1. Нәјин сајәсиндә Јеһованын аиләсиндә бирлик вар?

БИЗ Јеһованын аиләсинә дахил олдуғумуз үчүн чох хошбәхтик. Нәјә ҝөрә бизим бу аиләмиздә меһрибанчылыг вә бирлик вар? Чүнки һамымыз баҹардығымыз гәдәр чалышырыг ки, Аллаһын тәсис етдији башчылыг гурулушуна һөрмәт едәк. Буна ҝөрә дә башчылыг гурулушуну нә гәдәр јахшы баша дүшәриксә, арамыздакы бирлик дә бир о гәдәр мөһкәм олар.

2. Бу мәгаләдә һансы суаллара ҹаваб тапаҹағыг?

² Бу мәгаләдә арашдыраҹағыг ки, јығынҹагда башчылыг етмәјә кимин сәлаһијјәти чатыр. Һәмчинин нөвбәти суалларын ҹавабыны өјрәнәҹәјик: Баҹыларын јығынҹагда һансы ролу вар? Доғруданмы, јығынҹагда һәр бир гардаш һәр бир баҹынын башыдыр? Аилә башчысынын арвады вә ушаглары үзәриндә нә гәдәр сәлаһијјәти варса, ағсаггалын да баҹы-гардашлар үзәриндә о гәдәр сәлаһијјәти вар? Илк нөвбәдә, ҝәлин ҝөрәк баҹылара неҹә јанашмалыјыг.

3. Баҹыларымызын зәһмәтини даһа чох гијмәтләндирмәјә бизә нә көмәк едә биләр?

³ Баҹыларымыз аиләләринин гејдинә галмаг, хош хәбәри тәблиғ етмәк, јығынҹаға дајаг олмаг үчүн чох чалышыр. Онлар бизим үчүн чох әзиздир. Јеһованын вә Исанын баҹыларымыза неҹә јанашдығыны арашдырмағын сајәсиндә онлары даһа чох гијмәтләндирәҹәјик. Һәмчинин һәвари Булусун гадынларла рәфтарындан чох шеј өјрәнәҹәјик.

4. Јеһованын кишиләрә дәјәр вердији кими, гадынлара да дәјәр вердији Мүгәддәс Китабдан неҹә ҝөрүнүр?

 ⁴ Мүгәддәс Китабдан ајдын ҝөрмәк олар ки, Јеһова кишиләри дә, гадынлары да ејни дәрәҹәдә гијмәтләндирир. Орадан өјрәнирик ки, биринҹи әсрдә Јеһова мүгәддәс руһуну һәм кишиләрә, һәм дә гадынлара вермишди. Бунун сајәсиндә онлар мөҹүзәләр ҝөстәрирдиләр, мәсәлән, мүхтәлиф дилләрдә данышырдылар (Һәв. 2:1—4, 15—18). Кишиләр дә, гадынлар да Мәсиһлә бирҝә ҝөјдә һакимијјәт сүрмәк үчүн мүгәддәс руһла мәсһ олунур (Гал. 3:26—29). Јер үзүндә әбәди јашамаг мүкафатыны кишиләр дә алаҹаг, гадынлар да (Вәһј 7:9, 10, 13—15). Бундан әлавә, хош хәбәри мүждәләмәк иши һәм кишиләрә һәвалә олунуб, һәм дә гадынлара (Мәт. 28:19, 20). Мәсәлән, «Һәвариләрин ишләри» китабында Прискилла адлы бир баҹыдан данышылыр. О, әри Аквиласла бирҝә Аполлос адлы савадлы бир нәфәрә һәгигәти даһа дәгигликлә изаһ етмишди (Һәв. 18:24—26).

5. Лука 10:38, 39, 42 ајәләриндән Исанын гадынлара мүнасибәти һаггында нә өјрәнирик?

⁵ Иса Мәсиһ гадынлара һөрмәтлә јанашырды. О, фәрисиләр кими дејилди. Фәрисиләр гадынлара јухарыдан ашағы бахырдылар. Ҹәмијјәт ичиндә гадынларла данышмағы өзләринә сығышдырмырдылар, о ки галды онларла Мүгәддәс Јазылардан нәләрисә мүзакирә етсинләр. Онлардан фәргли олараг, Иса Мәсиһ дәрин руһани мөвзулар әтрафында гадынларла да сөһбәт едирди. * (Лука 10:38, 39, 42 ајәләрини охујун.) Һәмчинин Иса һансыса әразијә тәблиғә ҝедәндә гадынларын да онунла ҝетмәсинә изин верирди (Лука 8:1—3). Бундан әлавә, Иса һәвариләринә дирилдијини хәбәр вермәји дә гадынлара тапшырмышды (Јәһ. 20:16—18).

6. Һәвари Булусун гадынлара һөрмәт етдијини нәдән ҝөрмәк олар?

⁶ Һәвари Булус гадынлара һөрмәт едирди. Мәсәлән, о, Тимутијә буну хүсуси олараг хатырлатмышды. Демишди ки, ағбирчәкләрлә анасы кими, ҹаван гадынларла баҹысы кими рәфтар етсин (1 Тим. 5:1, 2). Тимутинин јеткин мәсиһи олмасында Булусун бөјүк әмәји олса да, о гәбул едирди ки, Тимутијә Мүгәддәс Јазылары ән биринҹи анасы вә нәнәси өјрәдиб (2 Тим. 1:5; 3:14, 15). Булус ромалылара јаздығы мәктубунда баҹылары ады илә саламламышды. О, баҹыларын Мәсиһин хидмәтчиләри кими ҝөрдүјү ишләрә фикир верирди вә буна ҝөрә онлара миннәтдарлығыны да билдирмишди (Ром. 16:1—4, 6, 12; Филип. 4:3).

7. Һансы суалларын ҹавабыны арашдыраҹағыг?

⁷ Әввәлки абзаслардан өјрәндијимиз кими, баҹыларын гардашлардан ашағы олдуғуну дүшүнмәјә Мүгәддәс Китаб һеч бир әсас вермир. Мәһәббәтли, сәхавәтли баҹыларымыз јығынҹаг үчүн әсл хәзинәдир. Ағсаггаллар јығынҹагда сүлһүн вә бирлијин һөкм сүрмәсиндә онларын көмәјинә архаланыр. Амма јенә дә бәзи суаллар јараныр: Нәјә ҝөрә Јеһова баҹылардан тәләб едир ки, бәзи мәгамларда башларыны өртсүнләр? Јалныз гардашлар ағсаггал вә јығынҹаг хидмәтчиси тәјин олундуғу үчүн бу о демәкдирми ки, јығынҹагда һәр бир гардаш һәр бир баҹынын башыдыр?

8. Ефеслиләрә 5:23 ајәсинә әсасән, јығынҹагда һәр бир гардаш һәр бир баҹынын башыдыр? Изаһ един.

⁸ Гысаҹа десәк, хејр! Гардашлар јығынҹагда олан бүтүн баҹыларын башы дејил. Онларын башы Мәсиһдир. (Ефеслиләрә 5:23 ајәсини охујун.) Аиләдә әрин арвад үзәриндә сәлаһијјәти вар, вәфтиз олунмуш оғул  анасынын башы дејил (Ефес. 6:1, 2). Јығынҹагда ағсаггалларын баҹылар вә гардашлар үзәриндә сәлаһијјәти мәһдуддур (1 Салон. 5:12; Ибр. 13:17). Бәс даһа валидејнләри илә бир евдә јашамајан субај баҹы һаггында нә демәк олар? О, јенә дә валидејнләринә һөрмәт едәҹәк, амма артыг атасынын башчылығы алтында дејил. Ејнилә, јығынҹагда о, ағсаггаллара һөрмәтлә јанашаҹаг, амма јығынҹагдакы гардашлар кими, онун да бир башы вар, о да Мәсиһдир.

9. Нәјә ҝөрә бәзән баҹылар башларыны өртмәлидир?

⁹ Јеһова јығынҹагда тәлим вермәк вә ибадәтин иҹрасына рәһбәрлик етмәк үчүн кишиләри тәјин едиб. Гадынлара исә белә сәлаһијјәт вермәјиб (1 Тим. 2:12). Нәјә ҝөрә? Јығынҹагда низам-интизамы горумаг үчүн. Ахы Јеһова кишинин дә башы кими Иса Мәсиһи тәјин едиб. Бу сәбәбдән јаранан вәзијјәтә ҝөрә баҹы Јеһованын гардашлара тапшырдығы иши иҹра едирсә, башыны өртмәлидир * (1 Кор. 11:4—7). Јеһова баҹылара буну бујурмагла онлары алчалтмыр, әксинә, истәјир ки, бу јолла баҹылар Онун тәсис етдији башчылыг гурулушуна һөрмәтләрини ҝөстәрә билсинләр. Бунлары нәзәрә алараг, ҝәлин нөвбәти суалын ҹавабыны тапаг: Аилә башчыларынын вә ағсаггалларын сәлаһијјәти һара гәдәрдир?

10. Нәјә ҝөрә бәзән ағсаггалда јығынҹагда гајдалар гојмаг истәји јарана биләр?

¹⁰ Ағсаггаллар Мәсиһи севир, онлар һәмчинин Јеһованын вә Исанын онлара тапшырдығы гузулары да севир (Јәһ. 21:15—17).  Ола биләр ки, ағсаггал јахшы нијјәтдән ирәли ҝәләрәк јығынҹагда ататәк бир башчы олдуғуну дүшүнсүн. О фикирләшә биләр ки, әҝәр аилә башчысы аиләсини горумаг үчүн гајдалар гојурса, ағсаггал да Јеһованын гузуларыны горумаг үчүн јығынҹагда гајдалар гоја биләр. Һәтта бәзән баҹы-гардашлар да ағсаггалы буна тәшвиг едир, онларын јеринә гәрар вермәји хаһиш едир. Бәс ағсаггалла аилә башчысынын сәлаһијјәти ејнидир?

11. Аилә башчысы илә ағсаггалын вәзифәсиндә һансы охшарлыглар вар?

¹¹ Һәвари Булус ҝөстәрмишди ки, аилә башчысы илә ағсаггалын вәзифәси арасында мүәјјән охшарлыглар вар (1 Тим. 3:4, 5). Мәсәлән, Јеһова истәјир ки, аилә үзвләри аилә башчысына итаәт етсин (Кол. 3:20). Ејнилә, Јеһова јығынҹағын да ағсаггала итаәт етмәсини истәјир. Јеһова һәм аилә башчыларына, һәм дә ағсаггаллара бујуруб ки, онларын сәлаһијјәти алтында оланларын руһани сағламлығынын, һәмчинин емосионал тәләбатларынын гејдинә галсынлар. Һәмчинин јахшы ата кими, ағсаггал да јығынҹагдакы баҹы-гардашлара чәтин анларында көмәк етмәлидир (Јаг. 2:15—17). Бундан әлавә, Јеһова һәм ағсаггаллара, һәм дә аилә башчыларына бујурур ки, сәлаһијјәтләри алтында олан  кәсләрә Мүгәддәс Китабдакы ганунлары ашыласынлар вә јазыланлардан кәнара чыхмасынлар (1 Кор. 4:6).

12, 13. Ромалылара 7:2 ајәсинә әсасән, аилә башчысы илә ағсаггалын вәзифәси арасында һансы фәрг вар?

¹² Ағсаггалын вә аилә башчысынын вәзифәси арасында әһәмијјәтли фәргләр дә вар. Мәсәлән, Јеһова јығынҹагда һаким гисминдә ағсаггалы тәјин едиб вә төвбә етмәјән ҝүнаһкары јығынҹагдан кәнар етмәк сәлаһијјәти вериб (1 Кор. 5:11—13).

¹³ Амма Јеһова ағсаггаллара аилә башчысына вердији сәлаһијјәти вермәјиб. Мәсәлән, аиләдә гајдалар гојмаг вә бу гајдалара әмәл етмәјәнләрә гаршы өлчү ҝөтүрмәк ихтијары аилә башчысына мәхсусдур. (Ромалылара 7:2 ајәсини охујун.) Мисал үчүн, аилә башчысынын ушагларынын ахшам евә саат нечәдә ҝәлмәли олдуғуну тәјин етмәјә һаггы чатыр. Һәмчинин ушаглары бу гајдалары позарларса, онлары ҹәзаландырмаға да һаггы чатыр (Ефес. 6:1). Аиләсини севән аилә башчысы бу кими гәрарлары вермәздән өнҹә һәјат јолдашы илә мәсләһәтләшәҹәк, ахы онлар бир бәдәндир * (Мәт. 19:6).

14. а) Марк 10:45 ајәсинә әсасән, нәјә ҝөрә Јеһова һаглы олараг Исаны јығынҹағын башы тәјин едиб? б) Рәһбәрлик Шурасынын һансы мәсулијјәти вар? (« Рәһбәрлик Шурасынын мәсулијјәтинә нәләр дахилдир?» адлы чәрчивәјә бахын.)

¹⁴ Јеһова фидјә гурбанлығы васитәсилә јығынҹагда олан һәр кәсин, о ҹүмләдән Исаја иман ҝәтирән  һәр кәсин һәјатыны сатын алыб. (Марк 10:45 ајәсини охујун; Һәв. 20:28; 1 Кор. 15:21, 22.) Буна ҝөрә дә Јеһова һаглы олараг өз ҹаныны гурбан верән Иса Мәсиһи јығынҹағын башы тәјин едиб. Бу сәбәбдән Исанын ајры-ајрылыгда һәр кәслә бағлы, аиләләрлә бағлы, бүтүн јығынҹагла бағлы гајдалар гојмаға вә бу гајдалара әмәл олунмасыны ҝөзләмәјә һаггы чатыр (Гал. 6:2). Амма Иса тәкҹә гајдалар гојмур. О һәмчинин һәр биримизин гејдинә галыр вә әзизләјир (Ефес. 5:29).

15, 16. Мерли баҹынын вә Бенжамин гардашын дедикләриндән нә өјрәнирсиниз?

¹⁵ Баҹылар Мәсиһә һөрмәт етдикләрини неҹә ҝөстәрә биләр? Рәһбәрлик етмәк үчүн тәјин олунан гардашларын ҝөстәришләринә итаәт етмәклә. Бирләшмиш Штатларда јашајан Мерли баҹы бир чох баҹынын үрәјиндән кечән фикри дејир: «Һәм аиләдә арвад кими, һәм дә јығынҹагда баҹы кими үзәримә дүшән мәсулијјәти гијмәтләндирирәм. Јеһованын тәсис етдији башчылыг гурулушуна һөрмәтлә јанашмаг үчүн даим үзәримдә ишләјирәм. Һәм әрим, һәм дә јығынҹагдакы гардашлар мәнә һөрмәт етдикләри вә ҝөрдүјүм ишләри гијмәтләндирдикләри үчүн онлара табе олмаг мәнә даһа асандыр».

¹⁶ Гардашлар исә башчылыг гурулушуну дүзҝүн баша дүшдүкләрини баҹылара һөрмәт етмәклә вә онлара дәјәр вермәклә ҝөстәрирләр. Инҝилтәрәдә јашајан Бенжамин гардаш дејир: «Мән баҹыларын јығынҹагдакы шәрһләриндән, даһа сәмәрәли тәблиғ етмәк үчүн, дәрс кечмәк үчүн вердији мәсләһәтләрдән чох шеј өјрәнмишәм. Онлар чох бөјүк ишләр ҝөрүр».

17. Нәјә ҝөрә башчылыг принсипинә һөрмәт етмәлијик?

¹⁷ Јығынҹагда һәр кәс — кишиләр, гадынлар, аилә башчылары вә ағсаггаллар башчылыг принсипини баша дүшүб, она һөрмәт едәндә бүтүн јығынҹагда сүлһ һөкм сүрүр. Ән әсасы исә биз сәмави Атамыз Јеһованын адыны уҹалдырыг (Зәб. 150:6).