1, 2. Садыг ким иди? (1 Салнамәләр 12:22, 26—28).

 БЕЛӘ бир сәһнәни тәсәввүр един: 340 000-дән чох киши Давуду Исраил үзәриндә падшаһ етмәк үчүн бир араја топлашыб. Үч ҝүндүр Һәбрунун јахынлығындакы дашлы-гајалы тәпәләри ҝүлүш сәдалары бүрүјүр, севинҹлә охунан һәмд нәғмәләри аләмә јајылыр. Сәс-сәсә, сөһбәт-сөһбәтә гарышыб (1 Салн. 12:39). Орада Садыг адлы бир ҝәнҹ дә вар. Сөзсүз ки, бу гәдәр бөјүк издиһамын ичәрисиндә о елә дә нәзәрә чарпмыр. Амма Јеһова ону ҝөрүрдү вә истәјирди ки, Садығын орада олдуғуну биз дә биләк. (1 Салнамәләр 12:22, 26—28 ајәләрини охујун.) Бәс Садыг ким иди?

² Садыг каһин иди. О, баш каһин Әбјатарла бирҝә хидмәт едирди. Садыг һәм дә «ҝөрүҹү» иди: онда гејри-ади бир һикмәт вар иди вә Аллаһын ирадәсини дәрк едә билирди (2 Ишм. 15:27). Инсанлар мәсләһәтә еһтијаҹ дујанда Садығын јанына ҝәлирдиләр. Бүтүн бунларла јанашы, Садыг ҹәсарәтли инсан иди. Мәгаләдә мәһз Садығын ҹәсарәтиндән данышаҹағыг.

3. а) Нәјә ҝөрә Јеһованын хидмәтчиләри ҹәсур олмалыдыр? б) Бу мәгаләдә нәдән данышаҹағыг?

³ Јашадығымыз бу ахырзаманда Шејтан Аллаһын халгына һүҹумларыны артырдыгҹа артырыр (1 Бут. 5:8). Јеһованын Шејтана вә онун шәр дүнјасына сон гојаҹағы вахты ҝөзләдијимиз мүддәтдә биз ҹәсарәтли олмалыјыг (Зәб. 31:24). Ҝәлин ҝөрәк һансы үч саһәдә Садығын ҹәсарәтиндән өрнәк ала биләрик.

АЛЛАҺЫН ПАДШАҺЛЫҒЫНЫ ДӘСТӘКЛӘЈИН

4. Нәјә ҝөрә Аллаһын халгы Онун Падшаһлығыны дәстәкләмәк үчүн ҹәсарәтли олмалыдыр? (Һәмчинин шәклә бахын.)

⁴ Јеһованын халгы Онун Падшаһлығыны ҹан-дилдән дәстәкләјир (Мәт. 6:33). Амма ҹәсарәт олмадан буну етмәк чәтиндир. Чүнки бу шәр дүнјада Јеһованын гајда-ганунларына ујғун јашамаг вә Падшаһлыг һагда хош мүждәни тәблиғ етмәк үчүн ҝәрәк ҹәсур олаг (1 Салон. 2:2). Һәмчинин  ҝетдикҹә парчаланан дүнјада сијаси битәрәфлијимизи горумаг үчүн дә бизә ҹәсарәт лазым олур (Јәһ. 18:36). Бундан башга, диндашларымыздан чоху мадди проблемләрлә үзләшир, јахуд сијаси вә һәрби фәалијјәтләрдә иштирак етмәдикләри үчүн дөјүлүрләр, һәбс олунурлар.

5. Нәјә ҝөрә Садыг Давуду дәстәкләмәк үчүн ҹәсарәтли олмалы иди?

⁵ Садыг Һәбруна Давудун падшаһ олмасыны гејд етмәк үчүн ҝәлсә дә, силаһланмыш шәкилдә, дөјүшә һазыр ҝетмишди (1 Салн. 12:38). О, лазым ҝәләрдисә, Давудла бирҝә дөјүшә ҝетмәјә, Исраили дүшмәнләрдән мүдафиә етмәјә һазыр иди. Онун әсҝәр кими дөјүш тәҹрүбәси аз олса да, ҹәсарәти чох иди.

6. Давуд Садыг үчүн һансы саһәдә нүмунә иди? (Зәбур 138:3).

⁶ Бәс каһин олан Садыгда бу ҹүр ҹәсарәт һарадан иди? Онун әһатәсиндә ҝүҹлү, ҹәсур инсанлар вар иди. Шүбһәсиз, Садыг бу кишиләрдән чох шеј өјрәнмишди. Онлардан бири елә Давуд иди. Давуд ҹәсарәтли башчы вә иҝид дөјүшчү иди. Буна ҝөрә дә бүтүн Исраил халгы ону падшаһ етмәк истәјирди (1 Салн. 11:1, 2). Давуд һәмишә дүшмәнләри илә дөјүшәндә Јеһоваја архаланырды, Ондан көмәк истәјирди (Зәб. 28:7; Зәбур 138:3 ајәсини охујун). Садығын јанында она нүмунә олаҹаг башга кишиләр дә вар иди. Мәсәлән, Јәһјадај, онун дөјүшчү оғлу Бәнаји вә Давудун тәрәфиндә олан диҝәр 22 гәбилә башчысы (1 Салн. 11:22—25; 12:26—28). Бу кишиләрин һамысы Давуду падшаһ етмәк вә ону мүдафиә етмәк үчүн гәти аддым атмышдылар.

7. а) Бу ҝүн кимләр бизим үчүн ҹәсарәт нүмунәсидир? б) Видеода Нсилу гардашдан нә өјрәнирик?

⁷ Јеһованын Падшаһлығыны ҹәсарәтлә дәстәкләјән инсанларын нүмунәси ҝүҹүмүзә ҝүҹ гатыр, бизи дә ҹәсарәтли едир.  Падшаһымыз Иса Мәсиһ јер үзүндә оларкән Шејтан дүнјасынын сијаси системинин бир парчасы олмағы гәтијјәтлә рәдд етмишди (Мәт. 4:8—11; Јәһ. 6:14, 15). Иса һәмишә Јеһовадан ҹәсарәт диләјирди. Мүасир дөврдә дә ҝәнҹ гардашларымызын ҹәсарәт нүмунәсини сајмагла битмәз. Онлар әгидәләринә ҝөрә һәрби хидмәтә ҝетмәкдән вә сијаси ишләрдә иштирак етмәкдән гәти шәкилдә имтина едирләр. jw.org сајтындан бу диндашларымыздан бәзиләринин һәјатлары барәдә охумағынызы төвсијә едәрик a.

ДИНДАШЛАРЫНЫЗА ЈАРДЫМ ӘЛИ УЗАДЫН

8. Диндашларына әмәлдә көмәк етмәк үчүн ағсаггаллара нә заман ҹәсарәт лазым олур?

⁸ Јеһованын халгына диндашларына јардым етмәк хошдур (2 Кор. 8:4). Амма бәзән бунун үчүн инсандан ҹәсарәт тәләб олунур. Мәсәлән, мүһарибә ҝедән әразиләрдә јашајан ағсаггаллар баша дүшүрләр ки, баҹы-гардашлар руһланмаға, дәстәјә, руһани гидаја вә физики тәләбатларынын тәмин олунмасына еһтијаҹ дујурлар. Ағсаггаллар Јеһованын гузуларыны чох истәјирләр вә онларын лазыми тәләбатларыны өдәмәк үчүн һәјатларыны тәһлүкәјә атырлар (Јәһ. 15:12, 13). Бунунла онлар Садығын гојдуғу ҹәсарәт нүмунәсини изләјирләр.

9. 2 Ишмуил 15:27—29 ајәләринә әсасән Давуд Садыға һансы иши тапшырды? (Һәмчинин шәклә бахын.)

⁹ Давудун һәјаты тәһлүкә алтында иди. Оғлу Абсалам атасыны гәтлә јетириб тахт-таҹы әлә кечирмәк нијјәтинә дүшмүшдү (2 Ишм. 15:12, 13). Давуд вахт итирмәдән Јерусәлимдән гачмалы иди. О, бүтүн әјан-әшрәфинә әмр едиб деди: «Дурун гачаг, јохса һеч биримиз Абсаламын әлиндән сағ чыхмајаҹағыг!» (2 Ишм. 15:14). Адамлары Јерусәлими тәрк едәндә Давуд баша дүшдү ки, кимсә орада галыб ону Абсаламын планларындан мүнтәзәм олараг  хәбәрдар етмәлидир. Буна ҝөрә дә о, Садыға вә диҝәр каһинләрә шәһәрә гајыдыб кәшфијјатчы кими она хидмәт етмәји тапшырды. (2 Ишмуил 15:27—29 ајәләрини охујун.) Онлар чох еһтијатла давранмалы идиләр. Бу чох тәһлүкәли тапшырыг иди, һәтта онларын һәјаты баһасына баша ҝәлә биләрди. Чүнки Абсалам егоист, интигам һисси илә алышыб-јанан, хәјанәткар бир инсан иди. Әҝәр о, Садығын вә диҝәр каһинләрин кәшфијјатчылыг етдијини өјрәнсә иди, онларын башына ојун ачарды!

10. Садыг вә јолдашлары Давуду неҹә горумушдулар?

¹⁰ Давуд бир план гурур. О, Садыгдан вә диҝәр садиг досту Хушајдан һәмин планы һәјата кечирмәк үчүн көмәк истәјир (2 Ишм. 15:32—37). Плана әсасән Хушај Абсаламын етибарыны газанмалы вә она Давуда һүҹум етмәклә бағлы мәсләһәт вермәли иди. Бу план сајәсиндә Давуд һүҹума һазырлашмаг үчүн вахт газанаҹагды. План баш тутур. Абсалам Хушајын мәсләһәтини бәјәнир. Сонра Хушај бу барәдә Садыгла Әбјатара мәлумат верир (2 Ишм. 17:8—16). Онлар да бу хәбәри Давуд падшаһа чатдырырлар (2 Ишм. 17:17). Јеһованын көмәји илә Садыг вә онун каһин јолдашлары Давудун һәјатыны горумагда әвәзсиз рол ојнадылар (2 Ишм. 17:21, 22).

11. Диндашларымыза көмәк едәркән Садыг кими неҹә ҹәсарәтли ола биләрик?

¹¹ Әҝәр тәһлүкәли вахтларда биздән баҹы-гардашларымыза көмәк етмәји хаһиш едәрләрсә, Садыг кими неҹә ҹәсарәтли ола биләрик? 1) Ҝөстәришләрә әмәл един. Тәһлүкәли вәзијјәтләр заманы итаәткар олмаг хүсусилә ваҹибдир, чүнки бунунла арамыздакы бирлији горујуруг. Одур ки, филиалыныздан ҝәлән ҝөстәришләрә табе олун (Ибр. 13:17). Ағсаггаллар әразиләриндә фәлакәтә һазырлыгла бағлы ҝөрүлән тәдбирләри, һәмчинин фәлакәт баш верәндә неҹә давранмагла бағлы тәшкилатдан ҝәлән ҝөстәришләри  мүнтәзәм нәзәрдән кечирмәлидирләр (1 Кор. 14:33, 40). 2) Ҹәсарәтли, амма еһтијатлы олун (Мәс. 22:3). Аддым атмамышдан габаг јахшы-јахшы фикирләшин. Өзүнүзү јерсиз рискә атмајын. 3) Јеһоваја ҝүвәнин. О һәм сизин, һәм дә диндашларынызын сағ-саламат олмасыны истәјир. Јеһова онлара тәһлүкәсиз шәкилдә көмәк етмәјинизә јардым едәҹәк.

12, 13. Викторун вә Виталијин һадисәсиндән нә өјрәнирсиниз? (Һәмчинин шәклә бахын.)

¹² Ҝәлин Виктор вә Виталиј адлы ики диндашымызын һадисәсинә бахаг. Онлар Украјнада баҹы-гардашлара әрзаг вә су чатдырырдылар. Виктор дејир: «Биз һәр јердә әрзаг ахтарырдыг. Тез-тез јахынлығымызда ҝүллә сәсләри ешидирдик. Бир гардаш анбарда сахладығы әрзаглары ианә еләди. Бу јардым сајәсиндә чох тәблиғчинин бир нечә ҝүнлүк јемәји олду. Әрзаглары јүк машынына јүкләјән заман биздән һарадаса 20 метр аралыја ракет дүшдү, чох шүкүр, партламады. Јеһоваја һәмин ҝүн дурмадан јалварырдым ки, бундан сонра да тәблиғчиләрә көмәк етмәк үчүн мәнә ҹәсарәт версин».

¹³ Виталиј дејир: «Белә вәзијјәтдә ҝәрәк үрәкли оласан. Илк дәфә јардым чатдыранда машынла 12 саат јол ҝетмишдим. Јол боју Јеһоваја дуа еләјирдим». Виталиј ҹәсарәтли олса да, еһтијатла давранырды. О, сөзүнә әлавә едир: «Мән дурмадан дуа едиб Јеһовадан һикмәт вә тәвазөкарлыг диләјирдим. Машыны анҹаг һөкумәтин иҹазә вердији јолларла сүрүрдүм. Баҹы-гардашларын әл-әлә вериб неҹә чалышдығыны ҝөрәндә иманым мөһкәмләнди. Онлар јолу манеәләрдән тәмизләјир, һуманитар јардымын јығылмасына вә јүкләнмәсинә көмәк едирдиләр. Һәмчинин Викторла мәним јолда јемәк јемәјимиз үчүн тәдарүк ҝөрүрдүләр, динҹәлмәјимиз үчүн јерләр тәшкил едирдиләр».

ЈЕҺОВАЈА САДИГ ГАЛЫН

14. Севдијимиз инсан Јеһованы тәрк едәндә бу бизә неҹә тәсир едә биләр?

¹⁴ Инсанын аилә үзвүнүн вә ја јахын достунун Јеһованы тәрк етмәси бөјүк дәрддир. Тәк-түк сынаг тапылар ки, инсанын ичини бу гәдәр ҝөјнәтсин (Зәб. 78:40; Мәс. 24:10). Әҝәр о инсана јахын олмушугса, вәзијјәти гәбул етмәк даһа да чәтин олур. Ола билсин, сиз дә белә бир вәзијјәтлә үзләшмисиниз. Онда Садығын сәдагәт нүмунәси сизи мөһкәмләндирә биләр.

15. Нәјә ҝөрә Садыға Јеһоваја садиг галмаг үчүн ҹәсарәт лазым иди? (1 Падшаһлар 1:5—8).

¹⁵ Садығын јахын досту Әбјатар хаин чыхмышды, буна рәғмән, Садыг Јеһоваја сәдагәтини горумушду. Бу һадисә Давуд падшаһын һакимијјәтинин сонунда баш вермишди. Давуд өлүм ајағында оланда оғлу Әдунијјә тахт-таҹы әлә кечирмәк истәјирди. Һалбуки Јеһова варис кими Сүлејманы сечмишди (1 Салн. 22:9, 10). Әбјатар бу ишдә Әдунијјәнин тәрәфини тутду. (1 Падшаһлар 1:5—8 ајәләрини охујун.) Әслиндә, Әбјатарын бу һәрәкәти тәкҹә Давуда јох, Јеһоваја гаршы да хәјанәт иди! Садығын һәмин вахт һансы һиссләр кечирдијини тәсәввүр етмәк чәтин дејил. О, 40 илдән чох Әбјатарла каһин кими хидмәт етмишди (2 Ишм. 8:17). Онлар «Аллаһын сандығы» илә бағлы ишләрә ҹавабдеһ идиләр (2 Ишм. 15:29). Башланғыҹда икиси дә Давудун падшаһ олмасыны дәстәкләјирдиләр вә бирликдә чох ишләр ҝөрмүшдүләр (2 Ишм. 19:11—14).

16. Садыға садиг галмаға нә көмәк етмиш ола биләрди?

¹⁶ Әбјатарын хәјанәти Садығын сәдагәтини сарсытмады. Давуд билирди ки, Садыға һәмишә ҝүвәнмәк олар. Буна ҝөрә дә Әдунијјәнин ишинин үстү ачыланда Давуд  Садыға, Натана вә Бәнајијә Сүлејманы падшаһ кими мәсһ етмәји тапшырды (1 Пад. 1:32—34). Сөзсүз ки, Натан кими мөмин инсанларын арасында олмаг Садығы чох руһландырмышды. Онлар һәм Јеһоваја садиг идиләр, һәм дә Давуду дәстәкләјирдиләр (1 Пад. 1:38, 39). Сүлејман тахта чыханда Садығы Әбјатарын јеринә баш каһин тәјин етди (1 Пад. 2:35).

17. Сизә јахын адам Јеһоваја сәдагәтсизлик едәндә Садығын нүмунәсини неҹә изләјә биләрсиниз?

¹⁷ Садығын нүмунәсини неҹә изләјә биләрсиниз? Сизә јахын олан бири һәгигәти тәрк едәндә Јеһоваја сәдагәтинизи ачыг шәкилдә ҝөстәрин (Јуш. 24:15). Дүзҝүн давранмағыныз үчүн Јеһова сизә ҝүҹ вә ҹәсарәт верәҹәк. Она дуа един вә Она садиг олан инсанларла достлуғунузу горујун. Јеһова ҝөстәрдијиниз сәдагәти гијмәтләндирир вә бунун әвәзини мүтләг верәҹәк (2 Ишм. 22:26).

18. Марко илә Сидсенин јашадыгларындан нә өјрәнирсиниз?

¹⁸ Ҝәлин Марко гардашла јолдашы Сидсенин һадисәсинә бахаг. Онларын һәр ики гызы Јеһоваја хидмәти дајандырыб. Марко гардаш бөлүшүр: «Инсан өвлад саһиби оланда ону ҹаны кими севир. Ону хата-баладан горумаг үчүн һәр шеји еләмәјә һазыр олур. Буна ҝөрә дә гызларымын Јеһованы тәрк етмәси үрәјимә дағ чәкди. Амма Јеһова бизи көмәксиз гојмады. Онун сајәсиндә мән зәиф оланда јолдашым ҝүҹлү олур, јолдашым зәиф оланда исә мән ҝүҹлү олурам». Сидсе дејир: «Јеһова дајаг олмасајды, чәтин ки бу дәрдә дөзә биләрдик. Баш верәнләрә ҝөрә мән өзүмү ҝүнаһландырырдым. Она ҝөрә дә өз һиссләрими Јеһова илә бөлүшдүм. Бир нечә ҝүн кечәндән сонра узун илләрдир ҝөрмәдијим бир баҹы ибадәт евиндә мәнә јахынлашды. О, әлини чијнимә гојду вә ҝөзүмүн ичинә бахыб деди: “Унутма, Сидсе. Бу сәнин сәһвин дејил”. Јеһованын көмәји илә хидмәтдә севинҹими горуја билдим».

19. Нәјә гәти гәрарлысыныз?

¹⁹ Јеһова бүтүн хидмәтчиләринин Садыг кими ҹәсур олмасыны истәјир (2 Тим. 1:7). Амма биз өз ҝүҹүмүзә јох, Онун ҝүҹүнә архаланыб ҹәсарәт ҝөстәрмәлијик. Јеһова бу һалда биздән разы галаҹаг. Буна ҝөрә дә ҹәсарәтә еһтијаҹ дујдуғунуз вәзијјәтлә үзләшәндә Она үз тутун. Онда Садыг кими сиз дә ҹәсарәтли олаҹагсыныз! (1 Бут. 5:10).