ИҸМАЛ *

1. Һансы һалларда бизә мәсләһәт верилә биләр вә нәјә ҝөрә һамымызын мәсләһәтә еһтијаҹы вар?

 ВАХТАШЫРЫ һәр биримизин мәсләһәтә еһтијаҹы олур. Бәзән өзүмүз кимәсә јахынлашыб мәсләһәт истәјирик. Бәзән исә бизә ҹаныјанан диндашымыз јахынлашыб мәсләһәт верир. О бизи сонрадан пешманчылығыны чәкәҹәјимиз сәһв бир ишдән чәкиндирмәк истәјир (Гал. 6:1). Јахуд ола биләр ки, бизә һансыса ҹидди сәһвимиздән сонра дүзәлиш етмәк үчүн мәсләһәт верилсин. Истәнилән һалда, биз верилән мәсләһәтә гулаг асмалыјыг. Бу бизим хејримизәдир вә һәјатымызы хилас едә биләр (Мәс. 6:23).

2. Мәсәлләр 12:15 ајәсинә әсасән, нәјә ҝөрә мәсләһәтә гулаг асмалыјыг?

² Мәгаләнин әсас ајәси бизи «мүдрикләрин сөзләрини динлә»мәјә тәшвиг едир (Мәс. 22:17). Елә инсан јохдур ки, һәр шеји билсин, һәмишә биздән даһа биликли вә даһа баҹарыглы кимсә олаҹаг. (Мәсәлләр 12:15 ајәсини охујун.) Буна ҝөрә дә мәсләһәтә гулаг асмаг тәвазөкарлығын әламәтидир. Бу ҝөстәрир ки, биз мәһдудијјәтләримизин фәргиндәјик вә мәгсәдләримизә чатмаг үчүн көмәјә еһтијаҹымыз олдуғуну анлајырыг. Мүдрик падшаһ Сүлејман Аллаһын илһамы илә јазмышды: «Мәсләһәт верән чох оларса, уғур олар» (Мәс. 15:22).

3. Бизә һансы јолларла мәсләһәт верилә биләр?

³ Мәсләһәт алмағымызын бир јолу Мүгәддәс Китабы вә ја нәшрләримизи охумагдыр. Бу заман охудуғумуз шејләр бизи дајаныб дүшүнмәјә, фикирләримиздә вә әмәлләримиздә лазыми дүзәлишләр етмәјә тәшвиг едир (Ибр. 4:12). Бәзән исә ағсаггал вә ја башга јеткин мәсиһи бизә дәјишмәли олдуғумуз саһәләри ҝөстәрә биләр. Әҝәр кимсә бизи чох истәдијиндән Мүгәддәс Китаб әсасында мәсләһәт верирсә, биз дә өз тәрәфимиздән  бу мәсләһәтә гулаг асараг вә әмәл етмәјә чалышараг миннәтдарлығымызы ҝөстәрмәлијик.

4. Ваиз 7:9 ајәсинә әсасән, бизә мәсләһәт вериләндә һансы әһвали-руһијјәдән гачмалыјыг?

⁴ Дүзүнү десәк, инсандан мәсләһәт гәбул етмәк бизә даһа чәтин олур. Һәтта бәзән инҹијирик. Дүздүр, биз гејри-камил олдуғумузу бојнумуза алырыг, амма кимсә конкрет сәһвимизи ҝөстәрәндә буну гәбул етмәјә чәтинлик чәкирик. (Ваиз 7:9 ајәсини охујун.) Ола биләр ки, өзүмүзә бәраәт газандыраг, мәсләһәт верәнин нијјәтини шүбһә алтына алаг вә ја мәсләһәтин верилмә тәрзи хошумуза ҝәлмәсин. Јахуд бизә мәсләһәт верән кәсдә сәһв тутуб белә дејәк: «Онун өзүнә мәсләһәт верән лазымдыр. О нијә мәнә мәсләһәт верир?» Мәсләһәтин бизә аид олмадығыны дүшүнсәк, нәтиҹәдә ону гәбул етмәјәҹәјик вә ја гулағымыза хош ҝәлән мәсләһәт ахтараҹағыг.

5. Бу мәгаләдә нә һагда данышаҹағыг?

⁵ Бу мәгаләдә Мүгәддәс Китабда адлары чәкилән бәзи инсанлардан данышаҹағыг. Ҝөрәҹәјик ки, онларын арасында һәм мәсләһәтә гулаг асмајан, һәм дә гулаг асанлар вар иди. Биз һәмчинин өјрәнәҹәјик ки, мәсләһәти гәбул етмәјә вә ондан фајдаланмаға бизә нәләр көмәк едә биләр.

6. Рәһабам падшаһ мәсләһәтә неҹә јанашды вә биз бундан нә өјрәнирик?

⁶ Ҝәлин Рәһабамын һадисәсинә бахаг. О, Исраилин падшаһы оланда халг онун јанына бир хаһишлә ҝәлмишди. Онлар дедиләр ки, атасы Сүлејманын үзәрләринә гојдуғу бојундуруғу јүнҝүлләшдирсин. Тәрифәлајигдир ки, Рәһабам халга ҹаваб верә билмәк үчүн Исраилин ағсаггаллары илә мәсләһәтләшди. Ағсаггаллар она мәсләһәт ҝөрдү ки, халгын хаһишини јеринә јетирсин, онда халг һәмишә она гуллуг едәҹәк (1 Пад. 12:3—7). Ҝөрүнүр бу мәсләһәт Рәһабамын үрәјинҹә олмады вә о өз јашыдлары илә мәсләһәтләшди. Онлар тәхминән гырх јашларында иди, сөзсүз ки, һәјатда мүәјјән тәҹрүбәләри вар иди (2 Салн. 12:13). Лакин бу мәсәләдә онлар Рәһабама сәһв мәсләһәт вердиләр. Онлар дедиләр ки, халгын бојундуруғуну даһа да ағырлашдырсын (1 Пад. 12:8—11). Рәһабама ики фәргли мәсләһәт верилмишди. О, дуа едиб Јеһовадан соруша биләрди ки, һансы мәсләһәти гәбул етсин. Амма о, хошуна ҝәлән мәсләһәтә гулаг асыб, ҹаванларын дедијини етди. Бу, һәм Рәһабам, һәм дә Исраил халгы үчүн фәлакәтлә нәтиҹәләнди. Бизим дә алдығымыз мәсләһәт һәмишә ешитмәк истәдијимиз кими олмаја биләр. Лакин мәсләһәт Аллаһын Кәламына әсасланырса, биз ону гәбул етмәлијик.

7. Үзијјә падшаһын һадисәсиндән нә өјрәнирик?

⁷ Үзијјә падшаһ да мәсләһәти рәдд етмишди. О, Јеһованын мәбәдиндә јалныз каһинләрин ҝирә биләҹәји јерә дахил олуб, бухур тәгдим етмәјә ҹәһд етмишди. Јеһованын каһинләри она деди: «Үзијјә, Јеһоваја бухур јандырмаг сәнин ишин дејил! Бухур јандырмаг јалныз каһинләрин... ишидир». Үзијјә мәсләһәтә неҹә јанашды? Әҝәр о, мәсләһәти тәвазөкарлыгла гәбул едиб, дәрһал мәбәддән чыхса иди, бәлкә дә, Јеһова ону бағышлајарды. Амма «Үзијјә гәзәбләнди». О нәјә ҝөрә мәсләһәти гәбул етмәди? Јәгин, дүшүнүрдү ки, падшаһ олдуғу үчүн истәдији һәр шеји едә биләр, амма Јеһова белә һесаб етмирди. Тәкәббүрлү давранышына ҝөрә Јеһова ону ҹәзаландырды вә о, «өмрүнүн ахырынадәк ҹүзамлы галды» (2 Салн. 26:16—21). Үзијјәнин һадисәсиндән ҝөрүрүк ки, ким олмағымыздан асылы олмајараг, әҝәр Мүгәддәс Китаба әсасланан мәсләһәти рәдд едириксә, Јеһованын рәғбәтини итирәҹәјик.

8. Әјјуб мәсләһәтә неҹә јанашды?

⁸ Мүгәддәс Китабда мәсләһәти гәбул етмәјән инсанларла јанашы, мәсләһәти гәбул едиб хејир тапан инсанларын да нүмунәси дә вар. Мәсәлән, Әјјуб пејғәмбәр. О, Аллаһдан горхса да, ҝүнаһсыз дејилди. О, чәтин вәзијјәтә дүшәндә бәзи јанлыш фикирләр сөјләди. Буна ҝөрә дә һәм Әлиһу, һәм дә Јеһова она бирбаша сәһвини ҝөстәрди. Әјјуб буна неҹә јанашды? О, мәсләһәти тәвазөкарлыгла гәбул етди. О деди: «Мән надан-надан данышдым... Сөзләрими ҝери ҝөтүрүрәм, торпаг ичиндә, күл ичиндә төвбә едирәм». Тәвазөкарлыг ҝөстәрдијинә ҝөрә Јеһова онун башындан немәтләр төкдү (Әјј. 42:3—6, 12—17).

9. Мәсләһәти гәбул етмәклә Муса һансы нүмунәни гојду?

⁹ Муса пејғәмбәр дә ҹидди сәһвинә ҝөрә верилән дүзәлиши гәбул етмишди. Бир дәфә о, һиссләрини ҹиловлаја билмәјиб, Јеһоваја шәрәф ҝәтирмәмишди. Буна ҝөрә дә Јеһова она Вәд едилмиш дијара дахил олмаға иҹазә вермәмишди (Сај. 20:1—13). Муса Јеһовадан гәрарыны дәјишмәсини хаһиш едәндә Јеһова она демишди: «Бир дә Мәнимлә бу һагда данышма» (Ган. 3:23—27). Јеһованын бу сөзләриндән сонра Муса аҹыгланмады, әксинә, о, Јеһованын гәрары илә разылашды вә Јеһова она бундан сонра да Исраил халгынын рәһбәри олмасына изин верди (Ган. 4:1). Һәм Әјјуб, һәм дә Муса пејғәмбәр мәсләһәти гәбул едәрәк бизә ҝөзәл нүмунә гојуб. Әјјуб бәһанәләр ҝәтирмәдән өз дүшүнҹәсини дәјишди. Муса онун үчүн дәјәрли олан имкандан мәһрум олса да, ахыра гәдәр Јеһоваја садиг галды вә бунунла да мәсләһәти гәбул етдијини ҝөстәрди.

10. а) Мәсәлләр 4:10—13 ајәләриндә мәсләһәти гәбул етмәјин фајдасы һаггында нә дејилир? б) Бәзиләри верилән мәсләһәтә неҹә јанашыблар?

¹⁰ Әјјуб вә Муса пејғәмбәрин, һәмчинин онлар кими садиг инсанларын нүмунәсини изләмәјин бизә бөјүк хејри вар. (Мәсәлләр 4:10—13 ајәләрини охујун.) Бир чох баҹы-гардашларымыз онлардан өрнәк алыб. Ҝөрүн Конгода јашајан Емануел адлы гардаш алдығы мәсләһәтлә бағлы нә дејир: «Јығынҹағымызда јеткин гардашлар ҝөрдүләр ки, иманым “ҝәми гәзасына” уғраја биләр вә дәрһал дадыма чатдылар. Мән онларын мәсләһәтинә риајәт етдим, бу исә мәнә бир чох проблемләрдән гачмаға көмәк етди» *. Канадада өнҹүл кими хидмәт едән Меган баҹы мәсләһәтлә бағлы дејир: «Чох вахт мәнә верилән мәсләһәтләр хошума ҝәлмәсә дә, онлар мәнә лазым олан мәсләһәтләр олуб». Хорватијада јашајан Марко адлы гардаш гејд едир: «Мәсулијјәтими итирсәм дә, ҝеријә дөнүб баханда ҝөрүрәм ки, мәнә верилән мәсләһәт Јеһова илә мүнасибәтләрими јенидән мөһкәмләндирмәјә көмәк етди».

11. Карл Клејн гардаш мәсләһәти гәбул етмәклә бағлы нәји баша дүшдү?

¹¹ Мәсләһәти гәбул едиб, онун хејрини ҝөрән диҝәр гардаш исә Рәһбәрлик Шурасынын үзвү олмуш Карл Клејн гардашдыр. О, биографијасында јахын досту олан Ҹозеф Рутерфорд гардашын бир дәфә она ҹидди мәсләһәт вермәсиндән данышыр. Карл гардаш етираф едир ки, әввәл-әввәл мәсләһәтә дүзҝүн јанашмајыб. О дејир: «Нөвбәти сәфәр Рутерфорд гардаш мәни ҝөрәндә: “Салам, Карл!” — дејиб, ҝүләрүзлә саламлады. Лакин һәлә дә инҹик олдуғум үчүн онунла гуру-гуру саламлашдым. Онда Рутерфорд гардаш мәнә деди: “Карл, еһтијатлы ол, Шејтан  сәни изләјир”. Мән утанараг дедим: “Һәр шеј јахшыдыр, гардаш”. Амма о ҝөрүрдү ки, мән инҹимишәм. Буна ҝөрә мәни јенә хәбәрдар етди: “Јахшы, јенә дә еһтијатлы ол. Шејтан сәни изләјир”. О, һаглы иди! Әҝәр биз дедији сөзә ҝөрә гардашымыза кин сахлајырыгса, хүсусилә дә онун бу сөзү демәјә сәлаһијјәти чатырдыса, онда биз асанлыгла Иблисин тәләсинә дүшә биләрик» * (Ефес. 4:25—27). Карл гардаш Рутерфорд гардашын мәсләһәтини гәбул едәрәк араларындакы достлуг мүнасибәтини горуду.

12. Тәвазөкарлыг бизә мәсләһәти гәбул етмәјә неҹә көмәк едә биләр? (Зәбур 141:5).

¹² Мәсләһәти гәбул етмәјә бизә нәләр көмәк едә биләр? Биз тәвазөкар олмалыјыг. Јадда сахламалыјыг ки, гејри-камилик вә бәзән ағылсыз давранырыг. Әввәлдә мүзакирә етдијимиз кими, Әјјубда сәһв дүшүнҹә вар иди. Лакин о, сонрадан өз дүшүнҹәсини дәјишди вә Јеһова ону мүкафатландырды. Чүнки Әјјуб тәвазөкар иди. О, буну өзүндән даһа ҹаван олан Әлиһунун мәсләһәтини гәбул етмәклә ҝөстәрди (Әјј. 32:6, 7). Бәзән, ола биләр ки, биздән јашҹа кичик бири бизә мәсләһәт версин вә ја верилән мәсләһәтин бизә аид олмадығыны дүшүнәк. Тәвазөкар олмаг бизә дә бу вәзијјәтләрдә мәсләһәти гәбул етмәјә көмәк едәҹәк. Канадада јашајан бир ағсаггал дејир: «Биз өзүмүзү гырагдан ҝөрә билмирик. Буна ҝөрә дә һеч ким бизә мәсләһәт вермәсә, неҹә инкишаф едә биләрик? Арамызда елә бир инсан јохдур ки, онун руһун бәһрәсини јетишдирмәкдә вә хидмәт саһәсиндә инкишафа еһтијаҹы олмасын». (Зәбур 141:5 ајәсини охујун.)

13. Мәсләһәтә неҹә јанашмалыјыг?

¹³ Мәсләһәтә Јеһованын мәһәббәтинин ифадәси кими бахын. Јеһова бизим үчүн һәр шејин ән јахшысыны истәјир (Мәс. 4:20—22). О бизә Мүгәддәс Китаб, нәшрләримиз вә јеткин диндашымыз васитәсилә мәсләһәт верәндә Өз мәһәббәтини ҝөстәрмиш олур. Ибраниләрә 12:9 вә 10-ҹу ајәләриндә дејилдији кими, О, «буну бизим хејримиз үчүн едир».

14. Бизә мәсләһәт вериләндә диггәтимизи нәјә ҹәмләмәлијик?

¹⁴ Диггәтинизи мәсләһәтин өзүнә ҹәмләјин, верилмә тәрзинә јох. Бәзән мәсләһәтин верилмә тәрзи там үрәјимизҹә олмур. Дүздүр, мәсләһәт верән инсан чалышмалыдыр ки, мәсләһәти елә версин ки, гаршы тәрәфә ону гәбул етмәк асан олсун * (Гал. 6:1). Амма әҝәр биз мәсләһәт алан тәрәфиксә, јахшы олар ки, диггәтимизи мәсләһәтин  өзүнә ҹәмләјәк, һәтта мәсләһәтин елә дә јахшы тәрздә верилмәдијини һесаб етсәк дә. Нөвбәти суаллар үзәриндә дүшүнә биләрик: «Мәсләһәтин верилмә тәрзи хошума ҝәлмәсә дә, дејиләнләрдән өзүм үчүн нәсә ҝөтүрә биләрәм? Мәсләһәт верән инсанын сәһвләрини кәнара гојуб, мәсләһәтин өзүндән јарарлана биләрәм?» Бизә верилән истәнилән мәсләһәтдән өзүмүз үчүн һансыса нәтиҹәни чыхарсаг, һикмәтли давранмыш оларыг (Мәс. 15:31).

15. Нәјә ҝөрә өзүмүз мәсләһәт истәмәлијик?

¹⁵ Мүгәддәс Китаб бизи мәсләһәт ахтармаға тәшвиг едир. Мәсәлләр 13:10 ајәсиндә дејилир: «Мәсләһәт ахтаран... һикмәтлидир». Неҹә дә доғру сөзләрдир! Киминсә она мәсләһәт вермәсини ҝөзләмәјиб, өзләри мәсләһәт ахтаран инсанлар башгаларына нәзәрән руһани ҹәһәтдән даһа јахшы инкишаф едир. Буна ҝөрә дә мәсләһәт алмаг үчүн өзүнүз тәшәббүс ҝөстәрин.

16. Һансы вәзијјәтләрдә мәсләһәт истәјә биләрик?

¹⁶ Диндашларымыздан нә вахт мәсләһәт истәјә биләрик? Ҝәлин бәзи вәзијјәтләрә бахаг. 1) Бир баҹы тәҹрүбәли тәблиғчини Мүгәддәс Китаб дәрсинә дәвәт едир. Сонра о өз мүәллимлик габилијјәтини пүхтәләшдирмәк үчүн баҹыдан мәсләһәт алыр. 2) Бир субај баҹы палтар алмаг истәјир вә сечдији палтарла бағлы јеткин баҹынын фикрини өјрәнир. 3) Бир гардаша илк дәфә ачыг нитглә чыхыш етмәк тапшырылыр. О, тәҹрүбәли натигдән хаһиш едир ки, онун нитгинә диггәтлә гулаг ассын вә нәји јахшылашдырмалы олдуғу барәдә она мәсләһәт версин. Һәтта узун илләр нитглә чыхыш едән гардашлар да нитгләрини даһа да јахшылашдырмаг үчүн тәҹрүбәли натигләрдән мәсләһәт истәјә биләрләр. Сонра да јахшы олар ки, верилән мәсләһәтә әмәл етсинләр.

17. Мәсләһәтин хејрини неҹә ҝөрә биләрик?

¹⁷ Нөвбәти һәфтәләр вә ја ајлар әрзиндә сизә дә һансыса мәсләһәт вериләҹәк; буну ја Мүгәддәс Китабдан вә нәшрләримиздән, ја да киминсә васитәсилә алаҹагсыныз. Бу заман мәгаләдә мүзакирә етдијимиз фикирләри јадыныза салын. Һәмишә тәвазөкар олун. Диггәтинизи мәсләһәтин верилмә тәрзинә јох, мәсләһәтин өзүнә ҹәмләјин. Алдығыныз мәсләһәти тәтбиг един. Һеч биримиз һикмәтли доғулмамышыг. Амма мәсләһәтә гулаг асыб, тәрбијәни гәбул етсәк, Аллаһын Кәламында дејилдији кими, һикмәтли оларыг (Мәс. 19:20).