1. Јеһовадан узаглашмыш бирҹә нәфәрин белә ҝери гајытмасы Она неҹә тәсир едир?

ӨТӘН мәгаләдән ҝөрдүк ки, Јеһова Өзүнү гојунлары илә нәвазишлә давранан Чобана бәнзәдир. О, сүрүдән узаглашан һәр бир гузусуну ахтарыр. Јеһова Аллаһ Ону тәрк едән исраиллиләрә демишди: «Мәнә тәрәф дөнүн, Мән дә сизә тәрәф дөнәрәм». Билирик ки, Јеһова инди дә бу ҹүр дүшүнүр, чүнки О дејиб: «Мән дәјишмирәм» (Мәл. 3:6, 7). Иса Мәсиһ демишди ки, сүрүдән узаглашан бирҹә нәфәр белә ҝери гајыданда Јеһова да, мәләкләр дә севиниб-шадланыр (Лука 15:10, 32).

2. Бу мәгаләдә нәји арашдыраҹағыг?

² Ҝәлин Исанын чәкдији үч мәсәли нәзәрдән кечирәк. Бу мәсәлләрдәки дәјәрли өјүдләр васитәсилә Јеһовадан узаглашмыш шәхсләрә ҝери гајытмаға көмәк едә биләрик. Бу мәгаләдә арашдыраҹағыг ки, Јеһоваја ҝери дөнмәк истәјәнләрә көмәк етмәк үчүн биздә һансы хүсусијјәтләр олмалыдыр. Һәмчинин гејри-фәаллара дајаг олмағын чохлу севинҹ бәхш едәҹәјини дә өјрәнәҹәјик.

3, 4. Лука 15:8—10 ајәләринә әсасән, нәјә ҝөрә гадын итмиш ҝүмүш пулуну ҹидд-ҹәһдлә ахтарыр?

³ Јеһоваја ҝери дөнмәк истәјәнләри тапмаг үчүн чох чалышмалыјыг. Луканын јаздығы Мүждәдә Иса Мәсиһ бир гадынын итирдији дәјәрли бир шеји — ҝүмүш пулу ахтардығыны тәсвир едир. Мәсәлдә әсас диггәт ахтарыш просесинә јөнәлиб. (Лука 15:8—10 ајәләрини охујун.)

⁴ Иса Мәсиһ чәкдији мәсәлдә ҝүмүш пулуну тапан гадынын һиссләрини тәсвир едир. Һәмин дөврдә, ҝөрүнүр, бәзи аналар гызларына тој һәдијјәси олараг 10 ҝүмүш пул верирдиләр. Бәлкә дә, мәсәлдәки гадын мәһз о пуллардан бирини итирмишди. Гадын пулун јерә дүшдүјүнү зәнн едир. Буна ҝөрә дә чырағы јандырыб һәр јерә бахыр, амма һеч нә тапмыр. Ҝөрүнүр, чырағын  ишығы балаҹа ҝүмүш пулу ҝөрәҹәк гәдәр ҝур дејилди. Ахырда гадын бүтүн еви сүпүрмәк гәрарына ҝәлир. Бир јерә јығдығы тоз-торпағын ичиндә чырағын ишығында парылдајан һәмин дәјәрли пулу ҝөрүр! Нәһајәт, гадынын үрәји јеринә ҝәлир. О, рәфигәләрини вә гоншуларыны чағырыб севинҹини бөлүшүр.

5. Гејри-фәаллары тапмаг нә үчүн чәтин ола биләр?

⁵ Бу мәсәлдән ҝөрдүјүмүз кими, итмиш бир шеји тапмаг үчүн зәһмәт чәкмәк лазымдыр. Ејни шеј гејри-фәаллара да аиддир. Онлары да тапмаг үчүн зәһмәт чәкмәк лазым ҝәлә биләр. Ола билсин, онларын јығынҹагдан узаглашмасындан узун илләр кечиб. Јахуд башга әразијә көчүбләр вә орадакы баҹы-гардашлар онлары танымыр. Амма әмин ола биләрик ки, елә индинин өзүндә гејри-фәалларын бәзиләри сәмими-гәлбдән Јеһоваја ҝери дөнмәк истәјир. Онлар јенидән баҹы-гардашларла бирҝә Јеһоваја хидмәт етмәк арзусундадыр, амма бунун үчүн көмәјимизә еһтијаҹ дујурлар.

6. Јығынҹагдакы һәр бир кәс гејри-фәалларын ахтарышында неҹә иштирак едә биләр?

⁶ Гејри-фәалларын ахтарышында кимләр иштирак едә биләр? Ағсаггаллар, өнҹүлләр, аилә үзвләри, тәблиғчиләр, үмумијјәтлә, һәр биримиз онлары тапмаға көмәк едә биләрик. Сизин достларыныз вә ја гоһумларыныз арасында гејри-фәал оланлар вар? Јахуд ев-ев вә иҹтимаи тәблиғ заманы гејри-фәала раст ҝәлмисиниз? Һәмин адама дејин ки, она зијарәт едилмәсини истәјирсә, әлагә мәлуматларыны мәмнунијјәтлә ағсаггаллара өтүрә биләрсиниз.

7. Бир ағсаггалын сөзләриндән нә өјрәндиниз?

⁷ Јеһоваја ҝери дөнмәк истәјән кәсләри тапмаг мәсулијјәти хүсусилә дә ағсаггалларын үзәринә дүшүр. Онлар бунун үчүн һансы практики аддымлары ата биләр? Томас * адлы бир ағсаггалын дедикләринә диггәт јетирәк. О, Испанијада јашајыр вә 40-дан чох Јеһованын Шаһидинә јығынҹаға гајытмаға көмәк едиб. Томас дејир: «Әввәлҹә, гејри-фәалларын һал-һазырда һарада јашадығыны билмәк еһтималы олан баҹы-гардашлардан мәлумат алырам. Јахуд да онлардан артыг јығынҹаглара ҝәлмәјән кимисә хатырлајыб-хатырламадыгларыны сорушурам. Әксәр баҹы-гардашлар бөјүк һәвәслә көмәк едирләр, чүнки севинирләр ки, онлар да бу ахтарышда иштирак едирләр. Гејри-фәал баҹы-гардашлары зијарәт едәндә исә онлардан ушаглары вә гоһумлары һагда сорушурам. Онлардан бәзиләри әввәлләр ушагларыны да јығынҹаглара ҝәтирирдиләр вә бу ушагларын бәзиләри бир вахтлар тәблиғчи олуб. Онлара да Јеһоваја ҝери дөнмәјә көмәк едә биләрик».

8. Лука 15:17—24 ајәләриндәки итмиш оғул һагда мәсәлдә ата оғлу илә неҹә рәфтар едир?

⁸ Јеһоваја ҝери дөнмәк истәјәнләрә көмәк етмәк үчүн биздә һансы хүсусијјәтләр олмалыдыр? Ҝәлин ҝөрәк Иса Мәсиһин еви тәрк едән оғул һагда чәкдији мәсәлдән нә өјрәнә биләрик. (Лука 15:17—24 ајәләрини охујун.) Иса мәсәлдә данышыр ки, нәһајәтдә оғулун ағлы башына ҝәлир вә о, евә гајытмаг гәрарыны верир. Ата оғлуну гаршыламаг үчүн габағына гачыр, ону бәрк гуҹаглајыб бағрына басараг нә гәдәр севдијини ҝөстәрир. Оғулун виҹданы она әзаб верир вә өзүнү оғул адланмаға лајиг билмир. О, үрәјини атасына бошалдыр, атасы да ону ҹаныјананлыгла динләјир. Сонра оғлунун евә гајытмасына шад олдуғуну, онун бу евдә муздлу ишчи јох, аиләнин дәјәрли үзвү олдуғуну ҝөстәрмәк үчүн тәдбир ҝөрүр. Ата төвбә етмиш оғлу үчүн зијафәт гурур, она ҝөзәл ҝејим бағышлајыр.

9. Гејри-фәалларын Јеһоваја ҝери дөнмәсинә көмәк етмәк үчүн биздә һансы хүсусијјәтләр олмалыдыр? (« Ҝери дөнмәк истәјәнләрә неҹә көмәк едә биләрик?» адлы чәрчивәјә бахын.)

 ⁹ Јеһова да, бу мәсәлдәки ата кими, гејри-фәал баҹы-гардашлары севир вә онларын ҝери дөнмәсини истәјир. Јеһовадан өрнәк алараг, биз онлара ҝери гајытмаға көмәк едә биләрик. Бунун үчүн биздән сәбир, ҹаныјананлыг вә мәһәббәт тәләб олунур. Бәс бу хүсусијјәтләри тәзаһүр етдирмәк нәјә ҝөрә ваҹибдир вә буну неҹә едә биләрик?

10. Сәбир хүсусијјәти руһани ҹәһәтдән зәиф дүшмүш инсаны дирчәлтмәјә неҹә көмәк едир?

¹⁰ Руһани ҹәһәтдән зәиф дүшмүш инсаны дирчәлтмәк үчүн вахт лазымдыр, одур ки, сәбирли олмалыјыг. Әввәлләр гејри-фәал оланларын бир чоху гејд едир ки, ағсаггалларын вә диҝәр баҹы-гардашларын онлары дәфәләрлә зијарәт етмәсиндән сонра ҝери гајытмаға гәрар верибләр. Ҹәнуб-Шәрги Асијадан олан Ненси адлы бир баҹы јазмышды: «Јығынҹагдан бир јахын рәфигәмин мәнә бөјүк көмәји дәјиб. О мәни бир бөјүк баҹысы кими чох истәјирди. Мәнә әввәлләр бирҝә кечирдијимиз хош ҝүнләри хатырладырды. Һиссләрими бөлүшәндә мәни сәбирлә динләјир вә лазым ҝәләндә мәсләһәт верирди. О, һәр ан көмәјә јетишмәјә һазыр олан әсл дост иди».

11. Ҹаныјананлыг хүсусијјәти инҹимиш инсанын гәлбинә мәлһәм олмағымыза неҹә көмәк едә биләр?

¹¹ Ҹаныјананлыг ҝүҹлү мәлһәм кимидир, гәлб јарасыны сағалтмаға гадирдир. Бәзиләринин гејри-фәал олмасына сәбәб илләр әввәл јығынҹагдан киминсә онларын хәтринә дәјмәси олуб вә онлар һәлә дә һәмин инсана гаршы аҹыглыдырлар. Бу һиссләр онлара Јеһоваја ҝери дөнмәјә мане олур. Ола билсин,  бу баҹы-гардашлар һагсызлыға мәруз галдыгларыны дүшүнүрләр. Онларын динләмәји баҹаран, һиссләрини баша дүшәҹәк биринә еһтијаҹлары ола биләр (Јаг. 1:19). Бир заманлар гејри-фәал олан Марија адлы баҹы дејир: «Мәни динләјә биләҹәк, ағлајанда мәнә тәсәлли верәҹәк вә мәнә јол ҝөстәрәҹәк инсана еһтијаҹым вар иди».

12. Јеһованын гејри-фәаллары Өз халгы арасына неҹә гајтардығыны нүмунә әсасында изаһ един.

¹² Мүгәддәс Китабда Јеһованын халгына гаршы мәһәббәти ипә вә ја кәндирә бәнзәдилир. Мәһәббәт һансы мәнада кәндирә бәнзәјир? Белә бир нүмунәјә бахаг: Тәсәввүр един ки, тәлатүмлү дәниздә боғулурсунуз вә кимсә сизә хиласедиҹи жилет атыр. Сөзсүз ки, һәмин инсана чох миннәтдар оларсыныз, чүнки бу сизә батмамаға көмәк едәҹәк. Амма сағ галмағыныз үчүн хиласедиҹи жилетин олмасы кифајәт дејил. Су сојуг олдуғундан хиласедиҹи гајыға минмәсәниз, сағ гала билмәрсиниз. Ҝәрәк ки, кимсә кәндир атыб сизи гајыға чәксин. Јеһова һагг јолдан дөнмүш Исраил халгы һагда демишди: «Онлары... севҝи бағлары илә Өзүмә чәкдим» (Һушә 11:4, Мүгәддәс Китаб Ширкәти, 2009). Јеһова бу ҝүн дә Она хидмәт етмәји дајандыран вә проблемләри, нараһатлыглары ичиндә батан кәсләрә бу ҹүр јанашыр. Јеһова онлары чох севир вә ҝери дөнмәләрини истәјир. Онлара севҝисини әјан етмәк үчүн сиздән истифадә едә биләр.

13. Гардашлыг мәһәббәтинин гүдрәтини ҝөстәрән нүмунә чәкин.

¹³ Гејри-фәаллары әмин етмәлијик ки, Јеһова да, биз дә онлары чох севирик; бу, олдугҹа ваҹибдир. Ҹәнуби Америкадан олан Пабло гардаш 30 илдән чох иди ки, гејри-фәал  иди. О дејир: «Бир ҝүн сәһәр евдән чыханда јашлы бир баҹыны ҝөрдүм, о мәнимлә чох мүлајим, мәһәббәтлә данышды. Мән ушаг кими ағламаға башладым. Она дедим ки, дејәсән, ону мәнимлә данышмаға Јеһова ҝөндәриб. Мәһз һәмин ан мән Јеһоваја ҝери дөнмәјә гәрар вердим».

14. Лука 15:4, 5 ајәләриндәки мәсәлә әсасән, чобан гојуну тапдыгдан сонра нә етди?

¹⁴ Гејри-фәаллара давамлы шәкилдә көмәк етмәк ҝәрәкдир. Ола билсин, онлар да, Иса Мәсиһин мәсәлиндәки итмиш оғул кими, мәнәви изтираб чәкирләр. Һәм дә Шејтан дүнјасына гајнајыб-гарышдыглары үчүн јәгин ки, Јеһова илә мүнасибәтләри әввәлки кими мөһкәм дејил. Онлара иманларыны мөһкәмләндирмәјә көмәк етмәлијик. Иса Мәсиһ итмиш гојун һагда мәсәлдә чобанын гојуну чијнинә гојуб, сүрүјә гајтардығыны дејир. Гојуну тапмаг үчүн чобан артыг нә гәдәр вахт вә ҝүҹ сәрф етмишди. Амма о баша дүшүрдү ки, гојун өз ҝүҹүнә сүрүјә гајыда билмәзди, буна ҝөрә дә ону чијнинә гојмушду. (Лука 15:4, 5 ајәләрини охујун.)

15. Јеһоваја ҝери дөнмәк истәјән гејри-фәаллара неҹә дәстәк ола биләрик? (« Дәјәрли вәсаит» адлы чәрчивәјә бахын.)

¹⁵ Гејри-фәаллара онлары зәиф салан проблемин өһдәсиндән ҝәлмәјә көмәк етмәк үчүн бизә чохлу вахт вә ҝүҹ сәрф етмәк лазым ҝәлә биләр. Амма Јеһованын мүгәддәс руһунун вә Кәламынын көмәји илә, һәмчинин јығынҹагда әлдә етдијимиз нәшрләр васитәсилә онларын јенидән руһани ҹәһәтдән мөһкәмләнмәсинә дәстәк ола биләрик (Ром. 15:1). Неҹә? Бир тәҹрүбәли ағсаггал дејир: «Јеһоваја ҝери дөнмәјә  гәрар верән гејри-фәалларын әксәријјәти илә Мүгәддәс Китаб дәрси кечмәк лазым ҝәлә биләр» *. Одур ки, сизә һәр һансы гејри-фәалла дәрс кечмәји тәклиф етсәләр, нијә дә мәмнунијјәтлә гәбул етмәјәсиниз? Һәмин ағсаггал дејир: «Мүгәддәс Китаб дәрсини кечән тәблиғчи јахшы дост олмалыдыр ки, гејри-фәал она етибар едиб үрәјини ача билсин».

16. Нәјин әсасында дејә биләрик ки, мәләкләрин көмәјинә архалана биләрик?

¹⁶ Јеһоваја ҝери дөнмәк истәјән гејри-фәалларын ахтарышында мәләкләрин дә бизимлә әмәкдашлыг етдијини бир чох һадисә ҝөстәрир (Вәһј 14:6). Мисал үчүн, Еквадорда јашајан Силвијо Јеһоваја јалвармышды ки, киминсә васитәсилә она јығынҹаға гајытмаға көмәк етсин. Елә дуа етдији вахт ики ағсаггал онун гапысынын зәнҝини чалмышды. Онлар бөјүк севинҹлә Силвијонун Јеһоваја ҝери дөнмәсинә көмәк етмәјә башламышдылар.

17. Руһән зәиф дүшән инсана көмәк етсәк, һансы мүкафаты алаҹағыг?

¹⁷ Руһән зәиф дүшән инсана Јеһоваја ҝери дөнмәјә көмәк етмәкдән севинҹ дујаҹағыг. Гејри-фәаллара хүсуси диггәт ҝөстәрән Салвадор адлы бир өнҹүл дејир: «Бәзән севинҹ ҝөз јашларымы сахлаја билмирәм. Јеһованын бир гузусуну Шејтан дүнјасындан неҹә хилас етдијини ҝөрмәк мәнә хошбәхтлик бәхш едир. Бу ишдә Онунла әмәкдашлыг етмәјим мәним үчүн бөјүк шәрәфдир» (Һәв. 20:35).

18. Гејри-фәалсынызса, нәјә әмин ола биләрсиниз?

¹⁸ Әҝәр сиз Јеһованын халгы илә әлагәнизи кәсмисинизсә, Јеһованын һәлә дә сизи севдијини унутмајын. О истәјир ки, Она ҝери дөнәсиниз. Ҝери дөнмәк үчүн мүәјјән аддымлар атмалысыныз. Амма билин ки, Иса Мәсиһин чәкдији мәсәлдәки ата кими, Јеһова да јолунузу сәбирсизликлә ҝөзләјир вә сизи бөјүк мәмнунијјәтлә гаршылајаҹаг.