Мән 1941-ҹи илдә Франсанын Парис шәһәриндә садә бир аиләдә дүнјаја ҝөз ачмышам. Мән өјрәнмәји чох хошлајырдым. Амма тәәссүф ки, 10 јашым оланда хошаҝәлмәз бир һадисә баш верди. Мән вәрәмә тутулдум. Она ҝөрә дә бир мүддәт мәктәбә ҝедә билмәдим. Һәкимләр мәсләһәт ҝөрдү ки, ағҹијәрләримин јорулмамасы үчүн бир мүддәт јатагда галым. Буна ҝөрә дә бир нечә ај вахтымы лүғәт охумагла вә Парис университетинин Сорбона радиосуну динләмәклә кечирдим. Һәкимләр дејәндә ки, артыг сағалмышам вә мәктәбә ҝери гајыда биләрәм, чох севиндим. Өз-өзүмә дедим: «Һәкимләр нә јахшы иш ҝөрүр». Һәмин ҝүндән етибарән хәстәләри сағалтмаг арзума чеврилди. Атам һәмишә сорушанда ки, «бөјүјәндә ким олмаг истәјирсән?», дејәрдим ки, «һәким олмаг истәјирәм». Һәкимлијә севҝим бах белә јараныб.

Биз аиләликҹә католик идик. Амма Аллаһ һагда чох аз шеј билирдим. Үстәлик, ҹавабсыз галан чохлу суалларым вар иди. Университетдә тибб үзрә тәһсил алмаға башлајандан сонра Јараданын варлығына әмин олдум.

Јадымдадыр, илк дәфә дағлаләсинин һүҹејрәләринә микроскоп алтында баханда тәәҹҹүбләнмишдим ки, онлар истијә вә сојуға неҹә реаксија ҝөстәрир. Мән һәмчинин ситоплазмалары (һүҹејрәнин ичиндәки маддә) мүшаһидә етмишдим. Онлар дузла реаксијаја ҝирәндә јығылыр, саф су илә реаксијаја ҝирәндә исә ҝенишләнир. Бу вә диҝәр сајсыз реаксијалар сајәсиндә организм дәјишән мүһитә ујғунлаша билир. Һүҹејрәләрин мүрәккәблијини мүшаһидә едәндә анладым ки, һәјат тәсадүф нәтиҹәсиндә јаранмајыб.

Университетин икинҹи курсунда охујанда Аллаһын варлығына әминлијим даһа да артды.  Бир дәфә анатомија дәрсиндә голун гурулушу сајәсиндә бармагларын неҹә ачылыб-јығылдығыны өјрәнирдик. Әзәләләрин, вәтәрләрин, бағларын бирҝә неҹә ишләдијини ҝөрәндә адам һејран галыр. Мисал үчүн, голумуздакы әзәләләрин биринә бирләшиб, бармағын икинҹи сүмүјүнә гәдәр давам едән вәтәрләр орадан ики һиссәјә ајрылараг көрпү шәклини алыр. Беләҹә, бу көрпүнүн алтындан кечиб бармағын уҹуна ҝедән башга бир вәтәр һәрәкәт заманы раһат сүрүшә билир. Мөһкәм тохумалар бу вәтәрләрин бармаг сүмүкләринә јахын олмасына көмәк едир. Бармагларымыз бу ҹүр гурулуша саһиб олмаса иди, бу вәтәрләр ҝәрҝин оларды вә бармагларымызы раһат ачыб-јума билмәздик. Мән ајдын ҝөрүрдүм ки, инсан бәдәнинин чох һикмәтли јараданы вар.

Көрпә дүнјаја ҝәлән заман неҹә нәфәс алмаға башладығыны өјрәнәндә Јараданын әл ишләринә даһа да һејран олдум. Өјрәндим ки, ушаг ана бәтниндә оланда оксиҝени ҝөбәк бағы васитәсилә алыр. Буна ҝөрә дә ағҹијәрдәки алвеол адланан һава кисәҹикләриндә һәлә ки оксиҝен олмур. Доғуша бир нечә һәфтә галмыш бу кисәҹикләрин әтрафы сурфактант адлы маддә илә әһатә олунур. Сонра көрпә дүнјаја ҝәлиб илк нәфәсини аланда чох һејрәтамиз бир просес баш верир. Көрпәнин үрәјиндәки дәлик бағланыр, бунун да сајәсиндә ган ҹијәрә өтүрүлүр. Һәмин ан чох ваҹиб бир просес баш верир. Сурфактант маддәси дәрһал һава илә долан кисәҹикләрин бир-биринә јапышмасынын гаршысыны алыр. Бу андан етибарән көрпә сәрбәст шәкилдә нәфәс ала билир.

Бу ҹүр мөҹүзәләр јарадан Аллаһы танымаг истәјирдим. Она ҝөрә дә ҹидди шәкилдә Мүгәддәс Китабы охумаға башладым. Аллаһын Исраил халгына үч мин ил әввәл вердији ҝиҝијена гајдалары мәни һејран гојду. Аллаһ Исраил халгына тапшырмышды ки, нәҹисләрини басдырсынлар, мүтәмади јујунсунлар, һәмчинин әҝәр кимсә кечиҹи хәстәлијә тутулардыса, ону сағаланадәк диҝәрләриндән тәҹрид етсинләр (Лав. 13:50; 15:11; Ган. 23:13). Мүгәддәс Китабда хәстәликләрин неҹә јајылмасы чохдан тәсвир олунса да, алимләр һәлә өтән әсрләрдә буну ашкар едә билмишдиләр. Һәмчинин баша дүшдүм ки, ҹинси мүнасибәтә даир верилмиш ҝиҝијена гајдалары Исраил халгынын сағламлығыны неҹә горујур (Лав. 12:1—6; 15:16—24). Ҝөрдүм ки, Јараданын исраиллиләрә вердији бу ганунлар онларын өз рифаһы үчүн иди вә Аллаһ бу ганунлара риајәт едәнләрә немәтләр верирди. Әмин олдум ки, Мүгәддәс Китаб Аллаһын илһамы илә јазылыб — о Аллаһын ки һәмин вахт адыны билмирдим.

Университетдә охујанда Лиди адлы бир гызла таныш олдум. Она вурулдум. 1965-ҹи илдә, һәлә тәһсилими тамамламамыш биз евләндик. Инди бизим алты ушағымыз вар. 1971-ҹи илдә артыг үч өвладымыз дүнјаја ҝәлмишди. Лиди һәм аиләдә, һәм дә ишимдә мәнә чох көмәк олурду.

Үч ил хәстәханада ишләдикдән сонра өз клиникамы ачмышдым. Гыса мүддәт сонра бир евли ҹүтлүк мүалиҹә үчүн јаныма ҝәлди. Јолдашы үчүн ресепт јазанда гадын деди: «Һәким, хаһиш едирәм, ган тәркибли дәрманлар олмасын». Тәәҹҹүблә сорушдум: «Доғрудан?  Нијә?» О деди: «Биз Јеһованын Шаһидләријик». Мән о вахта гәдәр нә Јеһованын Шаһидләри, нә дә онларын ганла бағлы мөвгеләри барәдә бир шеј ешитмәмишдим. О, Мүгәддәс Китабыны чыхарыб, нәјә ҝөрә гандан имтина етдикләрини мәнә ҝөстәрди (Һәв. 15:28, 29). Сонра онлар Аллаһын Падшаһлығынын ҝөрәҹәји ишләр барәдә охудулар. Орада дејилирди ки, артыг әзаб-әзијјәт, хәстәлик, өлүм олмајаҹаг (Вәһј 21:3, 4). Мән һәјәҹанла дедим: «Сиз нә данышырсыныз?! Бу ки мәним ушаглыг арзумдур. Мән хәстәләрә көмәк етмәк үчүн һәким олмушам». Бу мәнә о гәдәр мараглы ҝәлди ки, бир саат јарым сөһбәт етдик. Онлар ҝетдикдән сонра артыг өзүмү католик кими һисс етмирдим. Өјрәндим ки, валеһ олдуғум Јараданын ады вар имиш — Јеһова.

Мән бу ҹүтлүклә үч дәфә клиникамда ҝөрүшдүм вә һәр дәфә бир саатдан чох сөһбәт етдик. Мүгәддәс Китаб барәдә даһа чох сөһбәт едә билмәк үчүн онлары евимә дәвәт етдим. Лиди Мүгәддәс Китаб дәрсләриндә бизә гошулса да, бизә өјрәдилмиш бәзи католик тәлимләринин јалан олдуғуну гәбул едә билмирди. Она ҝөрә дә мән евимизә рајонумуздакы килсәнин кешишини дәвәт етдим. Биз садәҹә Мүгәддәс Китабы истифадә едәрәк килсә тәлимләри барәдә ахшама гәдәр гызғын мүзакирә апардыг. Бу мүзакирәнин нәтиҹәсиндә Лиди әмин олду ки, Јеһованын Шаһидләри һәгигәти өјрәдир. Бундан сонра Јеһоваја олан мәһәббәтимиз о гәдәр артды ки, һәр икимиз 1974-ҹү илдә вәфтиз олундуг.

Јеһованын бәшәријјәтлә бағлы нијјәтини өјрәнмәк һәјатымдакы приоритетләримә ҝүҹлү тәсир етди. Јеһоваја хидмәт етмәк Лиди илә мәним үчүн һәјатымызын мәгсәди олду. Гәрар вермишдик ки, ушагларымызы Мүгәддәс Китаб принсипләри әсасында бөјүдәк. Өвладларымыза Аллаһы вә башгаларыны севмәји өјрәтдик. Бу исә бизи бир-биримизә даһа да јахынлашдырды (Мәт. 22:37—39).

Исанын «бәли»низ бәли, «хејр» сөзүнүз хејр олсун сөзләри бизим евимиздә ганун олуб (Мәт. 5:37). Лиди илә мән ушагларын тәрбијәсиндә һәмишә һәмфикир олмушуг. Ушагларымызын буна мүнасибәтини јадымыза саланда һәрдән бизи ҝүлмәк тутур. Мәсәлән, гызларымыздан биринин 17 јашы оланда ушагларла бир јердә ҝәзмәјә ҝетмәк истәјирди. Амма јолдашым она иҹазә вермәмишди. Ушаглардан бири она демишди ки, «анан иҹазә вермир, атандан соруш». Гызым исә она белә ҹаваб  вермишди: «Бунун һеч бир мәнасы јохдур. Онларын сөзү һәмишә бир олур». Ушагларымызын алтысы да ҝөрүрдү ки, биз Мүгәддәс Китаб принсипләринә ејни јанашырыг. Шүкүр Јеһоваја, бу ҝүн өвладларымызын әксәријјәти Она хидмәт едир.

Һәгигәти өјрәнәндән сонра һәјатда приоритетләрим дәјишсә дә, һәкимлији атмадым. Истәјирдим, тибби савадымдан Аллаһын халгынын рифаһы үчүн истифадә едим. Буна ҝөрә дә әввәлҹә Парисдәки Бејтелдә, сонралар исә Лувједә тикилмиш јени Бејтелдә көнүллү олараг һәким кими хидмәт етмәјә башладым. Артыг 50 илә јахындыр ки, Бејтелдә көнүллү кими хидмәт едирәм. Бу илләр әрзиндә Бејтелдә чох јахшы достлар газанмышам. Онлардан бәзиләринин артыг 90-дан јухары јашы вар. Бир дәфә мараглы бир шеј олду. Јени бир бејтелли илә таныш олдум. Сөһбәт әснасында мәлум олду ки, сән демә, 20 ил әввәл анасы ону дүнјаја ҝәтирәндә һәкими мән олмушам.

Һәгигәтдә олдуғум илләр әрзиндә Јеһованын тәшкилаты васитәсилә Өз халгына јол ҝөстәрдијинә, онлары горудуғуна шаһид олмушам вә бу мәним Она мәһәббәтими артырыб. Мәсәлән, 1980-ҹи илләрин әввәлләриндә Рәһбәрлик Шурасы бир програм һазырламышды. Бу програмын мәгсәди һәкимләри вә тибб ишчиләрини Јеһованын Шаһидләринин ганла бағлы мөвгеји илә даһа јахындан таныш етмәк иди.

Сонралар, 1988-ҹи илдә Рәһбәрлик Шурасы Бејтелдә Хәстәхана мәлумат хидмәти адлы јени шөбә јаратды. Бу шөбәнин нәздиндә Хәстәханаларла әлагә комитәләри фәалијјәт ҝөстәрирди. Һәмин вахт бу комитәләр јалныз Бирләшмиш Штатларда јарадылмышды. Хәстәханаларла әлагә комитәси баҹы-гардашлара онларын ганла бағлы мөвгејинә һөрмәтлә јанашан һәким тапмаға көмәк едир. Сонралар бу комитә бүтүн дүнјадакы Бејтелләрдә, еләҹә дә Франсада јарадылды. Јеһованын тәшкилатынын хәстә баҹы-гардашлара һәјатларынын бу чәтин вахтында неҹә дајаг олдуғуну ҝөрәндә һејран галырам!

Һәким олмаг мәним ушаглыг арзум иди. Амма приоритетләрим барәдә дүшүнәндә баша дүшдүм ки, инсанларын ән әсасы руһани шәфаја еһтијаҹы вар. Буна ҝөрә дә онлара едә биләҹәјим ән јахшы көмәк һәјат мәнбәји олан Јеһова Аллаһ һагда билик вермәк иди. Бу мүалиҹә методуну тәтбиг етмәк үчүн Лиди илә мән өнҹүл кими хидмәт едирдик. Һәр ај мүмкүн гәдәр чох вахт ајырыб Падшаһлыг һагда мүждәни инсанлара тәблиғ едирдик. Биз бу ҝүн дә бу һәјати ваҹиб ишдә баҹардығымыз гәдәр иштирак едирик.

Мән јенә дә инсанлара мүвәггәти дә олса, шәфа вермәк үчүн әлимдән ҝәләни едирәм. Амма баша дүшүрәм ки, ән јахшы һәким белә бүтүн хәстәликләри сағалтмаға, өлүмүн гаршысыны алмаға гадир дејил. Буна ҝөрә дә ағры-аҹынын, хәстәлијин, өлүмүн олмајаҹағы о ҝөзәл дөвраны һәсрәтлә ҝөзләјирәм. Сүрәтлә јахынлашан бу јени дүнјада мәним Аллаһын јаратдыглары һагда, әләлхүсус да мөһтәшәм инсан бәдәни һагда әбәдијјән өјрәнмәк имканым олаҹаг. Ушаглыг арзум тезликлә тамамилә чин олаҹаг. Әминәм ки, бизи гаршыда ән ҝөзәл һәјат ҝөзләјир!