1. Киминлә аилә гураҹағыны гәрарлашдырмаздан өнҹә субај баҹы һансы суалларын үзәриндә дүшүнмәлидир?

БҮТҮН мәсиһиләр мүкәммәл башчы олан Иса Мәсиһин табелијиндәдир. Амма мәсиһи гадын аилә гуранда гејри-камил кишинин башчылығы алтында олур. Бу да өз нөвбәсиндә, мүәјјән чәтинликләр јарадыр. Она ҝөрә дә гадын һәјат јолдашы сечәндә нөвбәти суаллар үзәриндә јахшыҹа дүшүнмәлидир: «Бу гардашын јахшы аилә башчысы олаҹағыны нә ҝөстәрир? Руһани ишләр онун һәјатында ваҹиб јери тутур? Тутмурса, бәс нәјин әсасында дүшүнүрәм ки, аилә гурандан сонра о, јахшы аилә башчысы кими руһанилијимизин гајғысына галаҹаг?» Тәбии ки, гадын өзүнә бу суаллары да вермәлидир: «Мәндә аиләмизин хошбәхтлијинә төһфә верәҹәк һансы хүсусијјәтләр вар? Сәбирлијәм? Сәхавәтлијәм? Јеһова илә мүнасибәтләрим мөһкәмдир?» (Ваиз 4:9, 12). Гадынын аилә гурандан сонра нә гәдәр хошбәхт олаҹағы, мүәјјән дәрәҹәдә, аилә гурмамышдан өнҹә вердији гәрарлардан асылыдыр.

2. Бу мәгаләдә нәји арашдыраҹағыг?

² Милјонларла мәсиһи баҹымыз әрләринә табе олмагда ҝөзәл нүмунәдир. Онлар тәрифә лајигдир! Бу сәдагәтли гадынларла бирҝә Јеһоваја хидмәт етмәк бизә чох хошдур! Бу мәгаләдә нөвбәти суалларын ҹавабы арашдырылыр: 1) Аиләдә арвадларын һансы чәтинликләри ола биләр? 2) Гадыны әринә табе олмаға нә тәшвиг едир? 3) Мәсиһи әрләр вә арвадлар Исанын, Абигајилин, Исанын анасы Мәрјәмин нүмунәсиндән табечиликлә бағлы нә өјрәнә биләр?

3. Нәјә ҝөрә никаһдан камиллик ҝөзләмәмәлијик?

³ Никаһ Аллаһын бәхш еләдији камил әнамдыр, амма инсанлар гејри-камилдир (1 Јәһ. 1:8). Елә бу сәбәбдән Мүгәддәс Китабда дејилир ки, аилә гуран ҹүтлүкләр «һәјатда јени чәтинликләрлә үзләшәҹәкләр» (1 Кор. 7:28). Ҝәлин ҝөрәк гадынларын үзләшдији бәзи чәтинликләр һансылардыр.

4. Нәјә ҝөрә гадына елә ҝәлә биләр ки, әрә табе олмаг онун ләјагәтини алчалдыр?

⁴ Ола билсин, алдығы тәрбијәјә ҝөрә гадын әрә табечилијин онун ләјагәтини алчалтдығыны дүшүнсүн. Бирләшмиш Штатларда јашајан Марисол баҹы дејир: «Бөјүјүб боја-баша чатдығым әразидә гадынларын бејнинә јеридилирди ки, онлар һәр шејдә кишиләрлә ејни олмалыдыр. Билирәм ки, Јеһова башчылыг гурулушу тәсис едиб; гадынын ролу әринә итаәт етмәкдир вә бу рол шәрәфли вә ваҹибдир. Амма дүнјанын тәсири уҹбатындан мәним үчүн әрин башчылығына дүзҝүн јанашмаг бәзән чәтин олур».

5. Бәзиләриндә арвадын ролу илә бағлы Мүгәддәс Китаба әсасланмајан һансы фикир вар?

⁵ Башга вәзијјәт дә ола биләр. Гадынын әрә ҝетдији кишијә гадынлара икинҹи дәрәҹәли инсан кими бахыр. Ҹәнуби Америкада јашајан Ивон баҹы дејир: «Јашадығым әразидә биринҹи кишиләр јемәк јејир, сонра гадынлар. Гыз ушаглары биш-дүшлә, тәмизлик ишләри илә мәшғул олмалыдыр. Оғлан ушагларына исә аналары вә баҹылары гуллуг етмәлидир. Оғланлара дејирләр ки, сиз евдә “падшаһсыныз”». Асијада јашајан Јинглинг баҹы дејир: «Бизим дилимиздә бир ифадә вар, мәнасы одур ки, гадынын савадлы олмасына, һансыса баҹарыға јијәләнмәсинә еһтијаҹ јохдур. Гадын ондан өтрүдүр ки, евин ишини-ҝүҹүнү ҝөрсүн, онун әринә өз фикрини демәјә ихтијары чатмыр». Бу ҹүр дүшүнҹәси олан әрин арвадына севҝиси јохдур вә о, Мүгәддәс Китаба зидд давраныр; белә әр арвадынын ҝүнүнү гара едир, Исанын нүмунәсини изләмир, Јеһова да ондан наразыдыр (Ефес. 5:28, 29; 1 Бут. 3:7).

6. Аиләли гадын Јеһова илә мүнасибәтләрини мөһкәмләндирмәк үчүн нә етмәлидир?

⁶ Өнҹәки мәгаләдә арашдырдығымыз кими, Јеһова истәјир ки, әр аиләнин руһани, емосионал вә мадди тәләбатыны өдәсин (1 Тим. 5:8). Амма арвад өзү дә һәр ҝүн вахт ајырыб Аллаһын Кәламыны дәриндән мүталиә етмәли, сидги-үрәкдән Јеһоваја дуа етмәлидир. Гадынын ҝүн әрзиндә иши-ҝүҹү чох олдуғу үчүн бу она чәтин ҝәлә биләр. О дүшүнә биләр ки, вахты јохдур, јахуд чох јорғундур. Амма бунлары етмәк чох ваҹибдир. Чүнки Јеһова истәјир ки, һәр биримизин Онунла өз мүнасибәти олсун вә бу мүнасибәтләри мөһкәм сахлајаг (Һәв. 17:27).

7. Гадына өһдәсинә дүшән ролу иҹра етмәјә нә көмәк едә биләр?

⁷ Ајдындыр ки, гадын үчүн гејри-камил әринә табе олмаг чәтин ҝәлә биләр. Амма о баша дүшсә ки, Мүгәддәс Китаба әсасән, нәјә ҝөрә әринә табе олмалыдыр, онда Јеһованын бујурдуғу кими давранмаг даһа асан олаҹаг.

8. Ефеслиләрә 5:22—24 ајәләринә әсасән, мәсиһи гадыны әринә табе олмаға нә тәшвиг едир?

⁸ Гадын Јеһова бујурдуғу үчүн әринә табе олмаг истәјир. (Ефеслиләрә 5:22—24 ајәләрини охујун.) О, Јеһоваја етибар едир, билир ки, Јеһова ону севир, нә дејирсә, онун хејри үчүн дејир (Ган. 6:24; 1 Јәһ. 5:3).

9. Гадынын әринин башчылығына табе олмасы һансы бәһрәләри ҝәтирир?

 ⁹ Бу дүнјада тәлгин олунур ки, әрә табечилик гадыны алчалдыр. Бу дүшүнҹәнин тәсири алтында чохлары Јеһованын тәсис етдији башчылыг гурулушуна табе олмурлар. Сөз јох ки, бу ҹүр фикирләри тәлгин едән инсанлар мәһәббәтли Аллаһымызы танымыр. Јеһова һеч вахт дәјәрли гызларынын ләјагәтини алчалдан әмр вермәз. Јеһованын бујруғуна әмәл едәрәк әринә табе олан баҹы аиләсиндә меһрибанчылыг јарадыр (Зәб. 119:165). Бу һәм онун өзүнүн, һәм әринин, һәм дә өвладларынын хејринәдир.

10. Карол баҹынын дедикләриндән өзүмүзә нә ҝөтүрә биләрик?

¹⁰ Арвад гејри-камил әринә табе оланда Јеһоваја, башчылығы тәсис едән Аллаһа севҝисини вә һөрмәтини сүбут етмиш олур. Ҹәнуби Америкада јашајан Карол баҹы дејир: «Мән билирәм ки, әрим сәһвләр едәҹәк. Амма ону да билирәм ки, Јеһова илә достлуғуму дәјәрләндирирәмсә, әримин сәһвләринә бахмајараг, она һөрмәтсизлик етмәјәҹәјәм. Она ҝөрә дә сәмави Атамын гәлбини шад етмәк истәдијим үчүн әримә табе олмаға чалышырам».

11. Анис баҹыја бағышлајан олмаға нә көмәк едир вә биз ондан нә өјрәнә биләрик?

¹¹ Баҹы ҝөрәндә ки, әри онун һиссләрини, нараһатлығыны нәзәрә алмыр, онда она әринә һөрмәт ҝөстәрмәк вә табе олмаг чәтин ола биләр. Ҝөрүн Анис баҹы белә мәгамларда нә едир: «Чалышырам, инҹимәјим. Ахы һамымыз сәһвләр едирик. Мәгсәдим Јеһова кими үрәкдән бағышламагдыр. Бағышлајанда гәлб раһатлығы тапырам» (Зәб. 86:5). Бағышламағы баҹаран гадына әринә табе олмаг даһа асандыр.

12. Мүгәддәс Китабда һансы инсанларын нүмунәси вар?

¹² Бәзиләри дүшүнүр ки, итаәткар инсан зәиф инсандыр. Амма бу, гәтијјән белә дејил. Мүгәддәс Китабда итаәткар олан, амма ејни заманда ҝүҹлү характерә саһиб олан чохлу инсанын нүмунәси вар. Мәсәлән, онларын сырасында Исанын, Абигајилин вә Мәрјәмин адыны чәкмәк олар. Ҝәлин ҝөрәк онлардан нә өјрәнә биләрик.

13. Нәјә ҝөрә Иса Јеһоваја табе олур? Изаһ един.

 ¹³ Иса Јеһоваја табе олур, амма она ҝөрә јох ки, о, әглән зәиф, јахуд баҹарыгсыздыр. Јалныз јүксәк зәкаја саһиб олан инсан Иса кими ајдын вә садә шәкилдә тәлим верә биләрди (Јәһ. 7:45, 46). Јеһова Исанын баҹарығына о гәдәр етибар едирди ки, һәтта Каинаты јараданда јанында чалышмасына изин вермишди (Мәс. 8:30; Ибр. 1:2—4). Иса дириләндән сонра исә Јеһова «ҝөјдә вә јердә бүтүн һакимијјәт»и она верди (Мәт. 28:18). Бахмајараг ки, Иса чох истедадлыдыр, о, јенә дә Аллаһын ҝөстәрдији јолла ҝедир. Чүнки Ону севир (Јәһ. 14:31).

14. Аилә башчысы а) Јеһованын гадынлара мүнасибәтиндән, б) Мәсәлләр 31-ҹи фәсилдә јазылан фикирләрдән нә өјрәнә биләр?

¹⁴ Әрләр нә өјрәнә биләр? Јеһованын гадыны әринин табелијиндә јаратмасы о демәк дејил ки, О, гадыны кишидән ашағы һесаб едир. Буну Јеһова Иса илә һакимијјәт сүрмәк үчүн кишиләрлә јанашы, гадынлары да сечмәклә ајдын ҝөстәриб (Гал. 3:26—29). Јеһова Исаја сәлаһијјәт вермәклә она етибар етдијини ҝөстәриб. Ејнилә, һикмәтли әр дә арвадына мүәјјән сәлаһијјәт һәвалә едәҹәк. Аллаһын Кәламында баҹарыглы гадын һагда дејилир ки, о, ев-ешијә нәзарәт едир, әмлак алыр-сатыр, пул сөвдәләшмәләри апарыр. (Мәсәлләр 31:15, 16, 18 ајәләрини охујун.) Гадын фикрини билдирмәк һаггы олмајан гул дејил. Әксинә, әри она етибар едир, онун тәклифләрини динләјир. (Мәсәлләр 31:11, 26, 27 ајәләрини охујун.) Әҝәр әр арвады илә бу ҹүр һөрмәтлә давранса, арвады она севә-севә табе олаҹаг.

15. Арвадлар Исанын нүмунәсиндән нә өјрәнә биләр?

¹⁵ Арвадлар нә өјрәнә биләр? Бахмајараг ки, Иса бөјүк ишләр ҝөрмүшдү, о, Јеһованын башчылығына табе олмағын ону алчалтдығыны дүшүнмүрдү (1 Кор. 15:28; Филип. 2:5, 6). Ејнилә, Исадан өрнәк алан баҹарыглы гадын да, әринә табе олмағын онун ләјагәтини алчалтдығыны дүшүнмәјәҹәк. О, әринә дајаг олаҹаг, амма буну тәк ону севдији үчүн јох, ән әсасы, Јеһованы севдији вә Она һөрмәт етдији үчүн едәҹәк.

16. 1 Ишмуил 25:3, 23—28 ајәләринә әсасән, Абигајилин һансы чәтинликләри вар иди? (Үз габығындакы шәклә бахын.)

¹⁶ Абигајилин Набал адлы әри вар иди. Бу киши чох худбин, тәкәббүрлү вә нашүкүр инсан иди. Абигајил истәсәјди, сусуб Давудла адамларынын әрини өлдүрмәсинә ҝөз јума биләрди вә беләликлә, бу ҹүр никаһдан асанлыгла ҹаныны гуртарарды. Амма белә етмәди. Набалы вә бүтүн ев әһлини горумаг үчүн һәрәкәтә кечди. Тәсәввүр едирсиниз, 400 әлисилаһлы кишинин гаршысына чыхмаг үчүн она нә гәдәр ҹәсарәт лазым иди? Үстәлик, о, һөрмәтҹил шәкилдә Давудла мәсәлә барәдә данышмалы иди. Абигајил һәтта әринин ҝүнаһыны өз үзәринә ҝөтүрдү. (1 Ишмуил 25:3, 23—28 ајәләрини охујун.) Давуд о дәгигә баша дүшдү ки, Јеһова бу шүҹаәтли гадынын мәсләһәти илә ону ҹидди ҝүнаһ етмәкдән чәкиндирир.

17. Әрләр Давуд вә Абигајилин нүмунәсиндән нә өјрәнә биләр?

¹⁷ Әрләр нә өјрәнә биләр? Абигајил чох дәрракәли гадын иди. Давуд да ағыллы давраныб онун мәсләһәтинә гулаг асды. Беләҹә, о, ган төкүб ҝүнаһа батмады. Ејнилә, һикмәтли әр ваҹиб гәрарлар вермәздән өнҹә арвадынын фикирләринә бөјүк әһәмијјәт верәҹәк. Ола билсин, арвадынын дедикләри ону ағылсыз гәрар вермәкдән сахлајаҹаг.

18. Арвадлар Абигајилин нүмунәсиндән нә өјрәнә биләр?

 ¹⁸ Арвадлар нә өјрәнә биләр? Јеһованы севән вә Она еһтирамла јанашан арвадын аиләсинин хошбәхтлијиндә бөјүк ролу вар. Һәтта әри Јеһованын Шаһиди олмаса да вә ја Онун гајда-ганунларына ујғун јашамаға чалышмаса да, баҹы аиләсинин рифаһы үчүн чох шеј едә биләр. О, никаһына сон гојмаг үчүн јоллар ахтармајаҹаг. Әксинә, өз һөрмәтҹил давранышы вә итаәткарлығы илә әринин үрәјиндә Јеһоваја хидмәт етмәк истәји ојатмаға чалышаҹаг (1 Бут. 3:1, 2). Ола биләр, әри онун ҝөзәл давранышына бахмајараг, Јеһоваја хидмәт етмәк истәмәсин. Буна бахмајараг, Јеһова баҹынын Она сәдагәт ҝөстәрәрәк әринә табе олмасыны јүксәк гијмәтләндирир.

19. Арвад һансы һалда әринә итаәт етмәмәлидир?

¹⁹ Мәсиһи арвадын әри ону Аллаһын ганунуну вә ја принсипини позан бир шеј тәләб едәрсә, гадын буна разылашмајаҹаг. Тутаг ки, баҹынын әри онун иманына шәрик дејил вә она дејир ки, јалан данышсын, оғурлуг етсин, јахуд Мүгәддәс Китаба зидд олан һансыса әмәл тутсун. Бүтүн мәсиһиләр, о ҹүмләдән әрдә олан баҹылар да илк нөвбәдә Јеһоваја итаәт етмәлидир. Буна ҝөрә дә әр арвадыны Аллаһын Кәламындакы принсипләри позмаға тәһрик едәндә о разылашмамалыдыр, мүлајим, амма гәти шәкилдә бунун сәбәбини изаһ етмәлидир (Һәв. 5:29).

20. Мәрјәмин Јеһова илә сых мүнасибәтә саһиб олдуғуну һарадан билирик?

²⁰ Мәрјәмин Јеһова илә сых мүнасибәти вар иди. Ҝөрүнүр, Мәрјәм Мүгәддәс Јазылары чох јахшы билирди. Чүнки Вәфтизчи Јәһјанын анасы олан Илсәба илә сөһбәтиндә о, Төвратдан 20-дән чох ситат ҝәтирмишди (Лука 1:46—55). Бир мәгама да диггәт јетирәк. Бахмајараг ки, Мәрјәм Јусифә нишанлы иди, Јеһованын мәләји әввәлҹә Јусифә ҝөрүнмәмишди. Мәләк илк нөвбәдә Мәрјәмлә данышмышды, она билдирмишди ки, Аллаһын Оғлуну дүнјаја ҝәтирәҹәк (Лука 1:26—33). Јеһова Мәрјәмин  неҹә инсан олдуғуну билирди, әмин иди ки, о, Исаны севәҹәк, онун гајғысына галаҹаг. Шүбһәсиз ки, Мәрјәм Исанын өлүмүндән вә онун ҝөјләр һәјатына дирилмәсиндән сонра да Јеһова илә сых мүнасибәтләрини горумушду (Һәв. 1:14).

21. Әрләр Мәрјәм һагда јазыланлардан нә өјрәнә биләр?

²¹ Әрләр нә өјрәнә биләр? Һикмәтли әр севинир ки, арвады Мүгәддәс Китабы јахшы билир. Әр горхуја дүшмүр ки, бирдән арвады ону үстәләмәјә чалышар. О баша дүшүр ки, Мүгәддәс Китаба вә орадакы принсипләрә јахшы бәләд олан гадын аилә үчүн әсл хәзинәдир. Сөз јох ки, арвад даһа савадлы олса да, аиләви ибадәтә вә диҝәр руһани фәалијјәтләрә башчылыг етмәк әрин мәсулијјәтидир (Ефес. 6:4).

22. Арвадлар Мәрјәмдән нә өјрәнә биләр?

²² Арвадлар нә өјрәнә биләр? Аиләнин руһани тәләбатыны өдәмәк әрин үзәринә дүшсә дә, гадын өзү дә руһани сағламлығынын гејдинә галмалыдыр (Гал. 6:5). О, фәрди мүталиә етмәк вә охудугларынын дәринлијинә вармаг үчүн вахт ајырмалыдыр. Бунун сајәсиндә о, Јеһоваја севҝисини вә һөрмәтини горујаҹаг вә әринә табе олмаг она севинҹ ҝәтирәҹәк.

23. Арвадын итаәткар олмасы өзүнә, аиләсинә вә јығынҹаға неҹә фајда ҝәтирир?

²³ Јеһоваја мәһәббәтдән ирәли ҝәләрәк әрләринә итаәт едән гадынлар башчылыг гурулушуну рәдд едәнләрдән фәргли олараг, даһа чох севинҹ вә мәмнунлуг дујур. Онлар ҝәнҹ оғланлара вә гызлара ҝөзәл нүмунәдир. Бундан әлавә, онлар нәинки өз аиләләриндә, һәмчинин бүтүн јығынҹагда хош аб-һава јарадыр (Тит. 2:3—5). Бу ҝүн Јеһоваја сәдагәтлә хидмәт едәнләрин бөјүк гисмини гадынлар тәшкил едир (Зәб. 68:11). Гадын вә ја киши олмағымыздан асылы олмајараг, һәр биримиз јығынҹагда ваҹиб рол ојнајырыг. Нөвбәти мәгаләдә данышаҹағыг ки, јығынҹагда өһдәмизә дүшән ролу неҹә иҹра едә биләрик.