1. Һәвари Бутрус диндашларына һансы мәсләһәти вермишди вә нәјә ҝөрә бу мәсләһәтә риајәт етмәк гејри-мүмкүн ҝөрүнә биләр?

 «СИЗИ чағырмыш Мүгәддәс Аллаһ кими һәр бир ишиниздә мүгәддәс олун, ахы јазылыб: “Мүгәддәс олун, чүнки Мән мүгәддәсәм”» (1 Бут. 1:15, 16). Бу сөзләри һәвари Бутрус биринҹи әсрдә јашамыш мәсһ олунмуш мәсиһиләрә демишди. Биз истәр ҝөјдә, истәрсә дә јердә јашамаг үмидинә малик олаг, бу мәсләһәтдән һәр биримиз фајдалана биләрик. Бу сөзләрдән өјрәнирик ки, мүгәддәслик саһәсиндә ән ҝөзәл нүмунә олан Јеһоваја бәнзәјә биләрик. Биз мүгәддәс ола биләрик вә олмалыјыг да. Амма биз гејри-камил олдуғумуз үчүн бу, мүмкүнсүз ҝөрүнә биләр. Һәвари Бутрусун өзү дәфәләрлә сәһвләр етмишди. Амма онун нүмунәси ҝөстәрир ки, мүгәддәс олмағымыз мүмкүндүр.

2. Бу мәгаләдә һансы суаллары арашдыраҹағыг?

² Бу мәгаләдә биз нөвбәти суаллары арашдыраҹағыг: Мүгәддәслик нәдир? Јеһованын мүгәддәслији илә бағлы Онун Кәламында нә јазылыб? Һәр бир ишимиздә неҹә мүгәддәс ола биләрик? Јеһова илә мүнасибәтләримизлә мүгәддәс олмағымыз бир-бири илә неҹә бағлыдыр?

3. Мүгәддәс инсан дејиләндә чохларында һансы тәсәввүр јараныр, бәс бунунла бағлы дәгиг мәлуматы һарадан тапа биләрик?

³ Бәзи әразиләрдә «мүгәддәс инсан» дејәндә һеч вахт ҝүлмәјән, һәмишә үзүндә ҹидди ифадә олан вә дини палтарлар ҝејинән бир инсан ҹанланыр. Амма мүгәддәслик бу дејил. Мүгәддәс олан Јеһова «хошбәхт Аллаһ» адланыр (1 Тим. 1:11). Она хидмәт едән инсанлар да «бәхтәвәр» вә «бәхтијар» адланыр (Зәб. 144:15). Иса Мәсиһ ҝејимләри илә башгаларындан  фәргләнән вә өз салеһликләрини нүмајиш етдирән инсанлары мәзәммәт едирди (Мәт. 6:1; Марк 12:38). Бир мәсиһи кими, мүгәддәсликлә бағлы тәсәввүрүмүзү Мүгәддәс Китабдан өјрәндикләримиз формалашдырмалыдыр. Биз әминик ки, мүгәддәс вә меһрибан Аллаһымыз Јеһова бизә һеч вахт ҝүҹүмүз чатмајан әмри вермәз. Буна ҝөрә дә Јеһова «мүгәддәс олун» дејәндә биз шүбһә етмирик ки, бу, мүмкүндүр. Әлбәттә, һәр ишимиздә мүгәддәс олмағымыз үчүн мүгәддәслијин нә демәк олдуғуну билмәлијик.

4. «Мүгәддәс» вә «мүгәддәслик» сөзләринин мәнасы нәдир?

⁴ Мүгәддәслик нәдир? Аллаһын Кәламында «мүгәддәс» вә «мүгәддәслик» сөзләри әсас етибарилә мәнәви, дини паклығы вә сафлығы билдирир. Бу сөзләр һәмчинин «Аллаһ үчүн ајрылмыш» мәнасыны верир. Башга сөзлә, әҝәр биз мәнәви ҹәһәтдән тәмизиксә, Јеһоваја Онун бәјәндији тәрздә ибадәт едириксә вә Онунла мөһкәм мүнасибәтимиз варса, мүгәддәс сајылырыг. Мүгәддәс Китабдан өјрәнәндә ки, бизим кими ҝүнаһлы инсанлар Јеһова кими мүгәддәс бир Аллаһла дост ола биләр, гәлбимизә раһатлыг чөкүр.

5. Садиг мәләкләрин сөзләриндән Јеһова һаггында нә өјрәнирик?

⁵ Јеһова һәр ҹәһәтдән пак вә тәмиздир. Буну серафларын — Јеһова Аллаһын тахты әтрафында дуран руһани варлыгларын сөзләриндән ҝөрмәк олар. Серафлар бир-бирини сәсләјәрәк демишдиләр: «Ордулар Аллаһы Јеһова мүгәддәсдир, мүгәддәсдир, мүгәддәсдир!» (Әшј. 6:3). Әлбәттә, мүгәддәс Аллаһла јахын мүнасибәтләринин олмасы үчүн мәләкләр өзләри дә мүгәддәс олмалыдыр вә еләдир ки вар, онлар мүгәддәсдир. Һәтта мәләјин јер үзүндә олдуғу мәкан белә, мүгәддәс сајылыр. Буна Муса пејғәмбәрин јанан колун јанында олдуғу һадисәни нүмунә чәкмәк олар (Чых. 3:2—5; Јуш. 5:15).

6, 7. а) Чыхыш 15:1, 11 ајәләриндә Муса Аллаһын мүгәддәслијини неҹә вурғуламышды? б) Исраиллиләрә Јеһованын мүгәддәс олдуғуну нә хатырладырды? (Үз габығындакы шәклә бахын.)

⁶ Муса пејғәмбәр исраиллиләри Гырмызы дәниздән кечирәндән сонра Јеһова Аллаһын мүгәддәс олдуғуну вурғуламышды. (Чыхыш 15:1, 11 ајәләрини охујун.) Мисир аллаһларына ибадәт едән инсанларын әмәлләри мүгәддәсликдән чох-чох узаг иди. Ејни шеји Кәнан аллаһларына ибадәт едәнләр һаггында да демәк олар. Онларын ибадәтинә ушаглары гурбан ҝәтирмәк вә позғун һәрәкәтләр дахил иди (Лав. 18:3, 4, 21—24; Ган. 18:9, 10). Бу сахта танрылардан фәргли олараг, Јеһова һеч вахт хидмәтчиләриндән белә ијрәнҹ шејләр тәләб етмәјиб. Јеһова тамамилә мүгәддәсдир. Бу, баш каһинин әммамәсинин үзәриндәки гызыл лөвһәҹикдә ачыг-ајдын јазылмышды. Лөвһәҹијин үзәринә «Мүгәддәслик Јеһоваја мәхсусдур» сөзләри һәкк олунмушду (Чых. 28:36—38).

⁷ Бу лөвһәдә јазылан сөзләр ону ҝөрән һәр кәси әмин едәҹәкди ки, Јеһова һәгигәтән дә мүгәддәсдир. Бәс јахшы исраиллиләрдән кимсә баш каһинә јахынлаша билмәдији үчүн о, белә бир ваҹиб мәлуматдан бихәбәр галаҹагды? Хејр. Чүнки Ганун кишиләрин, гадынларын вә ушагларын өнүндә охунанда һәр бир исраилли буну ешитмишди (Ган. 31:9—12). Әҝәр сиз һәмин вахты орада олсајдыныз, бу сөзләри ешидәрдиниз: «Мән Јеһова сизин Аллаһынызам... Мән мүгәддәсәм, буна ҝөрә сиз дә мүгәддәс олмалысыныз». «Мәнә мәхсус оланлар кими  мүгәддәс олун, чүнки Мән Јеһова мүгәддәсәм» (Лав. 11:44, 45; 20:7, 26).

8. Лавилиләр 19:2 вә 1 Бутрус 1:14—16 ајәләриндән нә өјрәнирик?

⁸ Ҝәлин Исраил халгына охунан Лавилиләр 19:2 ајәсинә диггәт јетирәк. Јеһова Мусаја демишди: «Бүтүн Исраил иҹмасына белә сөјлә: “Сиз мүгәддәс олмалысыныз, чүнки Мән, Аллаһыныз Јеһова мүгәддәсәм”». Ола билсин, Бутрус мәсиһиләри мүгәддәс олмаға тәшвиг едәндә бу ајәдән ситат ҝәтирмишди. (1 Бутрус 1:14—16 ајәләрини охујун.) Дүздүр, биз Мусаја верилән ганунун табелији алтында дејилик, амма Бутрусун дедији сөзләр Лавилиләр 19:2 ајәсиндән өјрәндикләримизи тәсдиг едир; јәни Јеһова мүгәддәсдир вә Ону севәнләр дә мүгәддәслијә ҹан атмалыдыр. Ҝөјдә вә ја јерүзү ҹәннәтдә јашамаг үмидимиздән асылы олмајараг, бу сөзләр һәр биримизә аиддир (1 Бут. 1:4; 2 Бут. 3:13).

9. Лавилиләр 19-ҹу фәсли арашдырмағын бизә һансы фајдасы олаҹаг?

⁹ Биз мүгәддәс Аллаһымыз Јеһованы разы салмаг истәјирик. Буна ҝөрә дә мүгәддәс олмағы өјрәнмәјә ҹан атырыг. Бу саһәдә бизә көмәк етмәк үчүн Јеһова бәзи мәсләһәтләр вериб. Лавилиләр 19-ҹу фәсил бунун үчүн әла мәнбәдир. Ибрани алими Маркус Калиш јазмышды: «Бәлкә дә, бу фәсил “Лавилиләр” китабынын вә һәтта дејәрдим, Төвратын ән мәзмунлу, ән рәнҝарәнҝ вә бәлкә дә, ән ваҹиб һиссәләриндән биридир». Ҝәлин бу фәсилдән бәзи ајәләри арашдыраг вә ҝөрәк бу ајәләрдән ҝүндәлик һәјатымызла бағлы һансы дәрсләри өјрәнирик. Диггәт јетирин ки, өјрәнәҹәјимиз бу дәрсләрин һамысы «мүгәддәс олмалысыныз» сөзләриндән сонра ҝәлир.

10, 11. Лавилиләр 19-ҹу фәслин илк ајәләриндә мүгәддәс давранышын һансы јөнү вурғуланыр вә биз бу ҝөстәришә неҹә јанашмалыјыг?

¹⁰ Јеһова исраиллиләрә «мүгәддәс олмалысыныз» дејәндән сонра бу сөзләри әлавә етмишди: «Гој һәр кәс ата-анасына һөрмәт етсин... Мән сизин Аллаһыныз Јеһовајам» (Лав. 19:2, 3).

¹¹ Бәли, биз Јеһованын бујруғуна ујғун олараг, валидејнләримизә һөрмәт етмәлијик. Јадыныздадырса, бир дәфә бир ҹаван оғлан Исадан сорушмушду: «Әбәди һәјаты  алмаг үчүн мән һансы јахшы ишләри ҝөрмәлијәм?» Иса она ҹавабында диҝәр шејләрлә јанашы, ата-анасына һөрмәт етмәјин ваҹиблијини дә демишди (Мәт. 19:16—19). Иса һәтта валидејнләринә һөрмәт етмәкдән бојун гачырмаға чалышан фәрисиләри вә мирзәләри мәзәммәт етмишди. Бунунла онлар Уҹа Аллаһын сөзүнү һечә ендирирдиләр (Мәт. 15:3—6). Аллаһын сөзүнә Он әмрдән бешинҹиси, һәмчинин Лавилиләр 19:3 ајәси дахил иди (Чых. 20:12). Бир даһа фикир верин ки, Лавилиләр 19:3 ајәсиндәки ата-анаја һөрмәт етмәклә бағлы ҝөстәриш «сиз мүгәддәс олмалысыныз, чүнки Мән, Аллаһыныз Јеһова мүгәддәсәм» сөзләриндән дәрһал сонра ҝәлир.

12. Лавилиләр 19:3 ајәсиндәки мәсләһәтлә бағлы өзүмүзә һансы суалы верә биләрик?

¹² Валидејнләрә һөрмәт етмәк ҝөстәриши илә бағлы өзүмүзә нөвбәти суалы верә биләрик: «Мәндә бу саһәдә вәзијјәт неҹәдир?» Ола билсин, белә гәнаәтә ҝәлдиниз ки, валидејнләриниз үчүн даһа чох шеј едә биләрдиниз. Кечмиши дәјишмәк мүмкүн олмаса да, инди нәләрисә дәјишә биләрсиниз. Мәсәлән, онларла бирликдә даһа чох вахт кечирә биләрсиниз. Онлара мадди, руһани вә мәнәви ҹәһәтдән даһа чох дәстәк ола биләрсиниз. Бунунла сиз Лавилиләр 19:3 ајәсиндә јазылан ҝөстәришә ујғун давранмыш олаҹагсыныз.

13. а) Лавилиләр 19:3 ајәсиндә башга һансы мәсләһәт вар? б) Исадан һансы нүмунәни ҝөтүрә биләрик? (Лука 4:16—18).

¹³ Лавилиләр 19:3 ајәсиндән мүгәддәс олмагла бағлы биз башга бир шеј дә өјрәнә биләрик. Орада шәнбә ҝүнүнә риајәт етмәк бујрулур. Мәсиһиләр Мусанын гануну алтында јашамырлар. Буна ҝөрә дә биздән шәнбәјә риајәт етмәк тәләб олунмур. Бунунла белә, исраиллиләрин шәнбәјә риајәт етмәсиндән вә бунун онлара һансы фајда ҝәтирмәсиндән чох шеј өјрәнә биләрик. Шәнбә ҝүнү исраиллиләр ҝүндәлик ишләрдән истираһәт едирдиләр вә Аллаһа ибадәтә вахт ајырырдылар *. Елә буна ҝөрә дә Иса шәнбә ҝүнләри синагога ҝедирди вә Аллаһын Кәламыны охујурду (Чых. 31:12—15; Лука 4:16—18 ајәләрини охујун). Лавилиләр 19:3 ајәсиндә јазылмыш «шәнбә ҝүнүнә риајәт един» ҝөстәриши бизи тәшвиг етмәлидир ки, ҝүндәлик ишләримиздән вахт ајырыб Аллаһа ибадәтә диггәтимизи ҹәмләјәк. Ола билсин, бу саһәдә мүәјјән дәјишикликләр етмәлисиниз. Әҝәр руһани ишләрә мүнтәзәм вахт ајырсаныз, Јеһова илә ҝөзәл, јахын мүнасибәтләриниз јаранаҹаг. Бу исә мүгәддәс олмаг үчүн мүтләгдир.

14. «Лавилиләр» китабынын 19-ҹу фәсли бојунҹа һансы тәмәл һәгигәт вурғуланыр?

¹⁴ Лавилиләр 19-ҹу фәсилдә мүгәддәс олмағымыза көмәк едәҹәк тәмәл һәгигәт дәфәләрлә вурғуланыр. Дөрдүнҹү ајә бу сөзләрлә јекунлашыр: «Мән сизин Аллаһыныз Јеһовајам». Бу вә буна охшајан ифадәјә бу фәсилдә 16 дәфә раст ҝәлинир. Бу бизә Јеһованын вердији илк әмри хатырладыр: «Мән... Аллаһыныз Јеһовајам. Мәндән башга аллаһыныз олмамалыдыр» (Чых. 20:2, 3). Мүгәддәс олмаг истәјән һәр бир мәсиһи әмин олмалыдыр ки, онунла Јеһова арасына һеч ким вә һеч нә ҝирмәјиб. Үстәлик, Јеһованын Шаһиди адыны дашыдығымыз үчүн бу ада ләкә ҝәтирәҹәк һәрәкәтләрдән узаг дурмаға гәти гәрарлыјыг (Лав. 19:12; Әшј. 57:15).

15. Лавилиләр 19-ҹу фәсилдә гурбанлыгларла бағлы јазыланлар бизи нә етмәјә тәшвиг етмәлидир?

 ¹⁵ Исраиллиләр Јеһованы Аллаһлары кими гәбул етдикләрини ҝөстәрмәк үчүн Онун вердији ганунлара әмәл етмәли идиләр. Лавилиләр 18:4 ајәсиндә јазылыб: «Сиз Мәним һөкмләримә табе олмалы, Мәним ганунларыма риајәт етмәлисиниз, онлара ујғун јашамалысыныз. Мән сизин Аллаһыныз Јеһовајам». 19-ҹу фәсилдә бу ганунларын бәзиләри јазылыб. Мәсәлән, 5—8, 21 вә 22-ҹи ајәләрдә һејван гурбанлары илә бағлы ганунлар јазылыб. Исраиллиләр бу гурбанлары елә ҝәтирмәли идиләр ки, Јеһоваја мәхсус олан мүгәддәс шеји мурдарламасынлар. Бу ајәләр бизи тәшвиг етмәлидир ки, Јеһованын разылығыны газанмаға чалышаг вә Ибраниләрә 13:15 ајәсиндә бујрулдуғу кими, Она мәгбул олан мәдһ гурбанлары тәгдим едәк.

16. Јеһоваја хидмәт едәнләрлә хидмәт етмәјәнләр арасындакы фәрг бизә нәји хатырладыр?

¹⁶ Мүгәддәс олмаг үчүн биз башгаларындан фәргләнмәјә чәкинмәмәлијик, амма бу, чәтин ола биләр. Бәзән синиф јолдашларымыз, иш јолдашларымыз, иманда олмајан гоһумларымыз вә башгалары тәзјиг ҝөстәрә биләр ки, ибадәтимизә зидд ҝедән ишләрдә иштирак едәк. Бу заман биз мүһүм гәрар гаршысында галырыг. Бәс дүзҝүн гәрар вермәјимизә нә көмәк едә биләр? Лавилиләр 19:19 ајәсиндә мараглы бир принсип јазылыб: «Ики ҹүр ипликдән тохунмуш палтар ҝејинмәјин». Бу ганун исраиллиләрә көмәк едирди ки, әтраф халглардан фәргләнсинләр. Дүздүр, биз мүхтәлиф материалларын, мәсәлән, памбыгла полиефирин, јунла сүни ипәјин гарышығындан олан палтарлар ҝејинмәјә гаршы дејилик. Анҹаг әгидәләри вә әмәлләри Мүгәддәс Китаба зидд ҝедән инсанлара бәнзәмәјин әлејһинәјик. Һәтта бунлар бизим синиф јолдашларымыз, иш јолдашларымыз вә ја гоһумларымыз олса да. Дүздүр, гоһумларымыз бизә әзиздир, үстәлик, диҝәр инсанлары да севирик, амма һәјатымызын мүһүм саһәләринә ҝәлдикдә онлардан фәргли давранмаға чәкинмирик. Бу, чох ваҹиб мәсәләдир. Әҝәр биз мүгәддәс олмаға ҹан атырыгса, Аллаһ үчүн ајрылмалыјыг (2 Кор. 6:14—16; 1 Бут. 4:3, 4).

17, 18. Лавилиләр 19:23—25 ајәләриндән нә өјрәнирик?

¹⁷ «Мән сизин Аллаһыныз Јеһовајам» сөзләри исраиллиләрә хатырлатмалы иди ки, Јеһова илә мүнасибәтләрини һәјатда һәр шејдән үстүн тутмалыдырлар. Неҹә? Лавилиләр 19:23—25 ајәләриндә бунун бир јолу ҝөстәрилир. (Ајәләри охујун.) Ҝәлин ҝөрәк исраиллиләр Вәд едилмиш дијара дахил оландан сонра бу сөзләрә неҹә әмәл етмәли идиләр.  Кимсә мејвә ағаҹы әкәрдисә, үч ил онун бәһрәсиндән јемәмәли иди. Дөрдүнҹү ил ағаҹын мејвәси мүгәддәс мәканда истифадә үчүн ајрылмалы иди. Јалныз бешинҹи ил ағаҹын саһиби онун бәһрәсини јејә биләрди. Бу ганун исраиллиләрә хатырладырды ки, биринҹи өз еһтијаҹларыны дүшүнмәмәлидирләр. Исраиллиләр Јеһованын онлара рузи јетирәҹәјинә етибар етмәли идиләр вә ибадәти һәјатларында һәр шејдән үстүн тутмалы идиләр. Бунун гаршылығында Јеһова да онлары аҹ гојмајаҹагды. Һәмчинин бу ганун васитәсилә Јеһова онлары тәшвиг едирди ки, ибадәтин мәркәзи олан мүгәддәс мәканда сәхавәтлә бәхшишләр тәгдим етсинләр.

¹⁸ Лавилиләр 19:23—25 ајәләриндә јазылан ганун бизә Исанын Дағүстү вәзиндә дедији сөзләри хатырладыр: «“Нә јејәҹәјик?”, “нә ичәҹәјик?” дејә... даһа гајғы чәкмәјин». Иса сөзүнә белә давам едир: «Сизин ҝөјдәки Атаныз... бүтүн бунлара еһтијаҹ дујдуғунузу билир». Һәтта гушларын да гајғысына галан Аллаһ бизим дә гајғымыза галаҹаг (Мәт. 6:25, 26, 32). Биз инанырыг ки, Јеһова рузимизи јетирәҹәк. Биз дә башгаларына ҹар чәкмәдән ҝүҹүмүз дахилиндә еһтијаҹы оланлара әл тутуруг. Һәмчинин јығынҹагларын еһтијаҹыны өдәмәк үчүн үрәкдән ианә едирик. Бизим белә сәхавәтли олмағымыз Јеһованын нәзәриндән јајынмыр. О бизә бунун әвәзини верәҹәк (Мәт. 6:2—4). Сәхавәтли олмагла Лавилиләр 19:23—25 ајәләриндә јазыланлары баша дүшдүјүмүзү ҝөстәририк.

19. «Лавилиләр» китабынын бәзи ајәләрини арашдырмағын сизә һансы фајдасы олду?

¹⁹ Сизинлә Лавилиләр 19-ҹу фәсилдән ҹәми бир нечә ајәни нәзәрдән кечирдик вә ҝөрдүк ки, мүгәддәс Аллаһымыз Јеһоваја неҹә бәнзәјә биләрик. Јеһовадан өрнәк алараг биз һәр бир ишимиздә мүгәддәс олмаға чалышырыг (1 Бут. 1:15). Јеһоваја хидмәт етмәјән бир чох инсан бизим ҝөзәл давранышымызы ҝөрүб вә һәтта бәзиләри Јеһованы мәдһ едиб (1 Бут. 2:12). Лавилиләр 19-ҹу фәсилдән биз һәлә чох шеј өјрәнә биләрик. Нөвбәти мәгаләдә бу фәслин диҝәр ајәләрини арашдыраҹағыг вә ҝөрәҹәјик ки, һәјатымызын башга һансы саһәләриндә Бутрусун да дедији кими, мүгәддәс ола биләрик.