1. Сүлејман падшаһ Ваиз 7:20 ајәсиндә нәји вурғуламышды?

 СҮЛЕЈМАН падшаһ јазмышды: «Дүнјада елә салеһ адам јохдур ки, һеч вахт ҝүнаһ етмәсин, анҹаг јахшылыг етсин» (Ваиз 7:20). О, чох дүз дејиб, биз һамымыз ҝүнаһлыјыг (1 Јәһ. 1:8). Буна ҝөрә дә һәр биримиз һәм Аллаһын, һәм дә инсанларын бизи бағышламасына еһтијаҹ дујуруг.

2. Достумуз сәһвимизи бағышлајанда һансы һиссләри кечиририк?

² Нә вахтса достунузун гәлбинә дәјдијиниз јадыныздадыр? Јәгин, онун көнлүнү алмаг, әввәлки мүнасибәти гајтармаг үчүн ондан үзр истәмишдиниз. Бәс о сизи сәмими-гәлбдән бағышладығыны дејәндә һансы һиссләри кечирмишдиниз? Үрәјиниз раһатлыг тапмышды, һә? Үстәлик, чох хошбәхт идиниз!

3. Мәгаләдә нә һагда данышаҹағыг?

³ Биз истәјирик ки, Јеһова бизим ән јахын Достумуз олсун. Амма бәзән данышығымыз вә ја тутдуғумуз әмәл Она ағыр ҝедир. Бәс бу заман неҹә әмин ола биләрик ки, Јеһова бизи бағышламаға һазырдыр? Јеһованын бизи бағышламасы илә бизим бир-биримизи бағышламағымыз арасында һансы фәрг вар? Јеһова кимләри Өз әфвинә лајиг билир?

4. Јеһованын бағышлајан Аллаһ олдуғуну һарадан билирик?

⁴ Мүгәддәс Китабы охујанда әмин олуруг ки, Јеһова бағышлајан Аллаһдыр. Сина дағында Јеһова Өзүнү Муса пејғәмбәрә әјан едәндә мәләк васитәсилә белә демишди:  «Јеһова, Јеһова, рәһмли вә мәрһәмәтли, сәбирли, мәһәббәти бол, һәгигәти әнҝин олан Аллаһ. Минләрҹә нәсилләрә мәһәббәт ҝөстәрән, тәгсири, асилији вә ҝүнаһлары бағышлајан... Аллаһ» (Чых. 34:6, 7). Јеһова меһрибан, рәһмли Аллаһдыр. О, төвбә едән ҝүнаһкары бағышламаға һәмишә һазырдыр (Нәһ. 9:17; Зәб. 86:15).

5. Зәбур 103:13, 14 ајәләриндән ҝөрдүјүмүз кими, Јеһова бизим һаггымызда һәр шеји билдији үчүн бизимлә неҹә давраныр?

⁵ Јеһова Јараданымыз олдуғу үчүн бизим һаггымызда һәр шеји билир. Тәсәввүр едирсиниз, бу нә демәкдир?! Аллаһ јер үзүндәки һәр бир инсанын һәр зәррәсиндән аҝаһдыр (Зәб. 139:15—17). Демәли, О, валидејнләримиздән бизә кечән бүтүн гејри-камилликләри ҝөрүр. Бундан әлавә, Јеһова һәјатымызын һәр анындан хәбәрдардыр вә баша дүшүр ки, јашадыгларымыз хасијјәтимизин формалашмасында рол ојнајыр. Бүтүн бунлары билдији үчүн Јеһова бизимлә неҹә рәфтар едир? О бизә мәрһәмәт ҝөстәрир (Зәб. 78:39; Зәбур 103:13, 14 ајәләрини охујун).

6. Јеһова бизи бағышламаг истәдијини неҹә сүбут едиб?

⁶ Јеһова бизи бағышламаг истәдијини артыг сүбут едиб. О билир ки, биз Адәмин уҹбатындан ҝүнаһын вә өлүмүн ләнәтинә дүчар олмушуг (Ром. 5:12). Биз нә өзүмүзү, нә дә башгаларыны бу ләнәтдән гуртара билмәздик (Зәб. 49:7—9). Мәһәббәтли Аллаһымыз Јеһова һалымыза аҹыјыб, бизи ҝүнаһын әсарәтиндән гуртармаг үчүн тәдбир ҝөрдү. О һансы тәдбири ҝөрдү? Јәһја 3:16 ајәсиндә гејд олундуғу кими, јеҝанә Оғлуну бизим уғрумузда гурбан верди (Мәт. 20:28; Ром. 5:19). Иса бизим јеримизә өлүмүн ҹәзасыны чәкди ки, она иман едәнләри азад етсин (Ибр. 2:9). Әзиз Оғлунун алчалдыҹы, әзаблы өлүмүнү ҝөрмәк Јеһова үчүн чох ағрылы иди. Әлбәттә ки, Јеһова бизи бағышламаг истәмәсә иди, Оғлунун белә әзаблы өлүмүнә һеч вахт изин вермәзди.

7. Јеһова кимләри үрәкдән бағышламышды?

⁷ Мүгәддәс Китабда Јеһованын үрәкдән бағышладығы чох инсанын һадисәси јазылыб (Ефес. 4:32). Сизин ағлыныза ким ҝәлир? Јәгин, Мәнәссә падшаһ. О, бәдәмәл инсан иди,  Јеһоваја гаршы дәһшәтли ҝүнаһлар етмишди. О, өлкәдә јалан ибадәти јајмышды. Оғулларыны сахта аллаһлара гурбан ҝәтириб одда јандырмышды. Һәтта Јеһованын мүгәддәс мәбәдиндә ојма бүт гојмушду. Мүгәддәс Китабда јазылыб ки, о, «Јеһованын бәјәнмәдији мәнфур ишләр ҝөрүб Ону тәһгир етди» (2 Салн. 33:2—7). Бүтүн бунлара бахмајараг, Мәнәссә сәмими-гәлбдән төвбә едәндә Јеһова ону бағышлады вә һәтта ону тахтына гајтарды (2 Салн. 33:12, 13). Бәлкә дә, ағлыныза Давуд падшаһ да ҝәлди. О, зина, гатиллик вә диҝәр ағыр ҝүнаһлар етмишди. Амма о, ҝүнаһыны бојнуна алыб, үрәкдән төвбә едәндә Јеһова ону бағышламышды (2 Ишм. 12:9, 10, 13, 14). Бу һадисәләр ҝөстәрир ки, Јеһова бизи бағышламаға һазырдыр. Ҝөрәҹәјимиз кими, Јеһованын әфв етмә габилијјәти бәнзәрсиздир.

8. Јеһованын бағышламаг габилијјәти бәнзәрсиз Һаким олмасы илә неҹә әлагәлидир?

⁸ Јеһова «бүтүн дүнјанын Һакими»дир (Јар. 18:25). Јахшы һаким ганунун бүтүн инҹәликләрини билмәлидир. Јеһова да гануна јахшы бәләддир, чүнки О, Һакимимиз олмагла јанашы, Ганунверәнимиздир (Әшј. 33:22). Нәјин јахшы, нәјин пис олдуғуну Јеһовадан әла һеч ким билә-билмәз. Јахшы һакимдән даһа нәләр ҝөзләнилир? О, гәрар чыхармаздан өнҹә бүтүн фактлары билмәлидир. Бу да Јеһованы бир Һаким кими үстүн едән мәгамлардандыр.

9. Јеһова бағышлајыб-бағышламамаг гәрарыны һансы фактлар әсасында верир?

⁹ Инсан һакиминдән фәргли олараг, Јеһова истәнилән мәсәлә илә бағлы бүтүн фактлары мүкәммәл шәкилдә билир (Јар. 18:20, 21; Зәб. 90:8). О, инсанларын ҝөрдүкләри вә ешитдикләри шејләр әсасында гәрар чыхармыр. О билир ки, инсанын давранышына ҝенетикасы, бөјүдүјү мүһит, алдығы тәрбијә, һәмчинин емосионал вә әгли сағламлығы тәсир едә биләр. Бундан әлавә, Јеһова инсанларын үрәјини ҝөрүр. Онларын нијјәтини, мәгсәдини, истәјини әлинин ичи кими билир. Ондан һеч нәји ҝизләтмәк мүмкүн дејил (Ибр. 4:13). Демәли, Јеһова инсанын вәзијјәтини һәртәрәфли билир вә бағышлајаркән бунлары нәзәрә алыр.

10. Јеһованын чыхардығы һөкмүн һәмишә әдаләтли олдуғуну нәјә әсасән дејә биләрик? (Ганунун тәкрары 32:4).

¹⁰ Јеһованын чыхардығы һөкм һәмишә әдаләтлидир. О, тамамилә гәрәзсиздир. Јеһова инсаны вар-дөвләтинә, мөвгејинә, баҹарығына, гара гашына-гара ҝөзүнә ҝөрә бағышламыр (1 Ишм. 16:7; Јаг. 2:1—4). Һеч кәс Она тәзјиг ҝөстәрә билмәз, рүшвәт верә билмәз (2 Салн. 19:7). Јеһованын гәрарлары нә гәзәбдән ирәли ҝәлир, нә дә үрәји јумушаглыгдан (Чых. 34:7). Бәли, әнҝин һикмәтә, ити бәсирәтә саһиб олдуғу үчүн Јеһова ән јахшы Һакимдир. (Ганунун тәкрары 32:4 ајәсини охујун.)

11. Јеһованын әфвини бәнзәрсиз едән нәдир?

¹¹ Төвраты гәләмә аланлар Јеһованын  әфвинин бәнзәрсиз олдуғуну анлајырдылар. Онларын истифадә етдикләри бир ибрани сөзү илә бағлы бир мәнбәдә мараглы фикир вурғуланыр: «Бу сөз јалныз Аллаһын ҝүнаһ ишләјән инсаны бағышламасына аид ишләнир. Бу сөз һеч вахт мәһдуд вә ҹүзи өлчүдә олан әфвә, јәни инсанын инсаны бағышламасына аид ишләнмир». Ҝүнаһ ишләјән инсаны бүтөвлүклә бағышламаға јалныз Аллаһын сәлаһијјәти вар. О бизи бағышлајанда һансы һиссләри кечиририк?

12, 13. а) Јеһованын әфви инсанда һансы һиссләри һасил едир? б) Јеһова бизи нә гәдәр мүддәтә бағышлајыр?

¹² Јеһованын бизи бағышладығыны гәбул едәндә үзәримизә «тәравәт мөвсүмү» ҝәлир, гәлб раһатлығымыз вә тәмиз виҹданымыз олур. Јалныз Јеһова бизи бағышлајанда биз бу ҹүр һиссләр кечиририк (Һәв. 3:19). Јеһова бизи бағышлајанда бизимлә мүнасибәтләрини там шәкилдә бәрпа едир, санки биз һеч вахт ҝүнаһ етмәмишик.

¹³ Јеһова бизи бағышлајанда даһа һеч вахт һәмин ҝүнаһымыза ҝөрә бизи тәгсирләндирмир вә ја ҹәза вермир (Әшј. 43:25; Әрм. 31:34). «Шәрг гәрбдән нә гәдәр узагдырса», Јеһова да ҝүнаһларымызы биздән о гәдәр узаглашдырыр * (Зәб. 103:12). Јеһованын әфвинин бөјүклүјү һагда дүшүнәндә гәлбимиз шүкранла вә еһтирамла долур (Зәб. 130:4). Бәс Јеһова кимләри Өз әфвинә лајиг билир?

14. Өјрәндикләримизә әсасән, Јеһова бизи бағышлајыб-бағышламамаға нәјин әсасында гәрар верир?

¹⁴ Ҝөрдүјүмүз кими, Јеһованын инсаны бағышлајыб-бағышламамасы ҝүнаһын бөјүклүјүндән вә ја кичиклијиндән асылы дејил. Һәмчинин өјрәндик ки, Јеһова бизи бағышлајыб-бағышламамаға гәрар верәндә Јарадан, Ганунверән вә Һаким кими саһиб олдуғу биликләрә әсасланыр. Бәс Јеһова һансы амилләри нәзәрә алыр?

15. Лука 12:47, 48 ајәләринә әсасән, Јеһова гәрар верәркән һансы амили нәзәрә алыр?

¹⁵ Јеһованын нәзәрә алдығы амилләрдән бири будур: инсан тутдуғу әмәлин ҝүнаһ олдуғуну билирди? Лука 12:47, 48  ајәләриндә бунун ваҹиб мәгам олдуғу ачыг-ајдын ҝөстәрилир. (Ајәләри охујун.) Планлы шәкилдә ҝүнаһ иш тутан вә едәҹәји әмәлин Јеһоваја аҹыг ҝетдијини билән инсан ҹидди ҝүнаһ ишләјир. Јеһова белә инсаны бағышламамаг гәрарына ҝәлә биләр (Марк 3:29; Јәһ. 9:41). Амма ачыг данышсаг, бәзән биз һансыса һәрәкәтин јанлыш олдуғуну билсәк дә, ону едирик. Бәс белә һалда Јеһованын бизи бағышлајаҹағына үмид вар? Бәли, вар. Чүнки бу заман Јеһова башга бир амили дә нәзәрә алыр.

16. Төвбә нәдир вә нәјә ҝөрә Јеһованын бизи бағышламасы үчүн төвбә етмәк ваҹибдир?

¹⁶ Јеһованын нәзәрә алдығы диҝәр амил ҝүнаһ едән инсанын үрәкдән төвбә едиб-етмәмәсидир. Төвбә етмәк нә демәкдир? Бу, инсанын «дүшүнҹәсини, мүнасибәтини, јахуд нијјәтини дәјишмәси» демәкдир. Төвбә едән инсан тутдуғу пис әмәлә ҝөрә, јахуд Аллаһын бәјәндији кими давранмадығына ҝөрә пешман олур вә дәрин кәдәр һисси кечирир. О мәјус олур ки, Јеһова илә мүнасибәтләринин зәифләмәсинә јол вериб вә нәтиҹәдә бу ҝүнаһы ишләјиб. Мәнәссә илә Давуд падшаһы јадымыза салаг. Онларын һәр икиси ҹидди ҝүнаһ ишләмишди, амма үрәкдән төвбә етдикләринә ҝөрә Јеһова онлары бағышламышды (1 Пад. 14:8). Бәли, Јеһова бизи төвбә етдијимиз тәгдирдә бағышлајыр. Амма етдијимиз ҝүнаһа ҝөрә пешман олмаг кифајәт дејил, биз лазыми аддымлары атмалыјыг *. Бу јердә кечирик диҝәр амилә.

17. Дөнмәк нәдир вә нәјә ҝөрә ваҹибдир? (Әшија 55:7).

¹⁷ Јеһованын нәзәрә алдығы диҝәр амил ҝүнаһ едән инсанын пис јолундан дөнмәсидир. «Дөнмәк» инсанын пис һәрәкәтләринә сон гојуб, Јеһованын бәјәндији кими һәјат тәрзи сүрмәси демәкдир. (Әшија 55:7 ајәсини охујун.) Инсан дүшүнҹә тәрзини дәјишиб Јеһованын дүшүнҹәсини һәјатында рәһбәр тутмалыдыр (Ром. 12:2; Ефес. 4:23). О, јанлыш дүшүнҹә вә һәрәкәтләринә сон гојмаға  гәти-гәрарлы олмалыдыр (Кол. 3:7—10). Әлбәттә, мәһз Мәсиһин фидјә гурбанлығына иманымыз Јеһоваја бизи бағышламаға вә ҝүнаһларымыздан тәмизләмәјә әсас верир. Јеһова ҝөрәндә ки, биз давранышымызы дәјишмәк үчүн әлимиздән ҝәләни едирик, фидјә гурбанлығы әсасында бизи бағышлајыр (1 Јәһ. 1:7).

18. Јеһованын әфви илә бағлы нәји арашдырдыг?

¹⁸ Ҝәлин әсас фикирләри гысаҹа тәкрарлајаг. Каинатда бағышламагда Јеһоваја тај олан икинҹи варлыг јохдур. Нәјә әсасән белә дејирик? Биринҹиси, О, бағышламаға һәмишә һазырдыр. Икинҹиси, һеч кәс бизи Онун гәдәр танымыр. О бизимлә бағлы һәр шејдән аҝаһдыр вә үрәкдән төвбә едиб-етмәдијимизи Ондан јахшы һеч ким билә билмәз. Үчүнҹүсү, Јеһова бизим ҝүнаһларымызы елә силир ки, онларын һеч изи-тозу да галмыр. Бунун сајәсиндә виҹданымыз тәмиз олур вә Јеһованын рәғбәтини газанырыг.

19. Нәјә ҝөрә биз гејри-камил олмағымыза, сәһвләр етмәјимизә бахмајараг, севинә биләрик?

¹⁹ Әлбәттә, һәлә ки биз гејри-камилик, ҝүнаһа јол веририк вә верәҹәјик. Јеһова хидмәтчиләринин ҹисмани зәифликләринә мәрһәмәтлә јанашдығы үчүн онлар мирас алдыглары гејри-камиллик уҹбатындан етдикләри сәһвләрә ҝөрә даим виҹдан әзабы чәкмәмәлидирләр (Зәб. 103:8—14; 130:3). Әҝәр онлар Јеһованын бујругларына ујғун јашамаг үчүн вар ҝүҹләри илә чалышырларса, севинә биләрләр (Филип. 4:4—6; 1 Јәһ. 3:19—22). Бу, неҹә дә руһландырыҹы фикирдир!

20. Нөвбәти мәгаләдә нә һагда данышаҹағыг?

²⁰ Јеһоваја шүкүрләр олсун ки, биз үрәкдән төвбә едәндә бизи бағышлајыр. Бәс биз Јеһовадан бағышламаг саһәсиндә неҹә өрнәк ала биләрик? Бизим кимисә бағышламағымызла Јеһованын бағышламасы арасында һансы охшарлыг вә һансы фәрг вар? Бу фәрги баша дүшмәк нәјә ҝөрә өнәмлидир? Нөвбәти мәгаләдә бу суалларын ҹавабыны тапаҹағыг.