1. Ибраһимин үмиди нәјә ҝөрә бош јерә дејилди?

 ЈЕҺОВА досту Ибраһимә белә бир вәд вермишди: «Јер үзүнүн бүтүн халглары сәнин өвладын васитәсилә мүбарәк олаҹаг» (Јар. 15:5; 22:18). Ибраһимин Јеһоваја иманы ҝүҹлү олдуғу үчүн о бу вәдин ҝерчәкләшәҹәјинә әмин иди. Анҹаг Ибраһимин 100, Саранын 90 јашы олса да, онларын һәлә дә оғуллары дүнјаја ҝәлмәмишди (Јар. 21:1—7). Бунунла белә, Мүгәддәс Китабда дејилир: «[Ибраһим] үмидини үзмәди, иман етди ки, чохлу халгларын атасы олаҹаг» (Ром. 4:18). Билдијимиз кими, Ибраһим пејғәмбәрин үмиди ҝерчәкләшди. Онун узун илләрдир һәсрәтиндә олдуғу оғлу Исһаг дүнјаја ҝәлди. Ибраһим пејғәмбәрдә Јеһованын вәдләринин ҝерчәкләшәҹәјинә әминлик һарадан иди?

2. Ибраһим Јеһованын вәдинин ҝерчәкләшәҹәјинә нәјә ҝөрә әмин иди?

² Ибраһим пејғәмбәрин Јеһова илә сых достлуг мүнасибәти вар иди. Буна ҝөрә дә о, там әмин иди ки, Аллаһ вердији вәди јеринә јетирәҹәк (Ром. 4:21). Јеһова Ибраһимдән разы галды вә иманына ҝөрә ону салеһ сајды (Јаг. 2:23). Ромалылара 4:18 ајәсиндән дә ҝөрмәк олар ки, Ибраһимин иманы вә үмиди бир-бири илә бағлы иди. Ҝәлин Ромалылара 5-ҹи фәсилдән бәзи ајәләрә нәзәр салаг вә ҝөрәк Булус үмид барәдә нә јазыб.

3. Булус үмидлә бағлы нәји изаһ едир?

³ Ромалылара 5:1—5 ајәләриндә Булус бир просесдән данышыр. Һәмчинин о, үмидин мәјуслуг ҝәтирмәдијини дејир вә буна нәјә ҝөрә әмин ола биләҹәјимизи изаһ едир (Ром. 5:5). Бундан башга, Булус үмидимизи неҹә мөһкәмләндирә  биләҹәјимизи вурғулајыр. Һәмин ајәләри арашдырдыгҹа өз үмидиниз барәдә дүшүнүн. Бунунла ҝәләҹәјә үмидинизин вахт кечдикҹә даһа да мөһкәмләндијини ҝөрәҹәксиниз. Һәмчинин өјрәнәҹәксиниз ки, үмидимизин индикиндән дә мөһкәм олмасы үчүн нә етмәк олар. Ҝәлин әввәлҹә бизә мәјуслуг ҝәтирмәјәҹәк бу мөһтәшәм үмиддән данышаг.

4. Ромалылара 5:1, 2 ајәләриндә сөһбәт нәдән ҝедир?

⁴ Ромалылара 5:1, 2 ајәләрини охујун. Булус бу сөзләри Ромадакы јығынҹаға үнванламышды. Орадакы баҹы-гардашлар Јеһова вә Иса һагда өјрәнмиш, иман јетишдирмиш вә мәсиһи олмушдулар. Јеһова иманларына ҝөрә онлары салеһ сајмыш вә мүгәддәс руһла мәсһ етмишди. Бәли, онлар ҹанлы, мөһтәшәм үмидә саһиб олмушдулар.

5. Мәсһ олунмушларын һансы үмиди вар?

⁵ Булус сонралар Ефесдәки мәсһ олунмуш мәсиһиләрә Аллаһын онлара вердији үмид барәдә јазмышды. Бу үмид мүгәддәсләрә «мирас кими» верилмишди (Ефес. 1:18). Колослулара јаздығы мәктубда исә Булус мәсһ олунмуш мәсиһиләрә үмидләринин һарада ҝерчәкләшәҹәјини демишди. О бу үмидин онлар үчүн «ҝөјләрдә» горунуб сахланылдығыны билдирмишди (Кол. 1:4, 5). Демәли, мәсһ олунмуш мәсиһиләр ҝөјдә әбәди һәјат үчүн дирилиб Мәсиһлә бирҝә һакимијјәт сүрәҹәкләринә үмид едирләр (1 Салон. 4:13—17; Вәһј 20:6).

6. Бир мәсһ олунмуш гардаш өз үмиди илә бағлы нә демишди?

⁶ Мәсһ олунмуш мәсиһиләр бу үмидләрини гијмәтләндирирләр. Онлардан бири дә Фредерик Франс гардаш иди. О, 1991-ҹи илдә үмиди барәдә демишди: «Бизим үмидимиз мүтләг ҝерчәкләшәҹәк. 144 000-ин һәр бир үзвү Аллаһын вәд етдији мүкафаты алаҹаг.  Бу мүкафат саһиб олдуғумуз һәр шејдән гат-гат дәјәрлидир». Фредерик гардаш бу сөзләри узун илләр Јеһоваја хидмәт етдикдән сонра демишди. О, сөзүнә белә давам едир: «Саһиб олдуғумуз бу үмид бизим үчүн һәлә дә дәјәрини итирмәјиб... Нә гәдәр чох ҝөзләјириксә, миннәтдарлығымыз да бир о гәдәр артыр. Чүнки бу үмиди ҝөзләмәјә дәјәр. Јери ҝәлсә, лап милјон ил дә ҝөзләјәрик. Инди үмидим мәним үчүн әввәлкиндән даһа да дәјәрлидир».

7, 8. Јеһованын әксәр хидмәтчиләринин һансы үмиди вар? (Ромалылара 8:20, 21).

⁷ Бу ҝүн Јеһоваја хидмәт едән әксәр мәсиһиләрин исә башга үмиди вар. Онларын үмидләри Ибраһим пејғәмбәрин үмиди илә ејнидир. Јәни онлар Аллаһын Падшаһлығы алтында јер үзүндә әбәди јашамаға үмид едирләр (Ибр. 11:8—10, 13). Булус бу үмидә саһиб оланлары ҝөзләјән мөһтәшәм немәтләр барәдә јазмышды. (Ромалылара 8:20, 21 ајәләрини охујун.) Мүгәддәс Китабдан ҝәләҹәклә бағлы вәдләр һагда илк дәфә өјрәнәндә ән чох һансы вәд сизин хошунуза ҝәлмишди? Бир ҝүн һәр кәсин камил, ҝүнаһсыз олаҹағы вәди, јохса өлән әзизләринизин Ҹәннәтдә дирилиб јенидән јашајаҹағы вәди? Аллаһын вердији үмид сајәсиндә ҝерчәкләшмәсини сәбирсизликлә ҝөзләдијимиз чох немәт вар.

⁸ Фәрги јохдур, биз ҝөјдә, јохса јер үзүндә әбәди јашамаға үмид едирик, онларын һәр бири мөһтәшәмдир вә бизә севинҹ ҝәтирир. Саһиб олдуғумуз бу үмид ҝетдикҹә даһа мөһкәм ола биләр. Булус бунун неҹә баш вердијини изаһ едир. Ҝәлин ҝөрәк, о, үмидимизлә бағлы нә јазмышды. Онун сөзләри үмид етдијимиз шејин мүтләг ҝерчәкләшәҹәјинә әминлијимизи артыраҹаг.

9, 10. Булусун һәјатындан ҝөрүндүјү кими мәсиһиләр нәјин олаҹағыны ҝөзләмәлидир? (Ромалылара 5:3). (Һәмчинин шәкилләрә бахын.)

⁹ Ромалылара 5:3 ајәләрини охујун. Булус гејд едир ки, әзијјәтләрлә үзләшәндә  үмидимизин ҝерчәкләшәҹәјинә әминлијимиз даһа да мөһкәмләнир. Бу фикир сизә гәрибә ҝәлә биләр. Амма бир шеј вар ки, Мәсиһин бүтүн давамчылары әзијјәтләрлә үзләшәҹәјини ҝөзләмәлидир. Булусу јадымыза салаг. О, Салоникидәки мәсиһиләрә демишди: «Јанынызда оланда да бүтүн бу әзијјәтләрин баш верәҹәјиндән сизи хәбәрдар едирдик. Билдијиниз кими, белә дә олду» (1 Салон. 3:4). Коринфлиләрә исә о јазмышды: «Гардашлар, сизи... башымыза ҝәлән бәладан бихәбәр гојмаг истәмирик... Һәтта сағ галаҹағымыза... үмид етмирдик» (2 Кор. 1:8; 11:23—27).

¹⁰ Бу ҝүн дә мәсиһиләр әзијјәтләринин олаҹағыны билир (2 Тим. 3:12). Сизин һансы сынагларыныз олуб? Бәлкә дә Исаја иман едиб онун шаҝирди олдуғунуз үчүн һансыса чәтинликләриниз олуб. Ола билсин, достларыныз, гоһумларыныз сизи лаға гојуб, һәтта сизә дүшмән кәсилиб. Бәлкә дә һәр саһәдә дүрүст олмағыныз ишдә мүәјјән проблемләр јарадыб (Ибр. 13:18). Јахуд үмидиниз барәдә инсанларла данышдығыныз үчүн һөкумәт тәрәфиндән тәгиб олунмусунуз. Амма һансы әзијјәтләрлә үзләшмәјимиздән асылы олмајараг, Булус демишди ки, биз севинмәлијик.

11. Нәјә ҝөрә һәр ҹүр сынаға дөзмәјә гәтијјәтли олмалыјыг?

¹¹ Әзијјәтләрлә үзләшәндә нәјә ҝөрә севинмәлијик? Чүнки бу биздә ваҹиб бир кејфијјәти јетишдирир. Ромалылара 5:3 ајәсиндә дејилир: «Әзијјәтләр дөзүмлү олмағы өјрәдир». Бүтүн мәсиһиләр әзијјәтләрлә үзләшәҹәји үчүн бу кејфијјәт онларын һамысына лазымдыр. Биз истәнилән сынаг заманы дөзүм ҝөстәрмәјә гәтијјәтли олмалыјыг. Јалныз бу һалда үмид етдијимиз мүкафаты алаҹағыг. Иса Мәсиһ бир мәсәлиндә тохумун дашлы торпаға дүшдүјүнү демишди. Биз онун бу мәсәлдә нәзәрдә тутдуғу инсанлара бәнзәмәк истәмирик. Бу ҹүр инсанлар сөзү севинҹлә гәбул етсәләр дә, «чәтинлик, тәгиб» башлајанда иманлары сарсылыр (Мәт. 13:5, 6, 20, 21). Дүздүр, тәгибләрлә, сынагларла үзләшмәк инсана хош дејил, амма бунлара дөзмәјин хејри бөјүкдүр. Ҝәлин бунун хејриндән данышаг.

12. Сынаглара дөзмәјин бизә һансы хејри вар?

¹² Шаҝирд Јагуб дөзүм ҝөстәрмәјин хејрини вурғуламышды. О јазмышды: «Гој дөзүм өз ишини тамамласын ки, сиз камил вә һәр ҹәһәтдән сағлам оласыныз, һеч нәдә әскијиниз олмасын» (Јаг. 1:2—4). Јагуб дөзүмүн санки бир иш ҝөрдүјүнү дејир. Дөзүм һансы иши ҝөрүр? О бизә сәбир, иман вә Аллаһа етибар кими хүсусијјәтләри даһа да инкишаф етдирмәјә көмәк едир. Амма дөзүмүн хејри бунунла битмир.

13, 14. Дөзүм нә газандырыр вә бу, үмидлә неҹә бағлыдыр? (Ромалылара 5:4).

¹³ Ромалылара 5:4 ајәсини охујун. Булус дөзүмүн «Аллаһын разылығыны» газандырдығыны гејд едир. Бу о демәк дејил ки, әзаб чәкдијинизи ҝөрмәк Аллаһа хошдур. Әксинә, Јеһоваја хош олан сизин садиг галмағыныздыр. Бәли, дөзүмүнүзлә Аллаһын гәлбини шад едирсиниз. Бундан ҝөзәл нә ола биләр? (Зәб. 5:12).

¹⁴ Ҝәлин, Ибраһим пејғәмбәри јадымыза салаг. О да чохлу чәтинликләрлә үзләшмишди, амма садиг галдығы үчүн Јеһованын разылығыны газаныб, Онун досту олмушду вә салеһ сајылмышды (Јар. 15:6; Ром. 4:13, 22). Биз дә онун кими ола биләрик. Јеһованын разылығыны газанмаг Онун јолунда нә гәдәр иш ҝөрмәјимиздән,  тәјинатларымыздан асылы дејил. О, сәдагәтлә дөзүм ҝөстәрдијимизә ҝөрә биздән разы галыр. Јашымыздан, вәзијјәтимиздән, баҹарығымыздан асылы олмајараг, һамымыз дөзүм ҝөстәрә биләрик. Бәлкә дә һал-һазырда һансыса сынағыныз вар вә сәдагәтлә дөзүрсүнүз. Әмин олун ки, Јеһова сиздән чох разыдыр. Буну биләндә ҝәләҹәјә үмидиниз даһа да мөһкәмләнир.

15. Ромалылара 5:4, 5 ајәләриндә Булус нә дејир вә нәјә ҝөрә бу бәзиләриндә чашгынлыг јарадыр?

¹⁵ Булусун да гејд етдији кими, сынаглара таб ҝәтирмәјин сајәсиндә биз Јеһованын разылығыны газанырыг. Булус сөзүнә белә давам едир: «Аллаһын разылығындан үмид доғур. Үмид исә мәјуслуг ҝәтирмәз» (Ром. 5:4, 5). Бу фикир бәзиләрини чаш-баш гојур. Чүнки бундан әввәл Ромалылара 5:2 ајәсиндә Булус Ромада јашајан мәсиһиләрә артыг үмидләринин олдуғуну дејир. Бу мәсиһиләр Аллаһын онлары шәрәфә чатдыраҹағына үмид едирди. Кимдәсә суал јарана биләр: «Онларын артыг үмиди олдуғу һалда нәјә ҝөрә Булус сијаһынын сонунда јенә үмиди гејд едир?»

16. Инсанын үмиди неҹә артыр? (Һәмчинин шәкилләрә бахын.)

¹⁶ Буну баша дүшмәк үчүн үмидин арта билдијини унутмамалыјыг. Мәсәлән, Аллаһын Кәламында верилән мөһтәшәм үмид барәдә илк дәфә ешитдијиниз вахтлар јадыныздадыр? Јәгин, һәмин вахт дүшүнүрдүнүз ки, јер үзүндә әбәди јашамаг садәҹә ҝөзәл бир хәјалдыр. Амма Јеһова вә Онун вәдләри барәдә даһа чох өјрәндикҹә бу үмидинизин доғрулаҹағына әминлијиниз ҝет-ҝедә артды.

17. Һәср олунуб вәфтиз олундугдан сонра үмидиниз артмаға неҹә давам едир?

¹⁷ Һәср олунуб вәфтиз олунандан сонра да Јеһованы даһа јахындан таныдығыныз вә јеткинләшдијиниз үчүн үмидиниз бөјүмәјә давам етди (Ибр. 5:13—6:1). Јәгин, Ромалылара 5:2—4 ајәләриндә јазыланлары  өз тәҹрүбәниздә јашамысыныз. Јәни сиз мүхтәлиф әзијјәтләрлә үзләшмисиниз, амма дөзүм ҝөстәриб Аллаһын разылығыны газанмысыныз. Буну биләндән сонра исә Аллаһын вәд етдији шејләри алаҹағынызы ҝөзләмәк үчүн даһа чох сәбәбиниз јараныб. Үмидиниз әввәлкиндән дә мөһкәм олуб. Артыг о сизин үчүн даһа ҝерчәк, даһа реалдыр. Саһиб олдуғунуз үмид һәјатынызын һәр саһәсинә ҝүҹлү тәсир едир, мәсәлән, аиләнизлә рәфтарыныза, вердијиниз гәрарлара вә вахтыныздан неҹә истифадә етмәјинизә.

18. Јеһова һансы зәманәти верир?

¹⁸ Булус Аллаһын разылығыны газанандан сонра саһиб олдуғунуз үмид барәдә ваҹиб бир фикри вурғулајыр. О сизи үмидинизин ҝерчәкләшәҹәјинә әмин едир. Буна нәјә ҝөрә әмин ола биләрсиниз? Булус Аллаһын илһамы илә мәсиһиләрә белә бир зәманәт верир: «Үмид... мәјуслуг ҝәтирмәз. Чүнки бизә верилмиш мүгәддәс руһ васитәсилә үрәјимизә Аллаһын мәһәббәти долмушдур» (Ром. 5:5). Јеһованын сизә вердији үмидин ҝерчәкләшәҹәјинә там архајын ола биләрсиниз!

19. Үмидинизлә бағлы нәјә әмин ола биләрсиниз?

¹⁹ Јеһованын Ибраһим пејғәмбәрә вердији вәд, ондан разы галмасы, ону досту адландырмасы үзәриндә дүшүнүн. Ибраһимин үмиди боша чыхмады. Мүгәддәс Китабда дејилир: «Ибраһим сәбир ҝөстәрәндән сонра бу вәди алды» (Ибр. 6:15; 11:9, 18; Ром. 4:20—22). О, сәбир ҝөстәрдијинә ҝөрә гәтијјән пешман олмады. Әҝәр садиг галсаныз, сиз дә үмидинизә ҝөрә мүкафат алаҹагсыныз. Үмидиниз ҝерчәкдир, о, севинҹ ҝәтирир, мәјуслуг јох! (Ром. 12:12). Булус јазмышды: «Гој үмид мәнбәји олан Аллаһ Она олан етибарыныз сајәсиндә үрәјинизи севинҹ вә сүлһлә долдурсун вә үмидиниз мүгәддәс руһун гүввәти илә долуб-дашсын» (Ром. 15:13).