1. Мәһәббәтли Атамыз Јеһоваја неҹә бәнзәјә биләрик?

ЈЕҺОВА АЛЛАҺ бизә дәрин мәһәббәт бәсләјир (Јәһ. 3:16). Биз дә мәһәббәтли Атамыза бәнзәмәк истәјирик. Одур ки, һәр кәсин, «әләлхүсус, иман гардашларымыз»ын «дәрдинә шәрик, гардашсевән, шәфгәтли вә тәвазөкар» олмаға чалышырыг (1 Бут. 3:8; Гал. 6:10). Руһани аиләмизин үзвләри стрессли анлар јашајанда онлара көмәк етмәк истәјирик.

2. Бу мәгаләдә нәји арашдыраҹағыг?

² Јеһова Аллаһын аиләсинин үзвү олмаг истәјән һәр бир кәс стрессли вәзијјәтләрлә үзләшәҹәк (Марк 10:29, 30). Бу дүнјанын сону јахынлашдыгҹа, чох ҝүман ки, чәтинликләримиз даһа да артаҹаг. Бәс бир-биримизә неҹә дајаг ола биләрик? Ҝәлин ҝөрәк Мүгәддәс Китабда ады чәкилән Лут, Әјјуб вә Наимәнин һадисәсиндән нә өјрәнирик. Һәмчинин бу ҝүн диндашларымызын үзләшдији бәзи чәтинликләрдән вә онлара көмәк етмәјин јолларындан данышаҹағыг.

3. 2 Бутрус 2:7, 8 ајәләринә әсасән, Лут һансы јанлыш гәрары верди вә бу, нә илә нәтиҹәләнди?

³ Лут позғун сакинләри олан Сәдум шәһәриндә јашамағы сечмәклә јанлыш гәрар верди. (2 Бутрус 2:7, 8 ајәләрини охујун.) Сәдумун торпағы бәрәкәтли олса да, ора көчмәк Лута баһа баша ҝәлди (Јар. 13:8—13; 14:12). Ҝөрүнүр, бу шәһәр, јахуд онун бәзи сакинләри Лутун арвадынын о гәдәр хошуна ҝәлирди ки, буна ҝөрә Јеһоваја итаәтсизлик етди. Јеһова Сәдума атәш вә күкүрд јағдыранда  Лутун арвады һәјатыны итирди. Лутун ики гызыны бир дүшүнүн. Онларын нишанлылары Сәдумда өләнләрин арасында иди. Лут евини, мал-мүлкүнү, ән дәһшәтлиси исә һәјат јолдашыны итирди (Јар. 19:12—14, 17, 26). Бу кешмәкешли дөврдә Јеһованын Лута гаршы сәбри түкәнди? Хејр.

4. Јеһованын Лута гаршы сәбри нәдән ҝөрүнүр? (Үз габығындакы шәклә бахын.)

⁴ Лут Сәдумда јашамаға гәрар версә дә, Јеһова она шәфгәт ҝөстәрди: ону аиләси илә бирҝә хилас етмәк үчүн мәләкләрини ҝөндәрди. Лакин Лут Сәдуму тәҹили шәкилдә тәрк етмәк ҝөстәриши верән мәләкләрә дәрһал итаәт етмәк әвәзинә, ләнҝ тәрпәнди. Одур ки, мәләкләр онларын әлләриндән тутараг шәһәрдән гачмаға көмәк етди (Јар. 19:15, 16). Сонра мәләкләр онлара дағлара гачмағы тапшырды. Лакин Јеһоваја итаәткарлыг ҝөстәрмәк әвәзинә, Лут јахынлыгдакы шәһәрә ҝетмәји хаһиш етди (Јар. 19:17—20). Јеһова ону сәбирлә динләди вә һәмин шәһәрә ҝетмәсинә изин верди. Амма чох кечмәмиш Лут һәмин шәһәрдә јашамағын тәһлүкәли олдуғуну ҝөрүб дағлыг әразијә, Јеһованын она әввәлҹәдән бујурдуғу јерә көчдү (Јар. 19:30). Јеһова Лута гаршы неҹә дә бөјүк сәбир ҝөстәрмишди! Бәс биз Ону неҹә тәглид едә биләрик?

5, 6. 1 Салоникилиләрә 5:14 ајәсини тәтбиг едәрәк, Јеһовадан неҹә өрнәк ала биләрик?

⁵ Ола билсин, руһани аиләмизин үзвләриндән кимсә Лут кими јанлыш гәрар верәрәк башына ҹидди проблемләр ачсын. Бу заман биз неҹә давранаҹағыг? Бәлкә дә, ичимиздән «нә әкмисән, ону да бичирсән» демәк ҝәләҹәк (Гал. 6:7). Һәр нә гәдәр һаглы олсаг да, даһа јахшы давранмаг олар. Јеһованын Лутла рәфтарындан өрнәк ҝөтүрә биләрик. Неҹә?

⁶ Јеһова мәләкләрини садәҹә Луту хәбәрдар етмәк үчүн ҝөндәрмәмишди. Мәләкләр Лута Сәдумун башына ҝәләҹәк бәладан гуртулмаға көмәк етмишдиләр. Ејнилә, диндашымызын јанлыш јола гәдәм гојдуғуну ҝөрәндә ону хәбәрдар етмәклә јанашы, һәр һансы јолла көмәк дә едә биләрик. Һәтта о, Мүгәддәс Китаб әсасында верилмиш мәсләһәти дәрһал тәтбиг етмәсә белә, сәбирли олмалыјыг. Чалышаг һәмин ики мәләк кими давранаг. Диндашымыздан әлимизи үзмәјәк, она көмәк етмәк үчүн практики јоллар ахтараг (1 Јәһ. 3:18). Ола билсин, мәҹази диллә десәк, онун әлиндән тутуб верилән мәсләһәтә әмәл етмәсинә көмәк етмәјимиз лазым ҝәлсин. (1 Салоникилиләрә 5:14 ајәсини охујун.)

7. Јеһованын Лута мүнасибәтиндән неҹә өрнәк ала биләрик?

⁷ Јеһова диггәтини Лутун сәһвләринә ҹәмләмәди. Әксинә, сонралар һәвари Бутрусу илһамландырараг Лутун салеһ адам олдуғуну гејд етдирди. Хошбәхтик ки, Јеһова бизим сәһвләримизи бағышлајыр! (Зәб. 130:3). Бәс биз Јеһованын Лута мүнасибәтиндән өрнәк ала биләрик? Баҹы-гардашларымызын мүсбәт ҹәһәтләрини ҝөрмәјә чалышсаг, онлара гаршы даһа сәбирли олаҹағыг. Онда көмәјимизи гәбул етмәк онлара даһа асан олаҹаг.

8. Шәфгәт һисси бизи нәјә тәшвиг едир?

⁸ Лутдан фәргли олараг, Әјјубун чәкдији әзијјәтләр өз сәһв гәрарынын нәтиҹәси дејилди. Бунунла белә, онун башына бөјүк мүсибәтләр ҝәлмишди: мал-мүлкүнү, ҹәмијјәтдәки ад-саныны, сағламлығыны итирмишди. Ән бетәри исә бүтүн өвладлары өлмүшдү. Үстәлик, үч сахта досту да  ону иттиһам едирди. Нәјә ҝөрә Әјјубун достлары она шәфгәт ҝөстәрмәмишди? Сәбәбләрдән бири одур ки, онлар вәзијјәти кәнардан дәјәрләндирирдиләр. Буна ҝөрә дә тез- тәләсик јанлыш нәтиҹә чыхарыб, Әјјубу рәһмсизҹәсинә мүһакимә етмишдиләр. Онларын сәһвини тәкрарламамаг үчүн нә едә биләрик? Јадда сахлајын ки, инсанын вәзијјәти барәдә бүтүн фактлары јалныз Јеһова билир. Әзаб чәкән диндашынызы диггәтлә динләјин. Онун дедији сөзләри ешитмәклә кифајәтләнмәјин, чәкдији изтирабы дујмаға чалышын. Јалныз бу һалда диндашынызын дәрдинә шәрик ола биләҹәксиниз.

9. Шәфгәтли олмаг бизи нәдән сахлајаҹаг вә бу, нә үчүн ваҹибдир?

⁹ Шәфгәт һисси бизи башгаларынын проблемләри һагда гејбәт етмәкдән сахлајаҹаг. Гејбәтчиләр јығынҹағы мөһкәмләндирмир, әксинә, парчалајыр (Мәс. 20:19; Ром. 14:19). Гејбәт едән шәхс хејирхаһлыг јох, дүшүнҹәсизлик едир. Онун сөзләри әзаб чәкән инсанын јарасына дуз сәпә биләр (Мәс. 12:18; Ефес. 4:31, 32). Јахшы олар ки, инсанын ҝөзәл хүсусијјәтләринә фикир вериб, чәтинликләринин өһдәсиндән ҝәлмәјә көмәк едәк.

10. Әјјуб 6:2, 3 ајәләриндән нә өјрәнирик?

¹⁰ Әјјуб 6:2, 3 ајәләрини охујун. Әјјуб китабында јазылыб ки, пејғәмбәрин дүшүнмәдән данышдығы анлар олуб. Лакин о, сонрадан дедији сөзләри ҝери ҝөтүрмүшдү (Әјј. 42:6). Бу ҝүн дә чәтинликләр уҹбатындан стресс јашајанлар Әјјуб кими, сонрадан пешман олаҹағы сөзләр дејә биләр. Бәс биз неҹә ҹаваб вермәлијик? Тәнгиди јанашмаг әвәзинә, шәфгәтли давранмалыјыг. Јадда сахлајын ки, Јеһованын нијјәтиндә бизим чәтинликләрлә,  стресслә үзләшмәјимиз јох иди. Одур ки, Јеһованын иманлы бәндәсинин ҝәрҝин вахтда дүшүнүлмәмиш сөзләр сөјләмәсини анламаг олар. Һәтта о, Јеһова һагда, јахуд бизим барәмиздә јанлыш бир шеј десә белә, дәрһал әсәбләшмәмәли вә ја ону мүһакимә етмәмәлијик (Мәс. 19:11).

11. Ағсаггаллар кимәсә дүзәлиш едән заман Әлиһудан неҹә өрнәк ала биләр?

¹¹ Бәзән чәтинликләр уҹбатындан стресс јашајан инсана һәр һансы мәсләһәт вермәк вә ја дүзәлиш етмәк лазым ҝәлә биләр (Гал. 6:1). Ағсаггаллар буну неҹә едә биләр? Онлар Әјјубу ҹаныјананлыгла динләјән Әлиһудан өрнәк алмалыдыр (Әјј. 33:6, 7). Әлиһу јалныз Әјјубун дүшүнҹәсини анладыгдан сонра она дүзәлиш вермишди. Ондан өрнәк алан ағсаггаллар да инсаны диггәтлә динләмәјә вә онун вәзијјәтини анламаға чалышаҹаг. Беләҹә, мәсләһәт верәркән онун үрәјинә јол тапа биләҹәкләр.

12. Әринин вә ики оғлунун өлүмү Наимәјә неҹә тәсир етмишди?

¹² Наимә Јеһованы севән сәдагәтли гадын иди. Лакин әринин вә ики оғлунун өлүмүндән сонра о гәдәр пәришан иди ки, инсанларын ону «аҹы» мәнасыны верән «Мара» дејә чағырмасыны истәмишди (Рут 1:3, 5, 20, һаш., 21). Наимәнин ҝәлини Рут бу чәтин анларында онун јанында иди. Рут она һәм әмәлдә көмәјини ҝөстәрирди, һәм дә сөзләри илә тәскинлик верирди. О, Наимәни севдијини, она дајаг олдуғуну садә, сәмими сөзләрлә ифадә етмишди (Рут 1:16, 17).

13. Нәјә ҝөрә һәјат јолдашы вәфат едәнләрин дәстәјимизә еһтијаҹы вар?

¹³ Руһани аиләмизин үзвләриндән киминсә һәјат јолдашы вәфат едәндә дәстәјимизә еһтијаҹ дујур. Әр-арвады јан-јана әкилмиш ики ағаҹа бәнзәтмәк олар. Илләр өтдүкҹә, бу ағаҹларын көкләри бир-биринә мөһкәм сармашыр. Ағаҹлардан бири гопарыланда, диҝәр ағаҹ да ҹидди зәдәләнир. Ејнилә, амансыз өлүм киминсә һәјат јолдашыны әлиндән аланда о, узун мүддәт ағыр изтираб чәкир. Әри гәфләтән өлүм јухусуна ҝедән Паула * дејир: «Һәјатым алт-үст олду. Өзүмү тамамилә ҝүҹсүз һисс едирдим. Ән јахын достуму итирмишдим. Јолдашымла һәр шеј барәдә данышырдым. О, хош ҝүнүмдә севинҹими пајлашыр, дар ҝүнүмдә мәнә арха-дајаг олурду. Мәни диггәтлә динләјирди. Онсуз, санки ики јерә бөлүнмүшдүм».

14, 15. Һәјат јолдашы вәфат едәнләрә неҹә тәскинлик верә биләрик?

¹⁴ Һәјат јолдашы вәфат едән шәхсә неҹә тәскинлик верә биләрик? Илк ваҹиб аддым одур ки, сизә чәтин ҝәлсә дә, нә дејәҹәјинизи билмәсәниз дә, онунла данышасыныз. Паула дејир: «Баша дүшүрәм ки, кимсә өләндә адам нә дејәҹәјини билмир. Сөзләринин пис тәсир едәҹәјинә ҝөрә нараһат олур. Амма нәсә демәк, һеч нә демәмәкдән даһа јахшыдыр». Јаслы адам биздән гејри-ади бир сөз ҝөзләмир. Паула дејир: «Достларымын садәҹә “үзләшдијин иткијә ҝөрә чох үзүлүрәм” демәләри мәним үчүн бөјүк шеј иди».

¹⁵ Бир нечә ил әввәл һәјат јолдашыны итирән Вилјам гардаш дејир: «Башгалары һәјат јолдашымла бағлы хош тәәссүратларыны бөлүшәндә фәрәһләнирәм. Онун севилдијинә, һөрмәт газандығына әмин олурам. Бу ҹүр дәстәк мәним үчүн олдугҹа дәјәрлидир. Онларын сөзләриндән бөјүк тәсәлли тапырам, чүнки јолдашым мәним  үчүн чох әзиз иди, о, һәјатымын бир парчасы иди». Бианка адлы дул баҹымыз дејир: «Мәнимлә бирҝә дуа едәндә, мәнә бир-ики ајә охујанда тәсәлли алырам. Кимсә әрим һаггында данышанда вә мәним онун һагда данышдыгларыма гулаг асанда үрәјим раһатлыг тапыр».

16. а) Әзизини итирән кәс үчүн нә етмәлијик? б) Јагуб 1:27 ајәсинә әсасән, үзәримиздә һансы мәсулијјәт вар?

¹⁶ Дул галмыш Наимәни тәрк етмәјән Рут кими, биз дә әзиз адамыны итирәнләрә давамлы дәстәк олмалыјыг. Јухарыда ады чәкилән Паула дејир: «Әрим вәфат едәндә мәнә дајаг олан чох иди. Заман кечдикҹә, һамы әввәлки һәјатына гајытды. Амма мәним һәјатым тамамилә дәјишмишди. Јаслы адамын ајлар, һәтта илләр сонра белә, дәстәјә еһтијаҹ дујдуғуну киминсә анламасы бөјүк көмәкдир». Әлбәттә ки, һәр кәс фәрглидир. Кимиси башгаларына нисбәтдә јени вәзијјәтинә тез ујғунлашыр. Кимиси дә, бир вахтлар әзизи илә бирҝә ҝөрдүјү иши тәк ҝөрәндә хатирәләрә далыб пис олур. Һәрә кәдәрини бир ҹүр ифадә едир. Ҝәлин јадда сахлајаг ки, Јеһова һәр биримизә һәјат јолдашларыны итирән кәсләрә гајғы ҝөстәрмәк кими шәрәфли вә мәсулијјәтли иш тапшырыб. (Јагуб 1:27 ајәсини охујун.)

17. Нә үчүн һәјат јолдашы тәрәфиндән тәрк едиләнләрин көмәјимизә еһтијаҹы вар?

¹⁷ Бәзиләри һәјат јолдашлары тәрәфиндән тәрк едилдији үчүн ҝүҹлү изтираб вә стресс кечирир. Башга гадына ҝөрә әри тәрәфиндән  тәрк едилән Ҹојс баҹы дејир: «Бошананда елә әзаб чәкдим ки, әрим өлсәјди, бундан јахшы иди. Билсәм ки, һансыса бәдбәхт һадисәдә, јахуд хәстәликдән өлүб, баша дүшәрдим ки, ондан асылы олан бир шеј дејил. Лакин мәни тәрк етмәји о өзү истәјиб. Өзүмү тәһгир олунмуш, алчалдылмыш һисс едирдим».

18. Даһа һәјат јолдашы олмајан кәсләр үчүн нә едә биләрик?

¹⁸ Даһа һәјат јолдашы олмајан кәсләрә кичик бир хејирхаһлыг едәндә онлары севдијимизә әмин олурлар. Инди онларын јахшы достлара һәмишәкиндән даһа чох еһтијаҹы вар (Мәс. 17:17). Бәс сизин јахшы дост олдуғунуз нәдән ҝөрүнәҹәк? Садә сүфрә ачыб онлары евинизә дәвәт едә биләрсиниз. Бир аз вахт ајырыб онларла истираһәт едә, јахуд саһә хидмәтинә чыха биләрсиниз. Јахуд вахташыры онлары аиләви ибадәтинизә дәвәт едә биләрсиниз. Беләҹә, сиз «гәлбисыныглара јахын», «дул гадынлара арха» олан Аллаһымыз Јеһованы севиндирәҹәксиниз (Зәб. 34:18; 68:5).

19. 1 Бутрус 3:8 ајәсини рәһбәр тутараг, сиз нә етмәјә гәрарлысыныз?

¹⁹ Тезликлә Аллаһын Падшаһлығы јер үзүндә һөкмранлыг едәҹәк вә бүтүн «дәрдләр унудулаҹаг». Көһнә шејләрин јада дүшмәјәҹәји, даһа хатырланмајаҹағы ҝүнү неҹә дә бөјүк һәсрәтлә ҝөзләјирик (Әшј. 65:16, 17). О ҝүнә гәдәр исә ҝәлин бир-биримизә дајаг олмаға, еләҹә дә, һәм сөздә, һәм дә әмәлдә руһани аиләмизи чох севдијимизи ҝөстәрмәјә давам едәк. (1 Бутрус 3:8 ајәсини охујун.)