Мери вә һәјат јолдашы Ҹон a елә бир әразидә јашајырлар ки, ора Филиппиндән чохлу инсанлар ишләмәјә ҝәлир. Бу исә һәмин инсанлара тәблиғ етмәк үчүн ҝөзәл фүрсәт јарадыр. COVID-19 пандемијасы заманы Мери тәкҹә өз өлкәсиндәки јох, башга өлкәләрдәки инсанлара да Мүгәддәс Китаб дәрси кечирди. Бәс о буну неҹә едирди?

Мери шаҝирдләриндән сорушурду: «Мүгәддәс Китабы өјрәнмәк истәјән башга кимисә таныјырсан?» Әҝәр онлар «һә» дејәрдисә, Мери хаһиш едирди ки, ону һәмин инсанла таныш етсинләр. Бу садә суал чох вахт ҝөзәл бәһрәләр верирди, чүнки Аллаһын Кәламына дәјәр верән инсанлар адәтән өјрәндикләрини аилә үзвләри вә достлары илә бөлүшүрләр. Ҝәлин ҝөрәк, Меринин бу суалы вермәси нә илә нәтиҹәләнди.

Меринин Жасмин адлы шаҝирди ону Мүгәддәс Китабы видеозәнҝ васитәсилә өјрәнмәк истәјән дөрд нәфәрлә таныш едир. Онлардан биринин ады Кристин иди. Мүгәддәс Китаб дәрсләри Кристинин о гәдәр хошуна ҝәлир ки, һәтта һәфтәдә ики дәфә дәрс кечмәк истәјир. Мери Кристиндән Мүгәддәс Китабы өјрәнмәк истәјән башга кимисә таныјыб-танымадығыны сорушур. Кристин она белә дејир: «Бәли, сәни рәфигәләримлә таныш едәҹәјәм». Кристин бир нечә һәфтәнин ичиндә Мерини дөрд рәфигәси илә, сонралар исә башга рәфигәләри илә таныш едир. Онлардан да бәзиләри Мерини башгалары илә таныш едир.

Кристин истәјирди ки, онун Филиппиндә јашајан аиләси дә Мүгәддәс Китабы өјрәнсин. Буна ҝөрә дә о, гызы Андреја илә данышыр. Әввәл-әввәл Андреја дүшүнүрдү: «Јеһованын Шаһидләри сектадыр. Онлар Исаны гәбул етмирләр, јалныз Әһди-Әтиги охујурлар». Амма о елә илк дәрсдән фикриндә јанылдығыны баша дүшүр. Дәрс вахты һәр дәфә јени бир шеј өјрәнәндә Андреја дејирди: «Әҝәр Мүгәддәс Китабда белә јазылыбса, демәли, бу, доғрудур!»

Сонралар Андреја ики рәфигәсини вә бир иш јолдашыны Мери илә таныш едир. Онлар да дәрс кечмәјә башлајыр. Һәлә бу һарасыдыр, сән демә, Андрејанын ҝөздән әлил халасы Анҹела Андрејаҝил дәрс кечәркән гулаг асырмыш. О, бир ҝүн Андрејадан хаһиш едир ки, Мери она да дәрс кечсин. Өјрәндикләри Анҹеланын чох хошуна ҝәлир. Бир ај әрзиндә о, чохлу ајәләр әзбәрләјир, һәтта истәјир ки, онунла һәфтәдә дөрд дәфә дәрс кечсинләр. Андрејанын көмәји илә халасы мүнтәзәм олараг видеоконфранс васитәсилә јығынҹаглара гошулмаға башлајыр.

Мери өјрәнир ки, Кристинин јолдашы Ҹошуа да онлар дәрс кечән вахт отагда отуруб  гулаг асырмыш. Мери Ҹошуаја да дәрсләрә гошулмағы тәклиф едир, Ҹошуа исә белә дејир: «Мән садәҹә гулаг асаҹағам, мәнә суаллар вермәјин. Әҝәр версәниз, дуруб ҝедәҹәјәм». Амма дәрсин илк беш дәгигәсиндә о, Кристиндән даһа чох суаллар вермәјә башлајыр вә Мүгәддәс Китаб һагда мүзакирәләри давам етдирмәк истәдијини дејир.

Меринин вердији садә бир суал чохлу сајда инсанын Мүгәддәс Китабы өјрәнмәсинә јол ачды. О, һәмин шаҝирдләрдән бәзиләрини башга баҹы-гардашлара өтүрдү. Үмумиликдә, Мери дөрд өлкәдән ијирми сәккиз нәфәрлә Мүгәддәс Китаб дәрсинә башлады.

Мәгаләдә ады чәкилән илк шаҝирд Жасмин 2021-ҹи илин апрел ајында вәфтиз олунду. Кристин исә 2022-ҹи илин мај ајында вәфтиз олунду вә Филиппинә, аиләсинин јанына гајытды. Кристинин Мери илә таныш етдији башга ики рәфигәси дә вәфтиз олунду. Бундан бир нечә ај сонра Анҹела да вәфтиз олунду вә инди өнҹүл кими хидмәт едир. Кристин јолдашы Ҹошуа, онларын гызы Андреја, һәмчинин диҝәр шаҝирдләр дә руһани ҹәһәтдән јахшы инкишаф едирләр.

Биринҹи әсрдә хош хәбәр аилә үзвләри вә достлар арасында тез јајылырды (Јәһ. 1:41, 42а; Һәв. 10:24, 27, 48; 16:25—33). Сиз дә Мүгәддәс Китаб шаҝирдләриниздән вә һәгигәтә мараг ҝөстәрән инсанлардан сорушун: «Мүгәддәс Китабы өјрәнмәк истәјән башга кимисә таныјырсан?» Ким билир, бәлкә, бу садә суалын сајәсиндә Мүгәддәс Китабы өјрәнмәк истәјән чохлу инсан тапаҹагсыныз?