1. Мәсиһи гардашлар Давудун мәсләһәтинә әмәл етмәк үчүн нә етмәлидир?

 ДАВУД падшаһ Сүлејмана нәсиһәт едиб демишди: «Мәтин ол, мәрд ол!» (1 Пад. 2:1—3). Бу мәсләһәтә бүтүн мәсиһи гардашлар әмәл етмәлидир. Бунун үчүн онлар Аллаһын ганунларына табе олмағы вә Мүгәддәс Китаб принсипләрини һәјатларынын һәр саһәсиндә тәтбиг етмәји өјрәнмәлидирләр (Лука 2:52). Јеткин мәсиһи олмаг ҝәнҹ гардашлар үчүн нәјә ҝөрә ваҹибдир?

2, 3. Ҝәнҹ гардашын јеткин мәсиһи олмасы нәјә ҝөрә ваҹибдир?

² Мәсиһи гардашларын аиләләриндә вә јығынҹагда мүһүм мәсулијјәтләри вар. Әзиз ҝәнҹ гардашлар, шүбһәсиз, сиз дә ҝәләҹәкдә үзәринизә мүәјјән мәсулијјәтләр ҝөтүрмәк барәдә дүшүнүрсүнүз. Бәлкә дә тамвахтлы хидмәтә башламаг, јығынҹаг хидмәтчиси, сонралар исә ағсаггал олмағы мәгсәд гојмусунуз. Ола билсин, ҝәләҹәкдә евләниб ушаг саһиби олмағы да истәјирсиниз (Ефес. 6:4; 1 Тим. 3:1). Бу мәгсәдләрә чатыб онлары лајигинҹә иҹра етмәк үчүн јеткин мәсиһи олмалысыныз b.

³ Јеткин мәсиһи олмаг үчүн нә едә биләрсиниз? Лазыми баҹарыглара јијәләнмәлисиниз. Бәс онда ҝәләҹәкдәки мәсулијјәтләринизи лајигинҹә јеринә јетирмәк үчүн индидән неҹә һазырлаша биләрсиниз?

4. Ҝәнҹ гардашлар кимләрдән нүмунә ҝөтүрә биләр? (Һәмчинин шәклә бахын.)

⁴ Јеткин инсанлардан нүмунә ҝөтүрүн. Мүгәддәс Китабда өрнәк ҝөтүрәҹәјиниз чохлу мөмин инсанларын нүмунәси  вар. Гәдимдә јашамыш бу кишиләр Аллаһын јолу илә ҝедир вә Онун халгынын гајғысына галмаг үчүн мүхтәлиф ишләр ҝөрүрдүләр. Бундан башга, аиләниздәки вә јығынҹағыныздакы јеткин мәсиһи гардашлардан да өрнәк ҝөтүрә биләрсиниз (Ибр. 13:7). Ән әсасы исә Иса Мәсиһин мүкәммәл нүмунәсини изләјә биләрсиниз (1 Бут. 2:21). Бу инсанларын һәјатларына нәзәр салдыгҹа онларын ҝөзәл кејфијјәтләри барәдә фикирләшин (Ибр. 12:1, 2). Сонра исә дүшүнүн ҝөрүн онлара бәнзәмәк үчүн нә едә биләрсиниз.

5. Сағламдүшүнҹәли олмаг үчүн нә едә биләрсиниз вә буну етмәк нәјә ҝөрә ваҹибдир? (Зәбур 119:9).

⁵ Сағламдүшүнҹәли олун (Тит. 1:8). Сағламдүшүнҹәли инсан тез-тәләсик гәрар вермир, аддымларыны јүз өлчүб бир бичир. Одур ки, бу хүсусијјәтә јијәләнмәк вә ону горумаг үчүн вар ҝүҹүнүзлә чалышын. Бу нәјә ҝөрә ваҹибдир? Чүнки бу дүнјадакы ҝәнҹ оғланларын чоху өз фикирләринә, өз һиссләринә гапылыб гәрар верирләр (Мәс. 7:7; 29:11). Һәмчинин телевизија, филмләр, интернет, сосиал медиа дүшүнҹә вә давранышыныза тәсир едә биләр. Сағламдүшүнҹәли олмаг үчүн нә едә биләрсиниз? Әввәла, Мүгәддәс Китаб принсипләрини өјрәнин вә онлара әмәл етмәјин фајдасы барәдә дүшүнүн. Сонра өјрәндијиниз принсипләри тәтбиг едәрәк Јеһованы разы салан гәрарлар верин. (Зәбур 119:9 ајәсини охујун.) Өзүнүздә бу мүһүм габилијјәти јетишдирмәклә јеткин мәсиһилијә доғру бөјүк бир аддым атаҹагсыныз (Мәс. 2:11, 12; Ибр. 5:14). Ҝәлин ҝөрәк сағламдүшүнҹәли олмаг сизә нөвбәти ики саһәдә неҹә көмәк едәҹәк: 1) баҹыларла рәфтарда вә 2) хариҹи ҝөрүнүшүнүзлә бағлы гәрарларынызда.

6. Сағламдүшүнҹәли олмаг ҝәнҹ гардаша баҹылара һөрмәт етмәјә неҹә көмәк едәҹәк?

⁶ Сағламдүшүнҹәли олмаг сизә гадынлара һөрмәтлә јанашмаға көмәк едәҹәк. Мәсәлән, ҝәнҹ гардаш мәсиһи баҹыны даһа јахындан танымаг үчүн она диггәт ҝөстәрә биләр. Бу, нормалдыр. Бунунла белә, сағламдүшүнҹәли ҝәнҹ гардаш евләнмәк нијјәти јохдурса, сөзләринә, јазышмаларына вә һәрәкәтләринә фикир верәҹәк ки, гаршы тәрәфә романтик һиссләр өтүрмәсин (1 Тим. 5:1, 2). Амма әҝәр гардаш баҹы илә  евләнмәк мәгсәди илә ҝөрүшүрсә, о, јанларында кимсә олмадан баҹы илә һеч вахт тәкликдә галмајаҹаг. О, бунунла баҹынын јахшы адыны горујаҹаг (1 Кор. 6:18).

7. Сағламдүшүнҹәли олмаг ҝәнҹ гардаша ҝејим вә хариҹи ҝөрүнүшлә бағлы гәрарларында неҹә көмәк едәҹәк?

⁷ Әзиз ҝәнҹ гардашлар, сизин сағламдүшүнҹәли олдуғунуз һәмчинин ҝејиминиздән вә хариҹи ҝөрүнүшүнүздән дә ҝөрүнәҹәк. Адәтән дәбдә олан ҝејимләр Јеһоваја һөрмәт етмәјән, әхлагсыз һәјат сүрән инсанлар тәрәфиндән һазырланыр вә реклам едилир. Онларын әхлагсыз дүшүнҹәләри һазырладыглары ҝејимләрә дә сирајәт едир. Чох вахт онлар дар, кишини гадына бәнзәдән ҝејимләр дизајн едирләр. Амма јеткин мәсиһи олмаға ҹан атан ҝәнҹ гардашлар ҝејим сечәркән Мүгәддәс Китаб принсипләрини әлдә рәһбәр тутаҹаглар вә јығынҹагдакы јеткин гардашлардан нүмунә ҝөтүрәҹәкләр. Одур ки, әзиз гардашлар, өзүнүзә бу суаллары верин: «Сечимләримдән сағламдүшүнҹәли олдуғум вә башгаларыны нәзәрә алдығым ҝөрүнүр? Инсанлар ҝејимимә бахыб Аллаһын хидмәтчиси олдуғуму дејә биләр?» (1 Кор. 10:31—33; Тит. 2:6). Ҝәнҹ гардашлар сағламдүшүнҹәли олмагла тәкҹә диндашларынын јох, һәм дә Јеһованын рәғбәтини газанаҹаг.

8. Ҝәнҹ гардаш етибарлы олмағы неҹә өјрәнә биләр?

⁸ Етибарлы олун. Етибарлы ҝәнҹ гардаш она тапшырылан бүтүн мәсулијјәтләри ҹанла-башла ҝөрүр (Лука 16:10). Ҝәлин Исанын гојдуғу мүкәммәл нүмунәјә бахаг. О, лагејд, мәсулијјәтсиз инсан дејилди. Јеһованын она һәвалә етдији тапшырыглары чәтин оланда белә јеринә јетирирди. Иса Мәсиһ инсанлары, хүсусилә дә давамчыларыны севирди, һәтта онлар үчүн һәјатыны да гурбан вермишди (Јәһ. 13:1). Исадан өрнәк ҝөтүрәрәк сизә тапшырылан истәнилән иши ҝөрмәк үчүн әлиниздән ҝәләни един. Әҝәр һансыса бир иши неҹә ҝөрәҹәјинизи дәгиг билмирсинизсә, тәвазөкар олуб јеткин гардашлардан көмәк истәјин. Һеч вахт аз иш ҝөрүб она гане олмајын (Ром. 12:11). Әксинә, ҝөрдүјүнүз һәр иши «инсанлар үчүн јох, Јеһова үчүн» ҝөрүн (Кол. 3:23). Әлбәттә, сиз камил дејилсиниз, бәзән сәһвләр едәҹәксиниз. Она ҝөрә дә тәвазөкар олун вә сәһвинизи бојнунуза алын (Мәс. 11:2).

9. Ҝәнҹ гардашлар нәјә ҝөрә мүәјјән баҹарыглара јијәләнмәлидир?

⁹ Јеткин мәсиһи гардаш олмаг үчүн бәзи баҹарыглара да јијәләнмәлисиниз. Онлар сизә јығынҹагда үзәринизә мәсулијјәт ҝөтүрмәјә, өзүнүзү вә аиләнизи тәмин етмәк үчүн иш тапмаға, инсанларла ҝөзәл мүнасибәт гурмаға көмәк едәҹәк. Ҝәлин ҝөрәк һансы баҹарыглара јијәләнә биләрсиниз.

10, 11. Гардашын охумағы вә јазмағы билмәјинин һәм өзүнә, һәм дә јығынҹаға һансы фајдасы вар? (Зәбур 1:1—3). (Һәмчинин шәклә бахын.)

¹⁰ Охумағы вә јазмағы өјрәнин. Мүгәддәс  Китабда дејилир ки, Аллаһын Кәламыны һәр ҝүн охујуб үзәриндә дүшүнән инсан хошбәхтдир вә һәр ишиндә уғур газанар. (Зәбур 1:1—3 ајәләрини охујун.) Белә инсан Мүгәддәс Китабы һәр ҝүн охумагла Јеһованын дүшүнҹә тәрзини гаврајаҹаг. Беләҹә, о, ајдын дүшүнәҹәк вә Мүгәддәс Китаб ајәләрини неҹә тәтбиг едә биләҹәјини өјрәнәҹәк (Мәс. 1:3, 4). Јығынҹагда бу ҹүр гардашлара еһтијаҹ вар. Нәјә ҝөрә?

¹¹ Диндашларымызын Мүгәддәс Китаба әсасланан ҝөстәришләр вә мәсләһәтләр верән баҹарыглы гардашларын көмәјинә еһтијаҹы вар (Тит. 1:9). Охумағы вә јазмағы јахшы билмәјин сајәсиндә сиз инсанлара фајда ҝәтирән, еләҹә дә онларын иманыны мөһкәмләндирән нитгләр вә шәрһләр һазырлајаҹагсыныз. Һәмчинин мүталиә едәндә, јығынҹаг ҝөрүшләриндә, топлантыларда нитгләрә гулаг асанда мараглы фикирләри өзүнүз үчүн гејд едә биләҹәксиниз. Бу гејдләрин сајәсиндә һәм өз иманынызы артыраҹагсыныз, һәм дә башгаларыны руһландыраҹагсыныз.

12. Јахшы үнсијјәт гурмаға сизә нә көмәк едәҹәк?

¹² Үнсијјәт гурмағы өјрәнин. Мәсиһи гардаш јахшы үнсијјәт гурмағы өјрәнмәлидир. Јәни о башгаларынын фикирләринә гулаг асмалы, һиссләрини баша дүшмәлидир (Мәс. 20:5). Һәмчинин гардаш гаршысындакы инсанын сәс тонундан, үз ифадәсиндән вә бәдән дилиндән онун кечирдији һиссләри охумағы өјрәнмәлидир. Инсанларла вахт кечирмәдән бунлары өјрәнмәк мүмкүн дејил. Әҝәр үнсијјәт гурмаг үчүн е-маил, месаж вә бу кими васитәләрдән мүнтәзәм истифадә едирсинизсә, инсанларла үз-үзә сөһбәт етмәк сизә чәтин олаҹаг. Она ҝөрә дә инсанларла ҹанлы сөһбәт етмәјә чалышын (2 Јәһ. 12).

13. Ҝәнҹ гардаш даһа нәји өјрәнмәлидир? (1 Тимутијә 5:8). (Һәмчинин шәклә бахын.)

¹³ Өзүнүзү мадди ҹәһәтдән тәмин етмәји өјрәнин. Јеткин мәсиһи гардаш һәм өзүнү, һәм дә аиләсини доландырмалыдыр. (1 Тимутијә 5:8 ајәсини охујун.) Бәзи өлкәләрдә ҝәнҹ гардашлар аталарындан вә ја гоһумларындан мүәјјән пешә өјрәнирләр. Башга өлкәләрдә исә ҝәнҹ оғланлар орта мәктәбдә охујан заман һансыса сәнәтә вә ја башга пешә баҹарығына јијәләнирләр. Һәр неҹә олса да, мүәјјән баҹарыға јијәләнмәк јахшыдыр, чүнки бу сизә иш тапмаға көмәк едәҹәк (Һәв. 18:2, 3; 20:34; Ефес. 4:28). Гој башгалары сизи зәһмәткеш, ишини ахыра чатдыран инсан кими танысын. Бунун сајәсиндә иш тапмаг сизин үчүн даһа  асан олаҹаг. Мәгаләдә арашдырдығымыз кејфијјәтләрә вә баҹарыглара саһиб олмаг мәсиһи гардаша ҝәләҹәкдә диҝәр мәсулијјәтләри дә иҹра етмәјә көмәк едәҹәк. Ҝәлин ҝөрәк бу һансы мәсулијјәтләрдир.

14. Ҝәнҹ гардаш тамвахтлы хидмәтә неҹә һазырлаша биләр?

¹⁴ Тамвахтлы хидмәтчи олмаға. Руһән јеткин мәсиһи гардашларын чоху ҝәнҹ јашдан тамвахтлы хидмәтә башлајыб. Өнҹүл хидмәти ҝәнҹ гардашлара мүхтәлиф инсанларла әмәкдашлыг етмәји өјрәдир. Һәмчинин бу хидмәт онлара пулдан ағылла истифадә етмәјә вә јерсиз хәрҹләр етмәмәјә көмәк едир (Филип. 4:11—13). Көмәкчи өнҹүл хидмәти тамвахтлы хидмәтә ачылан гапыдыр. Чохлары бир мүддәт көмәкчи өнҹүл кими хидмәт едир. Бу онлары өнҹүл хидмәтинә һазырлајыр. Өнҹүл хидмәти исә тамвахтлы хидмәтин диҝәр нөвләринә гапы ача биләр. Мәсәлән, тикинтидә вә ја Бејтелдә хидмәт етмәјә.

15, 16. Ҝәнҹ гардаш јығынҹаг хидмәтчиси вә ағсаггал олмаг үчүн нә едә биләр?

¹⁵ Јығынҹаг хидмәтчиси вә ја ағсаггал олмаға. Мәсиһи гардашлар јығынҹагда диндашларына ағсаггал кими хидмәт етмәк үчүн лазыми тәләбләрә ҹаваб вермәјә чалышмалыдырлар. Мүгәддәс Китабда дејилир ки, бу мәсулијјәтә ҹан атан гардаш «јахшы шеј арзулајыр» (1 Тим. 3:1). Ағсаггал олмаздан габаг гардаш илк нөвбәдә јығынҹаг хидмәтчиси олмаг үчүн тәләбләрә ҹаваб вермәлидир. Јығынҹаг хидмәтчиләри бир чох ишләрдә ағсаггаллара көмәк едирләр. Һәм ағсаггаллар, һәм дә јығынҹаг хидмәтчиләри баҹы-гардашларына тәвазөкарлыгла хидмәт едирләр вә тәблиғ ишиндә шөвглә чалышырлар. 17—19 јаш аралығында олан ҝәнҹ гардашлар јығынҹаг хидмәтчиси кими хидмәт етмәјә јарарлы ола биләрләр. Тәҹрүбәли јығынҹаг хидмәтчиләри исә 20 јашларынын әввәлләриндә ағсаггал кими хидмәт едә биләрләр.

¹⁶ Бу мәсулијјәтләрә јарарлы олмаг үчүн нә едә биләрсиниз? Бунун конкрет дүстуру јохдур. Амма бир шеји унутмајын: бу мәсулијјәтләрә јијәләнмәк үчүн лазым олан тәләбләрин һамысы Мүгәддәс Китаба әсасланыр вә тәмәлиндә Јеһоваја, аиләнизә, јығынҹаға мәһәббәт дајаныр (1 Тим. 3:1—13; Тит. 1:6—9; 1 Бут. 5:2, 3). Чалышын бу тәләбләрин һәр бирини баша дүшәсиниз. Тәләбләрә ҹаваб вермәк үчүн дуада Јеһовадан көмәк истәјин c.

17. Ҝәнҹ гардаш әр вә аилә башчысы олмаға неҹә һазырлаша биләр? (Һәмчинин шәклә бахын.)

 ¹⁷ Әр вә аилә башчысы олмаға. Бәзи јеткин мәсиһи гардашлар, Исанын дедији кими, субај галмағы сечир (Мәт. 19:12). Амма әҝәр сиз евләнмәк гәрарына ҝәлсәниз, әр вә аилә башчысы ролуну да үзәринизә ҝөтүрмүш олаҹагсыныз (1 Кор. 11:3). Јеһова әрдән арвадыны севмәји, онун физики, емосионал вә руһани тәләбатларынын гајғысына галмағыны ҝөзләјир (Ефес. 5:28, 29). Мәгаләнин әввәлиндә арашдырдығымыз кејфијјәтләр вә баҹарыглар, мәсәлән, сағламдүшүнҹәли олмаг, гадынлара һөрмәт гојмаг, етибарлы олмаг сизә јахшы әр олмаға көмәк едәҹәк. Бунунла сиз әр вә аилә башчысы кими өһдәнизә дүшән мәсулијјәти иҹра етмәјә һазыр олаҹагсыныз.

18. Ҝәнҹ гардаш ата олмаға неҹә һазырлаша биләр?

¹⁸ Ата олмаға. Евләнәндән сонра, ола билсин, ушағыныз олсун. Јахшы ата олмагла бағлы Јеһовадан чох шеј өјрәнә биләрсиниз (Ефес. 6:4). Јеһова Оғлу Исаја ону севдијини, ондан разы галдығыны демишди (Мәт. 3:17). Ата олсаныз, ушагларыныза һәмишә онлары севдијинизи дејин. Јахшы ишләринә ҝөрә онлары тез-тез тәрифләјин. Јеһовадан өрнәк ҝөтүрән аталар өвладларына јеткин мәсиһи олмаға көмәк едирләр. Она ҝөрә дә нә гәдәр ки субајсыныз, индидән аилә үзвләринизин, јығынҹагдакы баҹы-гардашларын гајғысына галын, онлара севҝинизи, миннәтдарлығынызы билдирмәји өјрәнин (Јәһ. 15:9). Бу сизә ҝәләҹәкдә јахшы әр, јахшы ата олмаға көмәк едәҹәк. Беләҹә, артыг индидән Јеһова үчүн, аиләниз үчүн вә јығынҹағыныз үчүн дәјәрли мәсиһи олаҹагсыныз.

19, 20. Ҝәнҹ гардашлара јеткин мәсиһи олмаға нә көмәк едәҹәк? (Үз габығындакы шәклә бахын.)

¹⁹ Әзиз ҝәнҹ гардашлар, јеткин мәсиһи олмаг өз-өзүнә баш верән просес дејил. Бунун үчүн јахшылардан өрнәк ҝөтүрмәли, сағламдүшүнҹәли, етибарлы олмалы, мүәјјән баҹарыглара јијәләнмәли вә ҝәләҹәк мәсулијјәтләринизә һазырлашмалысыныз.

²⁰ Јәгин, фикирләширсиниз: «Мән нә гәдәр шејин үзәриндә ишләмәлијәм!» Нараһат олмајын, сиздә алынаҹаг. Унутмајын, Јеһова сизә көмәк етмәји чох истәјир (Әшј. 41:10, 13). Сөзсүз, јығынҹагдакы баҹы-гардашларын да дәстәјинә архалана биләрсиниз. Артыг јеткин мәсиһи оланда һәјатыныз долғун, мәналы олаҹаг. Әзиз ҝәнҹ гардашлар, биз сизи чох севирик. Гој Јеһова јеткин мәсиһи олмаг үчүн ҝөрдүјүнүз һәр бир иши аванд етсин! (Мәс. 22:4).