Сүбутлар ҝөстәрир ки, Иса ерамызын 29-ҹу илиндә вәфтиз олунанда Баш Каһин олду. Буну һарадан билирик? Иса вәфтиз олунанда өзүнү Аллаһын «ирадәсини» тәмсил едән гурбанҝаһда гурбан ҝәтирмәк үчүн тәгдим етди (Гал. 1:4; Ибр. 10:5—10). Бу символик гурбанҝаһ Иса вәфтиз олундуғу андан мөвҹуд олду. Буна ҝөрә руһани мәбәдин дә һәмин андан етибарән мөвҹуд олдуғу мәнтигәујғундур. Руһани мәбәд исә Исанын фидјә гурбанлығы әсасында пак шәкилдә Јеһоваја ибадәт етмәјимизи мүмкүн едән һәр шеји тәмсил едир. Гурбанҝаһ һәмин руһани мәбәдин әсас һиссәсидир (Мәт. 3:16, 17; Ибр. 5:4—6).

Бөјүк руһани мәбәддә баш каһин дә олмалы иди. Буна ҝөрә дә Јеһова Исаны «мүгәддәс руһла вә гүввә илә мәсһ етди» (Һәв. 10:37, 38; Марк 1:9—11). Бәс неҹә әмин ола биләрик ки, Иса Мәсиһ өлүб дирилмәмишдән әввәл Баш Каһин тәјин олунду? Мусанын Гануну алтында хидмәт едән Һарунун вә ондан сонракы баш каһинләрин нүмунәсинә нәзәр саланда буна әмин олуруг.

Ганунда дејилирди ки, чадырдакы Ән мүгәддәс јерә, сонралар исә мәбәддәки Ән мүгәддәс јерә јалныз баш каһин ҝирә биләрди. Ән мүгәддәс јер Мүгәддәс јердән пәрдә илә ајрылырды. Баш каһин јалныз Кәффарә ҝүнүндә пәрдәдән ичәри, јәни Ән мүгәддәс јерә ҝирә биләрди (Ибр. 9:1—3, 6, 7). Һарун вә ондан сонракы баш каһинләр чадырдакы пәрдәдән ичәри ҝирмәздән әввәл баш каһин кими мәсһ олунурдулар. Демәли, Иса Мәсиһ дә өлүб, сонра «пәрдәни, јәни бәдәнини архада гојуб» ҝөјләрә галхмаздан әввәл Јеһованын руһани мәбәдиндә Баш Каһин тәјин олунмалы иди (Ибр. 10:20). Бу сәбәбдән һәвари Булус Иса һаггында данышаркән демишди ки, о, «баш каһин кими» ҝәлди, сонра «инсан әли илә гурулмамыш вә... даһа бөјүк вә мүкәммәл чадыра ҝирди» вә «дүз ҝөјә дахил олду» (Ибр. 9:11, 24).

Бәс јени әһд нә заман гүввәјә минди? Иса ҝөјә галхыб өз камил инсан һәјатыны бизим уғрумузда тәгдим едәндә јени әһдин гүввәјә минмә просеси башлады. Јени әһдин гүввәјә минмәси үчүн һансы мәрһәләләр лазым иди?

Илк өнҹә Иса Јеһованын һүзуруна ҝәлди. Сонра Иса өз гурбанлығынын дәјәрини Јеһоваја тәгдим етди. Сонда исә Јеһова Исанын ахыдылан ганынын дәјәрини гәбул етди. Бу үч мәрһәләни кечмәјинҹә јени әһд гүввәјә минмәди.

Мүгәддәс Китабда јазылмајыб ки, Јеһова Исанын гурбанлығынын дәјәрини дәгиг нә вахт гәбул етди. Буна ҝөрә дә јени әһдин гүввәјә миндији дәгиг вахты дејә билмәрик. Лакин биз билирик ки, Иса Әллинҹи ҝүн бајрамындан он ҝүн әввәл ҝөјә галхды (Һәв. 1:3). Бу он ҝүн әрзиндә, һансыса бир мәгамда о өз гурбанлығынын дәјәрини Јеһоваја тәгдим етди вә Јеһова да ону гәбул етди (Ибр. 9:12). Јени әһдин артыг гүввәдә олдуғу Әллинҹи ҝүн бајрамында ајдын шәкилдә ҝөрүндү (Һәв. 2:1—4, 32, 33). Ајдын иди ки, һәмин вахт јени әһд артыг фәалијјәтдә иди.

Демәли, Јеһова Исанын ахыдылан ганынын дәјәрини гәбул едәндән вә мәсһ олунмуш мәсиһиләри јени әһдә дахил едәндән сонра јени әһд гүввәјә минди. О вахтдан бу әһд Баш Каһин олан Иса Мәсиһин васитәчилији илә фәалијјәтә башлады (Ибр. 7:25; 8:1—3, 6; 9:13—15).