1. Бәзиләриндә һансы горху олуб?

 ҜӘЛИН бәзи Јеһованын Шаһидләринин үзләшдији вәзијјәтләрә нәзәр салаг. Несторла арвады Марија тәблиғчиләрә тәләбат олан әразидә хидмәт етмәк истәјирдиләр *. Бунун үчүн онлар һәјатларында бәзи шејләри дәјишмәли идиләр. Амма онлар горхурдулар ки, пуллары аз олса, там хошбәхт ола билмәјәҹәкләр. Бинјам Јеһованын хидмәтчиләринин тәгиб олундуғу бир өлкәдә һәгигәтә ҝәлиб. О баша дүшүрдү ки, бир Јеһованын Шаһиди кими, тәгибләрлә үзләшә биләр. Бу, ону бәрк горхудурду. Амма ону ән чох горхудан гоһумларынын онун Јеһованын Шаһиди олдуғуну биләндә ҝөстәрәҹәкләри реаксија иди. Валерија адлы баҹыја агрессив хәрчәнҝ диагнозу гојулмушду. Баҹы онун ганла бағлы мөвгејини нәзәрә алаҹаг ҹәрраһ тапа билмирди. Тәбии олараг, о горхурду ки, һәјатыны итирә биләр.

2. Нәјә ҝөрә горхуларымызы ашмаға чалышмалыјыг?

² Сиздә дә белә горхулар олур? Чохларымызда олур. Әҝәр горхуларымыза үстүн ҝәлмәји өјрәнмәсәк, бөјүк еһтимал ки, јанлыш гәрарлар верәҹәјик, бу исә Јеһова илә мүнасибәтләримизә зәрәр вура биләр. Шејтанын да истәдији елә будур. О һәмчинин чалышыр ки, биз горхуја гапылыб, Аллаһын ганунларыны позаг, мәсәлән, хош хәбәри тәблиғ етмәјәк (Вәһј 12:17). Шејтан мәнфурдур, гәддардыр вә ҝүҹлүдүр. Амма биз өзүмүзү ондан горуја биләрик.

3. Горхуларымызы ашмаға бизә нә көмәк едәҹәк?

 ³ Јеһованын бизи севдијинә, бизә көмәк едәҹәјинә әмин оланда Шејтанын һәмләләринә гаршы дура биләрик (Зәб. 118:6). Мәсәлән, 118-ҹи мәзмурун јазары олдугҹа чәтин вәзијјәтләрлә үзләшмишди. Онун чохлу дүшмәнләри вар иди, һәтта онлардан бәзиләри сәлаһијјәтли инсанлар иди (9 вә 10-ҹу ајәләр). Бәзән о, һәдсиз нараһатлыг кечирирди (13-ҹү ајә). Һәмчинин Јеһова ону ҹидди тәнбеһ етмишди (18-ҹи ајә). Буна бахмајараг, мәзмурчу «горхмарам» демишди. Нәјин сајәсиндә онун үрәјиндә раһатлыг, сакитлик вар иди? О билирди ки, сәмави Атасы Јеһова ону тәнбеһ етсә дә, чох истәјир. Мәзмурчу әмин иди ки, һансы вәзијјәтлә үзләшир-үзләшсин, Аллаһы һәмишә она көмәк етмәјә һазырдыр (Зәб. 118:29).

4. Јеһованын бизи севдијинә әминиксә, һансы горхуларымызы аша биләрик?

⁴ Биз әмин олмалыјыг ки, Јеһова ајры-ајрылыгда һәр биримизи севир. Бу ҹүр әминлик бизә үч нөв горхунун өһдәсиндән ҝәлмәјә көмәк едәҹәк. Бу, 1) аиләни доландыра билмәмәк горхусу, 2) инсан горхусу вә 3) өлүм горхусудур. Илк абзасда ады чәкилән баҹы-гардашлар Аллаһын онлары севдијинә әмин олдуглары үчүн горхуларыны аша билмишдиләр.

5. Һансы вәзијјәтләр аилә башчысынын нараһатлығына сәбәб ола биләр? (Үз габығындакы шәклә бахын.)

⁵ Мәсиһи аилә башчылары аиләләрини мадди ҹәһәтдән тәмин етмәк мәсулијјәтләринә ҹидди јанашырлар (1 Тим. 5:8). Әзиз аилә башчылары, јәгин, пандемија вахты ишинизи итирмәк тәһлүкәси илә үзләшмисиниз. Ола билсин, нараһат олмусунуз ки, евә чөрәк пулу ҝәтирә билмәјәҹәксиниз, евин кирајә вә ја ипотека пулуну өдәјә билмәјәҹәксиниз. Јахуд горхмусунуз ки, әҝәр ишинизи итирсәниз, башга иш тапа билмәрсиниз. Бәлкә дә, јухарыда ады чәкилән Нестор вә Марија кими ишинизлә бағлы дәјишиклик етмәјә тәрәддүд етмисиниз. Дүшүнмүсүнүз ки, аз пулла долана билмәрсиниз. Шејтан бу јолларла чохларыны горхутмаға мүвәффәг олуб.

6. Шејтан бизи нәјә инандырмаға чалышыр?

⁶ Шејтан бизи инандырмаға чалышыр ки, Јеһова һәр биримизлә ајры-ајрылыгда марагланмыр, аиләмизи доландырмаг мәсәләсиндә биз өзүмүз башымыза чарә гылмалыјыг. Буна инансаг, белә гәнаәтә ҝәләрик ки, нәјин баһасына олурса олсун, һәтта Мүгәддәс Китаб принсипләрини позмаг лазым ҝәлсә дә, индики ишимизи әлдән вермәјәк.

7. Иса Мәсиһ бизи нәјә әмин едир?

⁷ Иса Мәсиһ сәмави Атамызы һамыдан јахшы таныјыр. О бизи әмин едир: «Атаныз сизин нәјә еһтијаҹ дујдуғунузу сиз Ондан истәмәздән әввәл билир» (Мәт. 6:8). Иса һәмчинин билир ки, Јеһова бизим еһтијаҹларымызы тәмин етмәјә һазырдыр. Биз Јеһованын аиләсинин үзвүјүк. Јеһова аиләмизин Башчысыдыр. Әмин ола биләрик ки, О, 1 Тимутијә 5:8 ајәсиндә бүтүн аилә башчыларына бујурдуғу принсипә Өзү дә әмәл едир.

8. а) Аиләни доландыра билмәмәк горхусуну неҹә аша биләрик? (Мәтта 6:31—33). б) Шәклә бахын: Бир баҹыја јемәк пајы ҝәтирән әр-арвадын нүмунәсиндән нә өјрәнирик?

⁸ Јеһованын бизи вә аиләмизи севдијинә әминиксә, Онун еһтијаҹ дујдуғумуз шејләрлә бизи тәмин едәҹәјинә шүбһә етмәјәҹәјик. (Мәтта 6:31—33 ајәләрини охујун.) Үстәлик, Јеһова буну етмәји үрәкдән истәјир. Өзү дә билирик  ки, О, сәхавәтлидир, рузи јетирән Аллаһдыр! Јеһова Јер күрәсини јараданда садәҹә јашамағымыз үчүн зәрури шејләри јаратмамышды. О, һәјатдан бөјүк зөвг дујмағымыз үчүн Јер күрәсини бол немәтләрлә долдуруб (Јар. 2:9). Ола билсин, бәзән бизим јалныз зәрури шејләримиз олсун, һәтта белә вәзијјәтдә унутмамалыјыг ки, Јеһова јетирдији үчүн биздә бунлар вар (Мәт. 6:11). Әҝәр биз мадди ҹәһәтдән нәләрисә гурбан вермишиксә, јадда сахламалыјыг ки, онлар Јеһованын бизә һәм индики, һәм дә ҝәләҹәк дөврдә верәҹәји немәтләрлә мүгајисәдә һеч нәдир. Несторла Марија буну өз тәҹрүбәләриндә ҝөрдүләр (Әшј. 65:21, 22).

9. Несторла Маријадан нә өјрәндиниз?

⁹ Нестор вә Маријанын Колумбијада иши, еви, һәр шәраити вар иди. Онлар дејирләр: «Биз һәјатымызы садәләшдириб, хидмәтимизи ҝенишләндирмәк истәјирдик. Амма горхурдуг ки, пулумуз аз олса, хошбәхт олмајаҹағыг». Онлара бу горхуларыны ашмаға нә көмәк етди? Несторла Марија Јеһованын онлара Өз мәһәббәтини дәфәләрлә неҹә сүбут етдији һагда дүшүндүләр. Бу, онлара әминлик верди ки, Јеһова онларын гејдинә һәр заман галаҹаг. Буна ҝөрә онлар јахшы ҝәлирли ишләриндән чыхдылар, евләрини сатдылар вә өз өлкәләриндә тәблиғчиләрә тәләбат олан әразијә көчдүләр. Бу гәрарлары илә бағлы онлар нә дүшүнүрләр? Нестор дејир: «Биз Мәтта 6:33 ајәсиндә јазылан сөзләрин доғрулуғуну өз ҝөзүмүзлә ҝөрдүк. Бизим һеч вахт мадди сыхынтымыз олмајыб. Үстәлик, инди әввәлкиндән даһа хошбәхтик».

10. Нәјә ҝөрә инсанын инсандан горхмасы тәәҹҹүблү дејил?

¹⁰ Та гәдимдән инсанлар бир-бириләринә пислик едирләр (Ваиз 8:9). Мәсәлән, инсанлар өз сәлаһијјәтләриндән суи-истифадә едирләр, ҹинајәткарлар зоракы әмәлләр төрәдирләр, мәктәбдә дәләдуз ушаглар өз синиф јолдашларыны алчалдырлар, һәдә-горху ҝәлирләр. Бәзиләри исә өз аилә үзвләри илә амансыз рәфтар едирләр. Буна ҝөрә дә инсанын инсандан горхмасы тәәҹҹүблү дејил. Бәс Шејтан инсан горхусундан бизим әлејһимизә неҹә истифадә едир?

11, 12. Шејтан инсан горхусундан бизим әлејһимизә неҹә истифадә едир?

¹¹ Шејтан истәјир ки, биз инсан горхусуна  гапылыб, тәблиғ етмәјә сон гојаг вә диҝәр саһәләрдә ҝүзәштә ҝедәк. Онун тәсири алтында һөкумәтләр фәалијјәтимизә гадаға гојур вә ја бизи тәгиб едир (Лука 21:12; Вәһј 2:10). Шејтан дүнјасында чохлары Јеһованын Шаһидләри һаггында шајиәләр вә мәнфур јаланлар јајырлар. Бу јалана инананлар бизи әлә салырлар, һәтта үстүмүзә һүҹум чәкирләр (Мәт. 10:36). Шејтанын бу фәндләри бизи һеч дә тәәҹҹүбләндирмир. О, биринҹи әсрдә дә бу фәндләрдән истифадә едирди (Һәв. 5:27, 28, 40).

¹² Һөкумәт тәрәфиндән тәгиблә үзләшмәк горхусу Шејтанын истифадә етдији јеҝанә силаһ дејил. Бу ҝүн бәзиләри бундан чох, гоһумларынын һәгигәтә неҹә јанашаҹағындан горхур. Гоһумлары онлар үчүн әзиздир вә истәјирләр ки, гоһумлары да Јеһова һагда өјрәнсинләр, Ону севсинләр. Гоһумларынын Јеһова вә Онун хидмәтчиләри һагда һөрмәтсиз данышмалары онлара ағыр ҝәлир. Амма бәзән олур ки, һәгигәтә гаршы чыхан гоһумлар сонрадан һәгигәти гәбул едир. Амма тутаг ки, гоһумларымыз јени етигадымыза ҝөрә бизимлә бүтүн әлагәләрини кәсирләр. Белә вәзијјәтдә биз неҹә давранаҹағыг?

13. Гоһумларымыз биздән үз дөндәрибсә, Јеһованын севҝисинә әминлик бизә неҹә көмәк едә биләр? (Зәбур 27:10).

¹³ Зәбур 27:10 ајәсиндә јазылан ҝөзәл сөзләр бизә тәсәлли верә биләр. (Ајәни охујун.) Јеһованын бизи нә гәдәр чох севдијини јадда сахлајанда гоһумларымыз биздән үз дөндәрсә дә, тәлаша дүшмүрүк. Биз тамамилә әминик ки, дөзүм ҝөстәрдијимизә ҝөрә Јеһова бизә мүкафат верәҹәк. Јеһова бизим физики, емосионал вә руһани тәләбатларымызы истәнилән инсандан јахшы тәмин едә биләр! Әввәлдә ады чәкилән Бинјам буну өз һәјатында ҝөрмүшдү.

14. Бинјамын нүмунәсиндән нә өјрәндиниз?

¹⁴ Бинјам дөвләт тәрәфиндән амансыз тәгибләрә мәруз галаҹағыны билсә дә, о, јенә дә Јеһованын Шаһиди олду. Јеһованын севҝисинә әминлик Бинјама инсан горхусуна үстүн ҝәлмәјә көмәк етди. Ҝөрүн о нә дејир: «Тәгибләр дүшүндүјүмдән дә шиддәтли олду. Амма һөкумәтин тәгибиндән чох, гоһумларымын нә дејәҹәји мәни нараһат едирди. Горхурдум ки, Јеһованын Шаһиди олмаг гәрарым атамы мәјус едәҹәк. Үстәлик, гоһумларын да ҝөзүндән дүшәҹәјәм». Бүтүн  бунлара бахмајараг, Бинјам әмин иди ки, Јеһова севдији инсанларын гајғысына галыр. О дејир: «Мән Јеһованын Өз хидмәтчиләринә мадди чәтинликләрә, гәрәзли мүнасибәтә, гәзәбли күтләнин һүҹумуна дөзмәјә көмәк етдији барәдә дүшүндүм. Билирдим ки, Јеһоваја бағлы галсам, О мәни һеч вахт мүкафатсыз гојмајаҹаг. Дәфәләрлә һәбс олунмушам, дөјүлмүшәм. Амма һәр дәфә шаһид олмушам ки, садиг галдығымыз тәгдирдә, Јеһова бизә чох көмәк олур». Јеһова Бинјама әсл Ата, халгы исә әсл аилә олду.

15. Өлүм горхусунун олмасы нәјә ҝөрә тәбиидир?

¹⁵ Мүгәддәс Китабда дејилир ки, өлүм дүшмәндир (1 Кор. 15:25, 26). Өзүмүз вә ја әзизләримиз ағыр хәстә оланда адам өлүмдән лап горхур. Бәс бунун сәбәби нәдир? Чүнки Јеһова бизи әбәди јашамаг арзусу илә јарадыб (Ваиз 3:11). Мүәјјән дәрәҹәдә өлүм горхусунун олмасы јахшыдыр. Бу бизә һәјатымызы горумаға көмәк едир. Мәсәлән, бу бизи сағлам гидаланмаға, идманла мәшғул олмаға, лазым оланда һәкимә ҝетмәјә, мүалиҹә ҝөтүрмәјә тәшвиг едир вә һәјатымызы јерсиз јерә тәһлүкәјә атмагдан горујур.

16. Шејтан тәбии олан өлүм горхусу һиссимиздән неҹә истифадә едир?

¹⁶ Шејтан билир ки, ҹан ширин шејдир. Буна ҝөрә дә о иддиа едир ки, ҹанымыздан өтрү һәр шејдән, һәтта Јеһова илә достлуғумуздан белә кечәрик (Әјј. 2:4, 5). О, чох јанылыр. Амма билирик ки, «өлүм силаһларынын саһиби» олдуғу үчүн Шејтан тәбии олан өлүм горхусундан бизи Јеһовадан узаглашдырмаг үчүн истифадә едир (Ибр. 2:14, 15). Мәсәлән, Шејтанын тәсиринә ујан бәзи инсанлар иманымыздан дөнмәсәк, бизи өлдүрмәклә һәдәләјирләр. Јахуд һәјати риск дашыјан тибби вәзијјәт јарананда Шејтан етигадымыза зидд давранмағымыз үчүн бу вәзијјәти фүрсәт билир. Һәкимләр вә иманымыза шәрик олмајан аилә үзвләримиз бизә тәзјиг ҝөстәрә биләр ки, Аллаһын ганунуну позараг ган көчүрәк. Ја да Мүгәддәс Китаб принсипләринә зидд ҝедән мүалиҹә үсулуну гәбул етмәјимиз үчүн бизи дилә тута биләрләр.

17. Ромалылара 8:37—39 ајәләринә әсасән, нәјә ҝөрә өлүмдән горхмамалыјыг?

¹⁷ Биз өлмәк истәмирик, амма билирик ки, һәјатымыз сона јетсә дә, Јеһова бизи севмәкдән ваз кечмәјәҹәк. (Ромалылара 8:37—39 ајәләрини охујун.) Јеһова өлән достларыны јаддашында сахлајыр, Јеһованын ҝөзүндә онлар сағдырлар (Лука 20:37, 38). Јеһова онлары һәјата гајтармағын һәсрәтиндәдир (Әјјуб 14:15). Бизим әбәди һәјатымыз олсун дејә Јеһова јүксәк дәјәр өдәјиб (Јәһ. 3:16). Онун бизә биҝанә галмадығыны, бизи неҹә бөјүк мәһәббәтлә севдијини јахшы билирик. Буна ҝөрә дә хәстәләнәндә, јахуд өлүм тәһлүкәси илә үз-үзә дуранда Јеһовадан узаглашмагданса, тәсәлли, һикмәт вә ҝүҹ алмаг үчүн Она сығынмалыјыг. Валерија илә һәјат јолдашы мәһз белә давранмышды (Зәб. 41:3).

18. Валерија баҹыдан нә өјрәндиниз?

¹⁸ Валеријанын 35 јашы оланда онда хәрчәнҝин чох надир вә агрессив нөвү ашкар олунмушду. Ҝәлин ҝөрәк Јеһованын мәһәббәти она өлүм горхусуна үстүн ҝәлмәјә неҹә көмәк етмишди. О дејир: «Бу диагнозла һәјатымыз бир ҝеҹәнин ичиндә дәјишди. Мән чох ағыр бир әмәлијјат кечирмәли идим. Чохлу ҹәрраһлара мүраҹиәт етдик, амма һеч бири ган көчүрмәдән  әмәлијјат етмәјә разылашмады. Мән чох горхурдум, амма Аллаһын әмрини билдијим үчүн ган көчүрмәји ағлымдан белә кечирмирдим. Һәјатым боју Јеһова мәнә мәһәббәтини дәфәләрлә ҝөстәриб. Инди мәним Она севҝими сүбут етмәк имканым вар иди. Һәр дәфә һәкимдән пис хәбәр аланда Шејтанын галиб ҝәлмәмәси вә Јеһованын фәрәһләнмәси үчүн даһа да гәтијјәтли олурдум. Нәһајәт, мән ган көчүрүлмәдән әмәлијјат олуна билдим. Сәһһәтимлә бағлы проблемләрим һәлә дә вар. Амма Јеһова мәнә һәмишә лазым олан көмәји ҝөстәрир. Мәнә диагноз гојулмамышдан әввәлки һәфтә јығынҹагда “Буҝүнкү фәлакәтләрә ҹәсарәтлә синә ҝәр” адлы мәгаләни мүзакирә етмишдик *. Бу мәгалә дүз вахтында иди, биз бу мәгаләни тәкрар-тәкрар охудуг. Бу кими мәгаләләр вә руһани ишләрдә фәал олмаг јолдашымла мәнә тәлаша гапылмамаға вә дүзҝүн гәрарлар вермәјә көмәк етди».

19. Тезликлә нә баш верәҹәк?

¹⁹ Јеһованын көмәји сајәсиндә бүтүн дүнјадакы мәсиһиләр чәтинликләрин өһдәсиндән ҝәлирләр вә Иблисә мүгавимәт ҝөстәрирләр (1 Бут. 5:8, 9). Сиз дә буну баҹарарсыныз. Чох тезликлә Јеһова Иса Мәсиһә вә онун һәмварисләринә «Иблисин ишләрини дағытмаг» әмрини верәҹәк (1 Јәһ. 3:8). Бундан сонра Аллаһын халгынын «горху, дәһшәт үчүн бир сәбәб»и олмајаҹаг (Әшј. 54:14; Мик. 4:4). О вахта гәдәр исә горхуларымызы ашмаг үчүн вар ҝүҹүмүзлә чалышмалыјыг.

20. Горхуларымыза үстүн ҝәлмәјә бизә нә көмәк едә биләр?

²⁰ Биз Јеһованын Өз хидмәтчиләрини севдијинә вә онлары горудуғуна әминлијимизи мөһкәмләндирмәлијик. Кечмишдә Јеһованын хидмәтчиләринә неҹә дәстәк олдуғу һагда дүшүнмәк, баҹы-гардашларла бу һагда данышмаг бизә бу саһәдә көмәк едәҹәк. Һәмчинин Јеһованын чәтин вәзијјәтләримиздә шәхсән бизә неҹә дајаг олдуғуну јадда сахламалыјыг. Јеһованын көмәји илә биз бүтүн горхуларымыза үстүн ҝәлә биләрик! (Зәб. 34:4).