыг олду» вә ҝөјә гајытды. Ејнилә дә, мәсһ олунмуш мәсиһиләр руһани варлыг кими дирилирләр. Булус изаһ едир: «Биз торпагдан јарадылмышын сурәтиндә олдуғумуз кими, ҝөјдән ҝәләнин дә сурәтиндә олаҹағыг» (1 Кор. 15:45—49).

¹² Булус дирилмә илә бағлы изаһатынын ән ваҹиб һиссәсинә ҝәлиб чатыр. Диггәт јетирмәк ваҹибдир ки, Иса ҹисмани бәдәндә дирилмәмишди. Булус ајдын шәкилдә гејд едир: «Ҹисмани бәдән [ҝөјә] Аллаһын Падшаһлығына ҝирә билмәз» (1 Кор. 15:50). Һәвариләр вә диҝәр мәсһ олунмуш мәсиһиләр әтдән вә гандан олан чүрүјән бәдәнлә ҝөјләр һәјатына дирилә билмәздиләр. Бәс дирилмә нә вахт олаҹагды? Булус онларын өлән кими јох, ҝәләҹәкдә дириләҹәјини демишди. О, «Коринфлиләрә биринҹи мәктуб»у јазанда Исанын бәзи давамчылары артыг «өлүм јухусуна» ҝетмишди. Мәсәлән, һәвари Јагуб (Һәв. 12:1, 2).  Диҝәр һәвариләр вә мәсһ олунмушлар исә бир мүддәт сонра «өлүм јухусуна» ҝетдиләр (1 Кор. 15:6).

13. Иса Мәсиһин һүзурунун әламәтинә нәләр дахилдир?

¹³ Һәм Иса, һәм дә Булус ҝәләҹәкдә тарихдә олаҹаг мүһүм дөврдән — Мәсиһин һүзурундан данышмышды. Мәсиһин һүзуру дөврүнүн әламәтләри мүһарибәләр, зәлзәләләр, хәстәликләр вә диҝәр глобал һадисәләр олаҹагды. Мүгәддәс Китабда јазылмыш бу пејғәмбәрлијин 1914-ҹү илдән бәри јеринә јетдијини ҝөрүрүк. Әламәтин башга бир ваҹиб һиссәси дә вар. Иса демишди ки, Аллаһын Падшаһлығы һаггындакы мүждә «халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәт. 24:3, 7—14). Булус гејд етмишди ки, һәмчинин «Ағанын һүзуру заманы... өлүм јухусуна» ҝедән мәсһ олунмуш мәсиһиләрин дирилмәси баш верәҹәк (1 Салон. 4:14—16; 1 Кор. 15:23).

14. Мәсиһин һүзуру заманы өлән мәсһ олунмушларла нә баш верир?

¹⁴ Бу ҝүн мәсһ олунмуш мәсиһиләр јер үзүндәки һәјатларыны баша вуран кими ҝөјләр һәјатына дирилирләр. Бу, Булусун 1 Коринфлиләрә 15:51, 52 ајәләриндә јаздығы сөзләрдә әкс олунуб: «Биз һамымыз өлүм јухусуна ҝетмәјәҹәјик, анҹаг һамымыз дәјишәҹәјик. Бир ан ичиндә, бир ҝөз гырпымында, ахырынҹы кәрәнај чалынанда дәјишәҹәјик». Булусун бу сөзләри инди јеринә јетир! Мәсиһин бу гардашлары дириләндә бөјүк севинҹ дујаҹаг, һәмишә ағалары илә бирликдә олаҹаглар (1 Салон. 4:17).

15. «Бир ҝөз гырпымында» дәјишән кәсләр һансы ишләри ҝөрәҹәк?

 ¹⁵ Мүгәддәс Китабда «бир ҝөз гырпымында» дәјишән кәсләрин ҝөрәҹәји ишләрдән данышылыр. Иса онлара дејир: «Атам мәнә һакимијјәт вердији кими, мән дә галиб ҝәләнә вә јолуму ахыра гәдәр давам етдирәнә халглар үзәриндә һакимијјәт верәҹәјәм. О, халглара дәмир чомагла чобанлыг едәҹәк, онлар сахсы габ кими сыныб чилик-чилик олаҹаглар» (Вәһј 2:26, 27). Рәһбәрләри кими, онлар да әлләриндә дәмир чомаг халглара чобанлыг едәҹәк (Вәһј 19:11—15).

16. Чохлу сајда инсан өлүм үзәриндә неҹә гәләбә чалаҹаг?

¹⁶ Мәсһ олунмуш мәсиһиләр ҝөјләр һәјатына дириләндә өлүм үзәриндә гәләбә чалыр (1 Кор. 15:54—57). Беләҹә, онлар Армаҝеддон мүһарибәсиндә писләрин үзәриндә чалынан гәләбәдә иштирак едә биләҹәк. Милјонларла киши вә гадын бөјүк мүсибәтдән сағ чыхыб, јени дүнјада јашајаҹаг (Вәһј 7:14). Бу инсанлар өлүм үзәриндә чалынаҹаг диҝәр гәләбәнин шаһиди олаҹаг. Кечмишдә өлмүш милјардларла инсанын дирилмәсини ҝөрәҹәкләр. Бу мөһтәшәм гәләбә заманы јашанан севинҹи тәсәввүр едирсиниз? (Һәв. 24:15). Јеһоваја тамамилә садиг галан кәсләр Адәмдән мирас алынан өлүм үзәриндә дә гәләбә чалаҹаглар. Онларын әбәди јашамаг имканы олаҹаг.

17. 1 Коринфлиләрә 15:58 ајәсинә әсасән, бу ҝүн биз нә етмәлијик?

¹⁷ Бу ҝүн сағ олан һәр бир мәсиһи Булусун дирилмә илә бағлы коринфлиләрә јаздығы тәсәлливериҹи сөзләрә ҝөрә миннәтдар олмалыдыр. Булусун мәсләһәтинә әмәл едәрәк, Рәббин ишиндә чох чалышмаг үчүн бизим әсаслы сәбәбләримиз вар. (1 Коринфлиләрә 15:58 ајәсини охујун.) Әҝәр биз сәдагәтлә фәал шәкилдә бу ишдә иштирак етсәк, ҝәләҹәкдә хошбәхт һәјатда јашамаг имканымыз олаҹаг. Һәмин вахт һәјатымыз тәсәввүр едә биләҹәјимиздән дә мөһтәшәм олаҹаг! Онда әмин олаҹағыг ки, Рәббин ишиндә чәкдијимиз зәһмәт һәдәр дејилмиш.