«Ҝөзәтчи гүлләси»нин бу ил чыхан сајларыны диггәтлә охумусунуз? Онда ҝөрүн нөвбәти суаллара ҹаваб верә биләрсиниз?

Дүшүнҹәмизи јениләшдирмәк үчүн нә етмәлијик? (Ром. 12:2).

Бир-ики јахшы әмәлимизин олмасы кифајәт дејил. Биз гәлбимизин дәринлијиндә неҹә инсан олдуғумузу јохламалыјыг вә лазыми дәјишикликләр етмәлијик ки, Јеһованын нормаларына максимум дәрәҹәдә ујғун јашајаг (w23.01 с. 8—9).

Дүнјада баш верәнләри мүшаһидә едәркән таразлығы неҹә горуја биләрик?

Дүнјада баш верән һадисәләрин пејғәмбәрликләрин иҹрасы илә неҹә бағлы олдуғуну мүшаһидә етмәк бизә мараглыдыр. Амма өз фәрзијјәләримизи ирәли сүрүб јығынҹагда бирлији позмамалыјыг. Јахшы олар ки, сөһбәтләримиз Јеһованын тәшкилатынын дәрҹ етдији мәлуматлара әсаслансын (1 Кор. 1:10) (w23.02 с. 16).

Исанын вәфтизи давамчыларынын вәфтизиндән нә илә фәргләнир?

Иса Аллаһа һәср олунмуш Исраил халгына мәнсуб олдуғу үчүн өзүнү Јеһоваја һәср етмәјинә еһтијаҹ јох иди. Иса камил, ҝүнаһсыз инсан иди. Онун ҝүнаһларына ҝөрә төвбә етмәсинә еһтијаҹ јох иди (w23.03 с. 5).

Башгаларынын ҝөрүш заманы шәрһ вермәси үчүн нә етмәлијик?

Чалышмалыјыг, гыса шәрһ верәк, онда башгалары да шәрһ верә биләҹәк. Һәмчинин јахшы олар ки, чох фикрә тохунмајаг. Беләҹә, башгаларына да демәјә сөз галаҹаг (w23.04 с. 23).

Әшија 35:8 ајәсиндә јазылан «Мүгәддәслик јолу» нәдир?

Бу мәҹази јол илк дәфә јәһудиләрин Бабилдән вәтәнләринә гајытдығы јола аид ишләниб. Бәс бизим дөврүмүз барәдә нә демәк олар? 1919-ҹу илә гәдәрки әсрләр әрзиндә һазырлыг ишләри апарылды. Бу ишләрдән бири Мүгәддәс Китабын тәрҹүмәси вә чапы иди. Аллаһын халгы «Мүгәддәслик јолу» илә јеријир. Бу јол руһани ҹәннәтдән кечир вә бизи Падшаһлығын ҝәтирәҹәји немәтләрә апарыр (w23.05 с. 15—19).

Мәсәлләр 9-ҹу фәсилдә ики мәҹази гадынын тәсвири әсасында һансы мәсләһәт верилир?

Мәсәлләрдә «ахмаг гадын»дан данышылыр. Онун дәвәтини гәбул етмәк инсаны «Мәзара» апарыр. Гадын образы илә тәсвир олунан «һәгиги һикмәт»ин дәвәти исә «дәрракә јолу»на апарыр вә инсана һәјат бәхш едир (Мәс. 9:1, 6, 13, 18) (w23.06 с. 22—24).

Јеһованын Лутла рәфтарындан Онун лүтфкар вә дәрракәли олдуғу неҹә ҝөрүнүр?

Јеһова Лута Сәдумдан чыхыб дағлара гачмағы тапшырмышды. Лакин Лут Јеһоваја јалварыб Соһара сығынмағы хаһиш едәндә Јеһова онун хаһишини нәзәрә алмышды (w23.07 с. 21).

Әр порнографијаја бахырса, гадын нә едә биләр?

Гадын ҝүнаһы өзүндә ҝөрмәмәлидир. О, диггәтини Јеһова илә мүнасибәтинә ҹәмләмәли, һәмчинин Мүгәддәс Китабда дәрдли инсанларын тәсәлли алдығы һадисәләри охујуб үзәриндә дүшүнмәлидир. Гадын әринә порнографијаја бахмаға ширникләндирән вәзијјәтләрдән узаг дурмаға көмәк едә биләр (w23.08 с. 14—17).

Етигадымызла бағлы етиразла гаршылашанда анлајыш бизә мүлајим олмаға неҹә көмәк едир?

Кимсә етигадымызла бағлы суал верәндә вә ја етираз едәндә буна онун дүшүнҹәсини, дәјәрләрини өјрәнмәк имканы кими бахмалыјыг. Бунунла мүлајим ҹаваб вермәјә даһа һазырлыглы олаҹағыг (w23.09 с. 17).

Ҝүҹ истәмәклә бағлы Мәрјәмдән нә өјрәнирик?

Мәсиһин анасы олаҹағыны өјрәнәндә Мәрјәм башгаларынын көмәјинә үз тутду. Ҹәбрајыл мәләк вә Илсәба Мүгәддәс Јазыларла ону руһландырдылар. Биз дә диндашларымыздан ҝүҹ ала биләрик (w23.10 с. 15).

Јеһова дуаларымыза неҹә ҹаваб верир?

Јеһова дуаларымызы ешидәҹәјинә сөз верир. О, дуаларымызын Онун нијјәти илә неҹә әлагәли олдуғуна да диггәт јетирир (Әрм. 29:12). Јеһова охшар дуалара фәргли ҹаваб верә биләр. Бунунла белә, О, һәмишә бизә дәстәк олмаға һазырдыр (w23.11 с. 21—22).

Ромалылара 5:2 ајәсиндән сонра нәјә ҝөрә 4-ҹү ајәдә дә јенидән үмиддән данышылыр?

Инсан хош мүждәни ешидәндә јерүзү Ҹәннәтдә јашајаҹағына үмиди јараныр. Амма әзијјәтләрлә үзләшиб онлара дөздүкҹә вә Аллаһын разылығыны газандыгҹа үмиди даһа да мөһкәмләнир. Бу үмидин ҝерчәкләшмәси онун үчүн даһа реал олур (w23.12 с. 12—13).