1. Јеһованын һәр биримизи севдијини һарадан билирик?

ЈЕҺОВА һәр биримизи Өзүнә ҹәлб едиб (Јәһ. 6:44). Бир дүшүнүн бу нә демәкдир! Јеһова Јер күрәсиндәки милјардларла инсаны бир-бир нәзәрдән кечирәркән сиздә дәјәрли бир шеј тапды. Ҝөрдү ки, неҹә тәмиз үрәјиниз вар, Ону севә биләрсиз (1 Салн. 28:9). Јеһова сизи јахшы таныјыр, баша дүшүр вә севир. Буну билмәк чох хошдур!

2. Иса Мәсиһ һәр биримизин Јеһова үчүн дәјәрли олдуғуну бир мәсәл әсасында неҹә изаһ етмишди?

² Сиз Јеһова үчүн дәјәрлисиниз. Ејнилә диҝәр баҹы-гардашлар да Онун үчүн дәјәрлидир. Буну баша дүшмәјимиз үчүн Иса гузуларыны севән чобан нүмунәсини чәкмишди. 100 гојуну олан чобанын сүрүдән 1 гојуну итсә, о нә едәр? Чобан 99 гојуну дағда гојуб, азмыш гојуну ахтармаға ҝедәр. Гојуну тапанда итдијинә ҝөрә она аҹыгланмаз, әксинә, севинәр. Бурадан нә өјрәнирик? Јеһова үчүн һәр бир хидмәтчиси әзиздир. Иса Мәсиһ демишди: «Мәним ҝөјдәки Атам бу кичикләрдән бирҹәҹијинин белә мәһв олмасыны истәмир» (Мәт. 18:12—14).

3. Бу мәгаләдә нә һагда данышаҹағыг?

³ Әлбәттә, биз һеч вахт истәмәрик ки, һансыса баҹы-гардашымызын руһдан дүшмәсинә сәбәб олаг. Башгаларыны бүдрәтмәмәк үчүн нә едә биләрик? Бәс кимсә бизим хәтримизә дәјәндә неҹә давранмалыјыг? Мәгаләдән бу ики суалын ҹавабыны өјрәнәҹәјик. Амма әввәлҹә ҝәлин ҝөрәк, Мәтта 18-ҹи фәсилдә «кичикләр» дејиләндә кимләр нәзәрдә тутулур.

4. «Кичикләр» дејиләндә кимләр нәзәрдә тутулур?

⁴ «Кичикләр» Исанын һәр јашда олан шаҝирдләридир. Һансы јашда олмаларындан асылы олмајараг, онлар «ушаг» кимидирләр. Чүнки Исадан өјрәнмәјә һазырдырлар (Мәт. 18:3). Онларын миллијјәти, мәдәнијјәти, хасијјәти, бахышы фәргли олса да, һамысы Исаја иман ҝәтирир, Иса да онлары чох истәјир (Мәт. 18:6; Јәһ. 1:12).

5. Кимсә Јеһованын хидмәтчисини бүдрәдәндә вә ја инҹидәндә Јеһова һансы һиссләри кечирир?

⁵ Бу «кичикләрин» һамысы Јеһова үчүн гијмәтлидир. Јеһованын онлара бәсләдији һиссләри баша дүшмәк үчүн бизим ушаглара неҹә јанашдығымызы јада сала биләрик. Ушаглар бизим үчүн гијмәтлидир. Онларда бөјүкләрдә олан ҝүҹ, тәҹрүбә вә һикмәт јохдур. Буна ҝөрә дә биз онлары горумаг истәјирик. Биз ҝөрәндә ки, кимсә кимисә инҹидир, бу бизим хошумуза ҝәлмир, амма кимсә ушағы инҹидәндә бу бизә лап пис тәсир едир, һәтта гәзәбләнирик. Ејнилә, Јеһова да бизи горумаг истәјир. О ҝөрәндә ки, кимсә хидмәтчисини бүдрәдиб вә ја инҹидиб, бу Она пис тәсир едир. Һәтта О гәзәбләнир (Әшј. 63:9; Марк 9:42).

6. 1 Коринфлиләрә 1:26—29 ајәләринә әсасән, дүнја Исанын шаҝирдләринә һансы ҝөзлә бахыр?

⁶ Башга һансы мәнада Исанын шаҝирдләри «кичикләрдир»? Адәтән бу дүнјада кимләри бөјүк адам һесаб едирләр? Варлылары, мәшһурлары, сәлаһијјәт саһибләрини. Амма бу дүнја Исанын шаҝирдләринә әһәмијјәтсиз, адсыз-сансыз «кичикләр» кими бахыр. (1 Коринфлиләрә 1:26—29 ајәләрини охујун.) Јеһова исә онлара бу ҹүр јанашмыр.

7. Јеһова баҹы-гардашлара неҹә јанашмағымызы истәјир?

⁷ Јеһова бүтүн хидмәтчиләрини севир, фәрги јохдур, онлар Она узун илләрдир хидмәт едир, јохса һәгигәтдә јенидирләр. Бүтүн баҹы-гардашларымыз Јеһова үчүн дәјәрлидир, буна ҝөрә дә онлар бизим үчүн дә дәјәрли олмалыдыр. Биз диндашларымызы бир-бириндән ајырмырыг, бүтүн гардашлығы севирик (1 Бут. 2:17). Онлары горумаг вә гејдләринә галмаг үчүн нә лазымдырса, етмәјә һазырыг. Киминсә хәтринә дәјдијимизи биләндә һеч нә олмамыш кими давранмамалыјыг, дүшүнмәмәлијик ки, о, чох һәссасдыр, ҝәрәк удмағы баҹарсын. Бәзиләринин инҹимәсинә нә сәбәб ола биләр? Ола билсин, онлар елә мүһитдә бөјүјүбләр ки, өзләри һагда ашағы фикирдәдирләр. Диҝәрләри һәгигәтдә јенидир вә инсанларын сәһвини бағышламағы һәлә өјрәнмәлидирләр. Һәр бир һалда, биз мүнасибәтләри дүзәлтмәк үчүн әлимиздән ҝәләни етмәлијик. Һәмчинин башгаларындан тез инҹијән инсан баша дүшмәлидир ки, бу, һеч дә јахшы хүсусијјәт дејил вә бунун үзәриндә ишләмәлидир. О буну һәм өзүнүн гәлбинин раһат олмасы үчүн, һәм дә башгалары илә мүнасибәтинин јахшы олмасы үчүн етмәлидир.

8. Исанын шаҝирдләринә һансы дүшүнҹә тәсир етмишди?

⁸ Исанын «кичикләр» барәдә данышмасынын сәбәби нә иди? Шаҝирдләри ондан сорушмушдулар: «Сәмави Падшаһлыгда ән бөјүк ким олаҹаг?» (Мәт. 18:1). Һәмин дөврдә әксәр јәһудиләр үчүн вәзифә, ад-сан чох өнәмли иди. Бир алим дејир: «Инсанлар шәрәф, ад-сан, шөһрәт, рәғбәт вә һөрмәт һәсрәти илә јашајыр вә өлүрдүләр».

9. Исанын шаҝирдләри нә етмәли иди?

⁹ Иса билирди ки, шаҝирдләри јәһуди мәдәнијјәтиндә көк салмыш рәгабәт руһуну үрәкләриндән гопарыб атмаг үчүн чох чалышмалыдырлар. Онлара демишди: «Гој аранызда бөјүк сајылан кичик кими олсун, башчылыг едән хидмәтчи кими олсун»  (Лука 22:26). Биз башгаларыны өзүмүздән үстүн сајанда «кичик» олдуғумузу ҝөстәририк (Филип. 2:3). Бу дүшүнҹәни өзүмүздә даһа чох инкишаф етдирдикҹә башгаларыны даһа аз инҹидәҹәјик.

10. Һәвари Булусун һансы мәсләһәтинә ҹидди јанашмалыјыг?

¹⁰ Бүтүн баҹы-гардашларымыз һансыса саһәдә биздән үстүндүр. Диггәтимизи онларын јахшы хүсусијјәтләринә ҹәмләјәндә буну ајдын ҝөрүрүк. Һәвари Булусун коринфлиләрә вердији мәсләһәтә ҹидди јанашмалыјыг: «Ахы сәни башгаларындан фәргләндирән нәдир? Мәҝәр һәр шеји Аллаһдан алмамысан? Әҝәр һәр шеји Аллаһдан алмысанса, онда нијә буну унудуб ловғаланырсан?» (1 Кор. 4:7). Еһтијатлы олмалыјыг ки, башгаларында тәәссүрат ојатмаға чалышмајаг, јахуд өзүмүзүн башгаларындан үстүн олдуғуну дүшүнмәјәк. Мәсәлән, јахшы мәрузә сөјләјән гардаш, јахуд инсанларла Мүгәддәс Китаб дәрсинә асанлыгла башламағы баҹаран баҹы бу габилијјәтинә ҝөрә шәрәфи һәмишә Јеһоваја вермәлидир.

11. Иса Мәсиһин падшаһ вә нөкәрлә бағлы мәсәлинин мәғзи нә иди?

¹¹ Иса давамчыларына башгаларыны бүдрәтмәјин нә гәдәр ҹидди мәсәлә олдуғуну дејәндән сонра падшаһ вә нөкәрлә бағлы бир мәсәл чәкир. Падшаһ нөкәринин һеч вахт өдәјә билмәјәҹәји бөјүк мәбләғдә борҹу ләғв едир. Сонра һәмин нөкәр она даһа аз борҹу олан нөкәр јолдашынын борҹуну бағышламагдан имтина едир. Нәтиҹәдә, падшаһ бу рәһмсиз нөкәри дустагханаја атыр. Бурадан нә өјрәнирик? Иса демишди: «Әҝәр сиз дә башгаларыны үрәкдән бағышламасаныз, ҝөјдәки Атам да сизинлә белә давранаҹаг» (Мәт. 18:21—35).

12. Бағышламамагла биз башгаларыны неҹә инҹидирик?

¹² Нөкәрин бу һәрәкәтиндән тәк өзү јох, башгалары да зијан чәкди. Әввәла, о, нөкәр јолдашына гаршы рәһмсиз давранды, ону дустагханаја атды ки, борҹуну гајтарана гәдәр орада галсын. Икинҹиси, о, бунун шаһиди олан диҝәр нөкәрләри инҹитди. Онлар онун бу һәрәкәтини ҝөрәндә чох пис олдулар. Ејнилә, бизим дә һәрәкәтләримиз башгаларындан јан кечмир. Әҝәр кимсә бизим хәтримизә дәјирсә вә биз ону бағышламаг истәмириксә, нә баш верә биләр? Илк нөвбәдә, ону бағышламамагла, сајмазјана јанашмагла, мәһәббәтимиздән мәһрум етмәклә ону јараламыш оларыг. Икинҹиси, јығынҹагдакы баҹы-гардашлар да ҝөрәндә ки, киминләсә бизим арамыз дәјиб, өзләрини нараһат һисс едәҹәк.

13. Бир өнҹүл баҹы илә баш верәнләрдән нә өјрәнирик?

¹³ Диндашымызы бағышлајанда бу һәм өз хејримизә олур, һәм дә башгаларынын. Ҝөрүн Кристал * адлы бир өнҹүл баҹы илә нә баш вермишди. Јығынҹагдакы бир баҹы онун хәтринә дәјмишди. Кристал дејир: «О бәзән елә кәскин сөзләр дејирди ки, елә бил мәни гылынҹла јаралајырды. Һәтта онунла тәблиғдә әмәкдашлыг белә етмәк истәмирдим. Јаваш-јаваш хидмәтдә севинҹими вә шөвгүмү итирмәјә башладым». Кристал дүшүнүрдү ки, дилхор олмасы әсассыз дејил. Амма о, баҹыја аҹыглы галмады, нә дә өзүнү јазыгламады. Кристал «Ҝөзәтчи гүлләси»нин 1999-ҹу ил 15 октјабр сајында дәрҹ олунан «Үрәкдән бағышлајын» мәгаләсиндәки мәсләһәтә тәвазөкарлыгла әмәл етди. О, баҹыны бағышлады.  Кристал дејир: «Инди дәрк едирәм ки, һамымыз јени шәхсијјәти ҝејинмәјә чалышырыг вә Јеһова бизи һәр ҝүн үрәкдән бағышлајыр. Санки чијинләримдән ағыр бир јүк дүшдү. Севинҹими бәрпа етдим».

14. Мәтта 18:21, 22 ајәләринә әсасән, ола билсин, һәвари Бутрусун һансы саһәдә чәтинлији вар иди вә биз Исанын ҹавабындан нә өјрәнирик?

¹⁴ Биз билирик ки, бағышламалыјыг вә бу ҹүр давранмаг дүзҝүндүр. Амма јенә дә бу бизә чәтин ҝәлә биләр. Ола билсин, һәвари Бутрус үчүн дә бу, бәзән чәтин олурду. (Мәтта 18:21, 22 ајәләрини охујун.) Бәс бизә нә көмәк едә биләр? Биринҹиси, Јеһованын сизи нә гәдәр чох бағышладығы һагда дүшүнүн (Мәт. 18:32, 33). Биз Онун әфвинә лајиг олмасаг да, О бизи үрәкдән бағышлајыр (Зәб. 103:8—10). Үстәлик, биз «бир-биримизи севмәјә борҹлујуг». Буна ҝөрә дә бағышламаг сечим мәсәләси дејил. Баҹы-гардашлары бағышламаг бизим борҹумуздур (1 Јәһ. 4:11). Икинҹиси, бағышламағын хејри һагда дүшүнүн. Бунунла хәтримизә дәјән инсана көмәк едирик, јығынҹагда бирлик олур, Јеһова илә мүнасибәтимизи горујуруг вә чијнимиздәки јүкдән азад олуруг (2 Кор. 2:7; Кол. 3:14). Үчүнҹүсү, сизә бағышламағы бујуран Јарадана дуа един. Шејтана диндашларынызла аранызда олан сүлһү позмаға имкан вермәјин (Ефес. 4:26, 27). Шејтанын тәләсинә дүшмәмәк үчүн Јеһованын көмәјинә еһтијаҹымыз вар.

15. Колослулара 3:13 ајәсинә әсасән, диндашымызын һәрәкәти бизи инҹидирсә, нә едә биләрик?

¹⁵ Бәс әҝәр диндашынызын һәрәкәти сизи чох инҹидирсә, онда неҹә? Бу заман нә етмәлисиниз? Сүлһү горумаг үчүн әлиниздән ҝәләни един. Јеһоваја үрәкдән дуа един. Ондан хәтринизә дәјән диндашыныза јар олмасыны диләјин. Һәмчинин хаһиш един ки, диндашынызын јахшы  хүсусијјәтләрини ҝөрмәјинизә көмәк етсин, о хүсусијјәтләри ки, Јеһова онда бәјәнир (Лука 6:28). Диндашынызын етдији һәрәкәти унуда билмирсинизсә, фикирләшин ки, онунла бу барәдә неҹә даныша биләрсиниз. Белә мәгамларда онун сизи гәсдән инҹитмәдијини дүшүнмәк даһа јахшы оларды (Мәт. 5:23, 24; 1 Кор. 13:7). Онунла данышанда да буну нәзәриниздә сахлајын. Бәс әҝәр о, сүлһ јаратмаг истәмирсә, онда неҹә? Диндашыныза гаршы һәмишә сәбирли олун. Ондан әлинизи үзмәјин. (Колослулара 3:13 ајәсини охујун.) Ән әсасы исә һеч вахт аҹыглы галмајын. Чүнки бу, Јеһова илә мүнасибәтинизи корлаја биләр. Нәјинсә сизи бүдрәтмәсинә имкан вермәјин. Бунунла сүбут едәҹәксиниз ки, Јеһованы һәр шејдән чох истәјирсиниз (Зәб. 119:165).

16. Һәр биримизин үзәринә һансы мәсулијјәт дүшүр?

¹⁶ «Бир сүрүдә» бирләшиб, «бир чобанын» нәзарәти алтында Јеһоваја хидмәт етмәк бизим үчүн бөјүк шәрәфдир! (Јәһ. 10:16). «Аллаһын ирадәсини јеринә јетирән тәшкилат» китабынын 165-ҹи сәһифәсиндә дејилир: «Јәгин сиз хошбәхтсиниз ки, бу ҹүр инсанларын арасындасыныз, амма сизин үзәринизә бу бирлији горумаг мәсулијјәти дүшүр». Буна ҝөрә дә баҹы-гардашларымыза «Јеһованын ҝөзү илә бахмаға» чалышмалыјыг. Јеһованын ҝөзүндә һамымыз Она дәјәрли олан «кичикләрин» сырасындајыг. Сиз дә баҹы-гардашлара бу ҹүр јанашырсыныз? Онлара дајаг олмаг вә гејдләринә галмаг үчүн етдијиниз һәр бир шеји Јеһова ҝөрүр вә гијмәтләндирир (Мәт. 10:42).

17. Биз гаршымыза һансы мәгсәди гојмушуг?

¹⁷ Биз диндашларымызы севирик. Буна ҝөрә дә гаршымыза мәгсәд гојмушуг ки, «һеч бир гардашын јыхылмасына, иман јолундан дөнмәсинә баис» олмајаг (Ром. 14:13). Биз иман баҹымызы вә гардашымызы өзүмүздән үстүн сајырыг вә үрәкдән бағышламаға һазырыг. Ҝәлин һеч вахт башгаларынын һәрәкәтиндән бүдрәмәјәк. Әксинә, «сүлһә апаран вә бир-биримизи руһландыран шејләрә ҹан атаг» (Ром. 14:19).