«Ҝөзәтчи гүлләси»нин бу ил чыхан сајларыны диггәтлә охумусунуз? Онда ҝөрүн нөвбәти суаллара ҹаваб верә биләрсиниз?

Јагуб 5:11 ајәсиндә дејилдији кими, Јеһованын «меһрибан вә мәрһәмәтли» олмасы биздә һансы әминлији јарадыр?

Биз билирик ки, Јеһова мәрһәмәтли олдуғу үчүн ҝүнаһларымызы бағышлајыр. Јагуб 5:11 ајәси биздә һәмчинин әминлик јарадыр ки, Јеһова чәтинликләримиз заманы бизә көмәк етмәјә һазырдыр. Биз Ондан нүмунә ҝөтүрмәлијик (w21.01 с. 21).

Нәјә ҝөрә Јеһова башчылыг гурулушуну тәсис едиб?

О, буну севҝидән ирәли ҝәләрәк едиб. Бунун сајәсиндә Јеһованын аиләсиндә сүлһ вә низам-интизам һөкм сүрүр. Башчылыг принсипинә һөрмәт едән һәр бир аилә билир ки, сон гәрары ким верәҹәк вә бу гәрарын иҹра олунмасына ким рәһбәрлик едәҹәк (w21.02 с. 3).

Нәјә ҝөрә мәсиһиләр електрон месажлашма тәтбигләриндән истифадә едәркән еһтијатлы олмалыдыр?

Бу кими тәтбигләрдән истифадә етмәјә гәрар верән мәсиһи киминлә үнсијјәт етдијинә фикир вермәлидир. Бөјүк мессенҹер групларында буна нәзарәт етмәк даһа чәтиндир (1 Тим. 5:13). Мессенҹерләрин бир тәһлүкәси дә одур ки, инсан сенсасија јарадан вә доғрулуғуна әмин олмадығы мәлуматлары јаја биләр вә ја баҹы-гардашлардан мадди мәнфәәт үчүн истифадә етмиш ола биләр (w21.03 с. 31).

Һансы сәбәбләрә ҝөрә Јеһова әзиз Оғлунун ишҝәнҹәли өлүмүнә изин верди?

Биринҹиси, Исанын дирәкдән асылмасы јәһудиләрин гаршысында ләнәтдән азад олмаг имканы ачды (Гал. 3:10, 13). Икинҹиси, Јеһова Исаны ҝәләҹәк вәзифәсинә, Баш каһин вәзифәсинә һазырлады. Үчүнҹүсү, Исанын садиг галмасы сүбут етди ки, инсанлар шиддәтли сынаглар гаршысында Аллаһа садиг гала биләрләр (Әјј. 1:9—11) (w21.04 с. 16—17).

Инсанлара евләриндә тәблиғ едә билмириксә, һансы үсуллардан истифадә едә биләрик?

Инсанларын евдә олма еһтималынын јүксәк олдуғу вахтларда тәблиғ едә биләрик. Һәмчинин мүхтәлиф мәканларда тәблиғ етмәк олар. Бундан әлавә, мүхтәлиф үсуллардан истифадә едә биләрик, мәсәлән, мәктуб јаза биләрик (w21.05 с. 15—16).

Һәвари Булус «ганунун васитәсилә ганун үчүн өлдүм» дејәндә нәји нәзәрдә тутурду? (Гал. 2:19).

Мусанын гануну инсанларын ҝүнаһлы олдуғуну ајдын шәкилдә ҝөстәрирди вә Исраил халгыны Мәсиһә доғру апарырды (Гал. 3:19, 24). Гануну баша дүшмәси сајәсиндә һәвари Булус Мәсиһи гәбул етди. Беләҹә, «ганун үчүн өлдү», артыг онун үзәриндә Мусанын ганунунун һөкмү јох иди (w21.06 с. 31).

Јеһова дөзүм ҝөстәрмәкдә бизә һансы нүмунәни гојуб?

Јеһова адына гара јахылмасына, чохларынын Онун һакимијјәтинә гаршы чыхмасына, јаратдығы өвладларынын үсјанына, Иблисин јаланлар јағдырмасына, әзиз бәндәләринин әзабына, өлүмүн дәјәрли достларыны Ондан ајырмасына, инсанларын писләрин әлиндән әзаб чәкмәсинә, бәшәријјәтин әхлаги тәнәззүлүнә, инсанларын Јер күрәсини тәләф етмәсинә дөзүр (w21.07 с. 9—12).

Јусиф сәбир саһәсиндә һансы ҝөзәл нүмунәни гојуб?

Јусиф гардашларынын она гаршы етдији бөјүк һагсызлыға дөздү. Даһа сонра Мисирдә јалан иттиһамлара мәруз галды вә узун илләр зинданда олду (w21.08 с. 12).

Һәггај 2:6—9, 20—22 ајәләриндә һансы мәҹази силкәләнмәдән сөз ҝедир?

Халглар Падшаһлыг һагда мүждәнин тәблиғинә пис јанашыр, амма чох адам һәгигәти гәбул едир. Тезликлә халглар сонунҹу дәфә силкәләнәҹәк, онлар мәһв олаҹаг (w21.09 с. 15—19).

Нәјә ҝөрә хидмәтимизи тәслим олмадан јеринә јетирмәлијик?

Јеһова бизим чәкдијимиз зәһмәти ҝөрүр вә бундан разы галыр. Әҝәр тагәтдән дүшмәсәк вә јорулмасаг, әбәди һәјат мүкафатыны алаҹағыг (w21.10 с. 25—26).

Лавилиләр 19-ҹу фәсилдәки ајәләр «һәр бир ишиниздә мүгәддәс олун» мәсләһәтинә әмәл етмәјимизә неҹә көмәк едә биләр? (1 Бут. 1:15).

Чох јәгин ки, бу ајә Лавилиләр 19:2 ајәсиндән ситатдыр. 19-ҹу фәсилдә 1 Бутрус 1:15 ајәсини ҝүндәлик һәјатымызда тәтбиг етмәјә көмәк едәҹәк чохлу вәзијјәтләр вурғуланыр (w21.12 с. 3—4).