1, 2. Нәјә ҝөрә мәсиһини ҝөјдәләнә бәнзәтмәк олар? (1 Коринфлиләрә 15:58).

 1978-ҸИ ИЛДӘ Токиода 60 мәртәбәли ҝөјдәлән инша едилирди. Инсанлары марагландырырды ки, ҝөрәсән, бу бојда бина тез-тез баш верән зәлзәләләрә неҹә таб ҝәтирәҹәк. Мүһәндисләр бинаны елә лајиһәләндирмишдиләр ки, о һәм мөһкәм, һәм дә еластик олсун вә беләҹә, сејсмик тәканлар заманы учмасын. Мәсиһиләр дә бу ҝөјдәләнә бәнзәјирләр. Һансы мәнада?

² Мәсиһи мәтин олмалыдыр, амма ејни заманда вәзијјәтә ујғунлашмағы да баҹармалыдыр. О, мөһкәм вә сарсылмаз олмалыдыр ки, Аллаһын гајда-ганунларына әмәл етсин. (1 Коринфлиләрә 15:58 ајәсини охујун.) О, «итаәткардыр» вә әгидәсиндән бир аддым белә ҝери чәкилмир. Ејни заманда о, «мүлајимдир», јәни мүмкүн, јахуд лазым олдуғу һалда вәзијјәтә ујғунлашмағы баҹарыр (Јаг. 3:17). Таразлы олмағы өјрәнән мәсиһи нә чох сәрт олаҹаг, нә дә һәддән артыг јумшаг. Бу мәгалә бизә мәтин вә сарсылмаз олмағы өјрәдәҹәк. Һәмчинин Шејтанын гәтијјәтимизи сындырмаг үчүн истифадә етдији беш үсулдан данышаҹағыг вә онун ҹәһдләрини боша чыхармағын јолларыны арашдыраҹағыг.

3. Һәвариләрин ишләри 15:28, 29 ајәләриндә Али Ганунвериҹинин һансы ганунлары јазылыб?

³ Јеһова Али Ганунвериҹидир. О, һәмишә халгына ајдын ганунлар вериб (Әшј. 33:22). Мәсәлән, биринҹи әсрдәки рәһбәрлик шурасы мәсиһиләрә үч саһәдә дәјанәтли олмағын ваҹиблијини вурғуламышды: 1) бүтпәрәстликдән узаг дуруб  јалныз Јеһоваја ибадәт етмәлијик, 2) ганын мүгәддәслијинә һөрмәт етмәлијик, 3) Јеһованын јүксәк әхлаг нормаларына риајәт етмәлијик. (Һәвариләрин ишләри 15:28, 29 ајәләрини охујун.) Ҝәлин ҝөрәк бу ҝүн мәсиһиләр бу үч саһәдә неҹә гәтијјәтли ола биләр.

4. Јеһоваја там сәдагәт ҝөстәрдијимиз нәдән ҝөрүнүр? (Вәһј 4:11).

⁴ Биз бүтпәрәстликдән узаг дуруб јалныз Јеһоваја ибадәт едирик. Исраиллиләр Јеһоваја там сәдагәт ҝөстәрмәли иди (Ган. 5:6—10). Иса да Шејтана ачыг-ајдын демишди ки, биз јалныз Јеһоваја ибадәт етмәлијик (Мәт. 4:8—10). Одур ки, биз бүтләрә ситајиш етмирик. Бундан әлавә, биз инсанлары да бүтләшдирмирик. Һеч бир дин хадимини, сијасәтчини, идманчыны, актјору вә ја мүғәннини илаһиләшдирмирик. Биз јалныз «һәр шејин јараданы» олан Јеһоваја ибадәт едирик вә Онун тәрәфини тутуруг. (Вәһј 4:11 ајәсини охујун.)

5. Нәјә ҝөрә биз һәјатын вә ганын мүгәддәслији илә бағлы гануна табе олуруг?

⁵ Биз һәјатын вә ганын мүгәддәслији илә бағлы гануна табе олуруг. Нәјә ҝөрә? Чүнки Јеһова дејир ки, ган һәјаты тәмсил едир вә һәјат Јеһованын бизә бәхш етдији гијмәтли һәдијјәдир (Лав. 17:14). Јеһова илк дәфә инсанлара һејванын әтиндән јемәјә изин верәндә онлара бујурмушду ки, ганы јемәсинләр (Јар. 9:4). О, исраиллиләрә Мусанын ганунуну верәндә буну тәкрарламышды (Лав. 17:10). Һәмчинин Јеһова биринҹи әсрдәки рәһбәрлик шурасы васитәсилә бүтүн мәсиһиләрә әмр етмишди ки, гандан узаг дурсунлар (Һәв. 15:28, 29). Биз мүалиҹә илә бағлы гәрарлар верәндә бу әмрә гәтијјәтлә табе олуруг b.

6. Јеһованын гојдуғу јүксәк әхлаг нормаларына риајәт етмәк үчүн нә едирик?

⁶ Биз Јеһованын гојдуғу јүксәк әхлаг нормаларына риајәт едирик (Ибр. 13:4). Һәвари Булус мәҹази диллә демишди ки, бәдән үзвләримизи «өлдүрәк». Бу о демәкдир ки, биз нәфсимизи көкүндән мәһв етмәк үчүн ҹидди тәдбирләр ҝөрмәлијик. Биз ҹинси әхлагсызлыға ҝәтириб чыхаран һеч бир шејә бахмырыг вә һеч бир һәрәкәтә јол вермирик (Кол. 3:5; Әјј. 31:1). Биздә нәфсани истәкләр јарананда дәрһал Јеһова илә мүнасибәтимизи корлајаҹаг фикирләри вә һәрәкәтләри өзүмүздән узаглашдырырыг.

7. Нә етмәјә гәрарлы олмалыјыг вә нәјә ҝөрә?

⁷ Јеһова истәјир ки, биз Она үрәкдән итаәт едәк (Ром. 6:17). Онун бујруглары һәмишә бизим хејримизәдир вә дәјишилмәздир (Әшј. 48:17, 18; 1 Кор. 6:9, 10). Биз вар ҝүҹүмүзлә чалышырыг ки, Јеһованын гәлбини севиндирәк вә мәзмурчу кими дејәк: «Өзүм үчүн гәрар вермишәм ки, даима, сонадәк гајда-ганунуна табе олум» (Зәб. 119:112). Амма Шејтан чалышаҹаг ки, бизи гәрарымыздан дөндәрсин. Бәс о бунун үчүн һансы үсуллардан истифадә едир?

8. Шејтан гәтијјәтимизи зәифләтмәк үчүн тәгибләрдән неҹә истифадә едир?

⁸ Тәгибләр. Шејтан гәтијјәтимизи сындырмаг үчүн физики вә мәнәви зоракылыға әл атыр. Онун мәгсәди бизи «удмагдыр», јәни Јеһова илә мүнасибәтләримизи корламагдыр (1 Бут. 5:8). Биринҹи әсрдәки мәсиһиләр мөвгеләриндә гәти олдугларына ҝөрә тәһдид олунурдулар, дөјүлүрдүләр вә өлдүрүлүрдүләр (Һәв. 5:27, 28, 40; 7:54—60). Шејтан инди дә тәгибләрдән истифадә едир. Белә бир шеј Русијада вә диҝәр  өлкәләрдә баш верир. Орада һөкумәт Јеһованын Шаһидләри илә гәддар давраныр. Һәмчинин баҹы-гардашларымыз башга нөв тәгибләрлә дә үзләширләр.

9. Бизә гаршы ҝизли һүҹумларын олдуғуну ҝөстәрән нүмунә чәкин.

⁹ Ҝизли һүҹумлар. Шејтан бизә ачыг һүҹум етмәклә јанашы, һијләјә дә әл атыр (Ефес. 6:11). Роберт адлы гардашла баш верәнләрдән буну ајдын ҝөрмәк олар. О, ҹидди әмәлијјат олунмаг үчүн хәстәханаја јерләшдирилмишди. Гардаш һәкимләрә билдирмишди ки, һеч бир һалда она ган көчүрүлмәсин. Ҹәрраһ онун гәрарына һөрмәт едәрәк разылашды. Амма әмәлијјатдан бир ҝүн габаг аиләси евә ҝедәндән сонра анестезиолог ҝеҹә онун јанына ҝәлди. Она деди ки, бөјүк еһтимал, Робертә ган көчүрүлмәјәҹәк, амма ганы һәр еһтимала әлләринин алтында сахлајаҹаглар. Аиләси Робертин јанында олмадығы үчүн, бәлкә дә һәким онун фикриндән дашынаҹағыны дүшүнүрдү. Амма Роберт мәтин галараг һәкимә билдирди ки, нә олурса олсун она ган көчүрүлмәсин.

10. Нәјә ҝөрә инсан дүшүнҹәси тәһлүкәлидир? (1 Коринфлиләрә 3:19, 20).

¹⁰ Инсан фикирләри. Әҝәр биз мәсәләјә инсан дүшүнҹәси илә бахсаг, онда Јеһоваја вә Онун ганунларына сајмазјана јанашарыг. (1 Коринфлиләрә 3:19, 20 ајәләрини охујун.) Чох вахт «бу дүнјанын мүдриклији» бизи ҹисмани арзуларымызы тәмин етмәјә сәсләјир. Пергам вә Тиатирада јашајан бәзи мәсиһиләр орадакы бүтпәрәст вә әхлагсыз инсанларын фикирләринин тәсири алтына дүшмүшдүләр. Иса һәр ики јығынҹағы әхлагсызлыға ҝөз јумдугларына ҝөрә мәзәммәт етмишди (Вәһј 2:14, 20). Бу ҝүн инсанлар чалышыр ки, јанлыш фикирләри бизим бејнимизә јеритсин. Аилә үзвләримиз вә достларымыз биздә елә һисс ојада биләрләр ки, санки биз чох сәрт мөвге тутмушуг вә бизи Аллаһын гајда-ганунуну позмаға тәһрик едә биләрләр. Мәсәлән, онлар дејә биләр ки, тәмиз әхлагы горумағын бир мәнасы јохдур вә Аллаһын Кәламындакы нормалар көһнәлиб.

11. Нәдән гачынмалыјыг?

¹¹ Бәзән бизә елә ҝәлә биләр ки, Јеһованын ҝөстәришләри кифајәт гәдәр ачыг дејил. Һәтта биздә јазыланлардан кәнара чыхмаг истәји ола биләр (1 Кор. 4:6). Исанын дөврүндәки дин хадимләри белә бир ҝүнаһы ишләтмишдиләр. Онлар Мусанын ганунуна өз гајдаларыны әлавә етмишдиләр. Бунунла да садә халгын үзәринә әлавә јүк гојмушдулар (Мәт. 23:4). Јеһова Кәламы вә тәшкилаты васитәсилә бизә ачыг-ајдын ҝөстәришләр верир. Әлавә гајдалар гојмағымыза еһтијаҹ јохдур (Мәс. 3:5—7). Одур ки, биз Аллаһын Кәламында јазыланлардан кәнара чыхмырыг вә шәхси мәсәләләрлә бағлы диндашларымыза гајдалар гојмуруг.

12. Шејтан «пуч вә јанлыш фикирләр»и неҹә јајыр?

¹² Јалан мәлуматлар. Шејтан «дүнјанын бахышлары», һәмчинин «пуч вә јанлыш фикирләр» васитәсилә инсанлары аздырмаға, араларында парчаланма јаратмаға чалышыр (Кол. 2:8). Биринҹи әсрдә јалан фикирләрә инсан дүшүнҹәсинә әсасланан фәлсәфә вә Мүгәддәс Китаб әсасы олмајан јәһуди тәлимләри дахил иди. Һәмчинин белә бир фикир вар иди ки, мәсиһиләр Мусанын ганунуна табе олмалыдырлар. Бүтүн бунлар јалан иди, чүнки һәгиги һикмәтин мәнбәји олан Јеһова Аллаһ көлҝәдә галырды. Бу ҝүн исә Шејтан медиа вә сосиал шәбәкәләр васитәсилә конспирасија нәзәријјәләри вә сијасәтчиләрин марагларына хидмәт едән сахта хәбәр мәлуматлары јајыр. COVID-19  пандемијасы заманы бу кими мәлуматлара тез-тез раст ҝәлирдик c. Јалан мәлуматлара гулаг асыб нараһатчылыг кечирән инсанлардан фәргли олараг, тәшкилатдан ҝәлән ҝөстәришләрә риајәт едән мәсиһиләр өзләрини нараһатчылыгдан горумушдулар (Мәт. 24:45).

13. Нәјә ҝөрә фикримизин јајынмамасы үчүн диггәтли олмалыјыг?

¹³ Фикримизи јајындыран шејләр. Биз фикримизи даһа ваҹиб шејләрә ҹәмләмәлијик (Филип. 1:9, 10). Диггәтимизи јајындыран шејләр ҝүҹүмүзү вә вахтымызы алыр вә фајдалы ишләр гырагда галыр. Һәтта ади шејләр, мәсәлән, јемәк, ичмәк, истираһәт вә иш һәјатымызда әсас јери тутса, диггәтимиз јајынаҹаг (Лука 21:34, 35). Бундан әлавә, биз һәр ҝүн аддымбашы сосиал мүнагишәләр вә сијаси мәсәләләрлә бағлы хәбәрләрә раст ҝәлирик. Бу ҹүр дебатларын бизи јајындырмасына имкан вермәмәлијик. Әкс һалда, үрәјимиздә тәрәф тутмаға башлајаҹағыг. Шејтан јухарыда гејд етдијимиз бүтүн үсуллар васитәсилә дүзҝүн давранмаг гәтијјәтимизи зәифләтмәјә чалышыр. Ҝәлин ҝөрәк онун ҹәһдләрини боша чыхармаг вә мөһкәм галмаг үчүн нә едә биләрик.

14. Јеһованын јолунда мәтин галмағыныза көмәк едән амилләрдән бири һансыдыр?

¹⁴ Һәср олунмағыныз вә вәфтизиниз барәдә дүшүнүн. Сиз бу гәрары нијә вермишдиниз? Чүнки Јеһованын тәрәфини тутмаг истәјирдиниз. Јадыныза салын, һәгигәти тапдығыныза неҹә әмин олмушдунуз? Сиз Јеһова һагда дәгиг билик алмышдыныз, ҝетдикҹә Ону севмәјә, Она еһтирам бәсләмәјә башламышдыныз. Сонра сиздә иман јаранды вә бу сизи төвбә етмәјә тәшвиг етди. Сиз Јеһованын нифрәт етдији ишләрдән узаг олуб Онун бәјәндији кими јашамаға башладыныз. Јеһованын сизи бағышладығыны һисс едәндә гәлб раһатлығы тапдыныз (Зәб. 32:1, 2). Јығынҹаглара ҝәлмәјә, өјрәндијиниз ҝөзәл һәгигәтләри башгалары илә бөлүшмәјә башладыныз. Инди исә һәср олунуб вәфтиз олунмуш бир мәсиһи кими һәјата апаран јолда  јеријирсиниз вә бу јолдан сапмамаг гәтијјәтиндәсиниз (Мәт. 7:13, 14).

15. Нәјә ҝөрә мүталиә етмәк хејримизәдир?

¹⁵ Аллаһын Кәламыны мүталиә едиб үзәриндә дүшүнүн. Ағаҹын көкү дәриндирсә, о, мөһкәм дајанаҹаг. Ејнилә бизим дә иманымыз мөһкәмдирсә, мәтин дура биләҹәјик. Ағаҹ бөјүдүкҹә көкү даһа да дәринә ҝедир вә шахәләнир. Биз дә Аллаһын Кәламыны мүталиә едәндә иманымыз мөһкәмләнир вә даһа да әмин олуруг ки, Онун ганун вә принсипләри мүкәммәлдир (Кол. 2:6, 7). Јеһованын өјүд-нәсиһәтләринин, вердији мүдафиәнин кечмишдә хидмәтчиләринә неҹә көмәк етдији барәдә дүшүнүн. Мисал үчүн, Һизгијал ҝөрүнтүдә мәләјин мәбәди өлчдүјүнү ҝөрмүшдү вә буна диггәт кәсилмишди. Бу ҝөрүнтү ону мөһкәмләндирди. Биз бу ҝөрүнтүдән өјрәнирик ки, Јеһованын пак ибадәт үчүн гојдуғу ганунлара неҹә риајәт етмәлијик d (Һизг. 40:1—4; 43:10—12). Биз дә Аллаһын Кәламындакы дәринликләри мүталиә етмәк, үзәриндә дүшүнмәк үчүн вахт ајыранда бөјүк фајда әлдә едирик.

16. Үрәјинин мәтин олмасы Роберти неҹә горуду? (Зәбур 112:7).

¹⁶ Гој үрәјиниз мәтин олсун. Давуд падшаһ нәғмәдә Јеһоваја белә демишди: «Үрәјим мәтиндир, еј Аллаһ» (Зәб. 57:7). О бунунла Јеһоваја мәһәббәтинин сарсылмаз олдуғуну билдирмишди. Бизим дә там архајынлыгла Јеһоваја ҝүвәнмәјимиз мүмкүндүр. (Зәбур 112:7 ајәсини охујун.) Ҝәлин ҝөрәк бу ҹүр үрәјә саһиб олмаг бајаг ады чәкилән Роберт гардаша неҹә көмәк етмишди. Һәким она дејәндә ки, ган һәр еһтимала әлләринин алтында олаҹаг, о, дәрһал белә ҹаваб вермишди: «Әҝәр мәнә ган көчүрмәк еһтималы аз да олса варса, мән елә бу дәгигә хәстәханадан чыхаҹағам». Һәмин һадисә илә бағлы сонралар Роберт белә демишди: «Үрәјимдә ҹүзи дә олса нә тәрәддүд, нә дә нараһатчылыг вар иди».

17. Робертдән нә өјрәнирсиниз? (Һәмчинин шәклә бахын.)

¹⁷ Нәјин сајәсиндә Роберт белә мәтин  иди? Чүнки о, хәстәханаја дүшмәздән узун мүддәт әввәл гәрар вермишди ки, мөһкәм дајанаҹаг. Бу гәрары вермәјә она нә көмәк етмишди? Биринҹиси, о, Јеһованын гәлбини севиндирмәк истәјирди. Икинҹиси, о, Мүгәддәс Китабда вә нәшрләримиздә ганын мүгәддәслији илә бағлы јазыланлары дәриндән мүталиә етмишди. Үчүнҹүсү, о әмин олмушду ки, Јеһованын ганунуна итаәт етмәси она әбәди немәтләр ҝәтирәҹәк. Биз дә һансы сынагла үзләшириксә үзләшәк мәтин ола биләрик.

18. Бәрәгин нүмунәсиндән Јеһоваја етибар етмәклә бағлы нә өјрәнирик? (Үз габығындакы шәклә бахын.)

¹⁸ Јеһоваја етибар един. Ҝәлин ҝөрәк Бәрәг Јеһованын ҝөстәришинә етибар етдији үчүн неҹә уғур газанды. Һәмин вахт өлкәдә нә бир галхан, нә бир низә ҝөзә дәјмирди. Амма Јеһова Бәрәгә бујурду ки, Кәнан ордусунун башчысы олан Сисара гаршы чыхсын. Сисарын ордусу исә јахшы силаһланмышды (Һак. 5:8). Пејғәмбәр Дәбурә Бәрәгә деди ки, дүзәнҝаһа ениб Сисар вә онун 900 арабасы илә гаршы-гаршыја дурсун. Бәрәг билирди ки, дүзәнҝаһда арабалара гаршы вурушмаг чох чәтин олаҹаг. Буна бахмајараг, о, итаәт етди. Исраиллиләр Табур дағындан енән вахт Јеһова ҝүҹлү лејсан ҝөндәрди. Она ҝөрә дә Сисарын арабалары палчыгда илишиб галды вә Јеһова Бәрәгә гәләбә верди (Һак. 4:1—7, 10, 13—16). Ејнилә әҝәр биз Јеһовадан вә Онун тәшкилатындан ҝәлән ҝөстәришләрә етибар етсәк, Јеһова бизә гәләбә газандыраҹаг (Ган. 31:6).

19. Нәјә ҝөрә мәтин галмаг нијјәтиндәсиниз?

¹⁹ Һәлә ки биз бу шәр дүнјада јашајырыг, мәтин галмаг үчүн мүбаризә апармалы олаҹағыг (1 Тим. 6:11, 12; 2 Бут. 3:17). Ҝәлин Јеһоваја садиг галмаға, ганунларына итаәт етмәјә әзмли олаг, мөһкәм дајанаг. Гојмајаг ки, тәгибләр, ҝизли һүҹумлар, инсан фикирләри, јалан мәлуматлар вә фикримизи јајындыран шејләр бизи сарсытсын (Ефес. 4:14). Бунунла јанашы, биз дәрракәли олмалыјыг. Нөвбәти мәгаләдә Јеһова вә Исанын бу саһәдә гојдуғу мүкәммәл нүмунәни арашдыраҹағыг.