1, 2. а) Нәјә ҝөрә чохларына сәлаһијјәт саһибләринә етибар етмәк чәтиндир? б) Бу мәгаләдә нәји арашдыраҹағыг?

 БУ ҜҮН чохларына сәлаһијјәт саһибләринә етибар етмәк чәтиндир. Онлар ҝөрүр ки, һөкумәт вә ганунлары чох вахт варлыларын вә нүфузлу шәхсләрин хејринә ишләјир, касыблар исә әзилир. Мүгәддәс Китабда неҹә дә дүз јазылыб: «Бүтүн дөврләрдә инсанын инсана ағалыг етмәси инсанын зәрәринә олуб» (Ваиз 8:9). Үстәлик, дин хадимләринин әмәлләри һеч дә үрәкачан дејил. Бунун уҹбатындан чохларынын Аллаһа да етибары итиб. Буна ҝөрә дә дәрс кечдијимиз инсанлара һәм Јеһоваја, һәм дә Онун халгына рәһбәрлик етмәк үчүн тәјин етдији шәхсләрә етибар етмәји өјрәтмәли олуруг.

² Әлбәттә, буну тәкҹә Мүгәддәс Китаб дәрси кечдијимиз инсанлар јох, биз дә өјрәнмәлијик. Һәтта Јеһоваја узун илләр хидмәт едәнләр дә унутмамалыдыр ки, Јеһова һәр шеји һәмишә мүкәммәл тәрздә ҝөрүр. Бәзән буна етибарымызы сынајан вәзијјәтләрлә үзләшә биләрик. Бу мәгаләдә үч саһәјә нәзәр салаҹағыг. Ҝөрәҹәјик ки, 1) Мүгәддәс Китабдан охудуғумуз бәзи парчалар, 2) Јеһованын тәшкилатындан ҝәлән ҝөстәришләр вә 3) ҝәләҹәкдә үзләшәҹәјимиз чәтинликләр иманымызы неҹә сынаја биләр.

3. Мүгәддәс Китабда јазылан бәзи һадисәләр Јеһоваја етибарымызы неҹә сынаја биләр?

 ³ Мүгәддәс Китабы охујаркән Јеһованын бәзи инсанларла рәфтары вә бәзи гәрарлары илә бағлы биздә суаллар јарана  биләр. Мәсәлән, «Сајлар» китабында охујуруг ки, Јеһова шәнбә ҝүнү одун јыған исраиллијә өлүм һөкмү кәсмишди. Бу һадисәдән әсрләр сонра Давуд падшаһ зина вә гатиллик етмишди, амма «Икинҹи Ишмуил» китабындан охујуруг ки, Јеһова ону бағышламышды (Сај. 15:32, 35; 2 Ишм. 12:9, 13). Биздә суал јарана биләр: «Нәјә ҝөрә Јеһова зина едән, гатиллик едән Давуду бағышлады, амма онун гәдәр ҹидди ҝүнаһ етмәјән адамы бағышламады?» Бу суала ҹаваб вермәк үчүн ҝәлин ҝөрәк Мүгәддәс Китабы охујаркән һансы үч амили нәзәрә алмалыјыг.

4. Јарадылыш 18:20, 21 вә Ганунун тәкрары 10:17 ајәләри Јеһованын гәрарларына етибарымызы неҹә мөһкәмләндирир?

⁴ Мүгәддәс Китабда һәр һадисә илә бағлы бүтүн тәфәррүатлар гејд олунмајыб. Мәсәлән, биз билирик ки, Давуд үрәкдән төвбә етмишди (Зәб. 51:2—4). Бәс шәнбә ганунуну позан киши һагда нә демәк олар? О неҹә бир инсан иди? Ҝөрдүјү ишә ҝөрә пешман иди? Бәлкә, кечмишдә дә Јеһованын ганунларыны позмушду? Бәлкә, она бу барәдә хәбәрдарлыг олунмушду вә о, бу хәбәрдарлығы гулагардына вурмушду? Мүгәддәс Китабда бу барәдә һеч нә дејилмир. Амма бир шејә әмин ола биләрик ки, Јеһова «наһаг иш ҝөрмәјән» Аллаһдыр (Ган. 32:4). Чох вахт шајиә, гәрәз вә ја башга бир шеј инсанларын вәзијјәтә јанлыш гијмәт вермәсинә сәбәб олур. Амма бу кими шејләр Јеһованын вердији гәрарлара тәсир етмир, О, бүтүн фактлары нәзәрә алыр. (Јарадылыш 18:20, 21; Ганунун тәкрары 10:17 ајәләрини охујун.) Јеһова вә Онун гајда-ганунлары һагда нә гәдәр чох өјрәнсәк, Онун гәрарларына бир о гәдәр чох етибар едәҹәјик. Мүгәддәс Китабы охујаркән биздә јаранан суалын ҹавабыны билмәсәк дә, Јеһованы о гәдәр јахшы таныјырыг ки, Онун «бүтүн јолларында әдаләтли» олдуғуна әминик (Зәб. 145:17).

5. Гејри-камиллијимиз әдаләт һиссимизә өз тәсирини неҹә ҝөстәрир? (« Гејри-камиллик әдаләтә бахышымызы корлајыб» адлы чәрчивәјә бахын.)

⁵ Гејри-камиллијимиз әдаләт һиссимизә дә тәсир едиб. Биз Аллаһын бәнзәриндә јарадылдығымыз үчүн инсанлара гаршы әдаләтсиз мүнасибәти ҝөтүрмүрүк (Јар. 1:26).  Амма гејри-камилик, буна ҝөрә дә бүтүн фактлары билдијимизи һесаб етсәк дә, бәзән јанлыш гәнаәтә ҝәлирик. Мәсәлән, јадыныздадырса, Јеһова нејнәвалылары бағышламаг гәрарына ҝәләндә Јунус чох дилхор олмушду (Јун. 3:10—4:1). Амма ҝәлин ҝөрәк Јеһованын бу гәрарынын нәтиҹәси нә олду: 120 000-дән чох нејнәвалы төвбә едиб хилас олду. Бу мәсәләдә дүшүнҹәсинә дүзәлиш етмәли олан Јеһова јох, Јунус иди.

6. Нәјә ҝөрә Јеһова гәрарларынын сәбәбини бизә изаһ етмәјә борҹлу дејил?

⁶ Јеһова гәрарлары илә бағлы инсанлара һесабат вермәјә борҹлу дејил. Дүздүр, елә вахтлар олмушду ки, Јеһова вердији вә ја верәҹәји гәрарларла бағлы хидмәтчиләринә нараһатчылыгларыны билдирмәјә изин вермишди (Јар. 18:25; Јун. 4:2, 3). Бәзән исә гәрарынын сәбәбини изаһ етмишди (Јун. 4:10, 11). Бунунла белә, Јеһова бизә нәјисә изаһ етмәјә борҹлу дејил. Јарадан олдуғу үчүн Онун нәјисә етмәмишдән әввәл вә ја сонра бизим разылығымызы алмаға еһтијаҹы јохдур (Әшј. 40:13, 14; 55:9).

7. Бизә нә чәтин ҝәлә биләр вә нәјә ҝөрә?

⁷ Биз бүтүн гәлбимизлә инанырыг ки, Јеһованын етдији һәр бир шеј һагдыр. Амма Јеһованын бизә рәһбәрлик етмәк үчүн тәјин етдији шәхсләрә етибар етмәк чәтин ола биләр. Биздә суал јарана биләр: «Онларын гәрарлары нәјә әсасланыб, өз дүшүнҹәләринә, јохса Јеһованын рәһбәрлијинә?» Гәдим дөврдә бәзиләриндә белә фикирләр ола биләрди. Ҝәлин  3-ҹү абзасда ҝәтирилән нүмунәләрә бахаг. Шәнбә ганунуну позан кишинин гоһуму шүбһә едә биләрди ки, доғруданмы Муса пејғәмбәр өлүм һөкмүнү Јеһова илә мәсләһәтләшәндән сонра чыхарыб? Јахуд Урјајын досту дүшүнә биләрди ки, Давуд Урјајын арвады илә етдији әхлагсызлығын ҹәзасындан гачмаг үчүн өз сәлаһијјәтиндән суи-истифадә етмишди. Демәли, бир шеј данылмаздыр ки, әҝәр Јеһованын етибар етдији шәхсләрә етибар етмириксә, Јеһоваја етибар етдијимизи дејә билмәрик.

8. Һәвариләрин ишләри 16:4, 5 ајәләриндә јазыланларла буҝүнкү мәсиһи јығынҹағынын фәалијјәти арасында һансы охшарлыг вар?

⁸ Бу ҝүн Јеһова тәшкилатыны «садиг вә ағыллы нөкәр» васитәсилә идарә едир (Мәт. 24:45). Биринҹи әсрдәки рәһбәрлик шурасы кими, бу нөкәр дә Јеһованын бүтүн дүнјадакы халгына нәзарәт едир вә јығынҹаг ағсаггалларына ҝөстәришләр верир. (Һәвариләрин ишләри 16:4, 5 ајәләрини охујун.) Ағсаггаллар да, өз нөвбәсиндә, верилән бу ҝөстәришләри јығынҹагда тәтбиг едирләр. Тәшкилатдан вә ағсаггаллардан ҝәлән ҝөстәришләрә риајәт етмәклә Јеһованын ҝөрдүјү һәр бир ишә етибар етдијимизи ҝөстәририк.

9. Ағсаггалларын вердији гәрары дәстәкләмәк нә вахт чәтин ола биләр вә нәјә ҝөрә?

⁹ Бәзән бизә ағсаггалларын вердији ҝөстәришләри дәстәкләмәк чәтин ҝәлә биләр. Мәсәлән, сон илләр бир чох јығынҹаглар бирләшдирилиб вә буна ҝөрә бәзи јығынҹаглар башга теократик рајона дүшүб. Бәзи һалларда ағсаггаллар тәблиғчиләрдән хаһиш едирләр ки, ибадәт евиндә отураҹаглар там долсун дејә, башга јығынҹаға кечсинләр. Биздән јени јығынҹаға кечмәк хаһиш олунса, достларымыздан вә аилә үзвләримиздән ајрылмаг бизә чәтин ҝәлә биләр. Бәс ағсаггаллар һәр тәблиғчинин һансы јығынҹаға ҝетмәси илә бағлы Аллаһдан ҝөстәриш алырлар? Хејр. Елә буна ҝөрә дә алдығымыз ҝөстәришә риајәт етмәк бизә чәтин ҝәлә  биләр. Амма Јеһова ағсаггаллара етибар едир вә онлара бу ҹүр гәрарлар гәбул етмәк ихтијары вериб. Биз дә онлара етибар етмәлијик *.

10. Ибраниләрә 13:17 ајәсинә әсасән, нәјә ҝөрә биз ағсаггалларла әмәкдашлыг етмәлијик?

¹⁰ Нәјә ҝөрә ағсаггалларын вердији гәрарлар үрәјимизҹә олмаса да, онлары дәстәкләмәлијик? Чүнки бунунла биз Јеһованын халгы арасында бирлији горујуруг (Ефес. 4:2, 3). Һәр кәс ағсаггаллар шурасынын гәрарларына табе оланда јығынҹаг чичәкләнир. (Ибраниләрә 13:17 ајәсини охујун.) Ән әсасы исә тәјин олунмуш гардашларла әмәкдашлыг етмәклә Јеһоваја етибарымызы ҝөстәририк. Чүнки Јеһова онлара бизим гејдимизә галмағы һәвалә едиб (Һәв. 20:28).

11. Ағсаггаллара етибар едиб, ҝөстәришләринә әмәл етмәјә бизә нә көмәк едә биләр?

¹¹ Ағсаггалларын вердији ҝөстәришләрә етибарымызы ҝүҹләндирмәк үчүн нөвбәти мәгамлары унутмамалыјыг: онлар јығынҹагла бағлы гәрарлар верәркән дуа едиб мүгәддәс руһ истәјирләр. Һәмчинин мүвафиг Мүгәддәс Китаб принсипләрини диггәтлә арашдырырлар вә Јеһованын тәшкилатынын вердији ҝөстәришләри әлдә рәһбәр тутурлар. Онлар ҹани-дилдән истәјирләр ки, Јеһованы разы салсынлар вә јығынҹағын рифаһы үчүн әлләриндән ҝәләни етсинләр. Бу садиг кишиләр билирләр ки, мәсулијјәтләринин иҹрасына ҝөрә Аллаһа ҹаваб верәҹәкләр (1 Бут. 5:2, 3). Әтрафымыза ҝөз ҝәздириб баханда ҝөрүрүк ки, бу ҝүн дүнја ирги, дини вә сијаси ҹәһәтдән парчаланыб, биз исә бирлик ичиндә тәк олан Аллаһымыз Јеһоваја ибадәт едирик. Бу, јалныз вә јалныз Јеһованын тәшкилатына дајаг олмасы сајәсиндә мүмкүндүр!

12. Ағсаггаллар инсанын төвбә едиб-етмәдијини мүәјјән едәркән нәләри нәзәрә алмалыдырлар?

¹² Јеһова ағсаггаллара јығынҹағын тәмизлијини горумаг мәсулијјәти һәвалә едиб. Бу, ҹидди мәсулијјәтдир. Әҝәр мәсиһи ағыр ҝүнаһ ишләјибсә, Јеһова тәләб едир ки, ағсаггаллар һәмин шәхсин јығынҹагда галыб-галмајаҹағыны мүәјјән етсинләр. Ағсаггалларын үзәринә дүшән мәсулијјәтләрин арасында ҝүнаһкарын сәмими гәлбдән төвбә едиб-етмәдијини ашкара чыхармаг да вар. Ола билсин, ҝүнаһ ишләјән инсан пешман олдуғуну дејир, бәс о, доғруданмы тутдуғу әмәлә нифрәт едир? О, бир дә бу ҝүнаһы етмәмәјә гәти-гәрарлыдыр? Әҝәр ону ҝүнаһа сүрүкләјән пис достлар идисә, онларла әлагәсини кәсмәјә һазырдыр? Ағсаггаллар бүтүн фактлары Мүгәддәс Китаб әсасында арашдырырлар вә ҝүнаһ ишләјән инсанын баш верәнләрә мүнасибәтини нәзәрә алырлар. Сонра да онун јығынҹагда галыб-галмајаҹағына гәрар верирләр. Бәзи һалларда инсаны јығынҹагдан кәнар етмәк лазым ҝәлир (1 Кор. 5:11—13).

13. Достумуз вә ја гоһумумуз јығынҹагдан кәнар едилибсә, һансы нараһатчылығымыз ола биләр?

¹³ Ағсаггаллара олан етибарымыз неҹә сынана биләр? Әҝәр јығынҹагдан кәнар едилән шәхс јахын достумуз вә ја гоһумумуз дејилсә, ағсаггалларын гәрары илә раһат разылашырыг. Амма тәсәввүр един ки, јығынҹагдан кәнар едилән шәхс бизә јахын адамдыр. Үрәјимиздә хал гала биләр ки, ҝөрәсән, ағсаггаллар һадисәни һәртәрәфли арашдырыблар? Ҝөрәсән, Јеһова да онларын вердији гәрары верәрди? Ағсаггалларын гәрарына дүзҝүн јанашмаға бизә нә көмәк едә биләр?

14. Ағсаггалларын бизә јахын адамла бағлы гәрарыны дәстәкләмәјә бизә нә көмәк едә биләр?

 ¹⁴ Јадда сахламалыјыг ки, јығынҹагдан кәнаредилмә Јеһованын ҝөрдүјү тәдбирдир. Бу, јығынҹағын рифаһы үчүндүр вә јығынҹагдан кәнар едилән инсана да фајда ҝәтирә биләр. Әҝәр төвбә етмәјән ҝүнаһкар јығынҹагда галса, о башгаларыны да ҝүнаһа сүрүкләјә биләр (Гал. 5:9). Бундан әлавә, о, ҝүнаһынын ҹиддилијини баша дүшмәз, Јеһованын рәғбәтини јенидән газанмаг үчүн дүшүнҹәсиндә вә әмәлләриндә дүзәлиш етмәјә чалышмаз (Ваиз 8:11). Әмин ола биләрик ки, ағсаггаллар инсанын јығынҹагдан кәнар едилмәси илә бағлы гәрар верәркән һәр шеји ҹидди ҝөтүр-гој едирләр. Гәдим Исраилдәки һакимләр кими онлар анлајыр ки, «инсан үчүн јох, Јеһова үчүн һөкм» чыхарырлар (2 Салн. 19:6, 7).

15. Нәјә ҝөрә инди Јеһованын ҝөстәришләринә етибар етмәк һәмишәкиндән даһа ваҹибдир?

¹⁵ Бу шәр дүнјанын сону јахынлашдыгҹа Јеһованын ҝөрдүјү ишләрә етибарымыз даһа чох сынанаҹаг. Нәјә ҝөрә? Бөјүк мүсибәт заманы елә ҝөстәришләр ала биләрик ки, онлар бизә гәрибә ҝәлсин, ағлабатан ҝөрүнмәсин. Әлбәттә, Јеһова бизимлә шәхсән данышмајаҹаг, һәр һалда, О, тәјин етдији шәхсләр васитәсилә ҝөстәриш верәҹәк. Һәмин вахт ҝөстәришләри ҝөтүр-гој етмәјин, онлара шүбһә илә јанашмағын, «ҝөрәсән, онлар Јеһовадан ҝәлиб, јохса мәсул гардашларын фикридир?» кими суаллар вермәјин вахты олмајаҹаг. Бәшәр тарихинин бу һәлледиҹи дөврүндә Јеһоваја вә Онун тәшкилатына етибар едәҹәксиниз? Ҹаваб бу ҝүн тәшкилатдан ҝәлән ҝөстәришләрә неҹә јанашмағыныздан асылыдыр. Әҝәр бу ҝүн верилән ҝөстәришләрә етибар едиб ҹанла-башла әмәл едирсинизсә, чох јәгин ки, бөјүк мүсибәт заманы да ејни шеји едәҹәксиниз (Лука 16:10).

16. Јахын ҝәләҹәкдә Јеһованын чыхардығы һөкмә етибарымыз неҹә сынана биләр?

¹⁶ Башга бир саһәдә дә Јеһоваја етибарымызы ҝүҹләндирмәлијик. Бу, Јеһованын бу шәр дүнјанын сонунда чыхараҹағы һөкмлә бағлыдыр. Һал-һазырда биз үмид едирик ки, Јеһоваја хидмәт етмәјән инсанлар, о ҹүмләдән гоһумларымыз нә вахтса һәгигәтә ҝәләҹәк. Амма Армаҝеддонда Јеһова Иса Мәсиһ васитәсилә бу инсанларын ҝәләҹәји илә бағлы сон һөкмү чыхараҹаг (Мәт. 25:31—33; 2 Салон. 1:7—9). Јеһованын мәрһәмәтинә кимин лајиг олдуғуна, кимин олмадығына биз гәрар вермәјәҹәјик (Мәт. 25:34, 41, 46). Биз Јеһованын чыхардығы һөкмә етибар едәҹәјик, јохса  бу бизи бүдрәдәҹәк? Ајдындыр ки, биз индидән Јеһоваја етибарымызы ҝүҹләндирмәлијик ки, һәмин вахт Она тамамилә етибар едәк.

17. Бу шәр дүнјанын сонунда Јеһованын чыхардығы һөкмүн һансы хејрини ҝөрәҹәјик?

¹⁷ Тәсәввүр един, Јеһованын чыхардығы һөкмүн нәтиҹәсиндә неҹә бир дүнја олаҹаг! Артыг јалан дин олмајаҹаг, аҹҝөз коммерсија саһәси, о ҹүмләдән бәшәријјәтә тарих бојунҹа олмазын әзаблар верән сијаси систем мәһв олаҹаг. Сағламлыгла бағлы проблемләр, гоҹалыг, әзизимизин өлүмү артыг һәјатымызын бир һиссәси олмајаҹаг. Шејтан вә онун ҹинләри миниллијә буховланаҹаг. Онларын үсјаны нәтиҹәсиндә јаранан проблемләр артыг кечмишдә галаҹаг (Вәһј 20:2, 3). Јеһованын ҝөрдүјү ишләрә етибар етдијимиз үчүн үрәјимиз севинҹлә долуб-дашаҹаг!

18. Сајлар 11:4—6 вә 21:5 ајәләриндә исраиллиләр һагда јазыланлардан һансы ибрәти ҝөтүрүрүк?

¹⁸ Бәс Јеһованын вәд етдији јени дүнјада Она етибарымызы сынајан вәзијјәтләр олаҹаг? Ҝәлин ҝөрәк исраиллиләр Мисир әсарәтиндән гуртуландан гыса мүддәт сонра нә баш вермишди. Бәзиләри орада једикләри тәрәвәзләрин, јемәкләрин хиффәтини чәкиб ҝилејләнмәјә башладылар; онлар Јеһованын вердији маннаја ијрәнҹ бир шеј кими јанашырдылар. (Сајлар 11:4—6; 21:5 ајәләрини охујун.) Ола биләрми ки, бөјүк мүсибәт сона чатандан сонра биздә дә ејни һиссләр олсун? Биз билмирик шәр дүнјанын дағынтыларыны тәмизләмәк, јер үзүнү тәдриҹән ҹәннәтә чевирмәк үчүн нә гәдәр зәһмәт чәкмәли олаҹағыг. Јәгин, ҝөрүләси чох иш олаҹаг вә әввәл-әввәл елә дә раһат шәраит олмајаҹаг. Бәс һәмин вахт Јеһованын бизә јетирдикләринә ҝөрә нашүкүрлүк етмәјә дилимиз ҝәләҹәк? Бир шеј данылмаздыр: әҝәр инди Јеһованын бәхш етдикләрини гијмәтләндиририксә, сөзсүз, һәмин вахт да белә едәҹәјик.

19. Бу мәгаләнин әсас фикирләрини неҹә иҹмал едәрдиниз?

¹⁹ Јеһованын ҝөрдүјү бүтүн ишләр һагдыр. Биздә буна әминлик олмалыдыр. Һәмчинин Јеһованын етибар етдији шәхсләрә дә етибарымыз олмалыдыр. Јеһованын Әшија пејғәмбәр васитәсилә дедији сөзләри һеч вахт унутмајын «Сакитлик вә етибар сизин ҝүҹүнүз [олаҹаг]» (Әшј. 30:15).