1. Иса Мәсиһ өлүм ајағында оларкән јанындакы ҹинајәткара нә деди? (Лука 23:39—43).

 ИСА вә онун јанындакы ики ҹинајәткар өлүм ајағында идиләр (Лука 23:32, 33). Онларын икиси дә әввәл-әввәл Исаны тәһгир едирди. Бу, ону ҝөстәрир ки, онлар Исанын шаҝирди дејилдиләр (Мәт. 27:44; Марк 15:32). Лакин бу ҹинајәткарлардан бири она мүнасибәтини дәјишди вә белә деди: «Иса, Падшаһлығына ҝәләндә мәни јада сал». Иса она ҹаваб верди: «Буну бил: сән мәнимлә Ҹәннәтдә олаҹагсан!» (Лука 23:39—43 ајәләрини охујун.) Һеч бир јердә дејилмир ки, һәмин ҹинајәткар Иса Мәсиһин тәблиғ етдији сәмави Падшаһлыг һагда хәбәри гәбул етмишди. Һеч Иса да демәди ки, һәмин киши онунла бирликдә Падшаһлыгда идарә едәҹәк (Мәт. 4:17). Иса ҝәләҹәкдә јер үзүндә олаҹаг Ҹәннәтдән данышырды. Ҝәлин ҝөрәк буну һарадан билирик.

2. Нәјә әсасән дејә биләрик ки, Исаја иман ҝәтирән ҹинајәткар јәһуди иди?

² Исаја иман едән ҹинајәткар, чох ҝүман ки, јәһуди иди. Һәмин ҹинајәткар диҝәринә белә демишди: «Сән һеч Аллаһдан горхмурсан? Ахы өзүн дә ејни ҹәзаны чәкирсән» (Лука 23:40). Јәһудиләр бир Аллаһа ибадәт едирдиләр, башга халглар исә чохлу аллаһлара (Чых. 20:2, 3; 1 Кор. 8:5, 6). Әҝәр һәмин ҹинајәткарлар башга халглардан олсајдылар, онда о, суалы белә верәрди: «Сән һеч аллаһлардан горхмурсан?» Үстәлик, Иса гејри-јәһудиләрә тәблиғ етмирди, чүнки о, «Исраил евинин итмиш гојунларынын јанына» ҝөндәрилмишди (Мәт. 15:24). Аллаһ исраиллиләрә билдирмишди ки, өлүләр дириләҹәк. Јәгин, һәмин ҹинајәткар буну билирди. Онун сөзләриндән ҝөрүнүр ки, о, Исанын дириләҹәјинә вә падшаһ олаҹағына инанырды. Ҝөрүнүр, һәмин ҹинајәткар Аллаһын ону да дирилдәҹәјинә үмид едирди.

3. Иса Ҹәннәтдән данышанда чох еһтимал ки, ҹинајәткар нә барәдә дүшүнмүшдү? Изаһ един (Јарадылыш 2:15).

 ³ Исаја иман ҝәтирән ҹинајәткар јәһуди олдуғу үчүн Адәмлә Һәвва һаггында вә Јеһованын онлар үчүн јаратдығы ҹәннәт барәдә ешитмишди. Буна ҝөрә дә Иса она ҹәннәт барәдә данышанда, јәгин, о баша дүшүрдү ки, сөһбәт Ҹәннәтә чеврилмиш Јер күрәсиндән ҝедир. (Јарадылыш 2:15 ајәсини охујун.)

4. Исанын ҹинајәткара дедији сөзләр бизи нә барәдә дүшүндүрүр?

⁴ Исанын ҹинајәткара дедији сөзләри охујанда истәр-истәмәз Ҹәннәтдә һәјатын неҹә олаҹағы барәдә дүшүнүрүк. Јәгин, јадыныздадыр, Сүлејман падшаһын һакимијјәти дөврүндә өлкәдә сүлһ, әмин-аманлыг һөкм сүрүрдү. Инди ҝөрүн Сүлејмандан даһа бөјүк олан Иса Мәсиһ һәмварисләри илә бирҝә һакимијјәт сүрәндә дүнја неҹә мөһтәшәм олаҹаг (Мәт. 12:42). Тәбии ки, «башга гојунлар» бу һәјаты сәбирсизликлә ҝөзләјирләр вә онлар баша дүшүрләр ки, Ҹәннәтдә әбәдијјән јашамаг үчүн мүәјјән тәләбләрә ҹаваб вермәлидирләр (Јәһ. 10:16).

5. Ҹәннәти неҹә тәсәввүр едирсиниз?

⁵ Ҹәннәти неҹә тәсәввүр едирсиниз? Бәлкә дә, Ҹәннәт дејәндә ҝөзүнүзүн габағында Әдән кими ҝөзәл бир бағ ҹанланыр (Јар. 2:7—9). Јахуд да Микәнин дедији пејғәмбәрлик јадыныза дүшүр. О јазмышды: «Һәр кәс өз мејнәсинин, өз әнҹир ағаҹынын алтында отураҹаг» (Мик. 4:3, 4). Бәлкә дә, гида боллуғунун олаҹағы илә бағлы ајәләри хатырлајырсыныз (Зәб. 72:16; Әшј. 65:21, 22). Инди исә өзүнүзү һәмин бағда тәсәввүр един. Бурада бөјүк бир сүфрә ачылыб. Масанын үзәриндә бир-бириндән ләзиз тәамлар вар. Чичәкләрин әтри аләми бүрүјүб. Достларынызын, доғмаларынызын ҝүлүш сәсләрини ешидирсиниз. Бәлкә дә, онларын арасында еләләри вар ки, тәзәликҹә дирилибләр. Бүтүн бунлар хүлја дејил. Һәјат белә олаҹаг. Бунунла јанашы, бизим мараглы ишимиз дә олаҹаг.

6. Ҹәннәтдә нә ишлә мәшғул олаҹағыг? (Шәклә бахын.)

⁶ Јеһова бизи елә јарадыб ки, биз ишләјәк вә әлимизин зәһмәтиндән зөвг алаг (Ваиз 2:24). Хүсусилә, Мәсиһин миниллик һакимијјәти дөврүндә ишимиз чох олаҹаг. Бөјүк мүсибәтдән сағ чыханлара, еләҹә дә дирилән милјонларла инсана јемәк, ҝејим, ев лазым олаҹаг. Бүтүн бунлары әрсәјә ҝәтирмәк үчүн чох ишләјәҹәјик. Неҹә ки Адәмлә Һәвва јашадыглары бағы беҹәрмәли идиләр, биз дә бүтүн Јер күрәсини Ҹәннәтә чевирмәк үчүн чох чалышаҹағыг. Үстәлик, дириләнләрин арасында Јеһованы танымајан, Онун нијјәти барәдә  һеч нә билмәјән милјонларла инсан олаҹаг. Һәм онлара, һәм дә Исадан әввәл јашамыш мөмин инсанлара тәлим вермәк неҹә дә хош олаҹаг!

7. Нәјә әмин ола биләрик вә нә үчүн?

⁷ Әмин ола биләрик ки, Ҹәннәтдә сүлһ, фираванлыг, низам-интизам олаҹаг. Нәјә әсасән белә дејә биләрик? Чүнки Јеһова артыг бизә Мәсиһин рәһбәрлији алтында һәјатын неҹә олаҹағыны бир нүмунә әсасында ҝөстәриб. Һәмин нүмунә Сүлејман падшаһын һакимијјәти дөврүдүр.

8. Зәбур 37:10, 11, 29 ајәләри кечмишдә неҹә јеринә јетди? (Бу сајда олан «Охуҹуларын суаллары» рубрикасына бахын.)

⁸ Јеһова Давуд падшаһа әјан етмишди ки, ҝәләҹәкдә садиг вә ағыллы падшаһ тахта чыханда һәјат неҹә олаҹаг. (Зәбур 37:10, 11, 29 ајәләрини охујун.) Биз чох вахт ҝәләҹәк Ҹәннәт барәдә данышанда Зәбур 37:11 ајәсини охујуруг. Бу, јериндәдир, чүнки Иса өзү дә вәз едәркән бу ајәдән ситат ҝәтирмишди (Мәт. 5:5). Беләҹә, бу сөзләрин ҝәләҹәкдә дә јеринә јетәҹәјини ҝөстәрмишди. Амма Давудун сөзләри һәмчинин Сүлејман падшаһын дөврүндәки һәјата да аид иди. Һәмин дөврдә сүд вә бал ахан дијарда Аллаһын халгы сүлһ вә фираванлыг ичиндә јашајырды. Аллаһ демишди: «Әҝәр ганунларымла отуруб-дурсаныз,.. өлкәнизә әмин-аманлыг верәҹәјәм, ҝеҹәни раһат јатаҹагсыныз, сизи горхудан олмајаҹаг» (Лав. 20:24; 26:3, 6). Бу вәдләр Сүлејманын падшаһлыг етдији дөврдә һәјата кечди (1 Салн. 22:9; 29:26—28). Һәмчинин Јеһованын вәдинә әсасән, өлкәдән писләрин көкү кәсилә биләрди (Зәб. 37:10). Демәли, Зәбур 37:10, 11, 29 ајәләри һәм гәдимдә јеринә јетди, һәм дә ҝәләҹәкдә јеринә јетәҹәк.

9. Сәба мәликәси Сүлејман падшаһын һакимијјәти барәдә нә демишди?

⁹ Сүлејманын һакимијјәти дөврүндә олан сүлһ вә әмин-аманлығын сорағы Сәба мәликәсинә дә ҝәлиб чатмышды. О, һәр шеји өз ҝөзү илә ҝөрмәк үчүн узаг дијардан Јерусәлимә ҝәлмишди (1 Пад. 10:1).  Сүлејман падшаһын сәлтәнәтиндәки шәраити ҝөрәндә демишди: «Сән демә, мәнә ҝөрдүкләримин һеч јарысыны да данышмајыблар... Бәхтәвәр сәнин һүзурунда дуруб һикмәтини динләјән адамларын, әјанларынын башына!» (1 Пад. 10:6—8). Лакин бүтүн бунлар Исанын һакимијјәти дөврүндә Јеһованын бәшәријјәт үчүн едәҹәји ишләрин кичик бир нүмунәсидир.

10. Иса һансы саһәләрдә Сүлејмандан үстүндүр?

¹⁰ Иса Сүлејмандан һәр саһәдә үстүндүр. Сүлејман гејри-камил иди, ҹидди ҝүнаһлар ишләмишди. Онун уҹбатындан Аллаһын халгынын башына мин ҹүр бәла ҝәлди. Ондан фәргли олараг Иса камил Рәһбәрдир, һеч вахт сәһв етмир (Лука 1:32; Ибр. 4:14, 15). Иса Шејтанын ән ағыр сынагларындан белә башыуҹа чыхмышды. О сүбут едиб ки, һеч вахт ҝүнаһ ишләмәјәҹәк вә садиг тәбәәләринин зәрәринә һеч бир шеј етмәјәҹәк. Биз хошбәхтик ки, белә бир Падшаһымыз вар.

11. Исаја кимләр көмәк едәҹәк?

¹¹ Иса 144 000 һәмвариси илә чијин-чијинә чалышараг бәшәријјәтин гајғысына галаҹаг вә Јеһованын јерлә бағлы нијјәтини һәјата кечирәҹәк (Вәһј 14:1—3). Бу 144 000 нәфәр јер үзүндә јашамыш киши вә гадынлардан сечилиб. Онлар да чохлу чәтинликләрлә үзләшибләр, буна ҝөрә дә инсанлара шәфгәтлә јанаша биләҹәкләр. Бәс онлар һансы ишләри ҝөрәҹәкләр?

12. Јеһова 144 000 нәфәрә һансы иши һәвалә едәҹәк?

¹² Иса вә онун һәмварисләринә Сүлејмандан гат-гат бөјүк ишләр һәвалә олунуб. Сүлејман јалныз бир өлкәдәки милјонларла инсанын рифаһы үчүн чалышырды. Аллаһын Падшаһлығында идарә едән кәсләр исә јер үзүндә јашајан милјардларла инсанын гајғысына галаҹаглар. Ҝөрүн Јеһова 144 000 нәфәрә неҹә бөјүк етимад ҝөстәриб!

13. Исанын һәмварисләринин үзәринә һансы шәрәфли иш дүшәҹәк?

¹³ Иса кими 144 000 нәфәр дә падшаһ вә каһин олаҹаг (Вәһј 5:10). Мусанын ганунуна ујғун олараг, инсанлара һәм сағламлыгларыны, һәм дә Јеһова илә мүнасибәтләрини горумаға әсас етибарилә каһинләр көмәк етмәли идиләр. Ганун ҝәләҹәк немәтләрин көлҝәси иди (Ибр. 10:1). Демәли, Исанын һәмварисләри дә бәшәријјәтә сағламлыгларыны вә Аллаһла мүнасибәтләрини горумаға көмәк едәҹәкләр. Ҝөрәсән, бу падшаһлар вә каһинләр јер үзүндәки инсанларла неҹә үнсијјәт гураҹаглар? Билмирик, бизә садәҹә ҝөзләмәк галыр. Јәгин ки, Јеһова бунунла бағлы һансыса тәдбир ҝөрәҹәк вә јер үзүндәки инсанлар лазыми ҝөстәришләр алаҹаглар (Вәһј 21:3, 4).

14. «Башга гојунлар»ла «кичик сүрү» арасында һансы мүнасибәт вар?

¹⁴ Иса Мәсиһ онунла һакимијјәт сүрәҹәк кәсләри «кичик сүрү» адландырмышды (Лука 12:32). О һәмчинин икинҹи групдан, «башга гојунлар»дан да сөз ачмышды. Бу ики груп бир сүрүдә бирләшиб (Јәһ. 10:16). Онлар артыг индидән чијин-чијинә чалышырлар вә јер үзү Ҹәннәтә чевриләндә дә бу әмәкдашлыға давам едәҹәкләр. О вахт артыг «кичик сүрү» ҝөјдә олаҹаг, «башга гојунлар»ын исә јер үзүндә әбәди јашамаг имканы олаҹаг. Амма Ҹәннәтдә јашамаг үчүн «башга гојунлар»  индидән мүәјјән тәләбләрә ҹаваб вермәлидирләр.

15. а) «Башга гојунлар» Мәсиһин гардашлары илә неҹә әмәкдашлыг едирләр? б) Шәкилдәки гардашдан һансы нүмунәни ҝөтүрүрсүнүз?

¹⁵ Исаја иман ҝәтирән ҹинајәткар өлүм ајағында иди. Буна ҝөрә дә онун имканы олмады ки, Исаја олан миннәтдарлығыны әмәлләриндә ҝөстәрсин. Нә јахшы ки «башга гојунлар»ын белә бир имканы вар. Мәсәлән, биз Исаја олан севҝимизи онун мәсһ олунмуш гардашларына мүнасибәтимизлә ҝөстәрә биләрик. Иса демишди ки, о мәһз бунун әсасында инсанлара һөкм чыхараҹаг (Мәт. 25:31—40). Биз тәблиғ вә шаҝирд һазырламаг ишиндә фәал иштирак етмәклә Мәсиһин гардашларыны дәстәкләјә биләрик (Мәт. 28:18—20). Буна ҝөрә дә тәлим вәсаитләриндән, мәсәлән, «Әбәди хошбәхт һәјат!» китабындан мәһарәтлә истифадә етмәји баҹармалыјыг. Ола билсин, һәлә дә һеч кимлә Мүгәддәс Китаб дәрси кечмирсиниз. Онда гаршыныза мәгсәд гојун ки, даһа чох инсана Мүгәддәс Китаб дәрси кечмәји тәклиф едәсиниз.

16. Аллаһын Падшаһлығынын тәбәәси олмаг үчүн индидән нә едә биләрик?

¹⁶ Јеһованын бәјәндији инсан олмаг үчүн Ҹәннәтин ҝәлмәјини ҝөзләмәк лазым дејил. Елә индидән данышығымызда вә әмәлләримиздә дүрүст олмаға чалышмалыјыг. Һәр шејдә һәдди билмәлијик. Јеһоваја, һәјат јолдашымыза вә диндашларымыза вәфалы олмалыјыг. Бу шәр дүнјада Јеһованын ганунларына нә гәдәр чох әмәл етмәјә чалышсаг, Ҹәннәтдә бу ганунларла јашамаг бир о гәдәр асан олаҹаг. Биз һәмчинин индидән елә баҹарыг вә хүсусијјәтләрә јијәләнмәлијик ки, Ҹәннәтдә јашамаға һазырлашдығымыз ҝөрүнсүн. Бу сајда јерләшән «Јери мирас алмаға һазырсыныз?» адлы мәгаләјә бахын.

17. Кечмиш ҝүнаһларымыза ҝөрә виҹдан әзабы чәкмәлијик? Изаһ един.

¹⁷ Ола билсин, кечмишдә етдијимиз ҹидди ҝүнаһлара ҝөрә виҹдан әзабы чәкирик. Амма чалышмалыјыг ки, бу һиссдән јаха гуртараг. Диҝәр тәрәфдән фикирләшмәмәлијик ки, фидјә билә-билә ишләнән ҝүнаһлары јујаҹаг (Ибр. 10:26—31). Әҝәр  биз ҝүнаһларымыздан төвбә етмишиксә, көмәк үчүн Јеһоваја үз тутмушугса вә давранышымызы дәјишмишиксә, әмин ола биләрик ки, Јеһова бизи ҹомәрдликлә әфв едир (Әшј. 55:7; Һәв. 3:19). Јадыныздадырса, Иса фәрисиләрә демишди: «Мән салеһләри јох, ҝүнаһлы адамлары чағырмаға ҝәлмишәм» (Мәт. 9:13). Исанын фидјә гурбанлығы бизим бүтүн ҝүнаһларымызы јумаға гадирдир.

18. Исанын јанындакы ҹинајәткарла нә барәдә данышмаг истәјәрдиниз?

¹⁸ Тәсәввүр един ки, Ҹәннәтдәсиниз. Һәмин ҹинајәткарла сөһбәт едирсиниз. Икинизин дә үрәји Исанын фидјә гурбанлығына ҝөрә миннәтдарлыгла ашыб-дашыр. Ондан хаһиш едирсиниз ки, Исанын јер үзүндәки һәјатынын сон саатлары барәдә бир аз данышсын. Јахуд сорушурсунуз ки, Иса онун хаһишинә ҹаваб верәндә һансы һиссләри кечирмишди. О да сиздән сорушур ки, Шејтан дүнјасынын сонунда һәјат неҹә иди. Ҹәннәтдә белә инсанлара Аллаһын Кәламыны өјрәтмәк чох мараглы олаҹаг! (Ефес. 4:22—24).

19. Ҹәннәтдә һәјат дарыхдырыҹы олаҹаг? (Үз габығындакы шәклә бахын.)

¹⁹ Ҹәннәтдә һәјат дарыхдырыҹы олмајаҹаг. Һәмишә мараглы инсанларла таныш олаҹағыг. Мәналы ишимиз олаҹаг. Ән әсасы, сәмави Атамызы һәр ҝүн бир аз да јахындан таныјаҹағыг. Онун вердији немәтләрдән һәзз алаҹағыг. Јеһова һаггында өјрәндикҹә өјрәнәҹәјик, бунун сону олмајаҹаг. Елә јаратдыглары барәдә дә нә гәдәр өјрәнсәк, аз олаҹаг. Илләр өтдүкҹә Аллаһа мәһәббәтимиз даһа да артаҹаг. Бәли, Ҹәннәтдә әбәди јашамаг бизә зөвг верәҹәк. Белә ҝөзәл вәдә ҝөрә Јеһова Аллаһа вә Иса Мәсиһә шүкүрләр олсун!