Јеһова исраиллиләрә мүгәддәс олмағы бујурмушду. Белә олмалары үчүн онлара демишди: «Гапы-гапы ҝәзиб ҹамааты шәрләмәјин. Һеч кимин гәсдинә дурмајын. Мән Јеһовајам» (Лав. 19:2, 16).

«Гәсдинә дурмаг» ифадәси ибрани дилиндә орижинал мәтндә јазылан фикри јахшы ифадә едир. Бәс бу ифадәнин мәнасы нәдир? «Лавилиләр» китабы илә бағлы бир јәһуди елми ишиндә дејилир: «Ајәнин бу һиссәсини изаһ етмәк чәтиндир, проблем бу ибрани ифадәсинин мәғзини там дуја билмәмәкдәдир».

Бәзи алимләрин фикринҹә, бу ифадә өнҹәки ајә илә бағлыдыр. Орада дејилир: «Әдаләтсиз һөкм чыхармајын. Нә касыбын тәрәфини сахлајын, нә дә варлыја үстүнлүк верин. Һәр кәси әдаләтлә мүһакимә един» (Лав. 19:15). Белә олан һалда, 16-ҹы ајәдәки «һеч кимин гәсдинә дурмајын» ифадәси о мәнаны верә биләр ки, Аллаһын халгы мәһкәмә ишләриндә, ишҝүзар вә ја аиләдахили мәсәләләрдә һагсызлыг етмәмәлидир. Һәмчинин исраилли өз мәнафеји үчүн фырылдагчылыға әл атмамалыдыр. Дүздүр, биз бу кими әмәлләрдән узаг олмалыјыг. Амма 16-ҹы ајәдәки ифадәни баша дүшмәјин даһа мәнтигли јолу вар.

Бу ајәнин илк сөзләринә диггәт јетирәк. Јеһова халгына бујурур ки, гапы-гапы ҝәзиб ҹамааты шәрләмәсинләр. Билдијимиз кими, гејбәт етмәк проблемләр јарадыр, амма кимисә шәрләмәк даһа бетәр фәсадлар төрәдир (Мәс. 10:19; Ваиз 10:12—14; 1 Тим. 5:11—15; Јаг. 3:6). «Шәрләмәк» сөзү мәгсәдјөнлү шәкилдә башгасынын адыны бәднам етмәк демәкдир. Һәтта, ола биләр, инсан билир ки, кимәсә шәр атса, онун һәјатыны тәһлүкәјә атаҹаг, буна рәғмән, онун һаггында јалан шаһидлик едир. Јадыныздадырса, бөһтанчы адамлар Набут һаггында јалан шаһидлик етмишдиләр вә бунун нәтиҹәсиндә Набут һагсыз јерә дашгалаг едилмишди (1 Пад. 21:8—13). Бәли, Лавилиләр 19:16 ајәсинин икинҹи һиссәсиндә дә дејилдији кими, башгасыны шәрләјән инсан онун һәјатына гәсд едир.

Бундан әлавә, ола билсин, башгасыны шәрләјән инсан буну она нифрәтдән ирәли ҝәләрәк етсин. 1 Јәһја 3:15 ајәсиндә дејилир: «Гардашына нифрәт едән гатилдир вә сиз билирсиниз ки, һеч бир гатилин әбәди һәјаты јохдур». Мараглы мәгамдыр ки, Јеһова 16-ҹы ајәдәки «һеч кимин гәсдинә дурмајын» сөзләриндән сонра «үрәјиниздә һеч кимә гаршы нифрәтиниз олмасын» сөзләрини дејир (Лав. 19:17).

Беләликлә, Лавилиләр 19:16 ајәсиндәки бу ифадә мәсиһиләрин ҹидди јанашмалы олдуғу мәсләһәтдир. Еһтијатлы олмалыјыг ки, пис фикирләрә гапылыб башгасыны шәрләмәјәк. Демәли, әҝәр кимдәнсә хошумуз ҝәлмәдији вә ја она пахыллыг етдијимиз үчүн ону шәрләјәрәк гәсдинә дуруругса, бу, һәмин инсана нифрәт етдијимиздән хәбәр верә биләр. Мәсиһиләр исә гәтијјән буна јол вермәмәлидир (Мәт. 12:36, 37).