1. Јеһованын вәди барәдә дүшүнәндә һансы һиссләри кечирирсиниз?

 «ӘБӘДИ ҺӘЈАТ». Јеһоваја итаәт едән кәсләри ҝәләҹәкдә мәһз белә һәјат ҝөзләјир. Бу, Јеһованын вәдидир (Ром. 6:23). Бу һагда дүшүнәндә Јеһоваја мәһәббәтимиз даһа да артыр. Ҝөрүн сәмави Атамыз бизи нә гәдәр севир ки, бизә белә бир немәт вәд едир. О истәмир ки, биз Ондан ајрылаг.

2. Әбәди һәјат үмиди бизә неҹә көмәк едир?

² Әбәди һәјат үмиди бизә инди үзләшдијимиз сынаглара дөзмәјә көмәк едир. Һәтта дүшмәнләримиз бизи өлүмлә һәдәләсәләр дә, имандан дөнмүрүк. Чүнки билирик ки, өләнәдәк Јеһоваја садиг галсаг, О бизи дирилдәҹәк вә әбәди јашамаг имканымыз олаҹаг (Јәһ. 5:28, 29; 1 Кор. 15:55—58; Ибр. 2:15). Бәс нәјә ҝөрә әмин ола биләрик ки, әбәди јашамаг мүмкүндүр? Ҝәлин бәзи сәбәбләри арашдыраг.

3. Нәјә ҝөрә әмин ола биләрик ки, Јеһова бизи әбәди јашатмаға гадирдир? (Зәбур 102:12, 24, 27).

³ Јеһова бизи әбәди јашатмаға гадирдир. Чүнки О, һәјат Мәнбәјидир вә Өзү дә әбәди јашајыр (Зәб. 36:9). Јеһова Аллаһ һәмишә вар олуб вә олаҹаг. Ҝәлин буну тәсдиг едән бир нечә ајәјә бахаг. Зәбур 90:2 ајәсиндә Јеһова һагда дејилир: «Әзәлдән әбәдијјәтә Аллаһ Сәнсән». 102-ҹи мәзмурда да ејни фикир јазылыб. (Зәбур 102:12, 24, 27 ајәләрини  охујун.) Һәмчинин ҝөрүн Һәбгуг пејғәмбәр сәмави Атамыз һаггында нә демишди: «Еј Јеһова, ахы Сән әзәлдән варсан, Пәрвәрдиҝара, еј Мүгәддәс Аллаһым, Сән өлмәзсән!» (Һәб. 1:12).

4. Јеһованын һәмишә вар олдуғуну баша дүшмәдијимизә ҝөрә нараһат олмалыјыг? Изаһ един.

⁴ Јеһованын «әбәдијјән» вар олдуғуну дәрк етмәк, бәлкә дә, сизә чәтин ҝәлир (Әшј. 40:28). Анҹаг сиз тәк дејилсиниз, буну баша дүшмәк чохларына чәтиндир. Мәсәлән, Әлиһу Аллаһ барәдә демишди ки, Онун «илләри дәркедилмәздир» (Әјј. 36:26). Амма биз нәјисә дәрк етмириксә, бу, о демәк дејил ки, о, һәгигәт дејил. Мәсәлән, ишығын нә олдуғуну там гавраја билмирик. Инди бу, о демәкдир ки, ишыг мөвҹуд дејил? Әлбәттә ки, јох. Јеһованын һәмишә вар олдуғу вә вар олаҹағыны да инсан зәкасы там дәрк етмәјә гадир дејил. Амма бу, о демәк дејил ки, Аллаһ әбәди дејил. Биз баша дүшсәк дә, дүшмәсәк дә бу, һәгигәтдир (Ром. 11:33—36). Каинат, ҝүнәш вә улдузлар мөвҹуд олмаздан әввәл Аллаһ вар иди. Биз әминик ки, «Одур јери гүдрәти илә хәлг едән». Бәли, ҝөјләр јаранмаздан әввәл О, мөвҹуд иди (Әрм. 51:15; Һәв. 17:24). Бәс башга һансы сәбәбә ҝөрә әмин ола биләрик ки, әбәди јашамағымыз мүмкүндүр?

5. Адәмлә Һәвванын һансы имканы вар иди?

⁵ Јеһованын јер үзүндә јаратдығы бүтүн ҹанлы варлыглар әввәл-ахыр өлмәли иди. Амма бу, инсана аид дејилди. Јеһова инсанларын гаршысында һеч вахт өлмәмәк имканы ачмышды. Амма бир шәртлә. О, Адәмә хәбәрдарлыг етмишди: «Хејирлә шәри билмә ағаҹынын мејвәсиндән јемә, чүнки ондан јејән ҝүн һөкмән өләҹәксән» (Јар. 2:17). Адәмлә Һәвва Јеһоваја итаәт етсәјдиләр, һеч вахт өлмәјәҹәкдиләр. Ајдын мәсәләдир ки, Јеһова онлара нә вахтса «һәјат ағаҹынын мејвәсиндән» јемәјә изин верәҹәкди. Бу да онларын әбәди јашајаҹағына зәманәт олаҹагды b (Јар. 3:22).

6, 7. а) Инсанларын өлмәк үчүн јарадылмадығыны ҝөстәрән даһа һансы сүбутлар вар? б) Сиз Ҹәннәтдә нә етмәји арзулајырсыныз? (Шәкилләрә бахын.)

⁶ Бәзи алимләр елми сүбутлара әсасланараг дејирләр ки, бејин инсанын өмрү боју әлдә етдији мәлуматдан гат-гат артығыны јадда сахламаға гадирдир. 2010-ҹу илдә дәрҹ олунан бир журналда гејд олунмушду ки, инсан бејнинин тәхминән 2,5 милјон ҝигабајт јаддашы вар. Бу, 3 милјон  саат вә ја 300 илдән чох давам едән телевизија верилишинә бәрабәрдир («Scientific American Mind»). Реаллыгда исә бу рәгәмләр гат-гат чох ола биләр. Демәли, Јеһова бизим бејнимизи садәҹә 70—80 иллик мәлуматы јадда сахламаг үчүн јаратмајыб (Зәб. 90:10).

⁷ Инсанларын үрәји һәјат ешги илә дөјүнүр, чүнки Јеһова инсаны белә јарадыб. Мүгәддәс Китабда дејилир ки, Јеһова инсанларын үрәјинә әбәдијјәт гојуб (Ваиз 3:11). Елә буна ҝөрә дә биз өлүмә дүшмән кими бахырыг (1 Кор. 15:26). Адәтән адам ҹидди хәстәлијә тутуланда нә едир? Вәзијјәтлә барышыб өлүмүнү ҝөзләјир? Әлбәттә ки, јох. О, һәкимә ҝедир, дава-дәрман гәбул едир ки, шәфа тапсын, өлмәсин. Јахуд ҝәнҹ, јашлы олмасындан асылы олмајараг, адамын доғмасы вәфат едәндә адамын үрәји ган ағлајыр, узун мүддәт өзүнә ҝәлә билмир (Јәһ. 11:32—34). Мәҝәр Јеһова инсаны әбәдијјән јашатмаг фикриндә олмасајды, онун үрәјинә һәјат ешги гојарды? Она белә мөһтәшәм бејин верәрди? Амма инсанын әбәдијјән јашајаҹағыны сүбут едән башга дәлилләр дә вар. Бу, Јеһованын кечмишдә вә һазырда ҝөрдүјү ишләрдир. Ҝәлин онлардан бәзиләрини нәзәрдән кечирәк вә ҝөрәк нәјә ҝөрә әмин ола биләрик ки, Јеһова илк нијјәтиндән дөнмәјиб.

8. Әшија 55:11 ајәсиндән нә өјрәнирик?

⁸ Адәмлә Һәвва ҝүнаһ едиб, өлүмү өвладларына өтүрсә дә, Јеһова нијјәтиндән дөнмәди. (Әшија 55:11 ајәсини охујун.) О һәлә дә садиг инсанлара  әбәди һәјат вермәк фикриндәдир. Буну һарадан билирик? Јеһованын дедији вә етдији шејләрдән. Ҝәлин онлары арашдыраг.

9. Аллаһ нә вәд едиб? (Дәнјал 12:2, 13).

⁹ Јеһова вәд едир ки, өлүләри дирилдәҹәк вә онлара әбәди јашамаг имканы верәҹәк (Һәв. 24:15; Тит. 1:1, 2). Мөмин инсан олан Әјјуб әмин иди: Јеһова өлүләри дирилтмәји һәсрәтлә ҝөзләјир (Әјј. 14:14, 15). Дәнјал пејғәмбәрә дә мәлум иди ки, өлүләр дириләҹәк вә онларын әбәди јашамаг имканы олаҹаг (Зәб. 37:29; Дәнјал 12:2, 13 ајәләрини охујун). Һәмчинин Исанын дөврүндә јашајан јәһудиләр билирдиләр ки, Јеһова садиг бәндәләринә «әбәди һәјат» бәхш едәҹәк (Лука 10:25; 18:18). Иса да бу вәд барәдә дәфәләрлә данышмышды. Үстәлик, елә онун өзү дә өләндә Атасы ону дирилтмишди (Мәт. 19:29; 22:31, 32; Лука 18:30; Јәһ. 11:25).

10. Гәдимдә өлүләрин дирилмәси нәји сүбут едир? (Шәклә бахын.)

¹⁰ Јеһова һәјат Мәнбәјидир вә өлән инсанлары һәјата гајтармаға гадирдир. Јеһованын вердији ҝүҹлә Илјас пејғәмбәр Сарфатда јашајан дул гадынын оғлуну дирилтмишди (1 Пад. 17:21—23). Сонралар Әлјәсә пејғәмбәр Аллаһын көмәјилә шунамлы гадынын оғлуну һәјата гајтармышды (2 Пад. 4:18—20, 34—37). Мүгәддәс Китабда башга өлүләрин дә дирилмәси барәдә јазылыб. Бүтүн бу һадисәләр сүбут едир ки, Јеһова өлүләри дирилтмәјә гадирдир. Иса Мәсиһ јер үзүндә оланда сүбут етмишди ки, Аллаһ она өлүләри дирилтмәк сәлаһијјәти вериб (Јәһ. 11:23—25, 43, 44). Һал-һазырда Иса ҝөјдәдир. «Ҝөјдә вә јердә бүтүн һакимијјәт» она верилиб. Буна ҝөрә дә о, «гәбирләрдә оланларын һамысы»ны һәјата гајтармаға гадирдир. Үстәлик, дириләнләрин әбәди јашамаг үмиди олаҹаг (Мәт. 28:18; Јәһ. 5:25—29).

11. Аллаһ әбәди јашамағымыз үчүн нә етди?

¹¹ Јеһова нәјә ҝөрә севимли Оғлунун, Иса Мәсиһин ишҝәнҹә илә өлдүрүлмәсинә изин верди? Иса өзү бунун сәбәбини белә изаһ етмишди: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:16). Аллаһ инсанларын ҝүнаһыны јумаг үчүн Оғлуну фидјә гурбаны олараг тәгдим етди. Бунунла да инсанларын гаршысында әбәди јашамаг имканы ачды (Мәт. 20:28). Һәвари Булус бу ваҹиб мәгамы белә изаһ етмишди: «Өлүм инсан васитәсилә ҝәлдији кими, өлүләрин дирилмәси дә инсан васитәсиләдир. Неҹә ки Адәмин уҹбатындан һамы өлүр, Мәсиһин сајәсиндә дә һамы һәјата говушаҹаг» (1 Кор. 15:21, 22).

12. Јеһова Өз нијјәтини неҹә һәјата кечирәҹәк?

¹² Иса давамчыларына өјрәдирди ки, Аллаһын Падшаһлығынын ҝәлмәси вә Аллаһын ирадәсинин јер үзүндә јеринә јетмәси барәдә дуа етсинләр (Мәт. 6:9, 10). Аллаһын ирадәсинә инсанларын јер үзүндә әбәди јашамағы да дахилдир. Буну јеринә јетирмәк үчүн Јеһова Оғлуну Падшаһ тәјин едиб. Үстәлик, Јеһова бу ишдә Исаја көмәк етмәк үчүн биринҹи әсрдән бәри јер үзүндән 144 000 нәфәр дә сечир (Вәһј 5:9, 10).

13. Јеһова бу ҝүн нә едир вә бизим өһдәмизә нә дүшүр?

¹³ Һазырда Јеһова бөјүк издиһамы топлајыр вә онлара Падшаһлығын һакимијјәти алтында јашамағы өјрәдир (Вәһј 7:9, 10; Јаг. 2:8). Бу ҝүн дүнја парчаланыб. Инсанлар бир-биринә нифрәт едир, бир-бири илә  мүһарибә едир. Анҹаг Јеһованын сечдији кәсләр үрәкләриндән һәр ҹүр нифрәти силиб атмаға чалышырлар. Онлар артыг индидән мәҹази мәнада «гылынҹларындан ҝаваһын» дүзәлдирләр (Мик. 4:3). Милјонларла инсанын ганына баис олан мүһарибәләрдә иштирак етмирләр. Әксинә, инсанлара әсл һәјаты тапмаға көмәк едирләр, јәни онлара Јеһова Аллаһ һаггында, Онун нијјәтләри барәдә өјрәдирләр (1 Тим. 6:19). Јеһованын тәрәфини тутдугларына ҝөрә бәзән мәсиһиләр аилә үзвләринин тәгибинә мәруз галыр вә ја мадди ҹәһәтдән корлуг чәкирләр. Лакин Јеһова Өз хидмәтчиләринин гајғысына галыр, һәмишә онларын рузисини јетирир (Мәт. 6:25, 30—33; Лука 18:29, 30). Бүтүн бунлар ҝөстәрир ки, Аллаһын Падшаһлығы һазырда идарә едир вә о, Јеһованын нијјәтини һәјата кечирмәјә давам едәҹәк.

14, 15. Јеһова өлүмү бирдәфәлик нә вахт мәһв едәҹәк?

¹⁴ Иса артыг ҝөјдә Падшаһдыр вә тезликлә Јеһованын бүтүн вәдләрини һәјата кечирәҹәк (2 Кор. 1:20). О, 1914-ҹү илдән бәри дүшмәнләри арасында һакимијјәт сүрүр (Зәб. 110:1, 2). Тезликлә Иса һакимијјәт шәрикләри илә бирликдә пислијин көкүнү кәсәҹәк вә там зәфәр чалаҹаг (Вәһј 6:2).

 ¹⁵ Исанын миниллик һакимијјәти дөврүндә өлүләр дириләҹәк вә итаәткар инсанлар камиллијә јетишәҹәк. Сонунҹу сынагдан сонра Јеһованын салеһ һесаб етдији кәсләр «јерә саһиб олаҹаг, орада әбәди јашајаҹаглар» (Зәб. 37:10, 11, 29). Нәһајәт, «ахырынҹы дүшмән олан өлүм» мәһв едиләҹәк (1 Кор. 15:26).

16. Јеһоваја һансы нијјәтдән ирәли ҝәләрәк хидмәт етмәлијик?

¹⁶ Ҝөрдүјүмүз кими, әбәди һәјат үмиди Аллаһын Кәламына әсасланыб. Бу үмид бизә көмәк едир ки, сон дәрәҹә чәтин дөвр олан ахырзаманда Јеһоваја садиг галаг. Амма Јеһованын рәғбәтини газанмаг истәјириксә, Она јалныз әбәди јашамаг нијјәтиндән ирәли ҝәләрәк ибадәт етмәмәлијик. Әсас сәбәб Јеһоваја вә Исаја бәсләдијимиз дәрин мәһәббәт олмалыдыр (2 Кор. 5:14, 15). Бу мәһәббәт бизи тәшвиг едир ки, онлара бәнзәјәк вә инсанлара үмидимиз барәдә данышаг (Ром. 10:13—15). Биз фәдакар, сәхавәтли олмағы өјрәндикҹә Јеһова бизимлә әбәдијјән достлуг етмәк истәјәҹәк (Ибр. 13:16).

17. Һәр биримизин өһдәсинә нә дүшүр? (Мәтта 7:13, 14).

¹⁷ Бәс сиз әбәди јашајан инсанларын арасында олаҹагсыныз? Јеһова һәр кәсә бу фүрсәти вериб. Һәјата апаран јолда галмаг бизим әлимиздәдир. (Мәтта 7:13, 14 ајәләрини охујун.) Ҝөрәсән, әбәди јашајанда јердә һәјат неҹә олаҹаг? Бу суалын ҹавабы нөвбәти мәгаләдә мүзакирә олунур.