1. Сон онилликләр әрзиндә бәзи әразиләрдә нә кими дәјишикликләр баш вериб?

МИН илләр боју инсанларын әксәријјәти һәр һансы дини етигада саһиб олуб. Лакин өтән онилликләр әрзиндә көклү дәјишикликләр баш вериб. Диндар олмадығыны дејәнләрин сајы ҝүнү-ҝүндән артыр. Бәзи өлкәләрдә әһалинин әксәр һиссәси һеч бир динә мәнсуб олмадығыны дејир * (Мәт. 24:12).

2. Бу гәдәр инсанын диндар олмамасына сәбәб нәдир?

² Нәјә ҝөрә диндар олмадығыны * дејәнләрин сајы ҝетдикҹә чохалыр? Бәзиләринин башы әјләнҹәјә, јахуд өз проблемләринә гарышыб (Лука 8:14). Диҝәрләри атеизмә үз тутуб. Бир башгалары Аллаһын варлығына инансалар да, дин анлајышынын көһнәлдијини, мүасир зәманәјлә, јахуд елм вә мәнтиглә узлашмадығыны сөјләјир. Онлар достларындан, мүәллимләриндән, јахуд күтләви информасија васитәләриндән һәјатын тәкамүл нәтиҹәсиндә јарандығыны ешидирләр, Аллаһа инанмаг үчүн тутарлы мүлаһизәләрә исә надир һалларда раст ҝәлирләр. Диҝәрләри дин хадимләринин пулҝирлијиндән, сәлаһијјәт һәрислијиндән икраһ едир. Бәзи әразиләрдә исә һөкумәт дини фәалијјәти рәсми шәкилдә мәһдудлашдырыр.

3. Бу мәгаләнин мәгсәди нәдир?

³ Иса Мәсиһ бизә «бүтүн халгларын ичиндә шаҝирд» һазырламағы бујуруб (Мәт. 28:19). Бәс диндар олмајан инсанлара Аллаһы севмәјә вә Мәсиһин давамчысы олмаға неҹә  көмәк едә биләрик? Јадда сахламалыјыг ки, инсанын бөлүшдүјүмүз хәбәрә неҹә мүнасибәт ҝөстәрмәси онун һансы мүһитдә бөјүмәсиндән асылы ола биләр. Мәсәлән, Авропада бөјүмүш инсанла Асијада бөјүмүш инсанын ҝөстәрдији мүнасибәт ејни олмаја биләр. Нә үчүн? Авропада чохларынын Мүгәддәс Китабдан мүәјјән анлајышы вар вә һәр шеји Аллаһын јаратмасы фикри онлара танышдыр. Лакин Асијада инсанларын әксәријјәти Мүгәддәс Китаб һагда ја чох аз билијә саһибдир, ја да үмумијјәтлә ондан хәбәрсиздир вә бәзиләри Јараданын варлығына инанмыр. Бу мәгаләнин мәгсәди һансы әразидән олмасына вә нәјә инандығына бахмајараг, хидмәтдә растлашдығымыз һәр бир кәсин үрәјинә јол тапмаға көмәк етмәкдир.

4. Нә үчүн үмидимизи үзмәмәлијик?

⁴ Үмидинизи үзмәјин. Һәр ил Јеһованын Шаһидләринин сырасына бир вахтлар диндар олмајан инсанлар гошулур. Онларын арасында артыг јүксәк әхлаги дәјәрә саһиб олан, динин ријакарлығындан икраһ едән кәсләр вар. Диҝәрләринин исә әхлаг дәјәрләри ашағы олуб вә ја пис вәрдишләриндән әл чәкмәли олуб. Әмин ола биләрик ки, Јеһованын көмәји илә «әбәди һәјата апаран јолда јеримәјә мејли оланлары» тапаҹағыг (Һәв. 13:48; 1 Тим. 2:3, 4).

5. Инсанлар адәтән һансы сәбәбләрә ҝөрә хош хәбәрә һај верир?

⁵ Меһрибан вә нәзакәтли олун. Чох вахт инсанлар хош хәбәрә бизим нә дедијимизә ҝөрә јох, неҹә дедијимизә ҝөрә һај верир. Меһрибан, нәзакәтли олмағымыз вә сәмими мараг ҝөстәрмәјимиз онларын хошуна ҝәлир. Инсанлары бизи динләмәјә мәҹбур етмирик. Әксинә, онларын нә үчүн диндар олмадығынын сәбәбини анламаға чалышырыг. Мисал үчүн, билирик ки, бәзиләри јад инсанларла дини мөвзуларда данышмағы хошламыр. Диҝәрләринә киминсә онлардан Аллаһ барәдә сорушмасы гәрибә ҝәлир. Бәзиләри исә истәмир ки, кимсә онларын Мүгәддәс Китаб охудуғуну ҝөрсүн, өзү дә Јеһованын Шаһидләри илә. Истәнилән һалда, биз онларын һиссләрини анламаға чалышырыг (2 Тим. 2:24, һаш.).

6. Һәвари Булусун вәзијјәтә ујғунлашдығы нәдән ҝөрүнүр вә ондан неҹә өрнәк ала биләрик?

⁶ Ҝөрәндә ки, «Мүгәддәс Китаб», «јарадылыш», «Аллаһ», јахуд «дин» кими ифадәләр ишләтмәјимиз инсанын хошуна ҝәлмир, нә етмәк олар? Һәвари Булусдан өрнәк алараг сөһбәтимизи онлара ујғунлашдыра биләрик. Һәвари Булус јәһудиләрлә данышан заман Мүгәддәс Китабдан ајәләрә истинад едирди. Лакин Ареопагда јунан философлары илә данышанда о, Мүгәддәс Китаба бирбаша истинад етмәмишди (Һәв. 17:2, 3, 22—31). Булусдан неҹә өрнәк алмаг олар? Мүгәддәс Китабы гәбул етмәјән биринә раст ҝәләндә, јахшы олар ки, сөһбәт заманы бирбаша китаба мүраҹиәт етмәјәсиниз. Әҝәр ҝөрсәниз ки, тәблиғ етдијиниз кәс Мүгәддәс Китабы охудуғуна ҝөрә киминсә ону ҝөрәҹәјиндән нараһатдыр, чалышын ајәни даһа аз диггәт чәкән тәрздә, мәсәлән, електрон ҹиһазыныздан ҝөстәрәсиниз.

7. Һәвари Булусун 1 Коринфлиләрә 9:20—23 ајәләриндә тәсвир олунан нүмунәсини неҹә изләјә биләрик?

⁷ Анлајышлы олун вә динләмәји баҹарын. Тәблиғ етдијиниз инсанын дүшүнҹәсинә һансы факторларын тәсир етдијини анламаға чалышын (Мәс. 20:5). Ҝәлин Булусун нүмунәсинә бир даһа нәзәр салаг. О, јәһудиләрин арасында бөјүмүшдү. Буна ҝөрә дә гејри-јәһудиләрә тәблиғ едән заман Булус тәблиғ үсулуну дәјиширди, чүнки онлар Јеһова Аллаһ вә Мүгәддәс Јазылар барәдә ја аз билијә саһиб идиләр, ја да һеч мәлуматлары јох иди. Биз дә әразимиздәки инсанлары даһа јахшы баша дүшмәк үчүн нәшрләримиздән мүәјјән ахтарышлар апара, јахуд јығынҹағымыздакы  тәҹрүбәли шәхсләрдән мәсләһәт ала биләрик. (1 Коринфлиләрә 9:20—23 ајәләрини охујун.)

8. Мүгәддәс Китаб барәдә сөһбәтә башламағын бир јолу һансыдыр?

⁸ Бизим мәгсәдимиз «лајигли адамлары» тапмагдыр (Мәт. 10:11). Хидмәтимизин сәмәрәли олмасы үчүн инсанларын фикрини сорушмалы вә диггәтлә динләмәлијик. Инҝилтәрәдә јашајан бир гардаш инсанлардан аилә хошбәхтлији, ушаг бөјүтмәк, јахуд әдаләтсизлијә дөзмәклә бағлы нә дүшүндүкләрини сорушур. Онларын ҹавабыны динләдикдән сонра дејир: «2000 ил бундан өнҹә јазылмыш бу мәсләһәт барәдә нә дүшүнүрсүнүз?» Сонра Мүгәддәс Китаб сөзүнү ишләтмәдән, өнҹәдән сечдији мүнасиб ајәләри телефонундан ҝөстәрир.

9. Аллаһ һаггында данышмағы хошламајан инсанларын үрәјинә неҹә јол тапа биләрик?

⁹ Аллаһ һаггында данышмағы хошламајан инсанларын үрәјинә јол тапмаг үчүн онлара мараглы ҝәлән мөвзу барәдә данышмаг олар. Мисал үчүн, тәбиәт чохларыны һејран едир. Одур ки, белә демәк олар: «Јәгин билирсиниз ки, бир чох ихтиралар алимләрин тәбиәтдә мөвҹуд олан шејләри тәглид етмәси нәтиҹәсиндә мејдана ҝәлиб. Мәсәлән, микрофон истеһсал едәнләр гулағын, камера истеһсал едәнләр ҝөзләрин гурулушуну тәдгиг едир. Бәс тәбиәти сејр едәндә сизин ағлыныза нә ҝәлир? Сизҹә, о, өз-өзүнә мејдана ҝәлиб, кимсә јарадыб, јохса неҹә?» Инсанын вердији ҹаваба диггәтлә гулаг асандан сонра белә демәк олар: «Мараглыдыр, мүһәндисләр гулағын, ҝөзүн гурулушуну өјрәнәндә кимин әл ишини тәглид етмәјә чалышыр? Гәдимдә јашамыш бир јазычынын сөзләри мәнә чох мараглы ҝәлиб. О демишди: “Гулағы јарадан ешитмәзми? Ҝөзә гурулуш верән ҝөрмәзми?.. Инсанлара билик верән Одур!” Бәзи алимләр дә бу гәнаәтә ҝәлиб, онлар јарадылыша инаныр» (Зәб. 94:9, 10). Һәмчинин һәмин адама jw.org^® сајтындан «Мүсаһибә вә һәјат һекајәләри» бөлмәсиндәки «Һәјатын әмәлә ҝәлмәси» рубрикасындан видео ҝөстәрә биләрсиниз. (НӘШРЛӘР >ВИДЕОЛАР бөлмәсинә дахил олун.) Јахуд онлара «Һәјат неҹә јараныб? Тәгдимат» видеосуну ҝөстәрә вә ја «Һәјат неҹә јараныб?» адлы брошүрү верә биләрсиниз.

10. Аллаһ һаггында данышмаға мејилли олмајан инсанла сөһбәтә неҹә башлаја биләрик?

¹⁰ Әксәр инсанлар ҝөзәл ҝәләҹәјин арзусундадыр. Лакин чохлары јер үзүнүн дағылаҹағыны, јахуд јашамаг үчүн јарарсыз һала  дүшәҹәјини дүшүнүр. Норвечдә сәјјар нәзарәтчи олан бир гардаш дејир ки, Аллаһ һаггында данышмағы хошламајан инсанлар дүнјанын вәзијјәти барәдә данышмағы севир. О, саламлашдыгдан сонра дејир: «Ҝәләҹәјимизин даһа јахшы олаҹағына һәр һансы үмид ҝөрүрсүнүз? Сизҹә, үмидләримизи сијасәтчиләр, алимләр, јохса башга кимсә ҝерчәкләшдирәҹәк?» Гардаш ҹавабы диггәтлә динләдикдән сонра ҝөзәл ҝәләҹәклә бағлы һәр һансы ајәни охујур вә ја ситат ҝәтирир. Јер үзүнүн һеч вахт дағылмајаҹағына вә јахшы инсанларын әбәди јашајаҹағына даир Мүгәддәс Китаб вәди бәзиләриндә мараг ојадыр (Зәб. 37:29; Ваиз 1:4).

11. Нәјә ҝөрә сөһбәтә башламаг үчүн мүхтәлиф үсуллар ахтармалыјыг вә Ромалылара 1:14—16 ајәләринә әсасән, һәвари Булусдан неҹә өрнәк ала биләрик?

¹¹ Раст ҝәлдијимиз инсанларла сөһбәтә башламаг үчүн мүхтәлиф үсуллардан истифадә етмәлијик. Чүнки инсанлар фәрглидир. Биринә мараглы ҝәлән мөвзуја башгасы гулаг асмаг истәмәјә биләр. Киминләсә Аллаһ вә Онун Кәламы барәдә бирбаша данышмаг, киминләсә әввәлҹә башга мөвзудан башламаг даһа јахшы нәтиҹәләр верир. Истәнилән һалда, биз һәр ҹүр инсанла сөһбәт едә билмәк үчүн фүрсәт ахтармалыјыг. (Ромалылара 1:14—16 ајәләрини охујун.) Әлбәттә, јадда сахламалыјыг ки, салеһлији севәнләрин үрәјиндә һәгигәти бөјүдән Јеһовадыр (1 Кор. 3:6, 7).

12. Асија өлкәләриндән оланларын үрәјинә неҹә јол тапа биләрик?

¹² Бүтүн дүнјада тәблиғчиләр Асијадан олан чохлу инсана раст ҝәлир. Онларын арасында фәалијјәтимизә мүәјјән мәһдудијјәтләр гојулмуш әразиләрдән оланлар да вар. Асијанын бир сыра өлкәләриндә чох адам һеч вахт Јараданын варлығы һагда дәриндән дүшүнмәјиб. Бәзиләринә дедикләримиз мараглы ҝәлир вә Мүгәддәс Китабы өјрәнмәк тәклифини гәбул едир. Лакин бәзиләри јени тәлимләр өјрәнмәјә һәвәсли дејил. Белә инсанларын үрәјинә неҹә јол тапа биләрик? Бәзи тәҹрүбәли тәблиғчиләр ади шејләрдән данышараг сөһбәтә башлајыр, инсана сәмими мараг ҝөстәрир вә мүнасиб мәгамда Мүгәддәс Китаб принсипләринин онларын һәјатыны јахшылыға доғру дәјишмәсиндән данышырлар.

13. Нәјин сајәсиндә инсанда Мүгәддәс Китаба мараг ојана биләр? (Үз габығындакы шәклә бахын.)

¹³ Бәзиләрини илк нөвбәдә Мүгәддәс Китабдакы практики мәсләһәтләр ҹәлб едиб (Ваиз 7:12). Нју-Јоркда чиндилли инсанлары зијарәт едән бир баҹы дејир: «Инсанларла марагланмаға, онлары динләмәјә чалышырам. Онларын бу өлкәјә јени көчдүкләрини биләндә сорушурам: “Буралара өјрәшә билирсиниз? Иш тапмысыныз? Јерли ҹамаат сизи инҹитмир ки?”» Бәзән бу үсул Мүгәддәс Китаб тәлимләри һагда данышмаға јахшы имкан јарадыр. Әҝәр мүнасибдирсә, баҹы әлавә едир: «Сизҹә, инсанларла јахшы јола ҝетмәк үчүн әсас нә лазымдыр? Мүгәддәс Китабдан сизә бир ајә ҝөстәрмәк истәјәрдим. Бахын, нә дејилир: “Даваны башламаг су бәндини ачмаға бәнзәр; дава башламамыш орадан узаглаш”. Сизҹә, бу мәсләһәтә әмәл етмәк инсанларла јола ҝетмәјә көмәк едә биләр?» (Мәс. 17:14). Бу кими сөһбәтләр әснасында даһа чох мәлумат алмаг истәјәнләри тапа биләрик.

14. Узаг Шәргдә хидмәт едән бир гардаш Аллаһа инанмајан инсанлара неҹә тәблиғ едир?

¹⁴ Бәс Аллаһа инанмадығыны сөјләјәнләр барәдә нә демәк олар? Узаг Шәргдә диндар олмајан инсанлара узун илләрдир тәблиғ едән бир гардаш дејир: «Адәтән бурадакы инсанлардан кимсә дејәндә ки, Аллаһа инанмыр, о, јерли әразидә чохларынын инандығы аллаһлары нәзәрдә тутур. Она ҝөрә дә  чох вахт әксәр аллаһларын инсан әли илә дүзәлдији вә сахта олдуглары фикри илә разылашырам. Адәтән Әрәмја 16:20 ајәсини охујурам: “Инсан да аллаһлар дүзәлдә биләр? Ахы дүзәлтдији әслиндә аллаһ дејил”. Сонра сорушурам: “Һәгиги Аллаһы инсан әли илә дүзәлдилмиш аллаһлардан неҹә ајырд етмәк олар?” Онлары диггәтлә динләдикдән сонра Әшија 41:23 ајәсини охујурам: “Дејин ҝәләҹәкдә нәләр олаҹаг, биләк ки, сиз аллаһсыныз”. Даһа сонра Јеһованын ҝәләҹәклә бағлы сөјләдикләрини ҝөстәрирәм».

15. Шәрги Асијадакы бир гардашын нүмунәсиндән нә өјрәнирик?

¹⁵ Шәрги Асијада бир гардаш тәкрар сөһбәт едән заман истифадә етдији үсул барәдә дејир: «Онлара Мүгәддәс Китабдакы һикмәтә даир нүмунәләр чәкирәм, јеринә јетән пејғәмбәрликләри вә каинаты идарә едән ганунлары ҝөстәрирәм. Сонра бүтүн бунларын ҹанлы вә һикмәтли Јараданын варлығына дәлаләт етдијини изаһ едирәм. Инсан Аллаһын варлығынын мүмкүнлүјүнү гәбул едәрсә, она Мүгәддәс Китабда Јеһова һагда дејиләнләри ҝөстәрирәм».

16. Ибраниләрә 11:6 ајәсинә әсасән, нәјә ҝөрә дәрс кечдијимиз инсанларын Аллаһа вә Мүгәддәс Китаба иманы олмалыдыр вә онлара бу саһәдә неҹә көмәк едә биләрик?

¹⁶ Диндар олмајан инсанлара Мүгәддәс Китаб дәрси кечәндә онларын Аллаһын варлығына олан иманларыны давамлы шәкилдә артырмаға чалышмалыјыг. (Ибраниләрә 11:6 ајәсини охујун.) Һәмчинин онларда Мүгәддәс Китаба иман јаратмалыјыг. Бунун үчүн мүәјјән фикирләри дәфәләрлә тәкрарламаг лазым ҝәлә биләр. Ола билсин, һәр дәрсдә Мүгәддәс Китабын Аллаһын сөзү олдуғуна даир сүбутлары арашдыраг. Бура Мүгәддәс Китабын јеринә јетмиш пејғәмбәрликләрини, елми вә тарихи дәгиглијини, јахуд практики һикмәтини дахил етмәк олар.

17. Мәһәббәт ҝөстәрмәк инсанлара неҹә тәсир едә биләр?

¹⁷ Диндар олуб-олмамасындан асылы олмајараг, инсанлара мәһәббәт ҝөстәрмәклә Мәсиһин шаҝирди олмаларына көмәк едә биләрик (1 Кор. 13:1). Мүгәддәс Китабы өјрәнәнләрә баша салмалыјыг ки, Аллаһ онлары севир вә онлардан да Өзүнә гаршы мәһәббәт ҝөзләјир. Һәр ил динә аз марағы олан вә ја үмумијјәтлә динлә марагланмајан минләрлә инсан вәфтиз олунур. Чүнки гәлбләриндә Аллаһа гаршы мәһәббәт јараныб. Одур ки, тәслим олмајын, һәр бир инсана гајғы вә мәһәббәтинизи ҝөстәрин. Онлары динләјин, баша дүшмәјә чалышын. Өз нүмунәнизлә Мәсиһин шаҝирди олмағы өјрәдин.