Никола вә Селин башга чәтинликлә үзләшмишди. Франса филиалынын тәклифи илә онлар јени јығынҹаға көчмүшдүләр. Онлар дејир: «Тәзә-тәзә чох севинҹәк идик, амма бу, узун сүрмәди. Чох кечмәмиш достларымыз үчүн дарыхмаға башладыг. Јени јығынҹагдакы баҹы-гардашларла һәлә о гәдәр дә мөһкәм достлуг мүнасибәти гурмамышдыг» a. Бүтүн бу чәтинликләрә рәғмән, јени јығынҹағынызда «чичәк ачмаг» үчүн нә едә биләрсиниз? Башгаларынын бу саһәдә һансы көмәји дәјә биләр? Јени јығынҹағынызда һәм руһланмаг, һәм дә руһландырмаг үчүн нәләр едә биләрсиниз?

СИЗӘ КӨМӘК ЕДӘҸӘК ДӨРД ПРИНСИП

1) Јеһоваја ҝүвәнин (Зәб. 37:5). Јапонијада јашајан Казуми баҹы 20 ил ејни јығынҹагда хидмәт едиб. Амма сонра јолдашынын иши илә бағлы онлар башга әразијә көчмәли олдулар. Баҹы јолуну Јеһоваја неҹә тапшырды? О дејир: «Бүтүн үрәјими Јеһоваја бошалдырдым. Она горхуларымы, кечирдијим тәнһалыг һиссини вә нараһатлығымы данышырдым. Һәр дәфә дуа едәндән сонра Јеһова еһтијаҹ дујдуғум ҝүҹү верирди».

Јеһоваја етибарынызы неҹә артыра биләрсиниз? Биткинин бөјүмәси үчүн су вә торпагдакы гида маддәләри лазымдыр. Иманымызын да бөјүмәси үчүн ону гидаландырмалыјыг. Бајаг ады чәкилән Никола гардаша Ибраһим пејғәмбәрин, Исанын вә Булусун нүмунәсини арашдырмаг көмәк едиб. Онлар Аллаһын ирадәсини јеринә јетирмәкдән өтрү чох гурбанлар вермишдиләр. Бу мөмин инсанларын нүмунәси Николаја Јеһоваја етибарыны артырмаға көмәк етди. Мүгәддәс Китабы мүнтәзәм мүталиә  етсәниз, һәм һәјатыныздакы јени дәјишикликләрин өһдәсиндән ҝәләҹәксиниз, һәм дә јени јығынҹағыныздакы диндашларынызы руһландырмаг үчүн мараглы фикирләр тапаҹагсыныз.

2) Мүгајисә етмәјин (Ваиз 7:10). Жуел гардаш Бениндән Бирләшмиш Штатлара көчәндә тамам фәргли бир мәдәнијјәтә ујғунлашмалы олду. О, һәмин вахтлары хатырлајараг дејир: «Мәндә елә бир тәәссүрат вар иди ки, гаршыма чыхан һәр кәсә һәјат һекајәми данышмалыјам». Буна алышмадығы үчүн о, јығынҹагдакыларла сәрһәд сахламаға башлады. Амма баҹы-гардашлары јахындан таныдыгҹа фикри дәјишди. О дејир: «Фикримҹә, һарада јашамасындан асылы олмајараг, бүтүн инсанлар ејнидир. Садәҹә, онлар фикирләрини фәргли ифадә едирләр. Инсанлары олдуғу кими гәбул еләмәк чох ваҹибдир». Она ҝөрә дә јени јығынҹағынызы әввәлки илә мүгајисә етмәјин. Анна-Лиз адлы өнҹүл баҹы бунунла бағлы мараглы бир фикир сөјләмишди: «Мән архада бурахдыгларымы тапмаға јох, јениләрини кәшф етмәјә ҝәлмишәм».

Ағсаггаллар да чалышмалыдырлар ки, јени јығынҹагларыны әввәлки илә мүгајисә етмәсинләр. Ишин фәргли үсулла ҝөрүлмәси һеч дә һәмишә онун сәһв олдуғуну ҝөстәрмир. Һансыса тәклифи етмәмишдән габаг јахшы олар ки, һәмин әразидәки вәзијјәтлә јахындан таныш оласыныз (Ваиз 3:1, 7б). Өз фикринизи јеритмәк әвәзинә, өз нүмунәнизи гојун (2 Кор. 1:24).

3) Гајнајыб-гарышын (Филип. 1:27). Һараса көчмәк инсанын чохлу вахтыны вә ҝүҹүнү алыр. Амма јени јығынҹағыныза тез бир заманда ҝетмәк вә мүмкүндүрсә, ҹанлы иштирак етмәк чох ваҹибдир. Әҝәр јени јығынҹағыныздакы баҹы-гардашлар сизи һеч вахт ҝөрмәјибсә, ја да һәрдәнбир ҝөрүрсә, сизә неҹә јахын ола биләрләр, неҹә көмәк әлләрини узада биләрләр? Ики гызы илә Ҹәнуби Африканын бөјүк бир шәһәринә көчән Лусинда хатырлајыр: «Достларым мәнә мәсләһәт ҝөрмүшдү ки, јени јығынҹағымла гајнајыб-гарышым. Онларла хидмәтә чыхым, ҝөрүшләрдә шәрһ верим. Бундан башга, тәблиғ ҝөрүшләринин бизим евимиздә кечирилмәсини тәклиф етдик».

Јени јығынҹағыныздакы баҹы-гардашларла теократик ишләрдә «чијин-чијинә» әмәкдашлыг етсәниз, һәм сизин, һәм дә онларын иманы мөһкәмләнәҹәк. Ағсаггаллар бајаг ады чәкилән Анна-Лиз баҹыны јени јығынҹағында һамы илә тәблиғә чыхмаға тәшвиг етмишди. Баҹы бунун һансы хејрини ҝөрдү? О дејир: «Чох кечмәмиш баша дүшдүм ки, бу, јығынҹаға ујғунлашмағын ән јахшы јолудур». Һәмчинин ибадәт евинин тәмизлијиндә, гуллуғунда вә бу кими диҝәр ишләрдә иштирак етмәјиниз ҝөстәрәҹәк ки, јени јығынҹағыныза өз јығынҹағыныз кими бахырсыныз. Нә гәдәр чох гајнајыб-гарышсаныз, бир о гәдәр тез баҹы-гардашлар сизә исинишәҹәк вә сиз дә онлара өз аиләниз кими бахаҹагсыныз.

4) Јени достлуглар гурун (2 Кор. 6:11—13). Гаршы тәрәфә диггәт ҝөстәрмәк достлашмағын ән јахшы јолудур. Буна ҝөрә  дә јығынҹагдан әввәл вә сонра баҹы-гардашларла сөһбәт етмәк, онларла таныш олмаг үчүн кифајәт гәдәр вахт ајырын. Онларын адыны јадда сахламаг үчүн сәј ҝөстәрин. Адлары јадда сахласаныз, истиганлы олсаныз вә онлар өзләрини сизин јанынызда раһат һисс етсәләр, сизинлә даһа јахындан таныш олмаг истәјәҹәкләр. Сөзсүз ки, бу да ҝөзәл достлуға јол ачаҹаг.

Сизи бәјәнмәләри үчүн өзүнүзү башга ҹүр апармајын. Чалышын баҹы-гардашлар сизи неҹә вар елә танысынлар. Гејри-рәсми шәраитдә буну етмәк даһа асан олур. Лусинданын нүмунәси бу саһәдә сизә көмәк едә биләр. О дејир: «Башгаларынын бизи гонаг дәвәт етмәсини ҝөзләмирдик, өзүмүз онлары дәвәт едирдик. Бунун сајәсиндә баҹы-гардашларла сых достлуғумуз вар».

БИР-БИРИНИЗИ ГӘБУЛ ЕДИН

Бәзиләринә танымадығы баҹы-гардашларын олдуғу ибадәт евинин гапысындан ичәри ҝирмәк чох чәтиндир, онлары һәјәҹан басыр. Бәс сиз онларын өзләрини раһат һисс етмәси үчүн нә едә биләрсиниз? Һәвари Булус белә бир мәсләһәт вермишди: «Мәсиһ сизи гәбул етдији кими, сиз дә бир-биринизи гәбул един» (Ром. 15:7). Ағсаггаллар да Мәсиһдән нүмунә ҝөтүрәрәк јени ҝәләнләри хош гаршылајырлар. (« Көчмәји асанлашдыран амилләр» адлы чәрчивәјә бахын.) Бунунла белә, јығынҹагда һамынын, һәтта ушагларын хош мүнасибәти сајәсиндә јени ҝәләнләр өзләрини евләриндәки кими һисс едә биләрләр.

Бир-биринизи гәбул етмәјә јениләрә гонагпәрвәрлик ҝөстәрмәк дахилдир. Амма бура әмәли көмәк ҝөстәрмәји дә аид етмәк олар. Мәсәлән, бир баҹы дәјәрли вахтыны ајырараг јашадығы әразијә јени көчән баҹыја шәһәри ҝөстәрмишди вә иҹтимаи нәглијјатдан неҹә истифадә етмәји өјрәтмишди. Бу һәрәкәт јени ҝәлән баҹыја чох хош тәсир бағышламышды вә она ора ујғунлашмаға көмәк етмишди.

ИНКИШАФА ЈОЛ АЧАН ФҮРСӘТ

Чәјирткә бөјүдүкҹә бир нечә дәфә дәрисини дәјишир вә јалныз бундан сонра ганадлары учмаға јарарлы олур. Ејнилә сиз дә јени јығынҹаға  кечәндә Јеһоваја хидмәтдә «ганад ачмағыныза» мане олан фикирләри атмалысыныз. Никола вә Селин дејир: «Көчмәк инсана чох шеј өјрәдир. Јени инсанлара вә јени әразијә ујғунлашмаг үчүн бизә өзүмүздә јени хүсусијјәтләр јетишдирмәк лазым ҝәлди». Әввәлдә ады чәкилән Жан-Шарл көчмәјин аиләсинә һансы хејри ҝәтирдији барәдә дејир: «Бу дәјишиклик көмәк етди ки, ушагларымыз јени јығынҹагда даһа чох инкишаф етсинләр. Ҹәми бир нечә ај сонра гызымыз һәфтәичи ҝөрүшләрдә тапшырыгла чыхыш етмәјә башлады, оғлумуз исә вәфтиз олунмамыш тәблиғчи олду».

Бәс әҝәр шәраитиниз башга әразијә көчмәјә имкан вермирсә, мәсәлән, тәләбат олан әразијә көчә билмирсинизсә, онда нә едә биләрсиниз? Бәлкә елә олдуғунуз јердә һәјатынызда јени сәһифә ачасыныз вә бу мәгаләдәки бәзи мәсләһәтләри тәтбиг едәсиниз? Јеһованын ҝүҹүнә архаланараг баҹардығыныз гәдәр јығынҹағынызла гајнајыб-гарышын. Мәсәлән, хидмәтә јазылын, јени достлуглар гурун, ја да гурдуғунуз достлуглары мөһкәмләндирин. Бәлкә, јениләрә вә ја имканы зәиф оланлара һансыса саһәдә көмәк әли узадасыныз? Мәһәббәт әсл мәсиһиләрә хас хүсусијјәт олдуғу үчүн бунлары етсәниз, Јеһова илә мүнасибәтләриниз мөһкәмләнәҹәк (Јәһ. 13:35). Әмин олун, «бу ҹүр гурбанлар Аллаһа хошдур» (Ибр. 13:16).

Нә гәдәр чәтин олса да, мәсиһиләрин чоху јени јығынҹаға ујғунлашыб орада «чичәк ачыблар». Бу сиздә дә алынар! Анна-Лиз баҹы дејир: «Јығынҹағымы дәјишмәк мәнә үрәјими ҝениш ачмаға көмәк едиб». Казуми исә артыг әминдир ки, «инсан көчәндә Јеһованын дәстәјини һеч вахт дујмадығы тәрздә ҝөрүр». Бәс Жуел һансы фикирдәдир? О дејир: «Гурдуғум достлуглар сајәсиндә артыг өзүмү јад һисс етмирәм. Инди јени јығынҹағым мәнә о гәдәр доғмадыр ки, бурадан көчмәк мәнә чәтин олар».