1. Һәгигәт барәдә нә дүшүнүрсүнүз?

 ЈЕҺОВАНЫН халгы Онун Кәламындан өјрәндији һәгигәтләри севир. Биз иманымызы бу һәгигәтләр үзәриндә гурмушуг (Ром. 10:17). Јеһованын тәсис етдији мәсиһи јығынҹағынын «һәгигәтин сүтуну вә дајағы» олдуғуна әмин олмушуг (1 Тим. 3:15). Бундан башга, бизә рәһбәрлик едәнләрә мәмнунијјәтлә табе олуруг, чүнки онлар Мүгәддәс Китабдакы һәгигәтләри бизә изаһ едир вә Јеһованын ирадәсинә ујғун олан ҝөстәришләр верирләр (Ибр. 13:17).

2. Јагуб 5:19 ајәсинә әсасән һәгигәти өјрәнәндән сонра һансы тәһлүкә илә үзләшә биләрик?

² Бахмајараг ки, биз һәгигәти гәбул етмишик, Јеһованын тәшкилатына вә вердији ҝөстәришләрә етибар едирик, јенә дә јолумузу аза биләрик. (Јагуб 5:19 ајәсини охујун.) Шејтанын ән бөјүк мәгсәди үрәјимиздә Мүгәддәс Китаба вә тәшкилатдан ҝәлән ҝөстәришләрә етибарымызы сарсытмагдыр (Ефес. 4:14).

3. Нәјә ҝөрә һәгигәтдән бәрк јапышмалыјыг? (Ефеслиләрә 6:13, 14).

³ Ефеслиләрә 6:13, 14 ајәләрини охујун. Шејтан тезликлә ҝүҹлү тәблиғаты васитәсилә бүтүн халглары алдадараг Аллаһа гаршы галдыраҹаг (Вәһј 16:13, 14). Һәмчинин о, Јеһованын халгыны алдатмаг үчүн әввәлкиндән даһа чох ҹәһд ҝөстәрәҹәк (Вәһј 12:9). Буна ҝөрә дә биз һәгигәтлә јалан арасындакы фәрги ајырд етмәји өјрәнмәлијик вә һәгигәтә ујғун јашамалыјыг (Ром. 6:17; 1 Бут. 1:22). Бөјүк мүсибәт заманы бизим хиласымыз бундан асылы олаҹаг!

4. Бу мәгаләдә нәләри мүзакирә едәҹәјик?

 ⁴ Бу мәгаләдә ики хүсусијјәтә нәзәр салаҹағыг. Бу хүсусијјәтләр бизә Аллаһын Кәламындакы һәгигәтләри ајырд етмәјә вә Јеһованын тәшкилатындан ҝәлән ҝөстәришләрә итаәт етмәјә көмәк едәҹәк. Һәмчинин үч мәсләһәт сајәсиндә һәгигәтдән һәмишә бәрк јапышмағын јолларыны өјрәнәҹәјик.

ҺӘГИГӘТИ АЈЫРД ЕТМӘЈӘ КӨМӘК ЕДӘН ХҮСУСИЈЈӘТЛӘР

5. Аллаһ горхусу һәгигәти ајырд етмәјә неҹә көмәк едир?

⁵ Аллаһ горхусу. Аллаһ гаршысында сағлам горхусу олан инсан Ону о гәдәр чох севир ки, һансыса һәрәкәти илә һеч вахт Ону кәдәрләндирмәк истәмәз. Биз нәјин сәһв, нәјин доғру олдуғуну, нәјин һәгигәт, нәјин јалан олдуғуну өјрәнмәк үчүн әлимиздән ҝәләни едирик. Чүнки Јеһованын разылығыны газанмаг истәјирик (Мәс. 2:3—6; Ибр. 5:14). Һеч вахт јол вермәмәлијик ки, инсан горхусу Јеһоваја севҝимизин өнүнә кечсин. Белә етсәк, инсанлары разы салмаға чалышаҹағыг. Инсанлары разы салан шејләр исә чох вахт Јеһованын наразылығына сәбәб олур.

6. Он кәшфијјатчы инсан горхусу уҹбатындан һәгигәти неҹә тәһриф етди?

⁶ Әҝәр биз Аллаһдан чох инсанлардан горхсаг, һәгигәт јолундан сапарыг. Ҝәлин 12 кәшфијјатчынын нүмунәси үзәриндә дүшүнәк. Онлар Јеһованын исраиллиләрә вермәји вәд етдији торпаға ҹасуслуг етмәјә ҝетмишдиләр. Он кәшфијјатчынын кәнаниләрдән горхусу Јеһоваја мәһәббәтләрини үстәләјирди. Онлар исраиллиләрә дедиләр: «Биз онлара бата билмәрик, онлар биздән ҝүҹлүдүрләр» (Сај. 13:27—31). Инсан ҝөзү илә баханда бу, доғрудан да белә иди. Амма онлар дүшмәнә галиб ҝәлә билмәјәҹәкләрини демәклә Јеһованы  унутдугларыны ҝөстәрмишдиләр. Бу он кәшфијјатчы диггәтини Јеһованын исраиллиләрдән нә истәдијинә ҹәмләмәли иди. Онлар һәм дә Јеһованын бир мүддәт бундан әввәл нәләр етдији барәдә дүшүнмәли иди. Онда баша дүшәрдиләр ки, кәнаниләрин ҝүҹү бөјүк гүдрәт саһиби Јеһованын гаршысында һеч нәдир. Бу имансыз кәшфијјатчылардан фәргли олараг Јушә вә Калиб Јеһованы разы салмаг истәјирди. Белә ки, онлар халга дедиләр: «Әҝәр Јеһова биздән разыдырса, онда бизи мүтләг сүд-бал ахан о дијара апарыб ораны бизә верәҹәк» (Сај. 14:6—9).

7. Биздә Аллаһ горхусунун ҝүҹлү олмасы үчүн нә едә биләрик? (Һәмчинин шәклә бахын.)

⁷ Биздә Аллаһ горхусунун ҝүҹлү олмасы үчүн һансыса гәрары вермәздән әввәл Јеһованын бундан разы галыб-галмајаҹағыны фикирләшмәлијик (Зәб. 16:8). Мүгәддәс Китабдан һансыса һадисәни охујанда бу суал үзәриндә дүшүнүн: «Әҝәр һәмин вәзијјәтдә мән олсајдым, һансы гәрары верәрдим?» Мәсәлән, тәсәввүр един, он кәшфијјатчынын ҝәтирдији бәд хәбәри сиз дә ешидирсиниз. Онларын дедикләринә инаныб инсан горхусуна гапылардыныз, јохса Јеһоваја севҝиниз вә Ону разы салмаг истәји галиб ҝәләрди? Исраиллиләр Јушә илә Калибин дедикләринин һәгигәт олдуғуна инанмады. Бунун да нәтиҹәсиндә онлар Вәд едилмиш дијара дахил олмаг имканыны итирдиләр (Сај. 14:10, 22, 23).

8. Өзүмүздә һансы хүсусијјәти јетишдирмәјә чалышмалыјыг вә нәјә ҝөрә?

⁸ Тәвазөкарлыг. Јеһова һәгигәти тәвазөкар инсанлара ачыр (Мәт. 11:25). Биз һәгигәти өјрәнмәк үчүн ҝөстәрилән көмәји тәвазөкарлыгла гәбул етмишик (Һәв. 8:30, 31). Амма гүрурланмамаг үчүн еһтијатлы олмалыјыг. Гүрурлу олсаг, елә дүшүнәрик ки, бизим фикирләримиз Мүгәддәс Китаб принсипләри вә Јеһованын тәшкилатындан ҝәлән ҝөстәришләр гәдәр дүзҝүндүр.

9. Тәвазөкарлығымызы неҹә горуја биләрик?

⁹ Тәвазөкар галмаг үчүн Јеһова илә мүгајисәдә нә гәдәр кичик олдуғумузу јадымызда сахламалыјыг (Зәб. 8:3, 4). Һәмчинин дуа едә биләрик ки, Јеһова бизә даһа тәвазөкар вә өјрәнмәјә һазыр олмаға көмәк етсин. Јеһова Кәламы вә тәшкилаты васитәсилә бизә Онун фикирләрини өз фикирләримиздән үстүн тутмаға көмәк едәҹәк. Мүгәддәс Китабы мүталиә едәндә Јеһованын тәвазөкарлығы севдији, гүрура, тәкәббүрә, мәғрурлуға нифрәт етдијини ҝөстәрән фикирләрә диггәт јетирин. Әсас да һансыса мәсулијјәти аланда вә башгалары буна ҝөрә сизә хүсуси јанашанда тәвазөкар галмаға даһа чох ҹәһд ҝөстәрин.

ҺӘГИГӘТДӘН БӘРК ЈАПЫШМАҒЫН ЈОЛЛАРЫ

10. Јеһова халгына ҝөстәришләри кимләр васитәсилә вериб?

¹⁰ Јеһованын тәшкилатындан ҝәлән ҝөстәришләрә етибар един. Гәдим дөврдә Јеһова әввәлҹә Муса пејғәмбәр, сонра исә Јушә васитәсилә Исраил халгына Өз әмрләрини чатдырырды (Јуш. 1:16, 17). Исраиллиләр бу инсанларын Јеһованын тәмсилчиси олдуғуну гәбул едәндә ишләри јахшы ҝедирди. Әсрләр сонра мәсиһи јығынҹағы јарананда ҝөстәришләри 12 һәвари верирди (Һәв. 8:14, 15). Сонралар онларын сырасына Јерусәлимдәки ағсаггаллар да гошулду. Јығынҹаглар бу иманлы инсанларын дедикләринә әмәл едәндә «иманда мөһкәмләнир вә ҝүнү-ҝүндән бөјүјүрдү» (Һәв. 16:4, 5). Ејни шеји бизим дөврүмүз һагда да демәк  олар. Биз дә Јеһованын тәшкилатындан ҝәлән ҝөстәришләрә әмәл едәндә бунун хејрини ҝөрүрүк. Бәс Јеһованын тәјин етдији бу шәхсләри гәбул етмәсәк, О буна неҹә јанашар? Бу суала ҹаваб тапмаг үчүн ҝәлин ҝөрәк исраиллиләр Вәд едилмиш дијара ҝедәндә нә баш вермишди.

11. Јеһованын башчы тәјин етдији Муса пејғәмбәрә һөрмәтсизлик едәнләрин ахыры нә олду? (Һәмчинин шәклә бахын.)

¹¹ Исраиллиләр Вәд едилмиш дијара ҝетдији вахт халгын арасында нүфузлу кишиләр Мусаја гаршы чыхдылар вә онун Јеһова тәрәфиндән тәјин олундуғуну суал алтына гојдулар. Онлар белә дејирдиләр: «[Тәкҹә Муса јох] һамы мүгәддәсдир, бүтүн иҹма. Јеһова онларын да арасындадыр» (Сај. 16:1—3). Дүздүр, Јеһованын ҝөзүндә «бүтүн иҹма» мүгәддәс иди, амма О, халгына башчылыг етмәк үчүн Муса пејғәмбәри сечмишди (Сај. 16:28). Онлар Мусаны писләмәклә, әслиндә, Јеһованы писләмиш олурдулар. Бу инсанлара Аллаһын нә истәдији мараглы дејилди, фикирләри-зикирләри даһа чох сәлаһијјәт, даһа чох шөһрәт газанмаг иди. Јеһова һәм бу үсјана башчылыг едәнләри, һәм дә онлара гошулан минләрлә инсаны мәһв етди (Сај. 16:30—35, 41, 49). Әминликлә дејә биләрик ки, Јеһова бу ҝүн дә тәшкилатындан ҝәлән ҝөстәришләрә һөрмәтсизлик едәнләрә гаршыдыр.

12. Нәјә ҝөрә Јеһованын тәшкилатына етибар етмәк олар?

¹² Јеһованын тәшкилатына етибарымызы горуја биләрик. Һансыса һәгигәтә вә ја хидмәтимизлә бағлы һансыса саһәјә дәјишиклик етмәк лазым ҝәләндә Рәһбәрлик Шурасы буну тәрәддүдсүз едир (Мәс. 4:18). Чүнки онлар үчүн һәр шејдән ваҹиб Јеһованы разы салмагдыр. Бундан әлавә, онлар вар ҝүҹләри илә чалышырлар ки, вердикләри бүтүн гәрарлар Мүгәддәс Китаба әсаслансын. Чүнки Мүгәддәс Китаб Јеһованын  бүтүн хидмәтчиләри үчүн нүмунәдир, еталондур.

13. «Сағлам сөзләр нүмунәси» нәдир вә биз нә етмәлијик?

¹³ «Сағлам сөзләр нүмунәсиндән ајрылма»јын (2 Тим. 1:13). «Сағлам сөзләр нүмунәси» дејиләндә Исанын өјрәтдији тәлимләр, еләҹә дә Мүгәддәс Китабдакы бүтүн тәлимләр нәзәрдә тутулур (Јәһ. 17:17). Етигадымызын тәмәлиндә мәһз бу тәлимләр дурур. Јеһованын тәшкилаты өјрәдир ки, инандығымыз һәр бир шеј сағлам сөзләр нүмунәсинә әсаслансын. Белә етсәк, руһани ҹәһәтдән һифз олунарыг.

14. Бәзи мәсиһиләрин «сағлам сөзләр нүмунәсиндән» узаглашмасына нә сәбәб ола биләрди?

¹⁴ «Сағлам сөзләр нүмунәсиндән» узаглашсаг, нә баш верәр? Бир нүмунәјә бахаг. Биринҹи әсрдә бәзи мәсиһиләр арасында шајиә ҝәзирди ки, ҝуја Јеһованын ҝүнү ҝәлиб чатыб. Ола билсин, белә фикир сөјләмәләринә сәбәб Булусун јаздығы һесаб едилән мәктуб иди. Салоники јығынҹағындакы бәзи мәсиһиләр фактлары арашдырмамыш бу јалана инанмышдылар, һәтта ону башгаларына да јајырдылар. Булусун онларын јанында оларкән өјрәтдикләрини јадда сахласајдылар, бу јалана алданмаздылар (2 Салон. 2:1—5). Булус онлара ешитдикләри һәр шејә инанмамағы мәсләһәт ҝөрдү. Ҝәләҹәкдә белә бир шејин тәкрарланмамасы үчүн о, салоникилиләрә јаздығы икинҹи мәктубуну бу сөзләрлә јекунлашдырды: «Мән Булус саламымы өз әлимлә јазырам. Бу, бүтүн мәктубларымда бир нишанәдир. Бу, мәним хәттимдир» (2 Салон. 3:17).

15. Һәгигәт кими ҝөрүнән јаланлардан өзүмүзү неҹә горуја биләрик? Нүмунә чәкин. (Һәмчинин шәкилләрә бахын.)

¹⁵ Булусун салоникилиләрә јаздығы мәктубдан һансы нәтиҹәни чыхарырыг? Ола билсин, Мүгәддәс Китабдан өјрәндикләримизлә узлашмајан һансыса фикри ешидәк, ја да сенсасијалы бир хәбәр гулағымыза чатсын. Бу заман ағылла давранмаг лазымдыр. Кечмиш Совет Иттифагында дүшмәнләримиз гардашларымыза ҝуја баш идарәдән олан мәктуб вермишдиләр. Мәктуб бәзи  гардашлары тәшкилатдан ајрылыб мүстәгил гурум кими фәалијјәт ҝөстәрмәјә сөвг етди. Мәктуб өз-өзлүјүндә сахтаја охшамырды. Амма садиг гардашлар мәктубда јазыланлара алданмадылар. Онлар баша дүшүрдүләр ки, орадакы фикирләр индијә кими өјрәндикләри илә үст-үстә дүшмүр. Бу ҝүн дә һәгигәтин дүшмәнләри мүасир технолоҝијадан истифадә едәрәк бизи чашгынлыға салмаға вә арамызда парчаланма јаратмаға чалышырлар. Биз бу кими шејләрин ағлымызы асанлыгла чашдырмасына јол вермирик. Охудуғумуз вә ја ешитдијимиз мәлуматын бу ҝүнә кими өјрәндијимиз һәгигәтләрлә үст-үстә дүшүб-дүшмәдијини ҝөтүр-гој едирик (2 Салон. 2:2; 1 Јәһ. 4:1).

16. Ромалылара 16:17, 18 ајәләринә әсасән һәгигәтдән сапан инсанлара гаршы һансы мөвгеји тутмалыјыг?

¹⁶ Јеһоваја садиг инсанларла араныздакы бирлији горујун. Јеһова истәјир ки, биз диндашларымызла бирлик ичиндә Она ибадәт едәк. Нә гәдәр ки һәгигәтә бағлыјыг, бу бирлији горујаҹағыг. Һәгигәтә зидд фикирләр јајан инсанлар исә јығынҹагда парчаланма јарадыр. Она ҝөрә дә Јеһова бизә онлардан узаг ҝәзмәји бујурур. Әкс һалда, биз өзүмүз һәгигәтдән узаглашарыг. (Ромалылара 16:17, 18 ајәләрини охујун.)

17. Һәгигәти ајырд етмәјин вә она бағлы галмағын һансы хејрини ҝөрүрүк?

¹⁷ Биз һәгигәти ајырд етсәк вә она бағлы галсаг, Јеһова илә мүнасибәтләримизи горујаҹағыг вә иманымыз ҝүҹлү олаҹаг (Ефес. 4:15, 16). Шејтанын сахта тәлимләри вә тәблиғаты бизи аздырмајаҹаг. Бөјүк мүсибәт заманы исә Јеһованын ганадлары алтында тәһлүкәсизликдә олаҹағыг. Одур ки, доғру олан шејләрдән бәрк-бәрк јапышын, «онда сүлһ Аллаһы сизинлә олаҹаг» (Филип. 4:8, 9).