1, 2. Һансы мәнада бәшәријјәтин вәзијјәти биринҹи абзасда данышылан оғланын вәзијјәтинә бәнзәјир?

 ВАРЛЫ аиләдә бөјүјән ҹаван бир оғланы тәсәввүр един. Бир ҝүн онун аиләсиндә фаҹиә баш верир: бәдбәхт һадисә нәтиҹәсиндә валидејнләри һәлак олур. Бу хәбәр ону бәрк сарсыдыр. Амма јазыг өзүнә ҝәлмәмиш ону сарсыдан башга бир хәбәр алыр. Сән демә, валидејнләри аиләнин бүтүн вар-дөвләтини саға-сола хәрҹләјибләр вә күлли мигдарда борҹа ҝирибләр. Инди бу оғланын һалыны тәсәввүр един. О, вар-дөвләт әвәзинә, борҹ мирас алыр. Бир тәрәфдән дә борҹ јијәләри оғланын башынын үстүнү кәсдириб. Борҹун мигдары да о гәдәрдир ки, ону өмрүндә гајтара билмәз.

² Биз мүәјјән мәнада һәмин оғланын вәзијјәтиндәјик. Бизим улу валидејнләримиз Адәмлә Һәвва камил идиләр, ҝөзәл Ҹәннәтдә јашајырдылар (Јар. 1:27; 2:7—9). Гаршыда онлары сонсуз, мөһтәшәм һәјат ҝөзләјирди. Амма сонра һәр шеј дәјишди. Онлар Ҹәннәти вә әбәди јашамаг имканыны итирдиләр. Бәс өвладларына нәји мирас гојдулар? Мүгәддәс Китабда јазылыб: «Ҝүнаһ бир адам [Адәм] васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ром. 5:12). Демәли, Адәм бизә ҝүнаһы мирас гојуб. Онун да нәтиҹәси өлүмдүр. Мирас алдығымыз ҝүнаһ һеч биримизин гајтара билмәјәҹәји бөјүк бир борҹ кимидир (Зәб. 49:8).

 3. Нәјә ҝөрә ҝүнаһларымызы борҹа бәнзәтмәк олар?

 ³ Иса ҝүнаһы «борҹа» бәнзәтмишди (Мәт. 6:12, һашијә; Лука 11:4, һашијә). Биз ҝүнаһ ишләјәндә санки Јеһованын гаршысында борҹа ҝиририк. Биздән бу борҹу өдәмәк тәләб олунур. Әҝәр бу борҹ өдәнилмәмиш галсајды, онда јалныз биз өләндән сонра ләғв олунаҹагды (Ром. 6:7, 23).

 4. а) Көмәксиз галсајдыг, биз ҝүнаһлы инсанларла нә баш верәрди? (Зәбур 49:7—9). б) Мүгәддәс Китабда «ҝүнаһ» дејиләндә нә нәзәрдә тутулур? (« Ҝүнаһ» адлы чәрчивәјә бахын.)

⁴ Биз Адәмлә Һәвванын итирдикләрини өз ҝүҹүмүзлә ҝери гајтара билмәрик. (Зәбур 49:7—9 ајәләрини охујун.) Көмәксиз галсајдыг, нә әбәди јашамаға, нә дә дирилмәјә үмидимиз оларды. Һејванлар кими өлүб ҝедәрдик (Ваиз 3:19).

 5. Мәһәббәтли Атамыз Јеһова мирас алдығымыз ҝүнаһ борҹуну өдәмәк үчүн нә едиб? (Шәклә бахын.)

⁵ Мәгаләнин әввәлиндә данышдығымыз ҝәнҹи јенидән јадымыза салаг. Әҝәр варлы бир инсан онун бүтүн борҹларыны өдәмәји тәклиф етсәјди, һәмин ҝәнҹ өзүнү неҹә һисс едәрди? Шүбһәсиз, сәхавәтлә верилмиш бу һәдијјәни бөјүк миннәтдарлыгла гәбул едәрди. Ејнилә, мәһәббәтли Атамыз Јеһова Адәмдән мирас алдығымыз ҝүнаһ борҹуну өдәмәк үчүн бизә һәдијјә вериб. Һәмин һәдијјә барәдә Иса демишди: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:16). Бу һәдијјә Јеһова илә ҝөзәл мүнасибәтләрә дә јол ачыр.

 6. Мәгаләдә нәји арашдыраҹағыг вә нәјә ҝөрә?

⁶ Ҝүнаһларымызын бағышланмасына јол ачан бу мөһтәшәм һәдијјәдән неҹә фајдалана биләрик? Мүгәддәс Китабдакы бәзи ифадәләр бу суала ҹаваб тапмаға көмәк едир. Ҝәлин барышмаг, кәффарә, фидјә, азад олунмаг вә салеһ сајылмаг ифадәләринин мәнасыны бир-бир арашдыраг. Өјрәндикләримиз барәдә дүшүндүкҹә Јеһованын бизи әфв етмәк үчүн ҝөрдүјү ишләрә миннәтдарлығымыз даһа да артаҹаг.

МӘГСӘД: БАРЫШМАГ

 7. а) Адәмлә Һәвва даһа нәји итирди? б) Адәмлә Һәвванын өвладлары олдуғумуз үчүн нәјә бөјүк еһтијаҹ дујуруг? (Ромалылара 5:10, 11).

⁷ Адәмлә Һәвва тәкҹә әбәди јашамаг имканыны јох, һәмчинин Аталары Јеһова илә дәјәрли мүнасибәтләрини итирдиләр. Онлар ҝүнаһ етмәмишдән әввәл Аллаһын аиләсинин үзвү идиләр (Лука 3:38). Амма итаәтсизлик етдикләри үчүн Јеһованын  аиләсиндән говулдулар. Бу һадисә онларын һәлә ушаглары олмамышдан габаг баш вермишди (Јар. 3:23, 24; 4:1). Биз дә дахил олмагла, Адәмлә Һәвванын өвладларындан һеч кәс Аллаһын аиләсинин үзвү ола билмәзди. Буна ҝөрә дә Јеһова илә мүнасибәтләримизи бәрпа етмәк үчүн Онунла барышмаға еһтијаҹ дујуруг. (Ромалылара 5:10, 11 ајәләрини охујун.) Бир мәнбәјә әсасән, «барышмаг» сөзү үчүн истифадә едилән јунан ифадәси «дүшмәни дост етмәк» мәнасыны верә биләр. Бизимлә барышмаг үчүн илк аддымы Јеһованын атмасы адамы валеһ едир. Бәс О буну неҹә етди?

ҜӨРҮЛӘН ТӘДБИР: КӘФФАРӘ

 8. Кәффарә нәдир?

⁸ Кәффарә — Јеһованын Өзү илә ҝүнаһлы инсанлар арасында мүнасибәтләрини бәрпа етмәк үчүн ҝөрдүјү тәдбирдир. Бура бир шеји ејни дәјәрдә олан диҝәр шејлә әвәз етмәк дахилдир. Бу јолла итирилмиш вә ја мәһв едилмиш бир шеји бәрпа етмәк, јахуд әвәз етмәк мүмкүн олур. Һәмчинин кәффарә инсанын Аллаһла сүлһдә олмасына имкан јарадыр (Ром. 3:25).

 9. Исраиллиләрин ҝүнаһларыны бағышламаг үчүн Јеһова һансы мүвәггәти тәдбири ҝөрмүшдү?

⁹ Јеһова исраиллиләрин ҝүнаһыны бағышламаг вә онларла арасында достлуг мүнасибәти јаратмаг үчүн бир тәдбир ҝөрмүшдү. Исраиллиләр илдә бир дәфә «Кәффарә ҝүнү» адлы хүсуси бир бајрамы гејд етмәли идиләр. Һәмин ҝүн баш каһин халгын адындан һејван гурбанлары тәгдим едирди. Инсан һејвандан үстүн олдуғу үчүн, сөзсүз, бу гурбанлар инсанын ҝүнаһыны тамамилә јуја билмәзди. Бунунла белә, төвбә едән исраиллиләр Јеһованын тәләб етдији гурбанлары ҝәтирәндә Јеһова онлары бағышлајырды (Ибр. 10:1—4). Бундан әлавә, Кәффарә ҝүнү вә диҝәр вахтларда ҝәтирилән гурбанлар исраиллиләрә ваҹиб бир шеји хатырладырды: онлар ҝүнаһлыдырлар вә там бағышланмаг үчүн бирдәфәлик һәлл јолуна еһтијаҹ дујурлар.

10. Ҝүнаһларымызын бирдәфәлик бағышланмасы үчүн Јеһова нә етди?

¹⁰ Јеһованын ағлында ҝүнаһларымызын бирдәфәлик бағышланмасы үчүн бир һәлл јолу вар иди. О, севимли Оғлу Иса Мәсиһин «бир чох адамын ҝүнаһыны дашымаг үчүн бир дәфә өзүнү гурбан» вермәси үчүн тәдбир ҝөрдү (Ибр. 9:28). Беләҹә, Иса һәјатыны «бир чохлары уғрунда фидјә кими» верди (Мәт. 20:28). Бәс фидјә нәдир?

ӨДӘНИЛӘН ДӘЈӘР: ФИДЈӘ

11. а) Мүгәддәс Китаба әсасән фидјә нәдир? б) Фидјәни өдәјән инсан һансы тәләбләрә ҹаваб вермәли иди?

¹¹ Мүгәддәс Китаба әсасән фидјә кәффарә вә барышыг үчүн өдәнилән дәјәрдир a. Јеһованын ҝөзүндә бу, итирилән шеји бәрпа етмәјә әсас верир. Һансы мәнада? Артыг гејд олундуғу кими, Адәмлә Һәвва камил һәјатлары илә јанашы, әбәди јашамаг имканыны да итирдиләр. Буна ҝөрә дә фидјәнин дәјәри итирилән шејә бәрабәр олмалы иди (1 Тим. 2:6). Фидјә јалныз јеткин јашда олан киши тәрәфиндән өдәнилә биләрди. Һәмин инсан 1) камил олмалы, 2) јер үзүндә әбәди јашамасы мүмкүн олмалы вә 3) бизләр үчүн һәјатыны гурбан вермәјә һазыр олмалы иди. Јалныз бу һалда һәмин инсанын һәјаты Адәмин итирдији һәјаты әвәз едә биләрди.

12. Нәјә ҝөрә Иса фидјәнин дәјәрини өдәмәк үчүн мүнасиб кәс иди?

 ¹² Иса фидјәнин дәјәрини өдәмәк үчүн мүнасиб инсан иди. Ҝәлин бунун үч сәбәбинә бахаг. 1) О, камил иди, «һеч бир ҝүнаһ ишләмәмишди» (1 Бут. 2:22). 2) Камил олдуғу үчүн јер үзүндә әбәди јашамасы мүмкүн иди. 3) О бизим уғрумузда һәјатыны гурбан вермәјә һазыр иди (Ибр. 10:9, 10). Исанын камил һәјаты илк инсан Адәмин камил һәјатына бәрабәр иди (1 Кор. 15:45). Бизим уғрумузда өлмәклә Иса тәләб олунан дәјәри өдәјиб Адәмин итирдикләрини ҝери гајтара билди (Ром. 5:19). Бунунла Иса «сонунҹу Адәм» олду. Артыг Адәмин итирдикләрини ҝери алмаг үчүн башга бир камил инсанын ҝәлмәсинә еһтијаҹ галмады. Иса өлүмү илә «буну бирдәфәлик етди» (Ибр. 7:27; 10:12).

13. Јеһова Онунла јахшы мүнасибәтләримизин олмасы үчүн нә етди?

¹³ Бура кими өјрәндик ки, Јеһова кәффарә тәдбири васитәсилә ҝүнаһларымызын бағышланмасына јол ачды. Бунун да сајәсиндә Онунла јахшы мүнасибәтләр гура биләрик. Амма кәффарә тәдбиринин баш тутмасы үчүн фидјә өдәнилмәли иди. Иса Мәсиһ бизим уғрумузда гијмәтли ганыны төкәндә бу дәјәри өдәди (Ефес. 1:7; Ибр. 9:14). Бәс бунунла нә мүмкүн олду? Ҝәлин ҝөрәк.

НӘТИҸӘ: АЗАД ОЛУНМАГ ВӘ САЛЕҺ САЈЫЛМАГ

14. Инди нә барәдә данышаҹағыг вә нәјә ҝөрә?

¹⁴ Кәффарә тәдбиринин нәтиҹәси нә олду? Мүгәддәс Китабда бу тәдбирин фајдаларыны вурғуламаг үчүн бир нечә ифадә ишләдилир. Бу ифадәләр охшар мәналары версә дә, һәр сөз кәффарә тәдбиринин мүәјјән бир јөнүнү вурғулајыр. Бу сөзләри тәһлил етдикҹә онларын бизә шәхсән неҹә аид олдуғуну да ҝөрәҹәјик.

15, 16. а) Мүгәддәс Китабда «азад олунмаг» дејиләндә нә нәзәрдә тутулур? б) Ҝүнаһ вә өлүмдән азад олунмаг биздә һансы һиссләри ојадыр?

¹⁵ Мүгәддәс Китабда дејилир ки, фидјә өдәнилдији үчүн биз азад олундуг. Һәвари Бутрус буну белә ифадә едир: «Билирсиниз ки, сиз дәдә-бабаларыныздан галма пуч һәјат тәрзиндән гызыл вә ҝүмүш кими фани шејләр васитәсилә јох, Мәсиһин гүсурсуз вә ләкәсиз гузунун ганына бәнзәр гијмәтли ганы илә азад едилмисиниз» (1 Бут. 1:18, 19).

¹⁶ Фидјә гурбанлығы сајәсиндә ҝүнаһ вә өлүмүн амансыз пәнҹәсиндән азад олмағымыз мүмкүндүр (Ром. 5:21). Исанын дәјәрли ганы, јәни һәјаты васитәсилә азад олундуғумуз үчүн, сөзсүз, өзүмүзү она вә Јеһоваја борҹлу һисс едирик. Буна ҝөрә онлара миннәтдарыг (1 Кор. 15:22).

17, 18. а) Салеһ сајылмаг нә демәкдир? б) Салеһ сајылмағын бизә һансы фајдасы вар?

¹⁷ Салеһ сајылмаг әлејһимизә олан иттиһамларын вә мәһкумлуғун үзәримиздән ҝөтүрүлмәси мәнасыны верир. Јеһованын бизи салеһ һесаб етмәси о демәк дејил ки, биз буна лајигик, јахуд О бизим ҝүнаһ ишләмәјимизә ҝөз јумур. О, ҝүнаһларымызы бағышламаға она ҝөрә һазырдыр ки, фидјә өдәнилди вә биз кәффарә тәдбиринә иман ҝәтиририк (Ром. 3:24; Гал. 2:16).

¹⁸ Салеһ сајылмағын һәр биримизә һансы фајдасы вар? Иса илә бирҝә ҝөјдә падшаһлыг етмәк үчүн сечиләнләр Аллаһын өвладлары кими артыг салеһ елан олунублар (Тит. 3:7; 1 Јәһ. 3:1). Јеһова онларын ҝүнаһларыны әфв едиб, башга сөзлә десәк,  онларын үзәриндә артыг мәһкумлуг јохдур. Буна ҝөрә дә Аллаһын Падшаһлығында олмаға јарарлыдырлар (Ром. 8:1, 2, 30). Јер үзүндә јашамаға үмид едәнләр исә Аллаһын досту кими салеһ сајылырлар. Јеһова онларын да ҝүнаһларыны бағышлајыб (Јаг. 2:21—23). Армаҝеддондан сағ чыхаҹаг бөјүк издиһамын һеч вахт өлмәмәк имканы вар (Јәһ. 11:26). Өлүм јухусунда олан «салеһләр» вә «гејри-салеһләр» дириләҹәкләр (Һәв. 24:15; Јәһ. 5:28, 29). Јеһованын јер үзүндә јашајан бүтүн итаәткар хидмәтчиләри тәдриҹән «Аллаһын өвладларынын шанлы азадлығына» говушаҹаг (Ром. 8:21). Атамыз Јеһованын јенидән камил өвладлары олаҹағымыз ҝүнү дөрд ҝөзлә ҝөзләјирик!

19. Вәзијјәтимиз јахшылыға доғру неҹә дәјишди? (Һәмчинин « Јеһованын әфви» адлы чәрчивәјә бахын.)

¹⁹ Мәгаләнин әввәлиндә бәһс едилән ҹаван оғлан һәр шејини итирмишди вә онун бојнунда һеч вахт өдәјә билмәјәҹәји бөјүк бир борҹ галмышды. Бир заманлар биз дә онун кими чарәсиз идик. Амма Јеһоваја миннәтдарыг ки, бизи наәлаҹ гојмады. Кәффарә тәдбири вә Исанын өдәдији фидјә сајәсиндә вәзијјәтимиз јахшылыға доғру дәјишди. Иса Мәсиһә иманымыз ҝүнаһ вә өлүмдән азад олунмағымыза имкан јарадыр. Һәмчинин бунун сајәсиндә ҝүнаһларымыз ләғв едилә биләр вә мәһкумлуг үзәримиздән ҝөтүрүлә биләр. Ән ваҹиби исә одур ки, бу ҝүн мәһәббәтли Атамыз Јеһова илә ҝөзәл мүнасибәтләримизин олмасы мүмкүндүр.

20. Нөвбәти мәгаләнин мөвзусу нә һагдадыр?

²⁰ Јеһованын вә Исанын бизим үчүн етдикләри үзәриндә дүшүндүкҹә үрәјимиз шүкранла долуб-дашыр (2 Кор. 5:15). Онларын көмәји олмасајды, бу дүнјада тамамилә үмидсиз јашајардыг. Бәс Јеһованын әфви шәхсән һәр биримиз үчүн һансы мәнаны кәсб едир? Нөвбәти мәгаләдә елә бундан данышылаҹаг.