1, 2. Һансы һадисәләр ҝөз јашларымыза сәбәб ола биләр?

 ҺАМЫМЫЗ өмрүмүздә бир дәфә дә олса, ҝөз јашы төкмүшүк. Бәзән бу ҝөз јашлары севинҹ ҝөз јашлары олур. Ола билсин, һәјатынызда хүсуси бир һадисә баш вериб. Мәсәлән, ушағыныз дүнјаја ҝәлиб, хош хатирәләр јадыныза дүшүб, ја да узун илләрдир ҝөрмәдијиниз достунузла ҝөрүшмүсүнүз.

² Амма әксәр һалларда ҝөз јашларымыза сәбәб гәлбимиздә дујдуғумуз ағры олур. Мәсәлән, ола билсин, кимсә бизи бәрк мәјус етдији үчүн ағлајаг. Амансыз хәстәлик уҹбатындан ҝүҹлү ағрылар чәкәндә, јахуд доғмамыз вәфат едәндә дә ҝөз јашы төкүрүк. Белә вахтларда өзүмүзү Әрәмја пејғәмбәр кими һисс едә биләрик. Бабиллиләр Јерусәлими ишғал едәндә Әрәмја демишди: «Ҝөзүм булаг кими чағлајыр. Ҝөз јашларым дурмадан ахыр, дајанмыр» (Мәрс. 3:48, 49).

3. Хидмәтчиләринин әзаб чәкдијини ҝөрәндә Јеһова һансы һиссләри кечирир? (Әшија 63:9).

³ Јеһова пәришан анларымызда нә гәдәр ҝөз јашы төкдүјүмүзү билир. Мүгәддәс Китабда дејилир ки, Јеһова хидмәтчиләринин әзаб чәкдији һәр бир вәзијјәтдән аҝаһдыр вә биз Ондан имдад диләјәндә јалварышларымызы ешидир (Зәб. 34:15). Јеһова дәрдимизи ҝөрмәклә, јалварышларымызы ешитмәклә кифајәтләнмир. О бизи — Өз балаларыны севир. Буна ҝөрә дә ҝөз јашларымызы ҝөрәндә О да кәдәрләнир вә дәрһал һајымыза јетир. (Әшија 63:9 ајәсини охујун.)

4. Мүгәддәс Китабдан кимләрин нүмунәсини арашдыраҹағыг вә бундан Јеһова һагда нә өјрәнәҹәјик?

 ⁴ Јеһова садиг бәндәләринин ҝөз јашларына неҹә јанашдығыны вә онлара неҹә көмәк етдијини Кәламында ачыглајыр. Буну Һәннәнин, Давудун вә Һизгијјәнин һадисәсиндән ҝөрә биләрик. Онларын ҝөз јашларына сәбәб нә иди? Јеһова онларын көмәк үчүн етдији јалварышлара неҹә һај верди? Кәдәрли анларымызда, хәјанәтлә үзләшәндә вә вәзијјәтимиз үмидсиз ҝөрүнәндә онларын нүмунәси бизә неҹә тәскинлик верә биләр?

КӘДӘР ҜӨЗ ЈАШЛАРЫ

5. Һәннәнин үзләшдији вәзијјәт она неҹә тәсир етмишди?

⁵ Һәннә ону ҝөз јашларына гәрг едән бир сыра проблемләрлә үзләшмишди. Бир дәрди о иди ки, Һәннә евин тәк арвады дејилди. Онун әринин Фәнинә адлы башга бир арвады да вар иди. Фәнинәнин Һәннәдән зәһләси ҝедирди. Бу азмыш кими Һәннәнин ушағы олмурду. Фәнинәнин исә бир нечә ушағы вар иди (1 Ишм. 1:1, 2). Фәнинә ҝедиб-ҝәлиб Һәннәни әлә салырды, сонсуз олдуғуну онун үзүнә вурурду. Сиз белә вәзијјәтдә олсајдыныз, һансы һиссләри кечирәрдиниз? Һәннә о гәдәр мәјус иди ки, «ағлајыр вә чөрәк јемирди», о «чох кәдәрли иди» (1 Ишм. 1:6, 7, 10).

6. Һәннә тәсәлли тапмаг үчүн нә етди?

⁶ Һәннәјә нә тәсәлли верди? Һәгиги ибадәтин мәркәзи олан мүгәддәс чадыра ҝетмәсинин она бөјүк көмәји дәјди. Ҝөрүнүр о, оранын һәјәтинин ҝиришинә јахын бир јердә дајаныб «аҹы-аҹы ағлајараг Јеһоваја дуа етмәјә башлады». Јеһоваја јалварыб деди ки, «бу гулунун дәрдинә биҝанә» галмасын, она нәзәр салсын (1 Ишм. 1:10б, 11). Һәннә дуада бүтүн үрәјини Јеһоваја бошалтды. Јеһова бу әзиз гызынын ҝөз јашларыны ҝөрәндә сөзсүз ки, она үрәји ағрымышды.

7. Һәннә үрәјини Јеһоваја бошалдандан сонра һансы һиссләри кечирди?

⁷ Баш каһин Әли Һәннәјә деди ки, Аллаһ онун дуасына ҹаваб верәҹәк. Һәннә бундан сонра өзүнү неҹә һисс етди? Мүгәддәс Китабда дејилир: «[Һәннә] ҝетди вә јемәк једи. Артыг онун чөһрәсиндә кәдәр олмады» (1 Ишм. 1:17, 18). Вәзијјәт һәлә дәјишмәсә дә, артыг Һәннәнин үрәјиндә раһатлыг вар иди. Һәннә она ағырлыг едән јүкү Јеһованын үзәринә гојмушду. Јеһова онун әзабларыны ҝөрдү, јалварышларыны ешитди, сонра исә она өвлад пајы верди (1 Ишм. 1:19, 20; 2:21).

8, 9. Ибраниләрә 10:24, 25 ајәләринә әсасән нәјә ҝөрә ибадәт ҝөрүшләриндә иштирак етмәк үчүн әлимиздән ҝәләни етмәлијик? (Һәмчинин шәклә бахын.)

⁸ Бизим үчүн дәрс. Ола билсин, һазырда үрәјинизи дағлајан дәрдиниз вар вә буна ҝөрә ҝөзүнүзүн јашы гурумур. Бәлкә дә, аилә үзвүнүз вә ја достунуз вәфат едиб.  Белә анларда инсан тәк галмаг истәјир. Бу нормалдыр. Амма јадынызда, Һәннә нә етди? О, мәбәдә ҝетди вә Јеһова орада она тәсәлли вериб руһландырды. Сиз дә һалыныз олмаса белә, ибадәт ҝөрүшләринә ҝетсәниз, тәсәлли тапаҹагсыныз. (Ибраниләрә 10:24, 25 ајәләрини охујун.) Ибадәт ҝөрүшләриндә тәсәлливериҹи ајәләр ешидирик. Бу заман Јеһова бизә мәнфи фикирләри мүсбәт фикирләрлә әвәз етмәјә көмәк едир. Беләҹә, һал-һазырда вәзијјәт олдуғу кими галса да, өзүнүзү даһа јахшы һисс едәҹәксиниз.

⁹ Ибадәт ҝөрүшләриндә һалымыза јанан баҹы-гардашларла үнсијјәтдә олуруг. Онларын севҝисини дујмаг, руһландырыҹы сөзләрини ешитмәк бизим әһвалымызы галдырыр (1 Салон. 5:11, 14). Ҝәлин хүсуси өнҹүл олан бир гардашын һадисәсинә бахаг. Онун һәјат јолдашы вәфат едиб. Гардаш дејир: «Јолдашым үчүн чох дарыхырам. Бәзән тәк галмаг истәјирәм, отуруб һөнкүр-һөнкүр ағлајырам. Амма ибадәт ҝөрүшләринә ҝедәндә чох руһланырам. Баҹы-гардашларын дедији хош сөзләр, вердији шәрһләр јаралы гәлбими овудур. Јығынҹагдан габаг нә гәдәр мәјус, нараһат олсам да орада өзүмү хејли јахшы һисс едирәм». Бәли, ибадәт ҝөрүшләриндә оланда Јеһова баҹы-гардашлар васитәсилә бизә дајаг олур.

10. Кәдәрли оланда Һәннәнин нүмунәси бизә неҹә көмәк едә биләр?

¹⁰ Һәмчинин Һәннә дуада һиссләрини Јеһоваја ачыб бошалдандан сонра да тәсәлли тапды. Сиз дә «бүтүн гајғыларынызы Онун [Јеһованын] үзәринә гојун», әмин олун О сизи динләјәҹәк (1 Бут. 5:7). Бир баҹымызын әрини силаһлы сојғунчулар гәтлә јетирмишди. Баҹы дејир: «Санки гәлбим чилик-чилик олмушду. Дүшүнүрдүм, чәтин ки нә вахтса бир дә үзүм ҝүлсүн. Амма сәмави Атам Јеһоваја етдијим дуалар сајәсиндә гәлбимә раһатлыг чөкдү. Бәзән дуа едәркән дүзҝүн сөзләр сечә билмирдим, амма Јеһова мәни анлајырды. Емосионал ҹәһәтдән чөкдүјүм вахтларда дуа едиб Јеһовадан гәлб раһатлығы диләјирдим. Бундан сонра үрәјимдә дәрһал сакитлик дујурдум вә ҝүнүмә давам едә билирдим». Сиз үрәјинизи Јеһоваја бошалданда О, ҝөз јашларынызы ҝөрүб сизә үрәји јаныр, нәләр кечирдијинизи јахшы билир. Һәтта нараһатлығыныза сәбәб олан вәзијјәт дәјишмәсә дә, Јеһова гәлбинизи овундуруб сизә сакитлик бәхш едәҹәк (Зәб. 94:19; Филип. 4:6, 7). Үстәлик, садиг галмаг үчүн дөзүм ҝөстәрдијинизә ҝөрә О сизә мүкафат верәҹәк (Ибр. 11:6).

ХӘЈАНӘТИН СӘБӘБ ОЛДУҒУ ҜӨЗ ЈАШЛАРЫ

11. Давуд һансы чәтинликләрлә үзләшмишди вә буна ҝөрә һансы һиссләри кечирмишди?

¹¹ Давудун башы чох бәла чәкмишди, о чох ҝөз јашы төкмүшдү. Онунла әдавәт апаран инсанларын сајы чох иди. Һәтта етибар етдији инсанлар она хәјанәт етмишди (1 Ишм. 19:10, 11; 2 Ишм. 15:10—14, 30). Бир дәфә о белә сөзләр демишди: «Тәнҝә ҝәлмишәм аһ-наләмдән, јатағым бүтүн ҝеҹәни ағламагдан јамјаш олуб, сел кими ахыр јорған-дөшәјимә ҝөз јашларым». Нәјә ҝөрә Давуд бу ҹүр һиссләр кечирирди? Өзүнүн дә дедији кими «дүшмәнләрин әлиндән» (Зәб. 6:6, 7). Башгаларынын пис рәфтары уҹбатындан Давудун ҝөз јашлары селә дөнмүшдү.

12. Зәбур 56:8 ајәсиндән ҝөрүндүјү кими Давуд нәјә әмин иди?

¹² Давудун һәјаты чох ағыр олса да, о јенә дә әмин иди ки, Јеһова ону севир. Давуд  јазмышды: «Јеһова һөнкүртүмү ешидәҹәк» (Зәб. 6:8). Бир дәфә исә о өз һиссләрини чох мараглы тәрздә ифадә етмишди. Бу барәдә Зәбур 56:8 ајәсиндә јазылыб. (Ајәни охујун.) Бу сөзләр Јеһованын бизи нә гәдәр чох севдијини, һиссләримизә гаршы биҝанә олмадығыны ҝөзәл тәсвир едир. Давуд демишди ки, Јеһова санки онун ҝөз јашларыны тулуға јығыр, јахуд китабында гејд едир. О, Јеһованын она нәзәр салдығына, чәкдији ағрыны унутмадығына әмин иди. Давуд билирди ки, Јеһова онун һансы чәтинликләрлә үзләшдијиндән вә бунун она неҹә тәсир етдијиндән аҝаһдыр.

13. Инсанлар бизә гәлб ағрысы јашаданда һансы фикирләр бизә тәсәлли верә биләр? (Һәмчинин шәклә бахын.)

¹³ Бизим үчүн дәрс. Ола билсин, етибар етдијиниз инсан хәјанәти илә вә ја башга һәрәкәти илә сизин гәлбинизи гырыб. Бәлкә дә, ҝөзләнилмәдән аиләниз дағылыб, ја да ҝөрүшдүјүнүз инсандан ајрылмысыныз. Јахуд доғманыз Јеһоваја хидмәт етмәји дајандырыб. Бир гардашын һәјат јолдашы зина едиб ону тәрк етмишди. Гардаш дејир: «Мән чох сарсылмышдым. Баш верәнләри ағлыма сығышдыра билмирдим. Өзүмү лазымсыз һисс едирдим, мәјус идим, гәзәбли идим». Әҝәр кимсә сизә хәјанәт едиб вә ја гәлбинизи јаралајыбса, билин ки, Јеһова сизи һеч вахт атмаз. Гој бу фикир сизә тәсәлли версин. Һәмин гардаш дејир: «Бир шеји баша дүшдүм: инсан сәнә садиг галмаса да, Јеһова һәмишә достуна садигдир. Нә баш версә дә, О һәмишә бизим јанымызда олаҹаг. Јеһова садиг бәндәләрини әсла тәрк етмәз» (Зәб. 37:28). Бир шеји дә јадда сахлајын: һеч ким сизи Јеһова гәдәр севә билмәз. Хәјанәтә уғрасаныз да, билин ки, сиз һәлә дә Јеһованын ҝөзүндә дәјәрлисиниз (Ром. 8:38, 39). Унутмајын, инсанын сизинлә неҹә рәфтар етмәсиндән асылы олмајараг сәмави Атаныз сизи чох севир.

14. Зәбур 34:18 ајәсиндә јазылмыш сөзләр сизи нәјә әмин едир?

¹⁴ Хәјанәтлә үзләшмисинизсә, Давудун Зәбур 34:18 ајәсиндәки сөзләри дә сизә тәсәлли верә биләр. (Ајәни охујун.) Бир елми мәнбәјә әсасән бу ајәдә «пәришан инсанлар» дејиләндә «ҝәләҹәкдә јахшы бир шејин олаҹағына үмид етмәјәнләр» нәзәрдә тутулур. Јеһова бу ҹүр һиссләр кечирән инсанлара неҹә јанашыр? Валидејн ағлајан өвладыны гуҹағына алыб ону овутдуғу кими Јеһова да бизә бу ҹүр «јахындыр». Хәјанәтә вә диҝәр сәбәбә ҝөрә мәјус оланда, О, дәрдимизә шәрик олур, һајымыза јетир. Јеһова сынмыш гәлбимизи сарымаға, руһумузу дирчәлтмәјә һазырдыр.  Үстәлик, индики чәтинликләримизә дөзәк дејә ҝәләҹәкдә бизи чохлу ҝөзәл шејләрин ҝөзләдијини хатырладыр (Әшј. 65:17).

ҮМИДСИЗЛИКДӘН ДОҒАН ҜӨЗ ЈАШЛАРЫ

15. Һизгијјәнин ҝөз јашларына нә сәбәб олмушду?

¹⁵ Јәһуда падшаһы Һизгијјә 39 јашы оланда өлүмҹүл хәстәлијә тутулду. Әшија пејғәмбәр Һизгијјәјә Јеһованын сөзүнү чатдырыб дејир ки, о бу хәстәликдән өләҹәк (2 Пад. 20:1). Һизгијјәнин вәзијјәти үмидсиз ҝөрүнүрдү. Һизгијјә бу хәбәрдән бәрк сарсылды вә «аҹы-аҹы ағлады». О Јеһоваја һәрарәтлә дуа етди (2 Пад. 20:2, 3).

16. Јеһова Һизгијјәнин ҝөз јашлары ичиндә етдији дуаја неҹә ҹаваб верди?

¹⁶ Јеһова Һизгијјәнин ҝөз јашлары ичиндә етдији јалварышы ешитди вә она јазығы ҝәлди. О, Һизгијјәјә белә деди: «Дуаны ешитдим. Ҝөз јашларыны ҝөрдүм. Сәнә шәфа верәҹәјәм». Әшија пејғәмбәр васитәсилә Јеһова сөз верди ки, Һизгијјәнин өмрүнү узадаҹаг вә Јерусәлими ашшурлуларын әлиндән гуртараҹаг (2 Пад. 20:4—6).

17. Сәһһәтимиздә ҹидди проблемләр варса, Јеһова бизә неҹә дајаг олур? (Зәбур 41:3; һәмчинин шәклә бахын.)

¹⁷ Бизим үчүн дәрс. Ола билсин, һал-һазырда сәһһәтинизлә бағлы вәзијјәт үмидсиз ҝөрүнүр. Бу заман Јеһоваја үз тутун, ағлаја-ағлаја да олса Она дуа един. Мүгәддәс Китаб бизи әмин едир ки, Јеһова «мәрһәмәтли Ата вә һәр ҹүр тәсәлли Аллаһы олуб һәр дәрдимиздә бизә тәсәлли» верәҹәк (2 Кор. 1:3, 4). Бу ҝүн биз Јеһовадан бүтүн проблемләримизи арадан галдырмасыны ҝөзләјә билмәрик, амма бизә дајаг олаҹағына архајын ола биләрик. (Зәбур 41:3 ајәсини охујун.) Јеһова мүгәддәс руһу васитәсилә бизә дөзмәк үчүн ҝүҹ, һикмәт вә гәлб раһатлығы верир (Мәс. 18:14; Филип. 4:13). О һәмчинин бүтүн хәстәликләри арадан галдыраҹағына сөз верәрәк бу үмид васитәсилә бизә дајаг олур (Әшј. 33:24).

18. Ағыр сынагларла үзләшәндә һансы ајәләр сизә тәсәлли вериб? (« Ҝөз јашларымызы силән ајәләр» адлы чәрчивәјә бахын.)

¹⁸ Јеһованын сөзләри Һизгијјәјә тәсәлли вермишди. Биз дә Аллаһын Кәламындан тәсәлли тапа биләрик. Орада јазылан сөзләр һәјатымызын ағыр анларында бизә тәсәлли, гол-ганад верә биләр (Ром. 15:4). Гәрби Африкада јашајан бир баҹыја хәрчәнҝ диагнозу гојулмушду. О буна ҝөрә тез-тез ҝөз јашы ахыдырды. Баҹы бөлүшүр: «Мәнә ән чох Әшија 26:3 ајәси тәсәлли верир. Үзләшдијимиз вәзијјәти чох вахт дәјишә билмәсәк дә, бу ајә мәни әмин едир ки, Јеһованын вердији гәлб раһатлығы васитәсилә һәмин чәтинлијә мүнасибәтимизи дәјишә биләрик». Бәс һәдсиз дәрәҹәдә ағыр, һәтта  чыхылмаз ҝөрүнән вәзијјәтдә сизә ән чох һансы ајә тәсәлли верир?

19. Бизи неҹә бир ҝәләҹәк ҝөзләјир?

¹⁹ Бу дүнја сона јахынлашдыгҹа ҝөз јашларымыза сәбәб олаҹаг проблемләр артаҹаг ки, азалмајаҹаг. Амма Һәннәнин, Давудун вә Һизгијјәнин нүмунәсиндән ҝөрдүјүмүз кими Јеһова ахытдығымыз ҝөз јашларыны ҝөрүр. Бу Она гәлб ағрысы верир. Ҝөз јашларымызын һәр бир дамласы Јеһова үчүн дәјәрлидир. Буна ҝөрә дә чәтин вәзијјәтләрлә үзләшәндә дуа едиб дәрһал үрәјинизи Јеһоваја бошалдын. Өзүнүзү баҹы-гардашлардан тәҹрид етмәјин. Бундан башга, Мүгәддәс Китабы охујараг Јеһованын вердији тәсәллини дујун. Әмин ола биләрик ки, әҝәр сәдагәтимизи горусаг вә дөзүм ҝөстәрсәк, Јеһова мүтләг бизә мүкафат верәҹәк. Јеһова сөз верир ки, вахты чатанда кәдәр, хәјанәт вә үмидсизлик уҹбатындан ахытдығымыз ҝөз јашларыны силәҹәк (Вәһј 21:4). О заман биз јалныз севинҹ ҝөз јашлары ахыдаҹағыг.