1. Јеткин мәсиһи олмаг үчүн нә етмәлијик?

 УШАГЛАР чох тез бөјүјүр. Бу просес инсаны һејран гојур. Адама елә ҝәлир ки, ушаг өз-өзүнә бөјүјүр. Амма руһани ҹәһәтдән бөјүмәк, јеткинләшмәк өз-өзүнә баш верән бир просес дејил b (1 Кор. 13:11; Ибр. 6:1). Бунун үчүн Јеһова илә мөһкәм достлуг мүнасибәти ҝәрәкдир. Һәмчинин Онун бәјәндији кејфијјәтләрә саһиб олмаг, мүәјјән баҹарыглара јијәләнмәк вә ҝәләҹәк һәјата һазырлашмаг үчүн Јеһованын мүгәддәс руһуна еһтијаҹымыз вар (Мәс. 1:5).

2. Јарадылыш 1:27 ајәсиндән нә өјрәнирик вә бу мәгаләдә нә һагда данышаҹағыг?

² Јеһова инсаны киши вә гадын олараг јарадыб. (Јарадылыш 1:27 ајәсини охујун.) Онлар физики ҹәһәтдән бир-бириндән чох фәргләнир. Онларын фәргли олдуглары диҝәр саһәләр дә вар. Јеһова киши илә гадыны јараданда һәрәсинә хүсуси бир рол верди. Онлар бу шәрәфли роллары иҹра етмәк үчүн мүәјјән кејфијјәтләрә вә баҹарыглара саһиб олмалыдырлар (Јар. 2:18). Бу мәгаләдә ҝәнҹ баҹыларымыздан данышаҹағыг. Ҝөрәҹәјик ки, онлар јеткин мәсиһи олмаг үчүн нә едә биләрләр. Нөвбәти мәгалә исә ҝәнҹ гардашларымыза һәср олунуб.

3, 4. Ҝәнҹ баҹылар кимләрдән нүмунә ҝөтүрә биләр? (Һәмчинин шәклә бахын.)

³ Мүгәддәс Китабда Јеһованы севән, Она хидмәт едән чохлу мөмин гадынлардан данышылыр. (jw.org сајтында «Мүгәддәс Китабда ады чәкилән гадынлардан нә өјрәнә биләрик?»  адлы мәгаләјә бахын.) Бу гадынлар, мәгаләнин әсас ајәсиндә дә дејилдији кими, «һәр шејдә [һәдд билән]» вә «һәр саһәдә сәдагәтли» идиләр. Һәмчинин ҝәнҹ баҹыларымыз јығынҹагларында хидмәт едән руһән јеткин баҹылардан да чох шеј өјрәнә биләрләр.

⁴ Әзиз ҝәнҹ баҹыларымыз, фикирләшин ҝөрүн һансы јеткин баҹылардан нүмунә ҝөтүрә биләрсиниз? Онларын ҝөзәл кејфијјәтләрини мүшаһидә един. Сонра исә дүшүнүн: сиз неҹә онлар кими даврана биләрсиниз? Нөвбәти абзасларда јеткин баҹы олмаг үчүн лазым олан ики кејфијјәтдән данышаҹағыг.

5. Нәјә ҝөрә јеткин мәсиһи баҹы үчүн тәвазөкар олмаг ваҹибдир?

⁵ Тәвазөкарлыг руһән јеткин мәсиһи олмаг үчүн ваҹиб хүсусијјәтдир. Әҝәр гадын тәвазөкардырса, Јеһова илә мүнасибәти мөһкәм олаҹаг вә башгалары илә јахшы јола ҝедәҹәк (Јаг. 4:6). Мәсәлән, Јеһованы севән гадын Онун тәсис етдији башчылыг принсипинә тәвазөкарлыгла табе олур (1 Кор. 11:3). Баҹы бу принсипин јығынҹагда вә аиләдә неҹә тәтбиг олундуғуну билмәлидир c.

6. Ҝәнҹ баҹылар Рәфәгәдән тәвазөкарлыгла бағлы нә өјрәнә биләр?

⁶ Ҝәлин Рәфәгәни јадымыза салаг. О, ағыллы-камаллы гадын иди, һәјаты боју ҹәсур гәрарлар вермишди, нәји нә вахт едәҹәјини јахшы билирди (Јар. 24:58; 27:5—17). Рәфәгә ејни заманда итаәткар иди, инсанлара һөрмәтлә јанашырды (Јар. 24:17, 18, 65). Сиз дә Рәфәгә кими тәвазөкар олуб Јеһованын сәлаһијјәт вердији кәсләрә табе олсаныз, һәм аиләнизә, һәм дә јығынҹаға јахшы нүмунә гојаҹагсыныз.

7. Ҝәнҹ баҹылар Әстәрдән тәвазөкарлыгла бағлы нә өјрәнә биләр?

⁷ Бүтүн мәсиһиләрә тәвазөкарлыг лазымдыр. Мүгәддәс Китабда дејилир: «Һикмәт... тәвазөкар инсанладыр» (Мәс. 11:2). Әстәр дә тәвазөкар, Аллаһа садиг гадын иди.  О, тәвазөкарлығы сајәсиндә мәликә оланда гүрурланмады. Әстәр өзүндән бөјүк олан әмиси оғлу Мәрдәһајын мәсләһәтинә гулаг асыб әмәл етмишди (Әст. 2:10, 20, 22). Сиз дә башгаларындан мәсләһәт алмагла вә верилән јахшы мәсләһәтә әмәл етмәклә Әстәр кими тәвазөкар олдуғунузу ҝөстәрә биләрсиниз (Тит. 2:3—5).

8. 1 Тимутијә 2:9, 10 ајәләринә әсасән тәвазөкарлыг баҹылара ҝејим-кеҹим мәсәләсиндә ағыллы гәрар вермәјә неҹә көмәк едир?

⁸ Әстәрин тәвазөкарлығы башга бир саһәдән дә ҝөрүнүр. О, «шух гамәтли ҝөзәл бир гыз иди», амма өзүнә јерсиз диггәт чәкмәјә чалышмырды (Әст. 2:7, 15). Әзиз баҹыларымыз, Әстәрдән неҹә нүмунә ҝөтүрә биләрсиниз? Бунун бир јолу 1 Тимутијә 2:9, 10 ајәләриндә јазылыб. (Ајәләри охујун.) Булус мәсиһи баҹылара мәсләһәт ҝөрүр ки, ҝејимләри ләјагәтли, абыр-һәјалы олсун. Бурада истифадә едилән јунан сөзләри о демәкдир ки, мәсиһи баҹынын ҝејиминдән башгаларына һөрмәт етдији, онларын фикирләрини вә һиссләрини нәзәрә алдығы ҝөрүнмәлидир. Бу мәсләһәтә гулаг асыб ләјагәтли ҝејинән баҹыларымызла фәхр едирик!

9. Абигајилин нүмунәсиндән нә өјрәнирик?

⁹ Бәсирәтли олмаг һәр бир јеткин мәсиһи баҹынын јијәләнмәли олдуғу икинҹи кејфијјәтдир. Бәсирәт нәдир? Бәсирәт јахшы илә писи ајырд едиб јахшыны сечмәк габилијјәтидир. Абигајилин һадисәси јадыныздадыр? Онун әри бир пис гәрары илә бүтүн ев әһлини аз гала фәлакәтә сүрүкләјирди. Абигајил буну биләндә ҹәлд һәрәкәтә кечди. О, бәсирәти сајәсиндә хејли инсанын һәјатыны хилас етди (1 Ишм. 25:14—23, 32—35). Бәсирәтли олмагла биз дә данышмағын вә сусмағын вахтыны мүәјјән едә биләрик. Һәмчинин бу кејфијјәт бизә көмәк едир ки, инсанларла сөһбәт едәркән һаггымыз чатмајан вә ја онлары пис вәзијјәтдә гојаҹаг суаллар вермәјәк (1 Салон. 4:11).

10, 11. Охујуб-јазмағы баҹармағынызын һәм өзүнүзә, һәм дә башгаларына һансы хејри вар? (Һәмчинин шәклә бахын.)

¹⁰ Һәр бир мәсиһи баҹы мүәјјән баҹарыглара јијәләнмәлидир. Ҝәнҹ баҹыларын ушаг вахты өјрәндији бәзи баҹарыглар онлара өмүрләри боју хејир ҝәтирәҹәк. Ҝәлин ҝөрәк һансы баҹарыглара јијәләнмәк лазымдыр.

¹¹ Охумағы вә јазмағы өјрәнин. Бәзи мәдәнијјәтләрдә гадын үчүн охумағы вә јазмағы билмәк елә дә ваҹиб һесаб олунмур. Амма һәр бир мәсиһинин бу баҹарыға јијәләнмәси чох ваҹибдир d (1 Тим.  4:13). Бу сәбәбдән манеәләр олса да, өјрәнмәјә давам един. Бәс бунун һансы хејрини ҝөрәҹәксиниз? Мәсәлән, өзүнүзә иш тапа биләҹәксиниз. Аллаһын Кәламыны өјрәнмәк вә башгаларына өјрәтмәк даһа асан олаҹаг. Ән әсасы, Мүгәддәс Китабы охујуб мүталиә едә билдијиниз үчүн Јеһоваја даһа да јахынлашаҹагсыныз (Јуш. 1:8; 1 Тим. 4:15).

12. Мәсәлләр 31:26 ајәсиндән нә өјрәнирсиниз?

¹² Үнсијјәт гурмағы өјрәнин. Бүтүн мәсиһиләр үнсијјәт гурмағы баҹармалыдыр. Шаҝирд Јагуб бунунла бағлы јахшы мәсләһәт вермишди: «Һәр бир инсан ешитмәјә һазыр олмалы, данышмаға... тәләсмәмәлидир» (Јаг. 1:19). Башгалары данышанда диггәтлә гулаг асмагла онларын «дәрдинә шәрик» олдуғунузу, онлара шәфгәтлә јанашдығынызы ҝөстәрәҹәксиниз (1 Бут. 3:8). Гаршыныздакы инсанын дедикләрини, һиссләрини баша дүшмәјәндә мүнасиб суаллар верә биләрсиниз. Сонра исә данышмаздан габаг бир аз дүшүнүн (Мәс. 15:28, һашијә). Өзүнүзә бу суаллары верин: «Данышаҹағым шејләр һәгигәтдир, руһландырыҹыдыр? Сөзләрим нәзакәтли, мүлајим сәсләнәҹәк?» Јахшы үнсијјәт гурмағы баҹаран јеткин баҹылардан да чох шеј өјрәнә биләрсиниз. (Мәсәлләр 31:26 ајәсини охујун.) Онлар данышанда диггәтлә изләјин, ҝөрүн нәји неҹә дејирләр. Бу баҹарығы пүхтәләшдирдикҹә башгалары илә ҝөзәл мүнасибәтиниз олаҹаг.

13. Ев ишләрини ҝөрмәји неҹә өјрәнә биләрсиниз? (Һәмчинин шәклә бахын.)

¹³ Ев ишләрини ҝөрмәји өјрәнин. Бир чох јердә евин јүкү гадынын үзәринә дүшүр. Ананыздан, јахуд баҹарыглы бир баҹыдан ев ишләрини өјрәнә биләрсиниз. Синди адлы бир баҹы дејир: «Анам мәнә чалышган олмағы, ҝөрдүјүм ишдән зөвг алмағы өјрәдиб. Бу онун мәнә вердији ән дәјәрли һәдијјәләрдән биридир. Јемәк биширмәји, тәмизлик етмәји, тикиш тикмәји, базарлыг етмәји баҹардығым үчүн һәјатым хејли асанлашыб. Бунларын сајәсиндә Јеһоваја хидмәтдә даһа чох иш ҝөрә билирәм. Һәмчинин анам мәнә гонагпәрвәр олмағы өјрәдиб. Беләҹә, мән өрнәк ҝөтүрә биләҹәјим ҝөзәл баҹы-гардашларла таныш олмушам» (Мәс. 31:15, 21, 22). Ев ишләрини ҝөрмәји өјрәнән чалышган, гонагпәрвәр баҹыларымыз һәм аиләләри, һәм дә јығынҹаг үчүн әсл һәдијјәдир (Мәс. 31:13, 17, 27; Һәв. 16:15).

14. Кристалын һадисәсиндән нә өјрәнирсиниз вә нәјин ваҹиблијини унутмамалысыныз?

¹⁴ Өз ајагларыныз үзәриндә дурмағы өјрәнин. Бүтүн мәсиһиләр буна ҹан атмалыдыр (Филип. 4:11). Кристал адлы баҹы дејир: «Мәктәбдә охујанда валидејнләримин мәсләһәти илә мүәјјән баҹарыға јијәләнмәјимә көмәк едән фәнләр үзрә охумаға башладым. Атам мәни мүһасибат тәмајүллү синифдә охумаға тәшвиг етди. Бу саһәни өјрәнмәјимин мәнә бөјүк көмәји  дәјди». Ишә дүзәлмәк үчүн һансыса баҹарыға јијәләнмәклә јанашы, газандығыныз пулу дүзҝүн хәрҹләмәји дә өјрәнмәјә чалышмалысыныз (Мәс. 31:16, 18). Аза гане олмагла вә јерсиз борҹа ҝирмәмәклә Јеһоваја хидмәтдә даһа чох иш ҝөрә биләрсиниз (1 Тим. 6:8).

15, 16. Субај баҹылары јығынҹаг үчүн дәјәрли едән нәдир? (Марк 10:29, 30).

¹⁵ Руһани кејфијјәтләрә вә ваҹиб баҹарыглара јијәләнмәјин ҝәләҹәкдә верәҹәјиниз гәрарлар заманы хејрини ҝөрәҹәксиниз. Ҝөрәк бу гәрарлардан бәзиләри һансылардыр.

¹⁶ Бир мүддәт субај гала биләрсиниз. Бәзи баҹылар мәдәнијјәтләриндә хош гаршыланмаса да, Исанын сөзләринә ујғун олараг, евләнмәмәк гәрарына ҝәлир (Мәт. 19:10—12). Кимиси дә башга сәбәбләрә ҝөрә аилә гурмур. Әмин олун ки, нә Јеһова, нә дә Иса субај олдуғунуз үчүн сизин дәјәрсиз олдуғунузу дүшүнмүр. Дүнјанын һәр бир јериндә субај баҹылар јығынҹаг үчүн әсл немәтдирләр. Онлар севҝиләри, гајғылары сајәсиндә јығынҹагда чохларына баҹы вә ана олублар. (Марк 10:29, 30 ајәләрини охујун; 1 Тим. 5:2.)

17. Ҝәнҹ баҹы индидән тамвахтлы хидмәтә неҹә һазырлаша биләр?

¹⁷ Тамвахтлы хидмәтә башлаја биләрсиниз. Баҹылар үмумдүнја тәблиғ ишиндә бөјүк пај саһибидирләр (Зәб. 68:11). Әзиз баҹыларымыз, тамвахтлы хидмәтә башламағы индидән планлашдыра биләрсиниз? Сиз тикинтидә көмәк едә, өнҹүл вә ја бејтелли ола биләрсиниз. Мәгсәдиниз барәдә дуа един. Артыг бу мәгсәдә чатмыш кәсләрлә сөһбәт един, ҝөрүн сизә һансы тәләбләрә ҹаваб вермәк лазымдыр. Сонра да мәгсәдинизә доғру ҝетмәк үчүн план ҹызын. Тамвахтлы хидмәтә башласаныз, Јеһованын јолунда даһа чох иш ҝөрмәк үчүн гаршынызда бөјүк имканлар ачылаҹаг.

18. Баҹы ҝәләҹәк һәјат јолдашыны нәјә ҝөрә диггәтлә сечмәлидир? (Һәмчинин шәклә бахын.)

¹⁸ Евләнмәк гәрарына ҝәлә биләрсиниз. Јухарыда садаладығымыз кејфијјәтләр вә баҹарыглар сизә јахшы арвад олмаға көмәк едәҹәк. Евләнмәк гәрарына ҝәлмисинизсә, һәјат јолдашы сечиминдә чох диггәтли олмалысыныз. Чүнки бу, һәјатда вердијиниз ән ваҹиб гәрарлардан биридир. Унутмајын ки, аилә гураҹағыныз инсанын башчылығы алтында олаҹагсыныз (Ром. 7:2; Ефес. 5:23, 33). Она ҝөрә дә бу суаллар үзәриндә дүшүнүн:  «О, јеткин мәсиһидир? Јеһова онун үчүн һәјатда һәр шејдән ваҹибдир? Дүзҝүн гәрарлар верир? Сәһвләрини бојнуна алыр? Гадынлара һөрмәт едир? Јеһова илә достлуғуму мөһкәмләндирмәји, мадди ҹәһәтдән мәни тәмин етмәји вә мәнимлә јахшы дост олмағы баҹараҹаг? Мәсулијјәтләринин өһдәсиндән јахшы ҝәлир? Мәсәлән, јығынҹагда һансы тапшырыглары вар, онлары неҹә јеринә јетирир?» (Лука 16:10; 1 Тим. 5:8). Әҝәр сизә јахшы әр олаҹаг бир инсанла аилә гурмаг истәјирсинизсә, әлбәттә ки, өзүнүз дә јахшы һәјат јолдашы олмаг үчүн индидән чалышмалысыныз.

19. «Көмәкчи» олмаг нәјә ҝөрә шәрәфли ишдир?

¹⁹ Мүгәддәс Китабда дејилир ки, јахшы арвад әрини «тамамлајан бир көмәкчи»дир (Јар. 2:18). Гадынын көмәкчи олмасы ону алчалтмыр, онун кишидән даһа ашағы сәвијјәдә олдуғуну ҝөстәрмир. Әксинә, бу шәрәфли бир мөвгедир. Мүгәддәс Китабда Јеһованын Өзү дә «јардымчы», јәни көмәкчи адланыр (Зәб. 54:4; Ибр. 13:6). Гадын әринә дајаг оланда, вердији гәрары һәјата кечирмәк үчүн ону дәстәкләјәндә әсл көмәкчи олдуғуну ҝөстәрир. О, Јеһованы севдији үчүн әлиндән ҝәләни едир ки, әри башгаларынын јанында јахшы ад саһиби олсун (Мәс. 31:11, 12; 1 Тим. 3:11). Сиз дә ҝәләҹәкдә јахшы һәјат јолдашы олмаг үчүн Јеһоваја севҝинизи артырын вә һәм евдә, һәм дә јығынҹагда башгаларына көмәк един.

20. Јахшы ана аиләси үчүн нә едир?

²⁰ Ана ола биләрсиниз. Аилә гурандан сонра өвлад саһиби ола биләрсиниз (Зәб. 127:3). Она ҝөрә дә бу барәдә габагҹадан дүшүнсәниз јахшы оларды. Мәгаләдә арашдырдығымыз кејфијјәтләрин вә баҹарыгларын сизә бөјүк көмәји дәјәҹәк. Сизин севҝиниз, хејирхаһлығыныз вә сәбриниз аиләниздә меһрибан мүһит јарадаҹаг. Ушагларыныз да севилдикләрини вә ҝүвәндә олдугларыны һисс едәҹәк (Мәс. 24:3).

21. Баҹыларымыз барәдә һансы фикирдәсиниз вә нәјә ҝөрә? (Үз габығындакы шәклә бахын.)

²¹ Әзиз ҝәнҹ баҹыларымыз, сизи чох севирик. Сиз Јеһова вә Онун халгы үчүн чох иш ҝөрүрсүнүз (Ибр. 6:10). Руһани кејфијјәтләрә јијәләнмәк вә лазыми баҹарыглара саһиб олмаг үчүн әлиниздән ҝәләни едирсиниз. Бунунла һәм өзүнүзүн, һәм дә әтрафынызда олан инсанларын һәјатыны ҝөзәлләшдирирсиниз. Үстәлик, индидән ҝәләҹәкдә верәҹәјиниз гәрарлара һазырлашырсыныз. Сиз Јеһованын тәшкилаты үчүн әсл хәзинәсиниз!