ОЛУБМУ ки, һансыса чәтинлик гаршысында өзүнүзү тәк, чарәсиз һисс етмисиниз? Биз «сон дәрәҹә чәтин бир вахт»да јашадығымыз үчүн һәрдән өзүмүзү јалгыз, мәјус һисс едирик (2 Тим. 3:1). Амма унутмамалыјыг ки, һәјатымызын ағыр дөнәмләриндә бизә көмәк едәҹәк инсанлар һәмишә вар. Мүгәддәс Китабда «дар ҝүн»дә инсанын көмәјинә јетән әсл достларын олмасынын чох дәјәрли олдуғу вурғуланыр (Мәс. 17:17).

Һәвари Булус тәблиғ сәјаһәтләри заманы достларынын көмәјини чох ҝөрмүшдү (Кол. 4:7—11). О, Ромада һәбсдә оланда онун едә билмәдији ишләри достлары едирди. Мәсәлән, Епафродит Филиппидән олан баҹы-гардашларын ҝөндәрдији бәхшишләри Булуса ҝәтириб чатдырмышды (Филип. 4:18). Тихик Булусун јаздығы мәктублары мүхтәлиф јығынҹаглара апарырды (Кол. 4:7). Булус һәтта ев дустағы оланда вә ја һәбсә салынанда да достлары сајәсиндә хидмәтини давам етдирә билирди. Бәс әсл дост олмаг үчүн сиз нә едә биләрсиниз?

Бизим дөврүмүздә дә достларын бир-биринә әл тутдуғуну ҝөстәрән һадисәләр чохдур. Испанијада өнҹүл кими хидмәт едән Елизабет адлы баҹы әсл достун көмәјини шәхсән дујмушду. Белә ки, онун анасында хәрчәнҝ ашкар олунмушду вә вәзијјәти үмидсиз иди. Бир баҹы Елизабетә Мүгәддәс Китаб ајәләринә әсасланан месажлар ҝөндәрирди. Елизабет дејир: «Һәмин месажлар мәнә ҝүҹ верирди, јалныз олмадығымы һисс едирдим» (Мәс. 18:24).

Диндашларымыза руһани ишләрдә иштирак етмәјә көмәк етмәклә онларла достлуғумузу мөһкәмләндирә биләрик. Мәсәлән, һансыса јашлы баҹы вә ја гардаша тәклиф едә биләрсиниз ки, ону јығынҹаға вә ја тәблиғә машынла апарасыныз. Бунун сајәсиндә гаршылыглы руһланаҹагсыныз (Ром. 1:12). Елә мәсиһиләр дә вар ки, евдән чөлә чыха билмир. Онлар үчүн неҹә әсл дост ола биләрсиниз?

Бәзи диндашларымыз сәһһәтләриндәки проблемләрә вә ја диҝәр сәбәбләрә ҝөрә јығынҹагларда ҹанлы иштирак едә билмир. Бу диндашларымыздан бири дә лимфома хәстәлијиндән әзијјәт чәкән Дејвид гардашымыз иди. О, алты ајдан чох кимјатерапија мүалиҹәси алмышды. Бу мүддәт әрзиндә Дејвид јолдашы Лидија илә јығынҹаглара онлајн гошулурду.

Јығынҹагдакы баҹы-гардашлар онлара неҹә дәстәк олмушду? Һәр ҝөрүшдән сонра ибадәт евиндәки бәзи баҹы-гардашлар Дејвид вә Лидија илә видеоконфранс васитәсилә сөһбәт едирди. Бундан әлавә, Дејвид вә Лидија шәрһ верәндә бәзиләри месаж јазыб миннәтдарлыгларыны  билдирирди. Бәс бу, Дејвидлә јолдашына неҹә тәсир бағышлајырды? Онлар өзләрини јығынҹагдан ајры дүшмүш һисс етмирдиләр.

Евдән чыха билмәјән диндашларымызла тәблиғ ишиндә әмәкдашлыг едә биләрик? Ҹәдвәлимиздә кичик дәјишикликләр етсәк, бу биздә алынаҹаг. Беләҹә, онлары унутмадығымызы ҝөстәрәҹәјик (Мәс. 3:27). Мәсәлән, онларла бирликдә мәктуб јазмаг вә телефон васитәсилә тәблиғ етмәк олар. Бу ҹүр баҹы-гардашлар видеоконфранс васитәсилә тәблиғ ҝөрүшләриндә иштирак едә биләр. Дејвид вә Лидија јығынҹағын онлар үчүн јаратдығы бу шәраитә ҝөрә чох миннәтдардырлар. Дејвид дејир: «Тәблиғ групумузла бирликдә гыса да олса, мүзакирәләрдә иштирак етмәк вә дуа етмәк бизи һәдсиз дәрәҹәдә чох руһландырырды». Бундан әлавә, вахташыры шаҝирдинизин дәрсини евдән чыха билмәјән тәблиғчинин евиндә кечә биләрсиниз. Амма әввәлҹә һәмин диндашыныздан бунун онун сағламлығы үчүн тәһлүкәли олуб-олмадығыны сорушун.

Евдән чыха билмәјән диндашларымызла әмәкдашлыг едәндә онлары јахындан таныјырыг вә ҝөзәл хүсусијјәтләрини ҝөрүрүк. Беләҹә, онларла мүнасибәтимиз мөһкәмләнир. Мәсәлән, тәблиғ заманы бу диндашларымызын инсанларын үрәјинә јол тапмаг үчүн Аллаһын Кәламындан мәһарәтлә истифадә етдикләрини ҝөрүрүк вә онлар бизә даһа да әзиз олур. Руһани ишләрдә диндашларымыза дәстәк оланда дост әһатәмизи ҝенишләндиририк (2 Кор. 6:13).

Булусун чәтин анларында досту Титус онун јанында иди вә бу, Булуса бөјүк тәсәлли иди (2 Кор. 7:5—7). Титусун нүмунәси бизә хатырладыр ки, диндашларымыза тәкҹә руһландырыҹы сөзләрлә јох, һәмчинин онларын јанында олмагла вә баҹардығымыз гәдәр онлара көмәк етмәклә дә тәсәлли ола биләрик (1 Јәһ. 3:18).

Русијадакы баҹы-гардашларын бир-биринә дәстәји бизим үчүн ҝөзәл нүмунәдир. Ҝәлин, Серҝејлә һәјат јолдашы Татјананын һадисәсинә бахаг. Полисләр онларын евиндә ахтарыш апардылар, сонра исә онлары истинтага ҹәлб етмәк үчүн бөлмәјә апардылар. Полисләр әввәлҹә Татјананы азад етдиләр вә о, евә гајытды. Серҝеј дејир: «[Татјана] евә гајыдан кими ҹәсур бир баҹы она дәјмәк үчүн евимизә ҝәлди. Чох кечмәмиш башга баҹы-гардашлар да бизә ҝәлиб ахтарыш заманы дағыдылмыш евимиздә сәлигә-саһман јаратдылар».

Серҝеј сөзүнә әлавә едир: «Мәсәлләр 17:17 ајәсини һәмишә севмишәм. Орада дејилир: “Әсл дост һәр заман севәр, о, дар ҝүн үчүн доғулмуш гардашдыр”. Тәгибләрлә үзләшән заман достларын көмәјинә бөјүк еһтијаҹ дујурдум вә бу сөзләрин нә гәдәр доғру олдуғуна өзүм шаһид олдум. Јеһова мәнә дар ҝүнүмдә јанымда олан горхмаз достлар бәхш етди» a.

Һәјат ҝүнү-ҝүндән чәтинләшир. Буна ҝөрә дә күрәјимизи сөјкәјә биләҹәјимиз достлара еһтијаҹымыз вар. Бөјүк мүсибәт заманы бизим бу ҹүр достлара даһа чох еһтијаҹымыз олаҹаг. Ҝәлин индидән әсл дост олмаг үчүн әлимиздән ҝәләни едәк! (1 Бут. 4:7, 8).