ИКИ гыз Филиппинин Баҝио шәһәриндә ишҝүзар әрази илә јол ҝедирди. Онлар иҹтимаи шаһидлик арабасыны ҝөрдүләр, амма јахынлашмадылар. Арабанын јанында дуран Һелен адлы баҹы онлара бахыб, меһрибанҹасына ҝүлүмсәди. Бу гызлар јолларына давам етдиләр, амма Һеленин сәмими тәбәссүмү онларын ҝөзүнүн габағындан ҝетмәди.

Даһа сонра онлар автобусла евләринә гајыдаркән бир ибадәт евинин диварында бөјүк лөвһәдә jw.org јазысыны ҝөрдүләр. Онларын јадына дүшдү ки, бу, даһа өнҹә шаһидлик арабасынын үзәриндә ҝөрдүкләри ејни јазыдыр. Икиси дә автобусдан дүшдү вә ибадәт евинә јахынлашды. Орада дарвазанын үстүндәки ҹәдвәлдә мүхтәлиф јығынҹагларын вахтына ҝөз ҝәздирдиләр.

Бу ики гыз нөвбәти ҝөрүшләрдән биринә ҝетди. Онлар ибадәт евинә дахил оланда кими ҝөрсәләр јахшыдыр? Һелени! Онлар дәрһал таныдылар ки, бу һәмин меһрибан тәбәссүмлү гадындыр. Һелен дејир: «Гызлар мәнә тәрәф ҝәләндә бир аз һәјәҹанландым. Дүшүндүм ки, јәгин, нәјисә дүз етмәмишәм». Амма бу гызлар Һеленә һәр шеји изаһ етдиләр.

Һәм ҝөрүш, һәм дә үнсијјәт гызларын чох хошуна ҝәлди. Онлар баҹы-гардашларын јанында өзләрини чох раһат һисс едирди. Ҝөрүшдән сонра баҹы-гардашларын ибадәт евини тәмизләдијини ҝөрәндә онлар да көмәк етмәк истәдикләрини дедиләр. Гызлардан бири артыг бу өлкәдә јашамыр, о бири гыз исә ибадәт ҝөрүшләринә ҝәлмәјә башлады вә Мүгәддәс Китабы өјрәнмәјә разылашды. Һәр шеј бир тәбәссүмдән башлады!