1. Нә үчүн Иса Мәсиһин хәбәрдарлығына гулаг асмалыјыг?

АХЫРЗАМАНЛА бағлы пејғәмбәрлијиндә Иса Мәсиһ демишди: «Өзүнүзә фикир верин, үрәјинизи... һәјатын гајғылары илә јүкләмәјин» (Лука 21:34). Бу мәсләһәтә гулаг асмаг чох ваҹибдир. Чүнки биз дә һамы кими, стресс јарадан проблемләрлә үзләширик.

2. Диндашларымыз стресс јарадан һансы проблемләрлә үзләшир?

² Бәзән ејни вахтда бир нечә проблемлә үзләширик. Ҝәлин бир нечә нүмунәјә бахаг. Сәпәләнмиш склероз хәстәлијиндән әзијјәт чәкән Ҹон * адлы Јеһованын Шаһиди 19 иллик һәјат јолдашынын ону тәрк етмәсинә ҝөрә чох сарсылыр. Бунун ардындан ики гызы Јеһоваја ибадәти дајандырыр. Боб вә Линда адлы бир әр-арвад исә башга проблемләрлә үзләшир. Онларын икиси дә ишини, даһа сонра исә евләрини итирир. Бу азмыш кими, Линдаја потенсиал риск дашыјан үрәк хәстәлији диагнозу гојулур, башга бир хәстәлик исә онун иммун системини дағытмаға башлајыр.

3. Филиппилиләрә 4:6, 7 ајәләри бизи нәјә әмин едир?

³ Әмин ола биләрик ки, Јараданымыз, мәһәббәтли Атамыз Јеһова стрессли анларда кечирдијимиз һиссләри анлајыр. О, проблемләримизин өһдәсиндән ҝәлмәјә көмәк етмәк истәјир. (Филиппилиләрә 4:6, 7 ајәләрини охујун.) Мүгәддәс Китабда Јеһованын хидмәтчиләринин үзләшдији чәтинликләрдән вә Онун бәндәләринә неҹә көмәк етдијиндән бәһс едән чохлу нүмунә вар. Ҝәлин онлардан бир нечәсинә нәзәр салаг.

4. Илјас пејғәмбәрин һәјатында һансы чәтинликләр олуб вә бу чәтин анларында Јеһованын әлини неҹә һисс едирди?

⁴ Илјас пејғәмбәр чох ағыр бир дөнәмдә Јеһоваја хидмәт едиб вә ҹидди чәтинликләрлә үзләшиб. Исраилин сәдагәтсиз падшаһларындан бири олан Әһәб падшаһ Баала ситајиш едән залым бир гадынла, Изәбиллә аилә гурмушду. Онлар гошалашыб бүтүн өлкәдә Баала ибадәти јајмыш, Јеһованын чохлу пејғәмбәрини гәтлә јетирмишдиләр. Илјас онларын әлиндән гача билмишди. О һәмчинин Јеһоваја ҝүвәнмәјин сајәсиндә өлкәдә олан ҝүҹлү аҹлыг заманы сағ галмышды (1 Пад. 17:2—4, 14—16). Илјас Баала ситајиш едәнләрә вә онун пејғәмбәрләринә мејдан охујанда да Јеһоваја бел бағламышды. О, исраиллиләри Јеһоваја ибадәт етмәјә сәсләмишди (1 Пад. 18:21—24, 36—38). Һәјатынын бу ҝәрҝин, стрессли анларында пејғәмбәр дәфәләрлә Јеһованын она дајаг олдуғуну һисс едирди.

5, 6. 1 Падшаһлар 19:1—4 ајәләринә әсасән, Илјас пејғәмбәр һансы һиссләри кечирирди вә Јеһова ону севдијини неҹә ҝөстәрди?

⁵ 1 Падшаһлар 19:1—4 ајәләрини охујун. Бунунла белә, Изәбил Илјасы өлүмлә һәдәләјәндә о, бәрк горхмушду вә ҹаныны гуртармаг үчүн Биир-Сәбаја гачмышды. Пејғәмбәр о гәдәр пәришан иди ки, өзүнә өлүм диләмишди. Нәјә ҝөрә Илјас белә һиссләр кечирирди? Чүнки о да гејри-камил, «бизим кими ади бир инсан иди» (Јаг. 5:17, һаш.). Ола билсин, пејғәмбәр ҝүҹлү стресс кечирирди, үстәлик, тагәти галмамышды. Бәлкә дә,  о фикирләширди ки, пак ибадәти дәстәкләмәк үчүн чәкдији бүтүн зәһмәт һәдәрдир, Исраилдә һеч нә јахшылыға доғру дәјишмәјиб вә Јеһоваја ибадәти давам етдирән тәкҹә о галыб (1 Пад. 18:3, 4, 13; 19:10, 14). Белә бир сәдагәтли пејғәмбәрин бу ҹүр һиссләр кечирмәси бизә гәрибә ҝәлә биләр. Амма Јеһова онун һиссләрини баша дүшүрдү.

⁶ Јеһова һиссләрини дилә ҝәтирдијинә ҝөрә Илјасы данламады. Әксинә, она ҝүҹүнү топламаға көмәк етди (1 Пад. 19:5—7). Даһа сонра һејрәтамиз гүдрәтини ҝөстәрәрәк Илјас пејғәмбәрин дүшүнҹәсинә мүлајим тәрздә дүзәлиш етди. Јеһова вурғулады ки, Исраилдә һәлә дә Баала ибадәт етмәкдән имтина едән 7000 нәфәр вар (1 Пад. 19:11—18). Бу ҹүр практики јолларла Јеһова Илјас пејғәмбәрә севҝисини ҝөстәрди.

7. Јеһованын Илјас пејғәмбәрлә рәфтары бизи нәјә әмин едир?

⁷ Ола билсин, сиз дә стресс јарадан проблемләрлә чарпышырсыныз. Јеһованын Илјас пејғәмбәрин һиссләринә анлајышла јанашмасыны билмәк һәр биримиз үчүн әсл тәсәллидир! Бу, бизи әмин едир ки, Јеһова бизим дә кечирдијимиз мәнәви изтираблары баша дүшүр. О, бизим мәһдудијјәтләримиздән, фикир вә һиссләримиздән аҝаһдыр (Зәб. 103:14; 139:3, 4). Илјас пејғәмбәр кими Јеһоваја ҝүвәнсәк, О, стрессә сәбәб олан проблемләримизин өһдәсиндән ҝәлмәјә көмәк едәҹәк (Зәб. 55:22).

8. Јеһова стрессин өһдәсиндән ҝәлмәјинизә неҹә көмәк едәҹәк?

⁸ Стресс бәдбин дүшүнҹәләрә гапылмағыныза вә беләҹә, руһдан дүшмәјинизә сәбәб ола биләр. Белә оланда јадда сахлајын ки, Јеһова сизә стрессин өһдәсиндән ҝәлмәјә көмәк едәҹәк. Неҹә? Јеһова үрәјинизин дәрдини Онунла бөлүшмәјә сәсләјир. О, имдад диләјинизи ҹавабсыз гојмајаҹаг (Зәб. 5:3; 1 Бут. 5:7). Одур ки, проблеминиз барәдә Јеһоваја тез-тез дуа един. О, сизинлә Илјас пејғәмбәрин һадисәсиндә олдуғу кими бирбаша данышмаса да, Кәламы вә тәшкилаты васитәсилә данышаҹаг. Мүгәддәс Китабдан охудуғунуз парча сизә тохтаглыг вә үмид вермәјә гадирдир. Үстәлик, јығынҹагдакы баҹы-гардашлар да сизи руһландыра биләр (Ром. 15:4; Ибр. 10:24, 25).

9. Етибарлы дост сизә неҹә көмәк едә биләр?

⁹ Јеһова Илјас пејғәмбәрә бујурур ки, она һәвалә етдији ишин јарысыны Әлјәсәјә тапшырсын. Беләҹә, она руһдан дүшдүјү анларда дајаг ола биләҹәк бир дост јетирир. Ејнилә, биз дә үрәјимизин дәрдини етибар етдијимиз бир достумуза ачанда о, бизә үрәјимиздәки јүкү дашымаға көмәк едә биләр (2 Пад. 2:2; Мәс. 17:17). Әҝәр белә бир достунуз јохдурса, Јеһоваја дуа един ки, сизә дајаг олуб дирчәлдәҹәк јеткин бир мәсиһи тапмағыныза көмәк етсин.

10. Илјас пејғәмбәрин һадисәси бизә неҹә үмид верир вә Әшија 40:28, 29 ајәләриндә јазылмыш вәд бизә неҹә көмәк едә биләр?

¹⁰ Јеһова Илјас пејғәмбәрә стрессин өһдәсиндән ҝәлмәјә вә Она узун илләр хидмәт етмәјә көмәк етди. Бу, биздә үмид һасил едир. Бәзән о гәдәр ҝүҹлү стресс кечиририк ки, һәм емосионал, һәм дә физики ҹәһәтдән әлдән дүшүрүк. Лакин Јеһоваја бел бағласаг, хидмәтимизи давам етмәк үчүн бизә лазыми ҝүҹү верәҹәк. (Әшија 40:28, 29 ајәләрини охујун.)

11—13. Аллаһын гәдимдә јашамыш үч хидмәтчисинә стресс неҹә тәсир етмишди?

¹¹ Мүгәддәс Китабда бөјүк стресс кечирән  диҝәр шәхсләр һагда да бәһс олунур. Мәсәлән, Һәннә сонсуз олдуғуна ҝөрә ел ичиндә рүсвај олмушду, үстәлик, әринин о бири арвады да ону алчалдырды (1 Ишм. 1:2, 6). Һәннә о гәдәр стресс кечирирди ки, ҝеҹә-ҝүндүз ағлајырды, һеч јемәк дә јемирди (1 Ишм. 1:7, 10).

¹² Давуд падшаһын да дәрин стресс кечирдији анлар олмушду. О, чохлу чәтинликләрлә үзләшмишди. Етдији сәһвләрә ҝөрә виҹдан әзабы чәкирди (Зәб. 40:12). Севимли оғлу Абсалам она гаршы үсјан галдырмыш, бир мүддәт сонра исә гәтлә јетирилмишди (2 Ишм. 15:13, 14; 18:33). Ән јахын достларындан бири она хәјанәт етмишди (2 Ишм. 16:23—17:2; Зәб. 55:12—14). Давудун јаздығы мәзмурлардан онун нә гәдәр изтираб чәкдијини, еләҹә дә Јеһоваја сарсылмаз етибарыны дујмаг олар (Зәб. 38:5—10; 94:17—19).

¹³ Бир мәзмурчу исә ҝүнаһлы инсанларын сүрдүјү һәјат тәрзинә һәсәд апармаға башламышды. Ола билсин, о, лавили Асәфин нәслиндән иди вә Аллаһын мүгәддәс мәканында хидмәт едирди. Кечирдији стресс севинҹини әлиндән алмыш вә ҝилеј-ҝүзарына сәбәб олмушду. Һәтта Јеһоваја хидмәтин әнам олдуғуна шүбһә етмәјә башламышды (Зәб. 73:2—5, 7, 12—14, 16, 17, 21).

14, 15. Мүгәддәс Китабдакы үч персонажын көмәк үчүн Јеһоваја үз тутмасындан нә өјрәнирик?

¹⁴ Јеһованын бу үч хидмәтчисинин һәр бири көмәк үчүн Она үз тутмушду. Онлар нараһатлыглары барәдә һәрарәтлә дуа етмишдиләр. Үрәкләрини үзән шејләр барәдә Јеһова илә ачыг данышмышдылар. Бундан әлавә, Јеһованын евинә ҝетмәјә давам едирдиләр (1 Ишм. 1:9, 10; Зәб. 55:22; 73:17; 122:1).

¹⁵ Јеһова бу үч бәндәсинин һәр биринә шәфгәтлә ҹаваб вермишди. Һәннә гәлб  раһатлығы тапмышды (1 Ишм. 1:18). Давуд пејғәмбәр јазмышды: «Салеһин дәрди-сәри чох олар, лакин Јеһова ону бүтүн бәлалардан гуртарар» (Зәб. 34:19). Мәзмурчу исә Јеһованын, санки онун әлиндән тутараг өјүд-нәсиһәтилә јол ҝөстәрдијини демишди. О сөјләјирди: «Мәнимчүнсә Аллаһа јахынлашмаг хошдур. Күлли-Ихтијар Јеһоваја сығындым» (Зәб. 73:23, 24, 28). Бу нүмунәләрдән нә өјрәнирик? Һәрдән проблемләрин чохлуғундан ҝүҹлү стресс кечирә биләрик. Лакин Јеһованын Өз хидмәтчиләринә неҹә дајаг олдуғу һагда дүшүнмәклә, дуада дәрдимизи Она ачмагла вә бизә бујурдуғу кими давранмагла бунун өһдәсиндән ҝәлә биләрик (Зәб. 143:1, 4—8).

16, 17. а) Нәјә ҝөрә тәнһалыға гапылмамалыјыг? б) Јенидән мөһкәмләнмәк үчүн нә едә биләрик?

¹⁶ Бу үч нүмунәдән даһа бир ваҹиб шеј өјрәнирик: өзүмүзү нә Јеһовадан, нә дә Онун халгындан тәҹрид етмәмәлијик (Мәс. 18:1). Әри тәрәфиндән тәрк едилән Ненси адлы баҹы ҝүҹлү сарсынты кечирмишди. О дејир: «Ҝүнләрлә нә кимисә ҝөрмәк истәјирдим, нә дә данышмаг. Амма тәнһалыға гапылдыгҹа даһа бетәр олурдум».  Ненси баҹы чәтинликләрлә үзләшәнләрә көмәк етмәк үчүн јоллар ахтармаға башлајанда вәзијјәти дәјишди. О дејир: «Баҹы-гардашларын дәрдини динләјирдим. Фикир вердим ки, онларын һалына јандыгҹа өзүмү даһа аз јазыглајырам».

¹⁷ Ибадәт ҝөрүшләринә ҝәлмәк ҝүҹүмүзү бәрпа етмәјә көмәк едир. Бурада Јеһовадан јардым вә тәсәлли алмаг үчүн даһа чох имканымыз олур (Зәб. 86:17). Ибадәт ҝөрүшләриндә Јеһова бизи Өз мүгәддәс руһу, Кәламы вә халгы васитәсилә мөһкәмләндирир. Ҝөрүшләрдә бир-биримизи руһландырмаг имканымыз олур (Ром. 1:11, 12). Софија адлы бир баҹы дејир: «Јеһова Аллаһ вә диндашларым мәнә ајагда галмаға көмәк етди. Мәним үчүн ән ваҹиби јығынҹаг ҝөрүшләри иди. Хидмәтә вә јығынҹағыма нә гәдәр чох вахт ајырырдымса, стресс вә нараһатчылығын өһдәсиндән бир о гәдәр јахшы ҝәлирдим».

18. Руһдан дүшәндә Јеһова бизә неҹә көмәк едир?

¹⁸ Руһдан дүшәндә унутмајаг ки, Јеһова ҝәләҹәкдә бүтүн әзабларымыза сон гојмағы вәд етмәклә јанашы, ҝүнү бу ҝүн дә стресслә мүбаризә апармағымыза көмәк едир. Јеһова мәјуслугдан вә үмидсизликдән гуртулмағымыз үчүн гәлбимиздә арзу ојадыр, бизә ҝүҹ верир (Филип. 2:13).

19. Ромалылара 8:37—39 ајәләри бизи нәјә әмин едир?

¹⁹ Ромалылара 8:37—39 ајәләрини охујун. Һәвари Булус һеч нәјин бизи Аллаһын мәһәббәтиндән ајыра билмәјәҹәјинә даир әминлик вермишди. Бәс стресслә мүбаризә апаран диндашларымыза неҹә көмәк едә биләрик? Нөвбәти мәгаләдә стресс кечирән баҹы-гардашларымыза шәфгәт ҝөстәрмәклә вә онлара дајаг олмагла Јеһованы неҹә тәглид едә биләҹәјимизи арашдыраҹағыг.