МҮГӘДДӘС КИТАБДА «биздәки кими дујғулара малик» бир чох инсанын һиссләри јер алыр (Јаг. 5:17, һаш.). Мисал үчүн, һәвари Булусун Ромалылара 7:21—24 ајәләриндә јазылан сөзләрини анламаг чәтин дејил: «Дүзҝүн иш ҝөрмәк истәјәндә пислик артыг јанымда һазыр дурур... Неҹә дә јазыг адамам!» Гејри-камиллијимизлә мүбаризә апаран заман Булус кими иманлы инсанларын бу ҹүр сәмими һиссләри бизә тәскинлик верир.

Һәвари Булус кечирдији диҝәр һиссләри дә гәләмә алмышды. Галатијалылара 2:20 ајәсиндә о, Мәсиһин шәхсән ону севдијини вә ҹаныны онун уғрунда фәда етдијини вурғулајыр. Сиз дә бу фикирдәсиниз? Бәлкә дә, һәрдән белә дүшүнмүрсүнүз.

Кечмиш ҝүнаһларыныз уҹбатындан һәлә дә өзүнүзү дәјәрсиз һисс едирсинизсә, Јеһованын сизи севдијинә, сизи әфв етдијинә инанмаг чәтин ҝәлә биләр. О ки галды, фидјә гурбанлығынын шәхсән сизин үчүн верилән әнам олдуғуну гәбул етмәјә. Бәс доғруданмы, Иса Мәсиһ фидјә гурбанлығына бу ҹүр јанашмағымызы истәјир? Беләдирсә, фидјәнин әнам олдуғуну анламаға бизә нә көмәк едә биләр? Ҝәлин бу ики суалы арашдыраг.

Иса Мәсиһ истәјир ки, өдәдији фидјәни шәхсән бизә бәхш олунан әнам кими гијмәтләндирәк. Буна неҹә әмин ола биләрик? Лука 23:39—43 ајәләриндәки сәһнәни тәсәввүр един. Бир киши Исанын јанындакы дирәкдән асылыб. О, ҝүнаһ ишләдијини етираф едир. Ҝөрүнүр, о, чох ҹидди ҝүнаһ ишләмишди, чүнки ишҝәнҹә дирәјиндә өлүмә ҹидди ҹинајәт төрәдәнләр мәһкум олунурду. Ағыр вәзијјәтдә олдуғуна ҝөрә кәдәрә гәрг олан бу адам Иса Мәсиһә јалварараг дејир: «Падшаһлығына ҝәләндә мәни јада сал».

Иса она неҹә ҹаваб верир? Башыны ҹинајәткара тәрәф чевирмәјин онун үчүн неҹә ағрылы олдуғуну тәсәввүр един. Чәкдији ишҝәнҹәјә бахмајараг, Иса өзүндә ҝүҹ тапыб меһрибанҹасына ону әмин едир: «Буну бил: сән мәнимлә Ҹәннәтдә олаҹагсан!» Иса она садәҹә олараг дејә биләрди ки, «инсан Оғлу... бир чохлары уғрунда һәјатыны фидјә кими вермәк үчүн ҝәлиб» (Мәт. 20:28). Лакин фикир верин ки, Иса гурбанлығынын шәхсән о инсан үчүн мәна кәсб етдијини вурғулады. О, мүлајим шәкилдә «сән», «мәнимлә» әвәзликләрини истифадә етмишди. Һәмчинин ҹинајәткара шәхсән ону нәзәрдә тутараг јерүзү ҹәннәтдә јашајаҹағыны билдирмишди.

Шүбһәсиз, Иса Мәсиһ истәјирди ки, верәҹәји гурбанлығы ҹинајәткар шәхсән онун үчүн верилән әнам олараг гәбул етсин. Әҝәр Иса Мәсиһ Аллаһа хидмәт етмәјән ҹинајәткара бу ҹүр мүнасибәт бәсләмишдисә, мәҝәр Аллаһа хидмәт едән вәфтиз олунмуш мәсиһиләрә бундан даһа ҝүҹлү һиссләр бәсләмир? Бәс ҝүнаһларымыза бахмајараг, фидјә гурбанлығынын шәхсән бизим үчүн верилдијинә неҹә әмин ола биләрик?

Хидмәт һәвари Булуса Иса Мәсиһин онун уғрунда өлдүјүнү анламаға көмәк едирди. Неҹә? О дејир: «Мәнә ҝүҹ верән Ағамыз Мәсиһ Исаја миннәтдарам, чүнки о, мәни садиг биләрәк мәнә хидмәт һәвалә едиб. Һәрчәнд әввәлләр мән күфр данышыр, Аллаһын халгыны тәгиб едирдим вә чох азғын адам идим» (1 Тим. 1:12—14). Етдији сәһвләрә бахмајараг, тәјинат алмасы Булусу әмин едирди ки, Мәсиһ она мәрһәмәт ҝөстәрир, ону севир вә етибар едир. Ејнилә, Иса Мәсиһ бизим дә һәр биримизә хош хәбәри тәблиғ етмәји тапшырыб (Мәт. 28:19, 20). Бу тапшырыг Иса Мәсиһин бизим уғрумузда өлдүјүнә әминлијимизи неҹә артыра биләр?

Тәхминән 34 ил јығынҹагдан кәнар олунмуш Алберт адлы бир нәфәр тәзәликҹә Јеһоваја тәрәф дөнүб. О дејир: «Ҝүнаһым ҝөзүмүн өнүндә дуруб. Лакин тәблиғдә оланда һәвари Булус кими һиссләр кечирирәм; Иса Мәсиһ шәхсән мәнә тәблиғ етмәји тапшырыб. Бу фикир әһвал-руһијјәми јүксәлдир, өзүм, һәјатым вә ҝәләҹәјим барәдә мүсбәт дүшүнмәјә көмәк едир» (Зәб. 51:3).

Һәгигәти өјрәнмәздән өнҹә ҹинајәт вә зоракылыг долу һәјат јашајан Алан дејир: «Һәлә дә инсанлара неҹә зүлм вердијим һагда дүшүнүрәм. Бәзән бу, мәни депресијаја салыр. Лакин Јеһоваја миннәтдарам ки, мәним кими ҝүнаһкара башгаларына хош хәбәри тәблиғ етмәк имканы вериб. Инсанлар хош хәбәрә һај верәндә Јеһованын неҹә ҝөзәл, неҹә мәһәббәтли Аллаһ олдуғуну ҝөрүрәм. Јеһованын мәним васитәмлә кечмиши мәнимки кими олан инсанлара көмәк етдијини һисс едирәм».

Хидмәт бизә јахшы иш ҝөрмәјә вә дүшүнҹәмизи позитив сахламаға көмәк едир. Беләҹә, Иса Мәсиһин бизә гаршы мәрһәмәтинә, севҝисинә вә етибарына әмин олуруг.

Шејтан дүнјасы мәһв олана гәдәр үрәјимиз кечмиш сәһвләримизә ҝөрә бизи мүһакимә етмәјә давам едәҹәк. Бу кими һиссләрлә мүбаризә апармаг үчүн нә едә биләрик?

Ҝәнҹлик илләриндә икили һәјат сүрдүјүнә ҝөрә виҹдан әзабы чәкән Ҹејн дејир: «“Аллаһ үрәјимиздән бөјүкдүр” сөзләрини чох севирәм» (1 Јәһ. 3:19, 20). Јеһованын вә Иса Мәсиһин бизим ҝүнаһлы олдуғумузу биздән даһа јахшы анладығыны билмәк бизим дә гәлбимизә раһатлыг бәхш едә биләр. Унутмајын ки, онлар фидјәни камил инсанлар үчүн јох, төвбә едән ҝүнаһлы шәхсләр үчүн тәгдим едибләр (1 Тим. 1:15).

Иса Мәсиһин ҝүнаһлы инсанларла рәфтары үзәриндә дәриндән дүшүнсәк вә онун бизә һәвалә етдији иши һәјата кечирмәк үчүн әлимиздән ҝәләни етсәк, фидјәнин шәхсән биздән өтрү верилән әнам олдуғуна әмин олаҹағыг. Белә етсәк, биз дә һәвари Булус кими «Иса Мәсиһ мәни севир вә ҹаныны уғрумда фәда едиб» дејәҹәјик.