Јеһова Адәмлә Һәвваја бујурмушду ки, төрәјиб чохалсынлар вә бүтүн јер үзүнү долдурсунлар (Јар. 1:28). Бу ҝөстәрирди ки, бүтүн дүнја нәһајәтдә ҹәннәт олаҹаг. Јер үзүнү мирас алаҹаг кәсләри дә ејни иш ҝөзләјир. Үстәлик, онлар ҹәннәти сыфырдан јарадаҹаглар, чүнки Әдән бағы артыг мөвҹуд дејил. Һәм дә инсанлар инди јери бәрбад ҝүнә гојублар, буна ҝөрә дә Армаҝеддондан сонра чохлу тәмизлик ишләри ҝөрмәк лазым ҝәләҹәк. Һәгигәтән дә, ишимиз башымыздан ашаҹаг!

Бабил әсарәтиндән гајыдан исраиллиләр дә, демәк олар ки, ејни вәзијјәтдә идиләр. Онларын јурд-јувалары 70 ил хараба галмышды. Бунунла белә, Әшија пејғәмбәр демишди ки, онлар Јеһованын көмәјилә өлкәни абадлашдыраҹаглар. О пејғәмбәрлик етмишди: «Онун сәһрасыны Әдән кими, чөлләрини Јеһованын бағы кими едәҹәк» (Әшј. 51:3). Һәгигәтән, белә дә олду. Ејнилә, Јеһова ҝәләҹәкдә инсанлара  јер үзүнү ҹәннәтә чевирмәјә көмәк едәҹәк. Сиз бу ишдә иштирак етмәк истәдијинизи индидән ҝөстәрә биләрсиниз.

Бунун бир үсулу евимизи, әтрафымызы тәмиз вә сәлигәли сахламагдыр. Бизим тәмизлијә мүнасибәтимиз башга инсанларын давранышындан асылы олмамалыдыр. Бундан башга, ибадәт евләринин вә топланты залларынын тәмизлијиндә вә тәмириндә иштирак едә биләрсиниз. Вәзијјәтиниз јол верирсә, фәлакәтләрдән зәрәрчәкәнләрә јардым етмәк үчүн бланк долдурун. Бунунла ҝөстәрәҹәксиниз ки, лазым оланда көмәк етмәјә һазырсыныз. Өзүнүздән сорушун: «Индидән һансы баҹарыглара јијәләним ки, Јеһова мәнә ҹәннәтдә јашамағы нәсиб етсә, онлардан истифадә едим?»

Иса Јаирин гызыны дирилдән кими деди ки, она јемәјә нәсә версинләр (Марк 5:42, 43). Сөзсүз, 12 јашлы гызы једиздирмәк чәтин дејилди. Инди тәсәввүр един: Иса демишди ки, ҝәләҹәкдә «гәбирләрдә оланларын һамысы онун сәсини ешидиб гәбирләриндән чыхаҹаг» (Јәһ. 5:28, 29). Мүгәддәс Китабда тәфәррүатлар гејд олунмаса да, биз баша дүшүрүк ки, дирилән инсанлары гида, ев вә ҝејимлә тәмин етмәк лазым ҝәләҹәк. Тәсәввүр едирсиниз, биз нә гәдәр иш ҝөрмәли олаҹағыг? Көмәјә һазыр олдуғунузу индидән ҝөстәрә биләрсиниз. Ҝәлин ҝөрәк неҹә.

Рајон нәзарәтчиси јығынҹағынызы зијарәт едәндә ону наһара дәвәт етмәк истәјинизи билдирә биләрсиниз. Хүсуси тамвахтлы хидмәтчиләр Бејтелдән саһәјә тәјин олунанда вә ја рајон нәзарәтчиси сәјјар хидмәти баша вуранда онлара ев тапмаға көмәк един. Сизин әразиниздә реҝионал вә хүсуси топланты кечириләндә топлантыдан әввәл вә сонра ҝөрүлән ишләрдә иштирак един вә ја гонаглары гаршылајын.

Һәвариләрин ишләри 24:15 ајәсинә әсасән, милјардларла инсан дириләҹәк. Онларын әксәријјәтинин Јеһованы танымаг имканы олмајыб. Дириләндә исә онларын белә имканы олаҹаг a. Аллаһын садиг хидмәтчиләри бу саһәдә онлара көмәк едәҹәк (Әшј. 11:9). Авропа, Ҹәнуби Америка вә Африкада хидмәт етмиш Шарлот адлы баҹы һәмин дөврү һәсрәтлә ҝөзләјир. О дејир: «Дириләнләрә тәлим верәҹәјим ҝүнү сәбирсизликлә ҝөзләјирәм. Кечмишдә јашајан кимсә һагда охујанда тез-тез дүшүнүрәм: “Каш о, Јеһованы таныјарды, онда һәјаты тамам башга ҹүр оларды”. Дириләнләри ҝөрмәји, онлара Јеһова һагда данышмағы сәбирсизликлә ҝөзләјирәм».

Иса јер үзүнә ҝәлмәздән өнҹә јашамыш мөмин инсанлар да чох шеј өјрәнмәли олаҹаглар. Мәсәлән, Дәнјала гәләмә алдығы, амма баша дүшмәдији пејғәмбәрликләри изаһ едәҹәјик (Дән. 12:8). Рутла Наимәјә Мәсиһин нәсил шәҹәрәсиндә һансы ролу ојнадығыны данышаҹағыг. Бизә о вахт инсанлара дәрс кечмәјә һеч нә мане олмајаҹаг, нә кимсә бизә тәзјиг ҝөстәрәҹәк, нә дә Шејтан дүнјасы диггәтимизи јајындыраҹаг. Дүнјанын дөрд бир јанында ҝедән тәлим ишиндә иштирак етмәкдән бөјүк зөвг дујаҹағыг.

Бу тәлим ишиндә иштирак етмәјә һазыр олдуғунузу неҹә ҝөстәрә биләрсиниз? Бунун бир јолу тәблиғ ишиндә пүхтәләшмәк вә бу ишдә мүнтәзәм иштирак етмәкдир (Мәт. 24:14). Һал-һазырда јашымыза вә ја диҝәр сәбәбләрә ҝөрә үрәјимиз истәјән гәдәр тәблиғ едә билмәсәк дә, әлимиздән ҝәләни етмәјимиз ҝөстәрәҹәк ки, биз дириләнләрә дәрс кечмәјә һазырыг.

Нөвбәти суаллар үзәриндә дүшүнмәк чох ваҹибдир: «Јери мирас алаҹағыныз ҝүнү ҝөзләјирсиниз? Јерә саһиб олмағы, дириләнләри евлә тәмин етмәји вә онлара тәлим вермәји арзулајырсыныз?» Ҝәлин индидән һәр фүрсәтдән истифадә едәрәк јухарыда садаланан ишләри ҝөрәк. Бунунла ҝөстәрәҹәјик ки, јери мирас аланда буна бәнзәр ишләри ҝөрмәјә һазырыг!