Мән Канаданын франсыздилли әјаләти олан Квебекдә дүнјаја ҝәлмишәм. Валидејнләрим Луис вә Зелиа мәни мәһәббәт вә гајғы илә бөјүдүб. Атам сакит тәбиәтли инсан иди, охумағы чох севирди. Мән јазмағы хошлајырдым вә бөјүјәндә журналист олмаг истәјирдим.

12 јашым оланда атамын иш јолдашы Родолф Сүси бир досту илә бизә ҝәлмишди. Онлар Јеһованын Шаһиди иди. Јеһованын Шаһидләри һагда елә дә чох шеј билмирдим вә нәјә инандыглары мәнә елә дә мараглы дејилди. Бунунла белә, онларын Мүгәддәс Китаб васитәсилә суаллара неҹә мәнтигли ҹаваблар вермәси мәни һејрәтләндирмишди. Бу, валидејнләримин дә хошуна ҝәлмишди, она ҝөрә дә Мүгәддәс Китабы өјрәнмәк гәрарына ҝәлдик.

Һәмин вахт мән католик мәктәбиндә охујурдум. Бәзән синиф јолдашларыма Мүгәддәс Китаб дәрсиндә өјрәндикләрим барәдә данышырдым. Ҝүнләрин бир ҝүнү кешиш олан мүәллимләрим бундан хәбәр тутду. Дедикләримин јанлыш олдуғуну Мүгәддәс Китаб васитәсилә сүбут етмәк әвәзинә, мүәллимләрдән бири мәни бүтүн синфин өнүндә сатгын адландырды. Амма јаранан бу ҝәрҝин вәзијјәт мәним үчүн хејир-дуаја чеврилди. Мәктәбдә өјрәдилән дини тәлимләрин Мүгәддәс Китабла узлашмадығыны ҝөрдүм. Анладым ки, бу мәктәб мәнлик дејил. Валидејнләримин разылығы илә башга бир мәктәбә кечдим.

Мүгәддәс Китабы өјрәнмәјә давам едирдим, амма ев-ев тәблиғ етмәкдән горхдуғум үчүн руһани инкишафым зәиф ҝедирди. Католик килсәси бөјүк нүфуза саһиб иди вә  тәблиғ ишимизә кәскин шәкилдә гаршы чыхырды. Квебекин баш назири Морис Дүплесси килсәнин сијаси мүттәфиги иди. Онун дәстәји илә ҹамаат Јеһованын Шаһидләрини тәгиб едир, һәтта онлара һүҹум чәкирди. Һәмин вахт тәблиғ етмәк үчүн әсл ҹәсарәт ҝәрәк иди.

Ҝилад мәктәбинин доггузунҹу синиф мәзуну Ҹон Реј гардаш мәнә горхуларымы дәф етмәјә көмәк етди. О, чох тәҹрүбәли, һәлим вә тәвазөкар инсан иди, онунла сөһбәт етмәк асан иди. Ҹон гардаш чох надир һалларда мәнә бирбаша мәсләһәт верәрди, амма онун гојдуғу нүмунәдән чох шеј өјрәндим. Гардаш франсыз дилиндә чәтинликлә данышырды, буна ҝөрә дә чох вахт хидмәтдә онунла әмәкдашлыг едир вә франсызҹа тәблиғ етмәјә көмәк едирдим. Јеһованын Шаһидләри илә танышлығымдан он ил сонра, 1951-ҹи ил мајын 26-сы вәфтиз олундум.

Квебек шәһәриндәки кичик јығынҹағымызын чоху өнҹүл кими хидмәт едирди. Онларын ҝөзәл нүмунәси мәни өнҹүл олмаға тәшвиг етди. О вахтлар ев-ев тәблиғдә һеч бир нәшрдән истифадә етмирдик. Тәкҹә Мүгәддәс Китабла тәблиғ етдијимизә ҝөрә ајәләрдән мәһарәтлә истифадә етмәји баҹармалыјдыг. Одур ки, һәгигәти мүдафиә етмәјимә көмәк едәҹәк ајәләри өјрәнмәјә чалышырдым. Лакин чохлары бу ајәләри дә охумаг истәмирди. Онлар Католик килсәсинин тәсдигләмәдији Мүгәддәс Китаб тәрҹүмәләрини гәбул етмирдиләр.

1952-ҹи илдә јығынҹағымыздан Симон Патри адлы сәдагәтли бир диндашымла аилә гурдум. Монреала көчдүк, бир илин ичиндә гызымыз Лиз дүнјаја ҝәлди. Евләнәндән гыса мүддәт сонра өнҹүллүјү дајандырсам да, Симонла бирҝә садә һәјат сүрмәјә чалышырдыг, истәјирдик ки, ибадәт ҝөрүшләриндә вә тәблиғ ишиндә там иштирак едәк.

Он илдән сонра јенидән хидмәтими ҝенишләндирмәк барәдә дүшүнмәјә башладым. 1962-ҹи илдә Канада Бејтелиндә Мәсул Гардашлар үчүн Мәктәбдә охујан заман Камил Волет адлы бир гардашла ејни отагда галырдым. Камил аиләли иди вә ушағы вар иди, буна рәғмән, хидмәтә ҹан гојурду. Бу мәнә чох тәсир етмишди. Һәмин вахт Квебекдә ушаг бөјүдән валидејнләрин өнҹүл кими хидмәт етдијинә чох надир һалларда раст ҝәлмәк оларды. Камил гаршысына өнҹүл олмаг мәгсәди  гојмушду. Бир јердә галдығымыз мүддәтдә о мәни дә вәзијјәтими ҝөтүр-гој етмәјә тәшвиг едирди. Бир нечә ајдан сонра дүшүндүм ки, јенидән өнҹүл кими хидмәт едә биләрәм. Бәзиләри бу гәрарымын мүдрик олмадығыны дүшүнүрдү, амма мән һеч нәјә фикир вермәдим. Әмин идим ки, Јеһова даһа чох хидмәт етмәк гәрарымы дәстәкләјәҹәк.

1964-ҹү илдә Симонла мән доғма јурдумуза, Квебек шәһәринә хүсуси өнҹүл кими тәјин олундуг вә бурада бир нечә ил хидмәт етдик. Һәмин вахтлар тәблиғлә бағлы вәзијјәт јахшылашмаға доғру ҝедирди, амма һәлә дә тәгибләрлә үзләширдик.

Бир дәфә шәнбә ҝүнү ҝүнорта саатларында Квебек шәһәринин јахынлығындакы Сент-Мари адлы балаҹа бир шәһәрдә һәбс олундум. Полис мәни бөлмәјә апарды вә иҹазәсиз ев-ев тәблиғ етдијим үчүн һәбс етди. Даһа сонра мәни Бајаржон адлы зәһмли бир һакимин гаршысына чыхардылар. О, мәһкәмәдә мәни кимин тәмсил едәҹәјини сорушду. Јеһованын Шаһиди олан танынмыш вәкил Глен Һаунун * адыны чәкәндә һаким һиддәтләниб деди: «Ола билмәз! Бирҹә о, олмасын!» Глен Һау Јеһованын Шаһидләрини уғурла мүдафиә едән вәкил кими бөјүк нүфуза малик иди. Чох кечмәмиш мәһкәмә мәним азад олундуғуму билдирди.

Квебекдәки тәгибләр уҹбатындан ибадәт ҝөрүшләри кечирмәјә мүнасиб јер тапмаг чәтин иди. Кичик јығынҹағымыз үчүн көһнә, буз кими сојуг гаражы ҝүҹлә тапмышдыг. Шахталы гыш ҝүнләриндә јүнҝүлвари исинмәк үчүн јағла ишләјән гыздырыҹы истифадә едирдик. Биз чох вахт јығынҹагдан бир нечә саат әввәл онун әтрафына топлашыб руһландырыҹы һадисәләр данышырдыг.

Илләр әрзиндә тәблиғ ишинин неҹә чичәкләндијини ҝөрмәк мөһтәшәмдир. 1960-ҹы илләрдә Квебек шәһәриндә, Кот-Нор бөлҝәсиндә вә Гаспе јарымадасында үмумиликдә бир нечә кичик јығынҹаг вар иди. Бу ҝүн исә бу әразиләрдә икидән чох теократик рајон вар вә баҹы-гардашлар ҝөзәл ибадәт евләриндә јығышыр.

1970-ҹи илдә һәјат јолдашымла бирҝә рајон хидмәтинә дәвәт алдыг. 1973-ҹү илдә исә вилајәт нәзарәтчиси тәјин олундум. Бу илләр әрзиндә сәјјар хидмәтдә олан Лорја Сомуер * вә Дејвид Сплејн * кими тәҹрүбәли гардашлардан чох шеј өјрәндим. Һәр топлантыдан сонра Дејвидлә мән тәлим вермәк баҹарығымызы даһа да јахшылашдырмагла бағлы бир-биримизә мәсләһәт верирдик. Јадымдадыр, бир дәфә Дејвид мәнә демишди: «Леонс, сонунҹу мәрузән хошума ҝәлди. Јахшы мәрузә иди, амма мән бу мәрузәдән үч мәрузә һазырлајардым!» Һәгигәтән дә, мәрузәмә һәддиндән чох мәлумат дахил едирдим. Даһа јығҹам мәрузә һазырламағы өјрәнмәлијдим.

 Вилајәт нәзарәтчиләринин үзәринә рајон нәзарәтчиләрини руһландырмаг мәсулијјәти дүшүрдү. Квебекдә тәблиғчиләрин бир чоху мәни јахшы таныдығындан рајонлары зијарәт едән заман хидмәтдә мәнимлә әмәкдашлыг етмәк истәјирдиләр. Онларла әмәкдашлыг етмәкдән зөвг алырдым, амма рајон нәзарәтчиләринә кифајәт гәдәр вахт ајыра билмирдим. Бир дәфә бир рајон нәзарәтчиси мәнә меһрибанлыгла деди: «Баҹы-гардашлара вахт ајырмағын чох јахшыдыр, амма унутма ки, бу бир һәфтә мәнә мәхсусдур. Мәним дә руһланмаға еһтијаҹым вар!» Бу мүлајим мәсләһәт мәнә даһа таразлы олмаға көмәк етди.

1976-ҹы илдә ҝөзләнилмәз фаҹиә баш верди. Ҹан јолдашым Симон ҹидди хәстәлијә тутулду вә өлүм јухусуна ҝетди. О, чох ҝөзәл һәјат јолдашы олуб, чүнки фәдакар вә Јеһованы севән бир гадын иди. Хидмәтә чох вахт ајырмағым онун иткисинә дөзмәјә көмәк етди. Јеһоваја миннәтдарам ки, бу ағыр дөнәмләрдә мәнә дајаг олду. Сонралар Каролин Елиот адлы өнҹүл диндашымла аилә гурдум. О, инҝилис дилиндә данышырды вә Квебекә тәләбат олан әразидә хидмәт етмәк мәгсәди илә көчмүшдү. Каролин меһрибандыр вә инсанларла сәмими-гәлбдән марагланыр. Хүсусилә дә утанҹаг хасијјәтли адамлара, јахуд тәнһалыгдан әзијјәт чәкәнләрә диггәт ҝөстәрир. Бирҝә сәјјар хидмәт етдијимиз вахтлар онун мәнә бөјүк көмәји дәјиб.

1978-ҹи илин јанварында мәнә Квебекдә кечирилән илк Өнҹүл Мәктәбиндә тәлим вермәји тапшырдылар. Чох һәјәҹанлы идим, чүнки бу мәктәб һәм шаҝирдләр, һәм дә мәним үчүн илк иди. Хошбәхтликдән, тәлим вердијим илк синифдә чохлу тәҹрүбәли өнҹүл вар иди. Тәлиматчы олсам да, шаҝирдләрдән чох шеј өјрәндим!

Елә һәмин илдә Монреал Олимпија Стадионунда «Галиб ҝәлән иман» адлы бејнәлхалг топланты кечирилди. Бу, Квебекдә кечирилмиш ән бөјүк топланты иди, 80 000-дән чох  адам иштирак етмишди. Мән Мәлумат шөбәсинә тәјин олунмушдум. Чохлу журналистлә сөһбәт етмишдим вә мәтбуатда һаггымызда чыхан ҝөзәл хәбәрләр мәни севиндирирди. Телевизија вә радио каналларында мүсаһибәләримизә 20 саатдан чох вахт ајрылмышды вә һаггымызда јүзләрлә мәгалә чап олунмушду. Бу, мөһтәшәм шаһидлик иди!

1996-ҹы илдә мәним үчүн бөјүк бир дәјишиклик баш верди. Вәфтизимдән бу јана Квебекдә франсыздилли әразидә хидмәт едирдим. Инди исә мәни Торонто әразисиндә инҝилисдилли саһәјә тәјин етдиләр. Өзүмү бу хидмәтә јарарсыз һесаб едирдим. Инҝилис дилини зәиф билдијим үчүн мәрузәләр сөјләмәк фикри мәни горхудурду. Јеһоваја тез-тез дуа етмәли вә Она там ҝүвәнмәли идим.

Бу вилајәтдә хидмәтә башлајанда чох һәјәҹанлы идим, амма инди дејә биләрәм ки, Торонто әразисиндә хидмәт етдијимиз ики ил чох ҝөзәл кечди. Каролин инҝилис дилиндә әминликлә данышмағыма көмәк етди, баҹы-гардашлар да мәнә дәстәк олур, руһландырырды. Тез бир заманда чохлу достлара саһиб олдуг.

Рајон топлантысы үчүн чохлу һазырлыглар ҝөрмәли олурдум. Бундан әлавә, чох вахт ҹүмә ҝүнләри ахшамлар тәхминән бир саат ев-ев хидмәтдә иштирак едирдим. Кимсә дүшүнә биләрди ки, ҝәрҝин топланты һәфтәси әрзиндә хидмәтә чыхмаға нә ҝәрәк вар? Амма хидмәт заманы ҝөзәл сөһбәтләр алынырды вә бу мәни руһландырырды. Һәтта инди дә саһә хидмәтиндә иштирак етмәк әһвалымы јүксәлдир.

1998-ҹи илдә Каролинлә мән јенидән Монреала хүсуси өнҹүл хидмәтинә тәјин олундуг. Узун илләр әрзиндә хүсуси иҹтимаи шаһидлик ишини тәшкил етмишәм вә Јеһованын Шаһидләринә гаршы олан гәрәзли фикирләри арадан галдырмаг үчүн күтләви информасија васитәләри илә әмәкдашлыг етмишәм. Һал-һазырда Каролинлә бирҝә Канадаја көчән әҹнәбиләрә тәблиғ едирик. Әксәр һалларда онлар Мүгәддәс Китабы өјрәнмәјә бөјүк мараг ҝөстәрир.

Јеһованын вәфтиз олунмуш хидмәтчиси кими 68 ил әрзиндә чохлу немәтләр алмышам. Тәблиғдән севинҹ дујмағы өјрәнмәк вә башгаларына һәгигәти өјрәтмәк мәнә хошбәхтлик бәхш едиб. Гызым Лизлә јолдашы ушагларыны бөјүдәндән сонра өнҹүл хидмәтинә башлады. Гызымын һәлә дә хидмәтдә неҹә шөвглү олдуғуну ҝөрмәк мәни чох севиндирир. Өз ҝөзәл нүмунәләри вә мәсләһәтләри илә мәнә руһани ҹәһәтдән тәрәгги етмәјә вә Јеһованын тәшкилатында мүхтәлиф тапшырыглары јеринә јетирмәјә көмәк едән диндашларыма чох миннәтдарам. Өјрәндим ки, јалныз Јеһованын мүгәддәс руһуна бел бағладығымыз тәгдирдә тәјинатымызы давам етдирә биләрик (Зәб. 51:11). Јеһоваја миннәтдарам ки, мәнә Өз адыны мәдһ етмәк шәрәфи нәсиб едиб! (Зәб. 54:6)