1. Нә үчүн тәгибләрә һазырлыглы олмалыјыг?

АҒАМЫЗ МӘСИҺ өлүмүндән өнҹәки ҝеҹә билдирмишди ки, онун шаҝирди олмаг истәјән һәр бир кәс нифрәт һәдәфинә чевриләҹәк (Јәһ. 17:14). Та бу ҝүнә кими Јеһованын сәдагәтли хидмәтчиләри һәгиги ибадәтә гаршы чыханлар тәрәфиндән тәгиб олунур (2 Тим. 3:12). Бу дүнјанын сону јахынлашдыгҹа дүшмәнләримизин бизи даһа чох тәгиб едәҹәјини билирик (Мәт. 24:9).

2, 3. а) Горху илә бағлы нәји билмәлијик? б) Бу мәгаләдә нәји арашдыраҹағыг?

² Тәгибләрә индидән неҹә һазырлаша биләрик? Башымыза ҝәләҹәк пис шејләри тәсәввүр етмәк лазым дејил. Јохса бизи горху вә нараһатлыг бүрүјәр. Олмајан шејләри бејнимиздә ҹанландырараг, һәлә һеч бир сынагла үзләшмәмиш ҝери чәкилә биләрик (Мәс. 12:25; 17:22). Горху дүшмәнимиз Иблисин бизә гаршы ишләтдији ән ҝүҹлү силаһлардан биридир (1 Бут. 5:8, 9). Бәс өзүмүзү мөһкәмләндирмәк үчүн индидән нә едә биләрик?

³ Бу мәгаләдә Јеһова илә мүнасибәтләримизи неҹә мөһкәмләндирә биләҹәјимизи вә буну индидән етмәјин ваҹиблијини арашдыраҹағыг. Һәмчинин ҹәсарәтимизи артырмағын јолуну мүзакирә едәҹәјик. Вә нәһајәт, инсанларын нифрәтинә туш ҝәләркән нә етмәли олдуғумузу өјрәнәҹәјик.

4. Ибраниләрә 13:5, 6 ајәләринә әсасән, нәјә әмин олмалыјыг вә нә үчүн?

⁴ Јеһованын сизи севдијинә вә һеч вахт тәрк етмәјәҹәјинә  әмин олун. (Ибраниләрә 13:5, 6 ајәләрини охујун.) Узун илләр өнҹә «Ҝөзәтчи гүлләси»ндә јазылмышды: «Аллаһы даһа јахшы таныјан инсан сынаглар заманы Она даһа чох етибар едир». Неҹә дә дүзҝүн сөзләрдир! Сынаглардан башыуҹа чыхмаг үчүн Јеһованы үрәкдән севмәли, Она там ҝүвәнмәли вә бизи севдијинә әсла шүбһә етмәмәлијик (Мәт. 22:36—38; Јаг. 5:11).

5. Јеһованын сизи севдијини неҹә дуја биләрсиниз?

⁵ Һәр ҝүн Мүгәддәс Китабы охујанда мәгсәдиниз Јеһоваја јахынлашмаг олсун (Јаг. 4:8). Мүталиә заманы Јеһованын ҝөзәл хүсусијјәтләринә диггәт јетирин. Онун сөзләриндән, етдикләриндән мәһәббәтини дујмаға чалышын (Чых. 34:6). Бәзиләри һеч вахт өзләринә гаршы севҝи ҝөрмәдијинә ҝөрә Аллаһын онлары севдијинә дә инанмыр. Әҝәр сиз дә белә дүшүнүрсүнүзсә, бир сијаһы тутун, Јеһованын һәр ҝүн сизә неҹә мәрһәмәт вә хејирхаһлыг ҝөстәрдијини гејд един (Зәб. 78:38, 39; Ром. 8:32). Өз һәјатыныз барәдә вә Аллаһын Кәламындан охудугларынызын үзәриндә дүшүндүкҹә, бу сијаһыја Јеһованын сизин үчүн етдији чох шеји гејд едә биләҹәксиниз. Онун етдикләрини нә гәдәр чох гијмәтләндирсәниз, мүнасибәтләриниз бир о гәдәр мөһкәм олаҹаг (Зәб. 116:1, 2).

6. Зәбур 94:17—19 ајәләринә әсасән, үрәкдән дуа етмәк сизә неҹә көмәк едә биләр?

⁶ Мүнтәзәм дуа един. Атасынын исти гуҹағына сығынан балаҹа оғланы тәсәввүр един. О, ҝүн әрзиндә баш верән пис-јахшы нә варса, һамысыны чәкинмәдән атасына данышыр. Һәр ҝүн үрәкдән дуа едәрәк Јеһоваја јахынлашсаныз, сизин дә аранызда бу ҹүр мүнасибәтләр олаҹаг. (Зәбур 94:17—19 ајәләрини охујун.) Дуада үрәјинизи сутәк Јеһованын дәрҝаһына бошалдын, бүтүн горху вә нараһатлыгларынызы Она данышын (Мәрс. 2:19). Онда «Аллаһын һәр бир ағылдан үстүн олан сүлһү»нү дујаҹагсыныз (Филип. 4:6, 7). Нә гәдәр чох бу ҹүр дуалар етсәниз, өзүнүзү Јеһоваја бир о гәдәр јахын һисс едәҹәксиниз (Ром. 8:38, 39).

7. Нә үчүн Јеһованын Падшаһлыгла бағлы вердији вәдләри мүтләг ҝерчәкләшдирәҹәјинә әмин олмалыјыг?

⁷ Аллаһын Падшаһлығынын немәтләр бәхш едәҹәјинә әмин олун (Сај. 23:19). Әҝәр бу кими вәдләрә иманыныз зәифдирсә, Шејтан вә онун әлалтылары сизи асанлыгла горхуја салаҹаг (Мәс. 24:10; Ибр. 2:15). Аллаһын Падшаһлығына олан әминлијинизи индидән неҹә мөһкәмләндирә биләрсиниз? Падшаһлыгла бағлы Аллаһын вәдләри вә онларын јеринә јетәҹәјинә нә үчүн әмин олдуғунуз барәдә арашдырма апарын. Бу, сизә неҹә көмәк едәҹәк? Иманына ҝөрә једди ил мүддәтинә һәбс олунан Стенли Ҹонс гардашын нүмунәси үзәриндә дүшүнүн. О, нәјин сајәсиндә сәдагәтлә дөзә билмишди? Гардаш дејир: «Иманым ҝүҹлү иди, чүнки Аллаһын Падшаһлығы вә онун һәјата  кечирәҹәји ишләр барәдә билирдим вә бунлара бир ан белә, шүбһә етмирдим. Буна ҝөрә дә һеч ким мәни јыха билмәди». Әҝәр Аллаһын вәдләринә иманыныз ҝүҹлү олса, Она даһа јахын олаҹагсыныз вә горху сизи үстәләјә билмәјәҹәк (Мәс. 3:25, 26).

8. Јығынҹаглара мүнасибәтимиз нәјин ҝөстәриҹисидир? Изаһ един.

⁸ Јығынҹаг ҝөрүшләриндә мүнтәзәм иштирак един. Јығынҹаглар бизи Јеһоваја јахынлашдырыр. Јығынҹагларда иштирак етмәјә неҹә јанашмағымыз ҝәләҹәкдә сынаглара нә дәрәҹәдә јахшы таб ҝәтирәҹәјимизин ҝөстәриҹисидир (Ибр. 10:24, 25). Нә үчүн? Әҝәр бу ҝүн кичик манеәләрә ҝөрә јығынҹаглара ҝетмириксә, ҝәләҹәкдә диндашларымызла бирҝә јығышмағын тәһлүкәли олдуғу вахтда нә едәҹәјик? Лакин бу ҝүн јығынҹагларда иштирак етмәјә ҹидди јанашырыгса, әлејһдарларымыз бирҝә јығышмағымыза мане оланда белә, бизи һеч нә дајандырмајаҹаг. Инди јығынҹагларымызы севмәји өјрәнмәјин әсл вахтыдыр. Јығынҹаглара севә-севә ҝедириксә, һеч бир тәгиб, һәтта дөвләтин гојдуғу гадаға, Аллаһа итаәт етмәјимизә мане олмајаҹаг (Һәв. 5:29).

9. Нәјә ҝөрә ајәләри әзбәрләмәк тәгибләрә һазырлашмағын јахшы јолудур?

⁹ Севимли ајәләринизи әзбәрләјин (Мәт. 13:52). Мүкәммәл јаддаша саһиб олмасаныз белә, Јеһованын гүдрәтли мүгәддәс руһу сизә ајәләри хатырламағыныза көмәк едәҹәк (Јәһ. 14:26). Шәрги Алманијада һәбсдә олан вә тәкадамлыг камерада јатан бир гардашымыз ҝөрүн нә дејир: «Ики јүздән чох ајәни әзбәр билдијимә ҝөрә чох шад идим. Һәбсдә кечирдијим тәнһа ҝүнләр боју бу ајәләрин үзәриндә дүшүнүрдүм». Бу ајәләр гардаша Јеһоваја бағлы галмаға вә сәдагәтлә дөзүм ҝөстәрмәјә көмәк етмишди.

10. Нә үчүн нәғмәләри әзбәрләмәлијик?

¹⁰ Јеһованы уҹалдан нәғмәләри әзбәрләјин вә охујун. Һәвари Булус вә Сила Филиппидә һәбсдә оланда әзбәр билдикләри һәмд нәғмәләрини охујурдулар (Һәв. 16:25). Кечмиш Совет Иттифагында Сибирә сүрҝүн олунан диндашларымыз да бунун сајәсиндә мөһкәм гала билдиләр. Марија Федун баҹы дејир: «Нәғмә китабындан әзбәр билдијимиз бүтүн нәғмәләри охујурдуг». Баҹы һәмин нәғмәләрин онлары руһландырдығыны вә өзләрини Јеһоваја јахын һисс етмәләринә көмәк етдијини сөјләјир.  Бәс сиз севимли нәғмәнизи охујанда өзүнүзү даһа ҝүҹлү һисс едирсиниз? Онда бу нәғмәләри индидән әзбәрләјин! (« Јеһова, ҹәсарәт вер» адлы чәрчивәјә бахын.)

11, 12. а) 1 Ишмуил 17:37, 45—47 ајәләринә әсасән, Давудда ҹәсарәт һарадан иди? б) Давудун нүмунәсиндән һансы ваҹиб дәрси өјрәнирик?

¹¹ Тәгибләрә синә ҝәрмәк үчүн ҹәсур олмалыјыг. Әҝәр сиздә бу хүсусијјәтин јетәринҹә олмадығыны дүшүнүрсүнүзсә, нә едә биләрсиниз? Нәзәрә алын ки, ҹәсарәт сизин өлчүләриниздән, ҝүҹүнүздән јахуд баҹарыгларыныздан асылы олан бир шеј дејил. Ҝәнҹ Давудун Ҹалутла үзләшдији сәһнәни јадыныза салын. Бу нәһәнҝлә мүгајисәдә Давуд кичик, зәиф иди, јетәринҹә силаһланмамышды. Һәтта гылынҹы да јох иди. Бунунла белә, онун ҹәсарәти ашыб-дашырды. Давуд горхмадан бу өзүндәнразы нәһәнҝлә дөјүшә атылмышды.

¹² Онда бу гәдәр ҹәсарәт һарадан иди? Давуд там әмин иди ки, Јеһова онунладыр. (1 Ишмуил 17:37, 45—47 ајәләрини охујун.) О, диггәтини Ҹалутун онунла мүгајисәдә нә гәдәр бөјүк олдуғуна јох, Јеһова илә мүгајисәдә нә гәдәр ҹылыз олдуғуна ҹәмләмишди. Биз бундан нә өјрәнирик? Гүдрәтли Аллаһын бизимлә олдуғуна әмин олсаг, әлејһдарларымызын Онун өнүндә нә гәдәр ҹылыз олдуғуну дәрк етсәк, биз дә ҹәсур олаҹағыг (2 Салн. 20:15; Зәб. 16:8). Бәс индидән, тәгибләр башламаздан өнҹә ҹәсарәтимизи неҹә артыра биләрик?

13. Ҹәсарәтимизи неҹә артыра биләрик? Изаһ един.

¹³ Ҹәсарәтимизи индидән артырмаг үчүн Аллаһын Падшаһлығы һагда хош хәбәри тәблиғ етмәлијик. Чүнки тәблиғ иши бизә Јеһоваја етибар едиб, инсан горхусуна үстүн ҝәлмәји өјрәдир (Мәс. 29:25). Әзәләләримиз идман етмәјин сајәсиндә мөһкәмләндији кими, ҹәсарәтимиз дә ев-ев, иҹтимаи јерләрдә, гејри-формал вә ишҝүзар әразиләрдә тәблиғ етмәјин сајәсиндә артыр. Индидән тәблиғ етмәјә ҹәсарәтимизи артырсаг, һәтта фәалијјәтимиз гадаға алтында оланда белә, бу иши давам етдирмәјә әзмли олаҹағыг (1 Салон. 2:1, 2).

14, 15. Ненси Јуен вә Валентина Гарновскајадан нә өјрәнирик?

¹⁴ Мөһтәшәм ҹәсарәт нүмунәси гојмуш ики сәдагәтли баҹыдан чох шеј өјрәнә биләрик. Ненси Јуен баҹынын ҹәми бир метр јарым боју олса да, ону горхутмаг  һәләм-һәләм асан дејилди *. О, Аллаһын Падшаһлығы һагда мүждәни тәблиғ етмәји дајандырмагдан имтина етди. Нәтиҹәдә, коммунист Чин һөкумәти ону тәхминән 20 ил мүддәтинә азадлыгдан мәһрум етди. Баҹыны диндирән рәсмиләр ону өлкәнин «ән инадкар шәхси» адландырмышдылар.

¹⁵ Ејнилә, Валентина Гарновскаја баҹы кечмиш Совет Иттифагында үч дәфә һәбс олунмуш вә үмумиликдә 21 ил һәбсдә олмушду *. Һансы сәбәбә ҝөрә? Баҹы тәблиғ етмәјә о гәдәр гәтијјәтли иди ки, мәмурлар она «хүсуси тәһлүкәли ҹинајәткар» дамғасы вурмушду. Бу ики сәдагәтли гадын нәјин сајәсиндә белә ҹәсарәтли иди? Онлар әмин идиләр ки, Јеһова јанларындадыр.

16. Әсл ҹәсарәтин сирри нәдәдир?

¹⁶ Бәһс етдијимиз кими, ҹәсарәтимизи артырмаг үчүн диггәтимизи өз ҝүҹүмүзә вә баҹарыгларымыза ҹәмләмәмәлијик. Әксинә, Јеһованын бизимлә олдуғуна вә бизим үчүн вурушдуғуна инанмалыјыг (Ган. 1:29, 30; Зәк. 4:6). Әсл ҹәсарәтин сирри бундадыр!

17, 18. Јәһја 15:18—21 ајәләринә әсасән, Иса Мәсиһ һансы хәбәрдарлығы вермишди? Изаһ един.

¹⁷ Һәр биримиз башгаларынын һөрмәтини газанмағы хошлајырыг, лакин инсанлар бизи севмирсә, бу о демәк дејил ки, дәјәрсизик. Иса Мәсиһ демишди: «Инсан Оғлундан өтрү сизә нифрәт едәндә, сизи гованда, тәһгир едәндә вә адынызы бәднам едәндә сиз неҹә дә хошбәхтсиниз» (Лука 6:22). О, нәји нәзәрдә тутурду?

¹⁸ Иса демәк истәмирди ки, мәсиһиләр нифрәт олунмағы хошлајыр. О, садәҹә реаллығы дејирди. Биз бу дүнјадан дејилик. Биз Мәсиһин тәлимләринә ујғун јашајыр вә онун вәз етдији мүждәни тәблиғ едирик. Буна ҝөрә дә дүнјанын нифрәт һәдәфинә чеврилмишик. (Јәһја 15:18—21 ајәләрини  охујун.) Мәгсәдимиз Јеһованы разы салмагдыр. Әҝәр инсанлар Аллаһы севдијимизә ҝөрә бизә нифрәт едирсә, бу, онларын өз проблемидир.

19. Һәвариләрдән неҹә өрнәк ала биләрик?

¹⁹ Һеч вахт фани инсанын һансыса сөзүнә вә ја һәрәкәтинә ҝөрә Јеһованын Шаһиди олмағыныздан утанмајын! (Мик. 4:5). Мәсиһин едамындан сонра Јерусәлимдә олан һәвариләрин гојдуғу нүмунә бизә инсан горхусуна үстүн ҝәлмәјә көмәк едә биләр. Һәвариләр билирди ки, јәһуди дин хадимләринин онлары ҝөрәси ҝөзү јохдур (Һәв. 5:17, 18, 27, 28). Бунунла белә, һәвариләр һәр ҝүн мәбәдә ҝедир вә ҹамаатын өнүндә Исанын шаҝирди олдугларыны бәјан едирди (Һәв. 5:42). Һәвариләр горхуја тәслим олмурду. Биз дә мүнтәзәм олараг ишдә, мәктәбдә вә јашадығымыз әразидә Јеһованын Шаһиди олдуғумузу демәклә горхуја үстүн ҝәлә биләрик (Һәв. 4:29; Ром. 1:16).

20. Нә үчүн һәвариләр нифрәт олунмаларына рәғмән, хошбәхт идиләр?

²⁰ Нифрәт һәдәфи олмаларына бахмајараг, һәвариләр хошбәхт иди. Чүнки онлар бунун сәбәбини билирдиләр вә Јеһованын ирадәсини јеринә јетирдикләринә ҝөрә пис рәфтара мәруз галмағы шәрәф сајырдылар (Лука 6:23; Һәв. 5:41). Һәвари Бутрус сонралар јазмышды: «Салеһлик уғрунда әзаб чәксәниз дә, сиз хошбәхтсиниз» (1 Бут. 2:19—21; 3:14). Јеһованын бәјәндији кими даврандығымыза ҝөрә нифрәт олундуғумузу дәрк етсәк, горхунун бизи әсир алмасына һеч вахт јол вермәјәҹәјик.

21, 22. а) Тәгибләрә һазырлашмаг үчүн нә етмәк нијјәтиндәсиниз? б) Нөвбәти мәгаләдә нәји арашдыраҹағыг?

²¹ Биз тәгиб далғаларынын нә заман ҹошаҹағыны, фәалијјәтимизә нә заман гадаға гојулаҹағыны билмирик. Лакин билирик ки, Јеһова илә мүнасибәтләримизи, ҹәсарәтимизи артырараг вә инсанларын нифрәтинә синә ҝәрмәји өјрәнәрәк бунлара һазырлыглы ола биләрик. Инди ҝөрдүјүмүз һазырлыглар ҝәләҹәкдә мәтин галмағымыза көмәк едәҹәк.

²² Бәс әҝәр ибадәтимизә гадаға гојулубса, онда неҹә? Нөвбәти мәгаләдә һәтта гадаға алтында белә, Јеһоваја хидмәти давам етдирмәјимизә көмәк едәҹәк принсипләри арашдыраҹағыг.