ЈЕҺОВА бизә бир-бириндән фәргли һәдијјәләр бәхш едиб. Нә јахшы ки, О бизә ирадә азадлығы верәрәк бу һәдијјәләрдән неҹә истифадә едәҹәјимизи өз өһдәмизә бурахыб. Мараглыдыр ки, Мүгәддәс Китабда шәраб да Аллаһын һәдијјәси адланыр. Орада дејилир: «Чөрәк үзү ҝүлдүрәр, меј һәјаты шән едәр» (Ваиз 10:19; Зәб. 104:15). Амма јәгин, бәзиләринин ички илә бағлы проблем јашадығыны ҝөрмүсүнүз. Һәмчинин ички илә бағлы фикирләр вә нормалар мәдәнијјәтдән-мәдәнијјәтә фәргләнир. Бәс онда мәсиһиләр ички мәсәләсиндә һансы мөвгени тутмалыдырлар?

Һарада јашамағымыздан, һансы мәдәнијјәтдә бөјүмәјимиздән асылы олмајараг, бизим үчүн инсанларын јох, Јеһованын нә дүшүндүјү өнәмли олмалыдыр. Гәрарымызы буна әсасән версәк, хејир тапаҹағыг вә хошбәхт олаҹағыг.

Әксәр инсанларын тез-тез, чох ичдијинә, јәгин, шаһид олмусунуз. Бәзиләри ичкинин ҝәтирдији хош һиссләрә ҝөрә ичир. Кимиси дәрдини унутмаг үчүн ичир. Бәзи әразиләрдә исә чох ичән инсана јеткин, ҝүҹлү бири кими бахырлар.

Амма бизи јарадан Аллаһ бунунла бағлы һикмәтли мәсләһәтләр верир. Мәсәлән, О бизи чох ичмәјин ҝәтирдији аҹы нәтиҹәләрдән хәбәрдар едир. Мәсәлләр 23:29—35 ајәләриндә бир сәрхош инсанын вәзијјәти, һәмчинин ичкинин јаратдығы проблемләр тәсвир олунуб a. Авропада ағсаггал кими хидмәт едән Даниел гардаш мәсиһи олмаздан өнҹәки һәјаты барәдә белә дејир: «Ичкидә һәдди јаман ашмышдым. Буна ҝөрә дә сәһв гәрарлар верирдим. Чох әзаблар чәкдим. Емосионал јараларым һәлә дә сызылдајыр».

Бәс мәсиһијә ирадә азадлығындан дүзҝүн истифадә етмәјә вә чох ички ичмәјин ҝәтирдији проблемләрдән гачмаға нә көмәк едәҹәк? Бунун үчүн дүшүнҹә вә давранышларымыз Јеһованын бахышыны әкс етдирмәлидир.

Ҝәлин ҝөрәк Мүгәддәс Китабда спиртли ички илә бағлы нә дејилир вә бәзиләри нәјә ҝөрә ички ичир.

Аллаһын Кәламында гәдәриндә ички ичмәк мүһакимә олунмур. Әслиндә, Мүгәддәс Китабда дејилир ки, шәраб ичмәк инсана хош һиссләр јашада биләр. Орада јазылыб: «Ҝет шад-хүррәм чөрәјини је, шән үрәклә шәрабыны ич» (Ваиз 9:7). Јеһованын садиг хидмәтчиләринин, һәмчинин Исанын да шәраб ичдији вахтлар олмушду (Мәт. 26:27—29; Лука 7:34; 1 Тим. 5:23).

Амма Мүгәддәс Китабда гәдәриндә ички ичмәклә сәрхош олмаг арасындакы фәрг ајдын ҝөстәрилир. Орада ачыгҹа јазылыб: «Шәрабдан сәрхош оланаҹан ичмәјин» (Ефес. 5:18). Һәтта дејилир ки, «ички дүшкүнләри... Аллаһын Падшаһлығына ҝирмәјәҹәкләр» (1 Кор. 6:10). Бәли, Јеһова һәддиндән артыг чох ичмәји вә сәрхошлуғу гадаған едир. Буна ҝөрә дә палаза бүрүнүб еллә сүрүнмәкдәнсә, Јеһованын дүшүнҹәсини мәнимсәмәлијик.

Бәзиләри чох ичиб сәрхош олмамағы баҹардығыны дүшүнүр. Амма бу, чох тәһлүкәлидир. Мүгәддәс Китабда ајдын ҝөстәрилир ки, «шәраб дүшкүнү» олан киши дә, гадын да әхлаги ҹәһәтдән јолуну аза вә Јеһова илә мүнасибәтини корлаја биләр (Тит. 2:3; Мәс. 20:1). Иса һәтта сәрхошлуғун инсана јени дүнјаја ҝирмәјә  мане олаҹағыны демишди (Лука 21:34—36). Бәс мәсиһи спиртли ичкинин асанлыгла ҝәтирәҹәји проблемләрдән неҹә узаг ола биләр?

Ички илә бағлы дүшүнҹәмизи мәдәнијјәтимиздәки инсанларын фикри формалашдырмамалыдыр. Бу, чох тәһлүкәлидир. Мәсиһиләр јејиб-ичмәк мәсәләләриндә Јеһованы разы салан тәрздә давранырлар. Мүгәддәс Китабда дејилир: «Истәр јејәндә, ичәндә, истәрсә дә башга бир иш ҝөрәндә һәр шеји елә един ки, Аллаһ шәрәфләнсин» (1 Кор. 10:31). Ҝәлин бәзи суаллары вә Мүгәддәс Китабдакы принсипләри арашдыраг.

Мән башгаларындан сечилмәмәк үчүн ичирәм? Чыхыш 23:2 ајәсинә әсасән күтләјә гошулмамалыјыг. Јеһова бу ајәләрдә исраиллиләрә билдирир ки, Ону разы салмајан инсанлара бәнзәмәмәлидирләр. Бу нәсиһәт бу ҝүн мәсиһиләр үчүн дә кечәрлидир. Әҝәр башгалары ички мөвзусунда дүшүнҹәмизә вә гәрарларымыза тәсир едирсә, әввәл-ахыр Јеһованын ганунуну позуб Онунла мүнасибәтләримизи корлајаҹағыг (Ром. 12:2).

Мән ҝүҹлү олдуғуму сүбут етмәк үчүн ичирәм? Бәзи мәдәнијјәтләрдә әксәријјәт тез-тез, чох ичмәјә нормал бир шеј кими јанашыр (1 Бут. 4:3). Амма ҝөрүн 1 Коринфлиләрә 16:13 ајәсиндә һансы һикмәтли сөзләр јазылыб: «Ојаг галын, иман јолунда дәјанәтли олун, мәрд олун, мөһкәмләнин». Спиртли ички инсаны доғрудан да мөһкәмләндирә, ҝүҹлү едә биләр? Хејр. Әксинә, ички инсанын ағлыны думанландырыр вә инсан сәһв гәрарлар верир. Буна ҝөрә дә чох ичмәк ҝүҹүн јох, зәифлијин ҝөстәриҹисидир. Әшија 28:7 ајәсиндә ичкинин тәсириндән јолуну азан инсанын сәндәләдији вә сәбатсыз олдуғу дејилир.

Әсл ҝүҹү верән Јеһовадыр. Руһани ҹәһәтдән ојаг галыб иман јолунда дәјанәтли олан инсан ҝүҹлү инсандыр (Зәб. 18:32). Бу ҹүр инсан олмаг үчүн тәһлүкәли вәзијјәтләрдән гачмалы вә Јеһова илә мүнасибәтләримизи корлајаҹаг гәрарлар вермәмәлијик. Иса Мәсиһдә мәһз белә бир ҝүҹ вар иди. О, јер үзүндә оларкән ирадәсинә вә ҹәсарәтинә ҝөрә чохларынын һөрмәтини газанмышды.

Мән проблемләрими унутмаг үчүн ичирәм? Бир мәзмурчу јазмышды: «[Еј Јеһова,]  фикирләр мәни чулғајанда мәнә тәсәлли вериб овутдун» (Зәб. 94:19). Проблемләр башыныздан ашанда раһатлыг тапмаг үчүн ичкијә јох, Јеһоваја үз тутун. Бунун бир јолу чохлу дуалар етмәкдир. Бундан башга, бәзиләри јығынҹагдакы јеткин мәсиһиләрдән мәсләһәт алмағын хејрини ҝөрүб. Әслиндә, проблемләриндән гуртулмаг мәгсәди илә ички ичән инсанын әхлаги сајыглығы вә дүзҝүн давранмаг гәтијјәти зәифләјир (Һушә 4:11). Мәгаләнин әввәлиндә ады чәкилән Даниел дејир: «Нараһатлыг, ҝүнаһ һисси мәни раһат бурахмырды. Бунлардан гуртулмаг үчүн ичирдим, амма проблемләрим азалмаг јеринә даһа да артырды. Нәтиҹәдә, һәм достларымы, һәм дә өзүмә һөрмәтими итирдим». Бәс Даниелә нә көмәк етди? «Баша дүшдүм ки, проблемләримин һәлли Јеһовададыр, ичкидә јох. Ахыр ки, Јеһованын көмәји илә проблемләрими һәлл едә билдим»,— дејә Даниел бөлүшүр. Бир шеј дәгигдир: ән чыхылмаз вәзијјәтләрдә белә Јеһова дәрдимизи јүнҝүлләшдирмәјә һазырдыр (Филип. 4:6, 7; 1 Бут. 5:7).

Гәдәриндә ичиб-ичмәдијинизи јохламаг үчүн өзүнүзә бу суаллары верә биләрсиниз: «Аилә үзвүм вә ја јахын достум ички ичмәјимлә бағлы нараһатлығыны билдириб?» Әҝәр билдирибсә, демәли, өзүнүзүн дә хәбәри олмадан ички илә бағлы проблеминиз јаранмаға башлајыб. «Һәмишәкиндән даһа чох ичирәм?» Демәли, сиздә һәлә асылылыг јаранмаса да, артыг о истигамәтдә ҝедирсиниз. «Бир нечә ҝүн вә ја даһа узун мүддәт ичкисиз галмаг мәнә чәтин ҝәлир?» Әҝәр еләдирсә, онда артыг ичкијә алудә олмусунуз вә сиздә асылылыг јараныб. Ола билсин, бу асылылығын өһдәсиндән ҝәлмәк үчүн сизә мүтәхәссисин көмәји лазым олаҹаг.

Бәзи мәсиһиләр ичкинин ҝәтирдији тәһлүкәләри нәзәрә алараг ону үмумијјәтлә дилләринә вурмурлар. Башгалары исә садәҹә дадыны бәјәнмәдији үчүн ичмирләр. Әҝәр јахынларыныздан кимсә белә бир гәрара ҝәлибсә, ону гынамајын, фикринә һөрмәтлә јанашын.

Ола билсин, гәрара ҝәлмисиниз ки, өзүнүзә ички илә бағлы мәһдудијјәт гојсаныз, јахшы  олар. Нә гәдәр ичәҹәјинизә, јахуд да нә гәдәр тез-тез ичәҹәјинизә сәрһәд гоја биләрсиниз. Мәсәлән, һәфтәдә бир дәфә вә ја јемәк заманы бир аз ичмәк гәрарына ҝәлә биләрсиниз. Јахуд ичкинин нөвү илә бағлы лимит гојмаг олар. Јәни гәрара ҝәлә биләрсиниз ки, мүәјјән мигдарда шәраб вә ја пивә ичәсиниз, амма сәрт ичкиләр, спиртли коктејлләр ичмәјәсиниз. Инсан ички илә бағлы өзүнә конкрет мәһдудијјәтләр гојанда буна ујғун давранмаг асан олур. Јеткин мәсиһи белә бир гәрар вердијинә ҝөрә вә гәрарында гәти олдуғуна ҝөрә башгаларынын јанында утаныб-сыхылмамалыдыр.

Ички мәсәләсиндә башгаларыны да нәзәрә алмалыјыг. Ромалылара 14:21 ајәсиндә дејилир: «Јахшысы одур, нә әт је, нә шәраб ич, нә дә гардашынын иманыны сарсыдан башга бир иш ҝөр». Бу мәсләһәтә неҹә әмәл етмәк олар? Гардашлыг мәһәббәти ҝөстәрмәклә. Әҝәр ҝөрсәниз ки, ички ичмәјиниз кимәсә пис тәсир едәҹәк, «ички ичмәјә һаггым вар» демәмәклә һәмин инсаны севдијинизи ҝөстәрмиш олаҹагсыныз. Һәмчинин башгаларына лагејд јанашмадығынызы, онларын һиссләринә һөрмәт етдијинизи, өзүнүздән чох онлары дүшүндүјүнүзү ҝөстәрәҹәксиниз (1 Кор. 10:24).

Бундан әлавә, мәсиһи һөкумәтин ганунларыны да нәзәр алмалыдыр. Ола биләр, һөкумәт спиртли ички ичмәјә минимум јаш һәдди гојсун, ја да ичкили һалда сүкан архасында әјләшмәји вә ја һансыса аләтләрдән истифадә етмәји гадаған етсин (Ром. 13:1—5).

Јеһова вердији һәдијјәләрдән һәзз алмағымыз үчүн бизә ирадә азадлығы бәхш едиб. Бура нә јејәҹәјимизлә, нә ичәҹәјимизлә бағлы сечим етмәк азадлығымыз да дахилдир. Гој сечимләриниздән ирадә азадлығыны гијмәтләндирдијиниз, сәмави Атамызы разы салмаг истәдијиниз ҝөрүнсүн!