1. Пахыллыг Јусифин аиләсинә неҹә тәсир ҝөстәрмишди?

ЈАГУБ оғулларынын һамысыны севирди, амма он једди јашлы Јусиф она даһа әзиз иди. Бәс оғуллары буна неҹә јанашырды? Онлар Јусифин пахыллығыны чәкирди вә бу пахыллыг нифрәтә чеврилмишди. Јусиф гардашларында нифрәт доғураҹаг һеч бир шеј етмәмишди. Буна бахмајараг, гардашлары ону гул кими сатыб, аталарына јалан данышмышдылар. Јагуб елә билмишди ки, әзиз оғлуну вәһши һејван парчалајыб. Пахыллыг онларын аиләсиндәки сүлһү позмуш, аталарынын гәлбинә дағ чәкмишди (Јар. 37:3, 4, 27—34).

2. Галатијалылара 5:19—21 ајәләринә әсасән, нә үчүн пахыллыг бу гәдәр тәһлүкәлидир?

² Мүгәддәс Китабда пахыллыг * «ҝүнаһлы бәдәнин әмәлләри» сырасында садаланыр. Бу хүсусијјәтә ҝөрә инсан Аллаһын Падшаһлығына ҝирмәјә биләр. (Галатијалылара 5:19—21 ајәләрини охујун.) Әдавәт, мүнагишә, гәзәб кими хүсусијјәтләр чох вахт елә пахыллыгдан гајнагланыр.

3. Бу мәгаләдә нәји арашдыраҹағыг?

³ Јусифин гардашларынын һәрәкәтиндән ҝөрүнүр ки, пахыллыг аилә мүнасибәтләрини корлајыр, аиләдәки сүлһү, бирлији позур. Дүздүр, биз һеч вахт Јусифин гардашлары кими давранмарыг, лакин һамымыз ҝүнаһлыјыг, хаин үрәјә саһибик (Әрм. 17:9). Елә бу сәбәбә ҝөрә бәзән башгаларынын пахыллығыны чәкирик. Ҝәлин Мүгәддәс Китабдан бир нечә ибрәтамиз нүмунәјә нәзәр салаг вә ҝөрәк нәләр үрәјимиздә пахыллыг һиссинин көк  атмасына сәбәб ола биләр. Һәмчинин бу хүсусијјәтлә мүбаризә апармаг вә сүлһ јаратмаг үчүн нә едә биләҹәјимизи өјрәнәк.

4. Филиштлиләр нә үчүн Исһагын пахыллығыны чәкирди?

⁴ Вар-дөвләт. Исһаг варлы-һаллы адам иди, буна ҝөрә дә филиштлиләр она пахыллыг едирди (Јар. 26:12—14). Һәтта пахыллыгдан онлар Исһагын сүрүләрини сувармаг үчүн истифадә етдији гујулары торпагла долдурмушду (Јар. 26:15, 16, 27). Филиштлиләр кими, бу ҝүн дә бәзи инсанлар мадди имканлары онларынкындан чох оланларын пахыллығыны чәкир. Онлар нәинки башгаларында олан шеји арзулајыр, һәтта «мәндә јохдур, онда да олмасын» дүшүнҹәси илә јашајыр.

5. Дин хадимләри нә үчүн Исаја пахыллыг едирди?

⁵ Севилмәк. Иса Мәсиһ ҹамаатын севҝисини газанмышды, буна ҝөрә дә јәһуди дин хадимләри она пахыллыг едирди (Мәт. 7:28, 29). Иса Аллаһын елчиси иди вә һәгигәти өјрәдирди. Бунунла белә, бу дин хадимләри онун барәсиндә јаланлар вә бөһтанлар јајараг адына гара јахмаға чалышырды (Марк 15:10; Јәһ. 11:47, 48; 12:12, 13, 19). Бундан һансы нәтиҹәјә ҝәлирик? Өз ҝөзәл хүсусијјәтләри илә јығынҹагда баҹы-гардашларын севҝисини газанмыш кәсләрә пахыллыг етмәмәк үчүн өзүмүзлә мүбаризә апармалыјыг. Чалышмалыјыг ки, онларын ҝөзәл хүсусијјәтләрини өрнәк алаг (1 Кор. 11:1; 3 Јәһ. 11).

6. Диотрефин пахыл инсан олдуғу нәдән ҝөрүнүр?

⁶ Јығынҹагдакы мәсулијјәтләр. Биринҹи әсрдә Диотреф адлы бир мәсиһи јығынҹагда рәһбәрлик едән гардашлара пахыллыг едирди. О, јығынҹаг үзвләринә «башчылыг етмәји» арзулајырды, буна ҝөрә дә һәвари Јәһјаны вә диҝәр мәсул гардашлары ҝөздән салмаға чалышырды (3 Јәһ. 9, 10). Дүздүр, биз һеч вахт Диотреф кими давранмарыг, амма ола билсин, бизим арзуладығымыз тәјинат башга мәсиһијә верилсин. Бу заман үрәјимиздә она гаршы пахыллыг јарана биләр, хүсусилә дә «мән дә бу мәсулијјәтин өһдәсиндән ҝәлә биләрәм, өзү дә ондан да јахшы» дејә дүшүнүрүксә.

7. Пахыллығын бизә һансы зәрәри вар?

⁷ Пахыллығы зәһәрли биткијә бәнзәтмәк олар. Бу биткинин тохуму үрәјимиздә көк салса, ону чыхарыб атмаг чәтин олаҹаг. Гысганҹлыг, гүрур вә худбинлик кими диҝәр мәнфи хүсусијјәтләр пахыллығын бој атмасына сәбәб олур. Пахыллыг һисси мәһәббәт, шәфгәт вә хејирхаһлыг кими ҝөзәл хүсусијјәтләрин инкишафына мане олур. Үрәјимиздә пахыллығын ҹүҹәрмәјә башладығыны һисс едәр-етмәз, ону көкүндән гопармалыјыг. Пахыллыгла неҹә мүбаризә апара биләрик?

8. Һансы хүсусијјәтләр пахыллыгла мүбаризә апармаға көмәк едә биләр?

⁸ Тәвазөкар вә шүкүр едән олмағы өјрәнмәк пахыллыгла мүбаризәдә көмәк едә биләр. Гәлбимиз бу ҝөзәл хүсусијјәтләрлә ашыб-дашса, орада пахыллыға јер галмајаҹаг. Тәвазөкарлыг өзүмүз барәдә һәддиндән артыг дүшүнмәмәјә көмәк едир. Тәвазөкар инсан башгаларындан даһа чох шејә лајиг олдуғуну дүшүнмүр (Гал. 6:3, 4). Шүкүр едән, ҝөзүтох инсан исә нәји варса она гане олур вә өзүнү башгалары илә мүгајисә етмир (1 Тим. 6:7, 8). Тәвазөкар вә шүкүр едән инсанлар башгаларынын әлдә етдији јахшы шејләрә ҝөрә севинир.

9. Галатијалылара 5:16 вә Филиппилиләрә 2:3, 4 ајәләринә әсасән, мүгәддәс руһ бизә неҹә көмәк едир?

⁹ Пахыллыг етмәмәк, әксинә тәвазөкар вә шүкүр едән олмағы өјрәнмәк үчүн Аллаһын мүгәддәс руһунун көмәјинә еһтијаҹымыз вар. (Галатијалылара 5:16; Филиппилиләрә 2:3, 4 ајәләрини охујун.) Јеһованын  мүгәддәс руһу ән дәрин дүшүнҹә вә нијјәтләримизи јохламаға көмәк едир. Аллаһын көмәји сајәсиндә зәрәрли фикир вә һиссләримиздән азад ола биләрик (Зәб. 26:2; 51:10). Ҝәлин пахыллыг мејлинин өһдәсиндән мүвәффәгијјәтлә ҝәлән Муса пејғәмбәрин вә һәвари Булусун нүмунәсинә нәзәр салаг.

10. Һансы вәзијјәт Муса пејғәмбәр үчүн сынаг ола биләрди? (Үз габығындакы шәклә бахын.)

¹⁰ Муса пејғәмбәр Аллаһын халгы үзәриндә бөјүк сәлаһијјәтә саһиб иди, бунунла белә, о, гысганҹлыгла бу сәлаһијјәти горумаға чалышмырды. Мисал үчүн, бир дәфә Јеһова она вердији мүгәддәс руһдан ҝөтүрүб һүзур чадырынын јанында дајанан бир груп исраилли ағсаггалын үзәринә гојур. Бундан гыса мүддәт сонра пејғәмбәрә хәбәр чатыр ки, чадырын јанында олмајан ики ағсаггал да мүгәддәс руһ алыб вә пејғәмбәр кими һәрәкәт етмәјә башлајыб. Јушә онун бу ики ағсаггала тәпинмәсини истәјир. Бәс бу заман пејғәмбәр неҹә давраныр? О, пејғәмбәрлик әнамы алан бу ики нәфәрә пахыллыг етмир. Әксинә, тәвазөкар давраныб, онларын севинҹинә шәрик олур (Сај. 11:24—29). Муса пејғәмбәрин нүмунәсиндән нә өјрәнирик?

11. Ағсаггаллар Муса пејғәмбәрдән нә өјрәнә биләр?

¹¹ Әзиз ағсаггаллар, һеч олубму ки, сиздән јығынҹагда севәрәк ҝөрдүјүнүз бир иши башгасына өјрәтмәји хаһиш етсинләр? Мәсәлән, бәлкә дә, сизин һәр һәфтә «Ҝөзәтчи гүлләси» мүзакирәсини апармаг хошунуза ҝәлир. Амма ола билсин, сиздән хаһиш едибләр ки, бу ҝөрүшү апармағы башга бир гардаша өјрәдәсиниз. Әҝәр Муса пејғәмбәр кими тәвазөкарсынызса, буну өз нүфузунуза тәһлүкә санмајаҹагсыныз. Әксинә, гардашыныза бөјүк мәмнунијјәтлә көмәк едәҹәксиниз.

12. Бу ҝүн бир чох мәсиһинин шүкүр едән вә тәвазөкар олдуғу нәдән ҝөрүнүр?

¹² Бир чох јашлы гардашын үзләшдији башга бир вәзијјәтә нәзәр салаг. Узун илләр ағсаггаллар шурасынын координатору кими хидмәт едән гардашлар 80 јашына чатанда бу тәјинаты көнүл хошлуғу илә дајандырыблар. Ејнилә, рајон нәзарәтчиләри дә 70 јашына чатанда тәјинатларынын дајанмасыны вә башга хидмәт нөвүнә тәјин олунмаларыны тәвазөкарлыгла гәбул едирләр. Сон илләр әрзиндә бүтүн дүнјада Бејтел аиләсинин бир чох үзвү саһә хидмәтинә тәјин олунуб. Ола билсин, онларын бир вахтлар ҝөрдүјү иши инди башгалары ҝөрүр. Амма бу садиг баҹы-гардашлар һәмин кәсләрә кин бәсләмирләр.

13. Нәјә ҝөрә Булусун үрәјиндә 12 һәваријә пахыллыг јарана биләрди?

¹³ Һәвари Булус да шүкүр едән вә тәвазөкар инсан олмагда ҝөзәл өрнәкдир. Булус үрәјиндә пахыллығын бој атмасына јол вермирди. Бахмајараг ки, о, хидмәтә ҹан гојурду, тәвазөкарҹасына «мән һәвариләрин ән кичијијәм вә һәвари адланмаға лајиг дејиләм» демишди (1 Кор. 15:9, 10). 12 һәвари Иса Мәсиһи јерүзү хидмәти боју мүшајиәт едәндә Булус һәлә мәсиһи дејилди. О јалныз Мәсиһ өлүб-дириләндән сонра һәгигәти гәбул етмишди. О, сонралар «диҝәр халглара ҝөндәрилмиш бир һәвари» тәјин едилсә дә, 12 һәваридән бири олмаг шәрәфинә саһиб олмады (Ром. 11:13; Һәв. 1:21—26). Амма Булус нә бу 12 нәфәрә, нә дә онларын бир вахтлар Иса илә сых үнсијјәтдә олмасына пахыллыг етмирди, о, саһиб олдуғу шејләрә гане иди.

14. Тәвазөкар вә шүкүр едән мәсиһи неҹә давраныр?

¹⁴ Әҝәр сиз тәвазөкар вә шүкүр едән инсансынызса, һәвари Булус кими давранаҹаг вә Јеһованын сәлаһијјәт вердији  шәхсләрә һөрмәтлә јанашаҹагсыныз (Һәв. 21:20—26). Јеһова тәдбир ҝөрүб ки, мәсиһи јығынҹағында тәјин олунмуш ағсаггаллар рәһбәрлик етсин. Гејри-камил олмаларына бахмајараг, Јеһова онлара «инсан тимсалында һәдијјәләр» кими јанашыр (Ефес. 4:8, 11). Биз бу мәсул гардашлара һөрмәт гојсаг вә вердикләри ҝөстәришләрә тәвазөкарлыгла итаәт етсәк, Јеһова илә мүнасибәтләримизи горујаҹағыг вә диндашларымызла арамызда меһрибанлыг олаҹаг.

15. Биз нә етмәлијик?

¹⁵ Пахыллыг һөкм сүрән јердә сүлһ, бирлик ола билмәз. Буна ҝөрә дә һәм өз үрәјимиздән пахыллығы гопарыб атмалыјыг, һәм дә еһтијатлы олмалыјыг ки, башгаларынын үрәјиндә пахыллыг ојатмајаг. «Сүлһә апаран вә бир-биримизи руһландыран шејләрә ҹан атаг» ҝөстәришинә итаәт етмәк үчүн бу ваҹиб аддымлары атмалыјыг (Ром. 14:19). Башгаларына пахыллыгла мүбаризә апармагда неҹә көмәк едә биләрик? Вә сүлһү неҹә јарада биләрик?

16. Башгаларынын пахыллыгла мүбаризә апармасына неҹә көмәк едә биләрик?

¹⁶ Дүшүнҹә вә давраныш тәрзимиз башгаларына ҝүҹлү тәсир едә биләр. Бу дүнја инсанлары саһиб олдуглары шејләри нүмајишә гојмаға тәшвиг едир (1 Јәһ. 2:16). Лакин бу дүшүнҹә пахыллыг доғурур. Башгаларында пахыллыг ојатмагдан неҹә гача биләрик? Отуруб-дуруб саһиб олдуғумуз вә ја алмағы планлашдырдығымыз шејләр барәдә данышмамагла.  Јығынҹагда дашыдығымыз мәсулијјәтләрә рәғмән, садә галмагла. Әҝәр ҝөрдүјүмүз ишләр барәдә тез-тез данышсаг, башгаларында пахыллығын бој атмасына сәбәб олан мүһит јаратмыш оларыг. Јох әҝәр башгалары илә үрәкдән мараглансаг, ҝөрдүкләри јахшы ишләри вурғуласаг, онлара һәјатдан мәмнунлуг дујмаға көмәк етмиш оларыг, бунунла да јығынҹагда сүлһә вә бирлијә төһфә вермиш олаҹағыг.

17. Јусифин гардашлары нәјә наил ола билди вә нәјин сајәсиндә?

¹⁷ Пахыллыға гаршы савашдан галиб чыхмаг мүмкүндүр! Јусифин гардашларынын һадисәсинә јенидән нәзәр салаг. Јусифлә амансыз давранан гардашлары илләр сонра онунла Мисирдә гаршылашырлар. Јусиф ким олдуғуну ачыгламаздан өнҹә дәјишиб-дәјишмәдикләрини јохламаг үчүн онлары сынајыр. О, јемәк сүфрәси ачдырыр вә ән кичик гардашы Бинјаминә диҝәр гардашларындан даһа чох диггәт ҝөстәрир (Јар. 43:33, 34). Лакин гардашлары Бинјаминә пахыллыг етмирләр. Әксинә, она вә аталары Јагуба ҝөрә нараһат олдугларыны билдирирләр (Јар. 44:30—34). Јусифин гардашлары пахыллығы үрәкләриндән чыхарыб атдыглары үчүн аиләләриндәки сүлһү бәрпа едә билмишдиләр (Јар. 45:4, 15). Ејнилә, биз дә үрәјимиздәки пахыллығы көкүндән чыхарсаг, аиләмиздә вә јығынҹагда сүлһүн олмасына көмәк едәҹәјик.

18. Јагуб 3:17, 18 ајәләринә әсасән, әмин-аманлыг мүһити јаратмаға көмәк етсәк, нә баш верәҹәк?

¹⁸ Јеһова истәјир ки, пахыллыгла мүбаризә апараг вә сүлһә ҹан атаг. Бу ики шејә наил олмаг үчүн чох чалышмалыјыг. Бу мәгаләдән өјрәндијимиз кими, һәр биримиздә пахыллыға мејил вар (Јаг. 4:5). Үстәлик, јашадығымыз дүнја да инсанларда пахыллыг һиссини аловландырыр. Лакин тәвазөкар, шүкүр едән вә миннәтдар олмаға чалышсаг, үрәјимиздә пахыллыға јер галмајаҹаг. Әксинә, ҝөзәл хүсусијјәтләрин инкишафы үчүн сүлһ, әмин-аманлыг шәраитинин јаранмасына төһфәмизи верәҹәјик. (Јагуб 3:17, 18 ајәләрини охујун.)