Атамла анам гаты католик идиләр. Амма Мүгәддәс Китабдан Аллаһын адынын Јеһова олдуғуну өјрәнәндә һәр икиси Јеһованын шөвглү хидмәтчиси олду. Атам тахта үзәриндә Исанын шәкилләрини ојарды. Амма Јеһованы таныјандан сонра о бу габилијјәтиндән истифадә едәрәк евимизин биринҹи мәртәбәсини ибадәт евинә чевирди. Бизим евимиз Сан-Хуан дел Монтедә (Филиппинин пајтахты Маниланын әтраф әразиси) илк ибадәт еви олду.

Мән 1952-ҹи илдә анадан олмушам. Валидејнләрим дөрд бөјүк гардашым вә үч баҹымла јанашы мәнә дә ҝөзәл руһани тәрбијә верибләр. Мән бөјүдүкҹә атам мәни Мүгәддәс Китабдан һәр ҝүн бир фәсил охумаға тәшвиг едирди. Атам тәшкилатымыза аид фәргли-фәргли нәшрләрдән мәнә дәрс кечиб. Һәрдән валидејнләрим сәјјар нәзарәтчиләри вә филиал нүмајәндәләрини евимиздә галмаға дәвәт едирди. Бу гардашларын данышдыглары һадисәләрдән аиләликҹә бөјүк севинҹ дујурдуг вә руһланырдыг. Бунлар бизи хидмәти һәјатымызда һәр шејдән үстүн тутмаға тәшвиг едирди.

Валидејнләримин гојдуғу иман нүмунәсиндән чох шеј өјрәнмишәм. Анам хәстәликдән һәјатыны итирәндән сонра атамла мән 1971-ҹи илдә өнҹүл хидмәтинә башладыг. Амма 1973-ҹү илдә 20 јашларымда атамы да итирдим. Валидејнләримин иткисиндән сонра дахилимдә бошлуг вә тәнһалыг һисс едирдим. Амма Мүгәддәс Китабын вердији «мөһкәм вә сарсылмаз» үмид бир лөвбәр кими мәнә емосионал вә руһани ҹәһәтдән сарсылмамаға көмәк еләди (Ибр. 6:19). Атамын өлүмүндән бир мүддәт сонра мән Палаван әјаләтиндә јерләшән уҹгар Корон адасында хүсуси өнҹүл кими хидмәт етмәјә башладым.

Корона ҝәләндә 21 јашым вар иди. Шәһәр ушағы олдуғум үчүн бу адада инсанларын  електрик, ахар су сарыдан корлуг чәкдијини, машынларын, мотосиклетләрин аз олдуғуну ҝөрәндә тәәҹҹүбләнмишдим. Бурада ҹәми бир нечә Јеһованын Шаһиди олдуғу үчүн мәним өнҹүл әмәкдашым јох иди вә бәзән тәк тәблиғ етмәли олурдум. Илк ај аиләм вә достларым үчүн бәрк дарыхырдым. Ҝеҹәләр улдузлу сәманы сејр едәндә јанагларымдан ҝөз јашлары сүзүлүрдү. Тәјинатымы дајандырыб евә гајытмаг истәјирдим.

Тәнһа галдығым бу вахтларда дуа едиб үрәјими Јеһоваја бошалдырдым. Мүгәддәс Китабдан, нәшрләримиздән охудуғум руһландырыҹы фикирләри јадыма салырдым. Чох вахт Зәбур 19:14 ајәси јадыма дүшүрдү. Анлајырдым ки, Јеһованы разы салан шејләр барәдә, мәсәлән, Онун ҝөрдүјү ишләр вә ҝөзәл хүсусијјәтләри барәдә дүшүнҹәләрә далсам, О мәним Гајам вә Хиласкарым олаҹаг. «Ҝөзәтчи гүлләси»ндәки «Сиз һеч вахт тәк дејилсиниз» a адлы мәгаләнин мәнә чох бөјүк көмәји дәјди. Ону тәкрар-тәкрар охујурдум. Һәмин вахтларда мүәјјән мәнада Јеһова илә тәкбәтәк галырдым. Бу исә мәнә дуа етмәк, арашдырма апармаг вә дәрин дүшүнмәк үчүн ҝөзәл имкан јарадырды.

Корона чатандан гыса мүддәт сонра ағсаггал тәјин олундум. Бурада јеҝанә ағсаггал мән олдуғум үчүн һәр һәфтә Теократик Хидмәт Мәктәбини, Хидмәт ҝөрүшүнү, Јығынҹағын китабөјрәнмәсини вә «Ҝөзәтчи гүлләси» мүзакирәсини апарырдым. Бундан әлавә, һәр һәфтә ачыг нитг сөјләјирдим. Бир шеји дејә биләрәм ки, артыг тәнһалығымын дәрдини чәкмәјә вахтым јох иди.

Корондакы хидмәтим ҝөзәл бәһрәләр верди: шаҝирдләримдән бәзиләри вәфтиз олунду. Амма чәтинликләрим дә олурду. Бәзән мүәјјән бир әразијә чатмаг үчүн јарым ҝүн пијада јол ҝетмәли олурдум. Өзү дә билмирдим чатанда һарада ҝеҹәләјәҹәјәм. Јығынҹағын тәблиғ әразисинә чохлу кичик адалар да дахил иди. Бахмајараг ки, үзмәји билмирдим һәмин әразиләрә ҝетмәк үчүн чох вахт мүһәррикли гајыгла фыртыналы дәнизләрдән кечирдим. Бүтүн бу чәтинликләримдә Јеһова мәни горуду вә мәнә дајаг олду. Сонралар баша дүшдүм ки, сән демә, Јеһова мәни нөвбәти тәјинатымдакы даһа бөјүк чәтинликләрә һазырлајырмыш.

1978-ҹи илдә Австралијанын шималына, Папуа-Јени Гвинејаја тәјин олундум. Бура тәхминән Испанијанын әразиси бојда олан дағлыг бир өлкәдир. Бурада јашајан үч милјона јахын әһалинин 800-дән чох дилдә данышдығыны биләндә һејрәтә ҝәлмишдим. Нә јахшы ки, инсанларын әксәријјәти ток-писин кими танынан Маланезија пиҹин дилиндә даныша билирди.

Мән мүвәггәти олараг пајтахт Порт-Морсбидәки инҝилисдилли јығынҹаға тәјин олундум. Амма сонра ток-писиндилли јығынҹаға кечдим вә бу дили өјрәнмәк үчүн курса ҝетдим. Орада өјрәндикләрими тәблиғдә истифадә едирдим. Бунун сајәсиндә дили даһа тез өјрәнә билдим. Чох кечмәмиш ток-писин дилиндә ачыг нитглә чыхыш етмәјә башладым. Тәсәввүр едирсиниз, Папуа-Јени Гвинејаја ҝәлмәјимдән һеч бир ил кечмәди ки, мәни ток-писиндилли јығынҹаглара рајон нәзарәтчиси тәјин етдиләр. Бу јығынҹаглар бир нечә бөјүк әјаләтдә јерләширди.

Јығынҹаглар бир-бириләриндән узагда олдуғу  үчүн мән чохлу рајон топлантысы тәшкил етмәли вә чохлу сәјаһәт етмәли олурдум. Әввәл-әввәл өзүмү бу әразиләрдә јад һисс едирдим, чүнки һәм өлкә, һәм дил, һәм дә мәдәнијјәт мәним үчүн јени иди. Әрази дағлыг вә кәлә-көтүр олдуғундан јығынҹаглары гуру јолла сәјаһәт етмәк мүмкүн дејилди. Буна ҝөрә дә демәк олар ки, һәр һәфтә тәјјарә илә сәјаһәт етмәли олурдум. Һәрдән елә дә јахшы вәзијјәтдә олмајан тәк мүһәррикли тәјјарәнин тәк сәрнишини мән олурдум. Гајыгла етдијим сәјаһәтләрдә олдуғу кими бу сәјаһәтләр заманы да тәлаш, һәјәҹан кечирирдим!

Һәмин вахтлар тәк-түк адамда телефон вар иди. Она ҝөрә дә мән јығынҹагларла мәктуб васитәсилә әлагә сахлајырдым. Чох вахт баш чәкдијим јығынҹаға ҝөндәрдијим мәктубдан әввәл ҝәлиб чатырдым. Буна ҝөрә дә ҹамаатдан соруша-соруша тәблиғчиләри тапырдым вә һәр дәфә онлар мәни елә ҝөзәл гаршылајырдылар, о гәдәр миннәтдар олурдулар ки, һәдәр јерә зәһмәт чәкмәдијимә әмин олурдум. Јеһованын гајғысыны бир чох јолла дујмушам. Бу да Онунла мүнасибәтими даһа да мөһкәмләндириб.

Буҝенвил адасына илк зијарәтимдә бир ҹүтлүк ҝүлүмсәјәрәк мәнә јахынлашыб сорушду: «Бизи таныдын?» Јадыма дүшдү ки, Порт-Морсбијә илк дәфә ҝәләндә бу ҹүтлүјә тәблиғ едиб Мүгәддәс Китаб дәрси кечмәјә башламышдым. Бу әразидән көчәндә онлары јерли бир гардаша өтүрмүшдүм. Инди һәр икиси вәфтиз олунмушду! Бу, Папуа-Јени Гвинејада хидмәт етдијим 3 ил әрзиндә алдығым чохлу немәтләрдән бири иди.

1978-ҹи илдә Корондан көчмәздән әввәл мән Адел адлы ҝөзәл вә фәдакар бир баҹы илә таныш олдум. Онун Самуел вә Ширли адлы ики өвлады вар иди. Адел бу өвладларыны бөјүдә-бөјүдә өнҹүллүк едирди, ејни заманда јашлы анасынын гејдинә дә галырды. Мән 1981-ҹи илин мајында Филиппинә гајыдыб онунла евләндим. Аилә гурандан сонра биз бирликдә өнҹүллүк едир вә аиләмизин гајғысына галырдыг.

Аиләли олсам да, 1983-ҹү илдә мәни Палаван әјаләтиндә јерләшән Линапакан адасына хүсуси өнҹүл тәјин етдиләр. Биз аиләликҹә Јеһованын Шаһидләринин олмадығы бу уҹгар әразијә көчдүк. Тәхминән бир ил сонра Аделин анасы вәфат етди. Даима хидмәтлә мәшғул олдуғумуз үчүн бу иткијә таб ҝәтирә билдик. Линапаканда чохлу инсанла дәрс кечмәјә башладыг. Шаҝирдләр ибадәт ҝөрүшләринә ҝәлмәк истәјирдиләр. Буна ҝөрә дә өзүмүз кичик бир ибадәт еви тикдик. Бураја ҝәлишимиздән ҹәми үч ил кечсә дә, анма мәрасиминдә 110 нәфәрин иштирак етдијини ҝөрәндә севинҹимизин һәдди-һүдуду јох иди. Бу инсанларын чоху сонралар вәфтиз олунду.

Мән 1986-ҹы илдә Кулон адасына тәјин олундум. Бу адада ҹүзам хәстәләринин колонијасы вар иди. Бир нечә илдән сонра Адел дә хүсуси өнҹүл тәјин олунду. Әввәл-әввәл биз ҹүзам хәстәлијинә ҝөрә ејбәҹәр һала дүшән инсанлара тәблиғ етмәјә еһтијат едирдик. Амма орадакы тәблиғчиләр бизи әмин еләдиләр ки, бу инсанлар мүалиҹә алыблар вә јолухма риски чох аздыр. Онлардан бәзиләри бир баҹынын евиндә кечирилән  ибадәт ҝөрүшләринә ҝәлирди. Өзләрини Аллаһ вә инсанлар тәрәфиндән атылмыш һисс едән бу адамлара Мүгәддәс Китабдакы үмиди бөлүшмәјә гыса заманда алышдыг вә бу бизә бөјүк севинҹ верирди. Ҹидди хәстә олан кәсләр бир ҝүн мүкәммәл сағламлыға говушаҹагларыны биләндә ҝөзләри парылдајырды. Буну ҝөрмәк нәјә десән дәјәрди! (Лука 5:12, 13).

Бәс ушагларымыз Кулондакы һәјата неҹә алышдылар? Онларын јахшы достлары олсун дејә Аделлә мән Коронда јашајан 2 баҹыны бизимлә әмәкдашлыг етмәјә дәвәт етдик. Биз бир нечә әр-арвада дәрс кечирдик, һәмин вахт исә Самуел, Ширли вә бу ики ҝәнҹ баҹы онларын ушагларына дәрс кечирди. Һәтта 11 аиләјә дәрс кечдијимиз вахтлар олуб. Шаҝирдләримизин сајы о гәдәр чохалды ки, јени бир јығынҹаг јаранды!

Әввәл-әввәл бу әразидә тәкҹә мән ағсаггал идим. Филиал мәндән хаһиш етди ки, Кулонда сәккиз тәблиғчинин олдуғу бир әразидә һәфтәлик ҝөрүшләри кечирим. Ејни шеји доггуз тәблиғчиси олан Марили адлы кәнддә дә етмәли идим. Бу кәндә гајыгла үч саата чатмаг олурду. Ибадәт ҝөрүшләриндән сонра исә аиләликҹә бир нечә саат дағлыг әразиләрлә јол ҝедиб Һалси адлы кәнддә Мүгәддәс Китаб дәрсләри кечирдик.

Тәдриҹән Марилидә вә Һалсидә һәгигәти өјрәнәнләрин сајы елә чохалды ки, һәр ики јердә ибадәт еви тикдик. Линапаканда олдуғу кими бурада да баҹы-гардашлар вә һәгигәтә мараг ҝөстәрәнләр чох көмәјимизә чатдылар. Онлар бизи һәм тикинти материаллары илә тәмин етдиләр, һәм дә тикинти ишинә көмәк етдиләр. Марилидәки ибадәт еви 200 нәфәрлик иди. Бу ибадәт евини ҝенишләндирмәк мүмкүн олдуғу үчүн орада биз топлантылар да кечирирдик.

Өвладларымыз бөјүјүб боја-баша чатандан сонра Аделлә мән 1993-ҹү илдә Филиппиндә сәјјар хидмәтә тәјин олундуг. 2000-ҹи илдә Хидмәти Тәкмилләшдирмә Мәктәбинә дәвәт олундум. Бу мәктәбдә мүәллим кими дәрс демәк үчүн тәлим алдым. Өзүмү бу тәјината јарарлы һесаб етмирдим. Амма Адел һәмишә мәни руһландырыб дејирди ки, Јеһова мәнә јени тәјинатымын өһдәсиндән ҝәлмәк үчүн ҝүҹ верәҹәк (Филип. 4:13). О бу сөзләрин һәгигәт  олдуғуну өз тәҹрүбәсиндән билирди. Чүнки һәмин вахт о да тәјинатыны хәстәлији илә мүбаризә апара-апара јеринә јетирирди.

2006-ҹы илдә Аделә Паркинсон хәстәлији диагнозу гојулду. Бу хәбәр бизи шока салды. Һәмин вахт мән Хидмәти Тәкмилләшдирмә Мәктәбиндә мүәллим идим. Мән Аделә тәклиф еләдим ки, тәјинатымызы дајандырыб онун гајғысына галым. О исә деди: «Нә олар, мүалиҹәм үчүн јахшы бир һәким тап. Билирәм ки, Јеһова тәјинатымызы јеринә јетирмәјә көмәк едәҹәк». Нөвбәти 6 ил әрзиндә Адел дејинмәдән Јеһоваја хидмәт етди. О артыг ҝәзә билмәјәндә әлил арабасы илә тәблиғ едирди. Данышмаға чәтинлик чәкәндә исә јығынҹагда бир-ики сөзлә шәрһ верирди. Адел та 2013-ҹү илдә вәфат едән ҝүнә кими һәмишә баҹы-гардашлардан дөзүмүнә ҝөрә тәриф месажлары алырды. О, дүз 30 ил мәнә садиг вә әзиз өмүр-ҝүн јолдашы олду. Буна ҝөрә дә Адел өлүм јухусуна ҝедәндә кәдәр вә тәнһалыг һисс мәни јенидән бүрүдү.

Адел истәјирди ки, тәјинатымы давам етдирим. Мән белә дә етдим. Чох мәшғул олдуғумдан тәнһалыға дөзә билирдим. 2014—2017-ҹи илләр әрзиндә мән фәалијјәтимизин гадаған олундуғу өлкәләрдә тагалдилли јығынҹаглары зијарәт етмәјә тәјин олундум. Сонра мән Тајванда, Бирләшмиш Штатларда вә Канададакы тагалдилли јығынҹаглары зијарәт етдим. 2019-ҹу илдә Һиндистанда вә Таиландда кечирилән Падшаһлыг Мүждәчиләри Мәктәбиндә инҝилисдилли синифләрә дәрс дедим. Бүтүн бу тәјинатларымдан бөјүк севинҹ дујурдум. Өзүмү бүтүнлүклә хидмәтә һәср едәндә дүнјанын ән хошбәхт инсаны олурам.

Һәр тәјинатымда јени-јени достлар газанырдым. Онлардан ајрылмаг чәтин олурду. Белә вахтларда Јеһоваја там етибар етмәји өјрәндим. Јеһованын әлини һәјатымда даим ҝөрмүшәм. Бу да мәнә гаршыдакы чәтинликләри ҹәсарәтлә гәбул етмәјә көмәк едиб. Һазырда Филиппиндә хүсуси өнҹүләм. Јени јығынҹағымда өзүмү чох раһат һисс едирәм. Баҹы-гардашлар бир аилә кими мәнә дајаг олур вә гајғыма галырлар. Аналары кими иманлы олдуглары үчүн Самуел вә Ширли илә фәхр едирәм (3 Јәһ. 4).

Бәли, һәјатда чох сынагларым олуб. Һәјат јолдашымын ҝөзүмүн габағында дәһшәтли хәстәликдән әзаб чәкәрәк өлдүјүнү дә ҝөрмүшәм. Һәмчинин тез-тез јени шәраитә алышмалы олмушам. Бунунла белә, Јеһованын «һеч биримиздән узаг» олмадығына да шаһид олмушам (Һәв. 17:27). Јеһованын «әли зәиф дејил», О һәтта уҹгар әразиләрдәки хидмәтчиләринә дә дәстәк олмаға вә онлары ҝүҹләндирмәјә гадирдир (Әшј. 59:1). Јеһова бүтүн һәјатым боју өмрүмүн Гајасы олуб, Она чох миннәтдарам. Јеһова һеч вахт мәни тәк гојмајыб.