ҺАМЫМЫЗ билирик ки, Јеһова Аллаһ бу ахырзаманда Өз халгына рәһбәрлик верир вә руһани ҹәһәтдән һәр шејлә тәмин едир (2 Тим. 3:1). Тәбии ки, һәр биримиздән итаәткарлыг тәләб олунур. Буҝүнкү вәзијјәти исраиллиләрин сәһрада үзләшдији вәзијјәтә бәнзәтмәк олар. Онлар кәрәнајын сәсинә һај вермәли иди.

Јеһова Муса пејғәмбәрә бујурмушду ки, «иҹманы топламаг, јахуд дүшәрҝәни јығмаг» үчүн дөјмә ҝүмүшдән ики кәрәнај дүзәлтсин (Сај. 10:2). Кәрәнајларын һәр дәфә неҹә чалынмасындан халг нә етмәли олдуғуну билирди (Сај. 10:3—8). Мүасир дөврдә дә Јеһова халгына мүхтәлиф үсулларла ҝөстәришләр верир. Ҝәлин гәдим Исраилдәки кәрәнај сәсини хатырладан бу үсуллардан үчүнү арашдыраг. Бу ҝүн Аллаһын халгы бөјүк топлантылара дәвәт олунур, ағсаггаллар тәлим алыр вә бүтүн јығынҹаглар үчүн ҝөстәришләрә дүзәлиш олунур вә ја дәјишдирилир.

Јеһова истәјирди ки, каһинләр кәрәнајлары чаланда «бүтүн иҹма» Һүзур чадырынын шәрг ҝиришиндә топлашсын (Сај. 10:3). Чадырын әтрафында дөрд бөлүк һалында дүшәрҝә салан бүтүн гәбиләләр бу сәси ешидирди. Ҝиришин јахынлығында дүшәрҝә саланлар кәрәнајын сәсини ешидән кими топлаша билирди. Амма бир аз аралыда оланлара ора ҝетмәк үчүн даһа чох вахт сәрф етмәк вә даһа чох зәһмәт чәкмәк лазым ҝәлирди. Һәр неҹә олса да, Јеһова истәјирди ки, һамы топлашсын вә вердији бујруглары ешитсин.

Бу ҝүн һеч бир чадырын гаршысында топлашмырыг, амма биздән Аллаһын халгынын топлантыларына јығышмаг ҝөзләнилир. Бура мүһүм фикирләр ешитдијимиз вә рәһбәрлик алдығымыз реҝионал топлантылар вә диҝәр хүсуси мәрасимләр дахилдир. Бүтүн дүнјада Јеһованын халгы ејни тәлими алыр. Буна ҝөрә дә дәвәтә һај верәнләр бөјүк, хошбәхт бир иҹмаја гошулур. Бәзиләри башгаларына нисбәтән даһа узун мәсафә гәт етмәли олур. Буна рәғмән, дәвәтә һај верән һәр кәс разыдыр ки, чәкилән зәһмәтә дәјәр.

Бәс уҹгар әразиләрдә оланлар бу бөјүк топлантылардан неҹәсә фајдалана билир? Мүасир технолоҝија сајәсиндә уҹгар әразидә оланларын бир чоху ејни тәлими ала билир, һәтта өзләрини санки бөјүк топлантыларда һисс едирләр. Мәсәлән, баш идарәнин нүмајәндәсинин зијарәтләриндән бири заманы програм Бенин филиалындан Бөјүк Сәһрада јерләшән мәдән шәһәри Арлитә (Ниҝер) јајымланды. Програма гулаг асмаг үчүн ијирми бир баҹы-гардаш вә мараглананлар бир јерә топлашмышды. Онлар уҹгар әразидә олсалар да, өзләрини 44 131 нәфәрин  арасында һисс едирдиләр. Бир гардаш јазмышды: «Бу мәрасими јајымладығыныз үчүн сизә үрәкдән миннәтдарыг. Бир даһа әмин олдуг ки, гәлбиниздә бизә дә јер вар».

Исраилли каһин кәрәнајын бирини чаланда Һүзур чадырынын өнүндә «јалныз Исраил күтләләринин бөјүкләри, башчылар топлашмалы» иди (Сај. 10:4). Онлар орада Муса пејғәмбәрдән тәлим вә ҝөстәришләр ала биләрди. Бу онлара гәбиләләриндә үзәрләринә дүшән мәсулијјәтләри јеринә јетирмәјә көмәк едәҹәкди. Әҝәр сиз бу башчылардан бири олсајдыныз, чадыра ҝәлиб орада дејиләнләри ешитмәк үчүн әлиниздән ҝәләни етмәздиниз?

Бу ҝүн јығынҹағын ағсаггаллары «башчы» дејилләр. Онлар Аллаһын әманәт етдији сүрү үзәриндә ағалыг етмирләр (1 Бут. 5:1—3). Амма сөзсүз ки, онлар сүрүјә нәзарәт етмәк үчүн әлләриндән ҝәләни едирләр. Одур ки, ағсаггаллар әлавә тәлим алмаға, мәсәлән Мәсул Гардашлар үчүн Мәктәбә дәвәт олунанда ҹанла-башла гәбул едирләр. Бу дәрсләр заманы ағсаггаллар јығынҹаг ишләрини даһа сәмәрәли ҝөрмәји өјрәнир. Бу тәлим һәм ағсаггаллары, һәм дә бүтүн јығынҹағы Јеһова Аллаһа даһа да јахынлашдырыр. Һәтта бу кими мәктәбләрдә тәлим алмамысынызса, тәлим аланларын тәҹрүбәсиндән јарарлана биләрсиниз.

Һәрдән исраилли каһинләр кәрәнајы «зилә-бәмә галхыб-дүшән» аһәнҝдә чалырды. Кәрәнајын чалынмасы булуддан асылы иди. Бу, о демәк иди ки, Јеһова бүтүн дүшәрҝәнин јола дүшмәсини истәјир (Сај. 10:5, 6). Дүшәрҝәнин јола дүшмәси јүксәк мүтәшәккилликлә һәјата кечирилирди. Амма бунун үчүн һәр кәсдән бөјүк зәһмәт тәләб олунурду. Бәзи исраиллиләр башга јерә көчәҹәкләринә ҝөрә нараһатчылыг кечирирдиләр. Нә үчүн?

Ола билсин, бәзиләри көчмәк барәдә чағырышын чох тез-тез вә ја ҝөзләнилмәдән олдуғуну дүшүнүрдү. Һәрдән булуд чадырын үстүндә «јалныз ахшамдан сәһәрә гәдәр», һәрдән исә ики ҝүн, бир ај, јахуд да лап чох дајанырды (Сај. 9:21, 22). Бәс дүшәрҝә үмуми нечә дәфә көчмүшдү? Сајлар китабынын 33-ҹү фәслиндә исраиллиләрин дүшәрҝә салдығы тәхминән 40 әразинин ады чәкилир.

Бәзән исраиллиләрин дүшәрҝә салдығы јер көлҝәли јер олурду. «Уҹсуз-буҹагсыз, ваһимәли сәһра»да көлҝәлик тапдыгларына ҝөрә јәгин севинирдиләр (Ган. 1:19). Буна ҝөрә дә көч едәндә әлверишсиз әразидә мәскунлашаҹагларыны дүшүнүб нараһат ола биләрдиләр.

Гәбиләләр көчмәјә башлајанда бәзиләринә өз нөвбәләрини ҝөзләмәк чәтин ҝәлә биләрди. Кәрәнајын «зилә-бәмә галхыб-дүшән» сәсини һамы ешидирди, амма һамы бирдән јола дүшә билмәзди. Кәрәнајын бу сәси шәргдә дүшәрҝә саланларын, Јәһуда, Јәсакир, Зәбулун гәбиләләринин јола дүшмәли олдуғуну билдирирди (Сај. 2:3—7; 10:5, 6). Онлар көчәндән сонра каһин икинҹи дәфә бу аһәнҝлә кәрәнај чалырды вә бу, ҹәнубда дүшәрҝә салан үч гәбилә үчүн чағырыш иди. Каһинләр бүтүн дүшәрҝә јола дүшәнә гәдәр бу ҹүр давам едирди.

Ола билсин, тәшкилатдакы бәзи дәјишикликләрә ҝөрә нараһатлыг кечирмисиниз. Бәлкә дә, ард-арда чохлу ҝөзләнилмәз дәјишикликләр сизи бир гәдәр јоруб. Ола билсин, бәзи гајдалара өјрәшмишдиниз вә дәјишилмәсини истәмәздиниз. Сәбәб нә олур-олсун, дәјишиклијә ујғунлашана гәдәр сәбримизи басмаг чәтин ҝәлә биләр. Буна рәғмән, лазым олан тәрздә даврансаныз, әлбәт ки, дәјишиклијин хејринизә олдуғуну вә Јеһованын сиздән разы галдығыны ҝөрәҹәксиниз.

Муса пејғәмбәрин дөврүндә Јеһова милјонларла кишијә, гадына вә ушаға сәһра боју бәләдчилик етмишди. Јеһованын гајғысы, рәһбәрлији олмадан онлар сағ гала билмәздиләр. Бу ҝүн дә биз Јеһованын рәһбәрлији сајәсиндә руһани ҹәһәтдән сағ галырыг. Нәинки сағ галырыг, һәтта руһән ҝүҹләнирик! Одур ки, гәдимдәки мөмин исраиллиләрдән өрнәк алараг, ҝәлин һәр биримиз кәрәнајын сәсинә һај верәк!