1. а) Јеһова бизә һансы үмиди вериб? б) Үмидимизи Јеһоваја бағламаг нә демәкдир? («Бәзи ифадәләрин изаһы»на бахын.)

 ЈЕҺОВА Ону севән һәр кәсә ҝөзәл үмид вериб. Тезликлә О, хәстәликләрә, ағры-аҹыја вә өлүмә сон гојаҹаг (Вәһј 21:3, 4). Јеһова Она ҝүвәнән кәсләрә, һәлимләрә јер үзүнү ҹәннәтә чевирмәјә көмәк едәҹәк (Зәб. 37:9—11). Јеһова Онунла индикиндән гат-гат мөһкәм мүнасибәтә саһиб олмағымызы мүмкүн едәҹәк. Бу неҹә дә мөһтәшәм үмиддир! Бәс Јеһованын бүтүн вәдләрини һәјата кечирәҹәјинә нәјә ҝөрә әмин ола биләрик? Чүнки Јеһова һәмишә вердији сөзүн үстүндә дурур. Одур ки, Она үмид бағламағымыз әсассыз дејил * (Зәб. 27:14). Јеһоваја үмид етдијимизи исә Онун вәдини јеринә јетирмәсини севинҹлә вә сәбирлә ҝөзләмәклә ҝөстәририк (Әшј. 55:10, 11).

2. Јеһова бизим дөврүмүздә һансы вәдини јеринә јетириб?

² Јеһова вәдләрини јеринә јетирдијини артыг сүбут едиб. Ҝәлин буна аид бариз бир нүмунәјә бахаг. «Вәһј» китабында Јеһова вәд етмишди ки, бизим дөврдә О, һәр милләтә, гәбиләјә вә дилә мәнсуб адамлары пак ибадәтдә бирләшдирәҹәк. Бу хүсуси груп «бөјүк... издиһам» адланыр (Вәһј 7:9, 10). Бахмајараг ки, онларын сырасында мүхтәлиф иргләрдән, дилләрдән вә мәншәләрдән олан киши, гадын вә ушаглар вар, онлар бөјүк, меһрибан бир аиләдир (Зәб. 133:1; Јәһ. 10:16). Онлар һәмчинин шөвглү тәблиғчиләрдир.  Бөјүк издиһам ҝөзәл ҝәләҹәклә бағлы үмидләрини онлары динләмәк истәјән һәр кәслә бөлүшүр (Мәт. 28:19, 20; Вәһј 14:6, 7; 22:17). Әҝәр сиз дә бөјүк издиһама аидсинизсә, ҝәләҹәкдә һәр шејин јахшы олаҹағына үмидиниз, шүбһәсиз, сизин үчүн чох гијмәтлидир.

3. Шејтанын нијјәти нәдир?

³ Шејтанын нијјәти бизим үмидимизи өлдүрмәкдир. Шејтан бизи инандырмаға чалышыр ки, биз Јеһова үчүн өнәмли дејилик вә Јеһова вәдләрини јеринә јетирмәјәҹәк. Әҝәр Шејтан буна наил олса, биз ҹәсарәтимизи итирәрик вә һәтта Јеһоваја хидмәти дајандырарыг. Мәгаләдә ҝөрәҹәјик ки, Шејтан Әјјубун үмидини итирмәси вә Јеһоваја ибадәт етмәмәси үчүн һәр шејә әл атды.

4. Бу мәгаләдә нә һагда данышаҹағыг? (Әјјуб 1:9—12).

⁴ Бу мәгаләдән өјрәнәҹәјик ки, Шејтан Әјјубун сәдагәтини сындырмаг үчүн һансы фәндләрә әл атмышды. (Әјјуб 1:9—12 ајәләрини охујун.) Һәмчинин арашдыраҹағыг ки, Әјјуб пејғәмбәрдән нә өјрәнә биләрик вә Аллаһын бизи севдијини вә вәдләрини һәјата кечирәҹәјини нәјә ҝөрә унутмамалыјыг.

5, 6. Гыса вахт әрзиндә Әјјубун башына нәләр ҝәлди?

⁵ Әјјуб пејғәмбәр фираван өмүр сүрүрдү. Онун Јеһова илә сых мүнасибәти вар иди. О, бөјүк, хошбәхт аиләјә, вар-дөвләтә саһиб иди (Әјј. 1:1—5). Амма бир ҝүнүн ичиндә Әјјуб, демәк олар ки, һәр шејини итирди. Әввәлҹә онун мал-һејваны тәләф олду (Әјј. 1:13—17). Сонра исә бүтүн өвладлары өлдү. Тәсәввүр едирсиниз, бу неҹә бөјүк фаҹиә иди? Валидејнләр бир өвладларыны итирәндә дүнјалары алт-үст олур. Ҝөрүн инди Әјјубла арвады биләндә ки, бүтүн өвладлары һәлак олуб, неҹә бөјүк сарсынты кечирмишдиләр, јаса батмышдылар. Елә буна ҝөрә дә Әјјуб кәдәр ичиндә јахасыны ҹырыб, јерә дөшәнди (Әјј. 1:18—20).

⁶ Сонра исә Шејтан Әјјубу дәһшәтли хәстәлијә дүчар едәрәк ону алчалтды (Әјј. 2:6—8; 7:5). Һалбуки бир вахтлар Әјјуб ҹәмијјәт ичиндә сајылыб-сечилән инсан иди. Инсанлар онун јанына мәсләһәтә ҝәлирдиләр (Әјј. 29:7, 8, 21). Инди исә һамы ондан ҝен ҝәзирди. Онун гардашлары, достлары, һәтта нөкәрләри ондан үз дөндәрмишдиләр! (Әјј. 19:13, 14, 16).

7. а) Әјјуб әзабларынын сәбәбини нәдә ҝөрүрдү, амма буна бахмајараг, о нә етмәди? б) Шәклә бахын. Мәсиһиләр буна бәнзәр һансы сынагла үзләшә биләрләр?

⁷ Шејтан истәјирди ки, Әјјуб Јеһованын ондан наразы олдуғуну вә буна ҝөрә дә башына белә бәлаларын ҝәлдијини дүшүнсүн. Мәсәлән, Әјјубун он өвлады бир јерә јығышыб јејиб-ичән вахт Шејтан ҝүҹлү туфан васитәсилә еви онларын башына учуртду (Әјј. 1:18, 19). О һәмчинин ҝөјдән од јағдырараг Әјјубун һәм сүрүләрини, һәм дә чобанларыны мәһв етди (Әјј. 1:16). Туфан вә од ҝөјдән ҝәлдији үчүн Әјјуб елә фикирләшди ки, бунлары едән Аллаһдыр вә демәли, Аллаһ ондан наразыдыр. Бунунла белә, Әјјуб Аллаһа ләнәт охумады. О, илләр әрзиндә Јеһовадан чохлу немәтләр алмышды. Буна ҝөрә дә белә гәнаәтә ҝәлди ки, јахшы шејләри шүкранлыгла гәбул етдији кими, пис шејләри дә гәбул етмәлидир. Әјјуб белә демишди: «Јеһованын адына алгыш олсун» (Әјј. 1:20, 21; 2:10). Ҝөрдүјүмүз кими,  Әјјуб вар-дөвләтини, өвладларыны, сағламлығыны итирсә дә, Јеһоваја садиг галды. Амма Шејтанын һәлә ондан әл чәкмәк фикри јох иди.

8. Шејтан Әјјуба гаршы даһа һансы фәнди ишләтди?

⁸ Шејтан Әјјуба гаршы даһа бир фәнд ишләтди: Әјјубун үч сахта досту васитәсилә онун өзүнә дәјәр һиссини өлдүрмәјә ҹәһд етди. Бу адамлар иддиа едирдиләр ки, Әјјубун башына ҝәләнләр тутдуғу пис әмәлләрин ҹәзасыдыр (Әјј. 22:5—9). Онлар һәмчинин Әјјубу инандырмаға чалышырдылар ки, Аллаһын ҝөзүндә онун ҝөрдүјү јахшы ишләрин һеч бир дәјәри јохдур (Әјј. 4:18; 22:2, 3; 25:4). Беләликлә дә, онлар Әјјубун үрәјиндә Аллаһын ону севдијинә, онун гејдинә галаҹағына, ибадәтини гијмәтләндирдијинә шүбһә ојатмаға чалышырдылар. Онларын сөзләринин уҹбатындан Әјјуб вәзијјәтинин үмидсиз олдуғуну дүшүнә биләрди.

9. Әјјуба ҹәсарәтли вә мөһкәм олмаға нә көмәк етмишди?

⁹ Тәсәввүр един, Әјјуб күлүн ичиндә отуруб вә ағрыдан инилдәјир (Әјј. 2:8). Инсафсыз достлары исә онун мәнлијини алчалдырлар, ону ҝөздән салмаға чалышырлар. Бир тәрәфдән өвлад иткиси онун үрәјини парча-парча едир, бир тәрәфдән дә үзләшдији сынаглар санки ағыр бир даш кими онун чијинләриндәдир. Әјјуб әввәл-әввәл һеч нә демир (Әјј. 2:13—3:1). Буну ҝөрән достлары Әјјубун Јараданындан үз дөндәрдији үчүн сусдуғуну дүшүнүрләрсә, јанылырлар. Һансыса бир мәгамда Әјјуб, бәлкә дә, достларынын дүз ҝөзүнүн ичинә бахараг дејир: «Мән сон нәфәсимәдәк садиг галаҹағам!» (Әјј. 27:5). Бу гәдәр әзаба бахмајараг, Әјјуба белә ҹәсарәтли вә мөһкәм олмаға нә көмәк етмишди? О, ән чарәсиз анында белә, бир ҝүн Аллаһын онун әзабларына сон гојаҹағына үмидини  итирмирди. Билирди ки, һәтта өлсә белә, Јеһова ону дирилдәҹәк (Әјј. 14:13—15).

10. Әјјубун һадисәсиндән нә өјрәнирик?

¹⁰ Әјјубун һадисәсиндән өјрәнирик ки, Шејтан бизи Јеһовадан зорла дөндәрә билмәз. Һәмчинин Јеһова үзләшдијимиз һәр бир вәзијјәтдән аҝаһдыр. Әјјубун әһвалатындан башга ваҹиб дәрсләр дә өјрәнирик. Ҝәлин онлардан бәзиләрини арашдыраг.

11. Даим Јеһоваја ҝүвәнириксә, нәдән архајын ола биләрик? (Јагуб 4:7).

¹¹ Әҝәр биз Јеһоваја ҝүвәнмәјә давам етсәк, истәнилән сынаға таб ҝәтирә биләрик вә Шејтана мүвәффәгијјәтлә гаршы дура биләрик. Мүгәддәс Китаб бизи әмин едир ки, әҝәр белә етсәк, Иблис биздән гачаҹаг. (Јагуб 4:7 ајәсини охујун.)

12. Дирилмә үмиди Әјјубу неҹә мөһкәмләндирмишди?

¹² Биз дирилмә үмидиндән бәрк-бәрк јапышмалыјыг. Әввәлки мәгаләдә гејд олундуғу кими, Шејтан өлүм горхусу васитәсилә бизим сәдагәтимизи сындырмаг истәјир. Әјјубла бағлы һадисәдә Шејтан иддиа едирди ки, Әјјуб һәјатыны хилас етмәк үчүн һәр шејдән кечәр, һәтта Аллаһдан үз дөндәрәр. Шејтан јанылырды. Әјјуб һәјатынын ән ағыр дөнәминдә, өлүмүн бир аддымлығында белә, Аллаһа садиг галды. Әјјуб билирди ки, Јеһова кәрамәтлидир вә һәр шеји ҝеҹ-тез јолуна гојаҹаг. Бу үмид она ҝүҹ верирди. Һәм дә инанырды ки, о, сағ икән Јеһова һәр шеји јолуна гојмаса да, ону ҝәләҹәкдә дирилдәҹәк. Дирилмә үмиди Әјјуб үчүн ҝерчәк иди. Әҝәр бу үмид бизим үчүн дә ҝерчәкдирсә, һәтта өлүм тәһлүкәси гаршысында садиглијимизи горујаҹағыг.

13. Шејтанын Әјјуба гаршы ишләтдији фәндләрә нәјә ҝөрә диггәт јетирмәлијик?

¹³ Биз Шејтанын Әјјуба гаршы истифадә етдији фәндләрә диггәт јетирмәлијик. Чүнки о, бу ҝүн дә ејни фәндләрдән истифадә едир. Ҝөрүн Шејтан нәји иддиа етмишди: «Инсан [тәкҹә Әјјуб јох] ҹанындан өтрү һәр шејини верәр» (Әјј. 2:4, 5). Бу сөзләрлә о демәк истәјирди ки, биз Аллаһы севмирик, һәјатымызы хилас етмәкдән өтрү Аллаһдан үз дөндәрәрик. Үстәлик, о иддиа едир ки, Аллаһ бизи севмир вә Ону разы салмаг үчүн ҝөрдүјүмүз ишләрә әһәмијјәт вермир. Шејтанын фәндләриндән аҝаһ олдуғумуз үчүн онун јаланларына алданмырыг.

14. Сынаглар биздә нәји ашкар едә биләр? Нүмунә чәкин.

¹⁴ Биз сынаглара өзүмүзү танымаг фүрсәти кими бахмалыјыг. Әјјубун үзләшдији сынаглар өз зәиф ҹәһәтләрини ҝөрмәјә вә онлары дүзәлтмәјә көмәк етди. Мәсәлән, о баша дүшдү ки, даһа да тәвазөкар олмалыдыр (Әјј. 42:3). Биз дә сынагларла үзләшәндә өзүмүз һаггында чох шеји үзә чыхара биләрик. Николај * адлы гардашын сағламлығында ҹидди проблем ола-ола ону һәбс етмишдиләр. О дејир: «Һәбсхана рентҝен апараты кимидир, мәсиһинин дахили хүсусијјәтләрини үзә чыхарыр». Биз зәиф ҹәһәтләримизи биләндән сонра онларын үзәриндә ишләмәлијик.

15. Биз кимә гулаг асмалыјыг вә нәјә ҝөрә?

¹⁵ Биз дүшмәнләримизә јох, Јеһоваја гулаг асмалыјыг. Јеһова Әјјубла данышанда Әјјуб она диггәтлә гулаг асырды. Аллаһ ону дүшүндүрәрәк, бир нөв, белә демишди: «Јарадылыша баханда Мәним гүдрәтими ҝөрүрсән? Сәнин башына ҝәлән  һәр шејдән хәбәрим вар. Елә билирсән, сәнин гајғына гала билмәрәм?» Әјјуб тәвазөкарлыгла вә Јеһованын кәрамәтинә дәрин шүкранла белә ҹаваб верди: «Гулағым Сәнин сорағыны алмышды, инди исә Сәни ҝөзүм ҝөрүр» (Әјј. 42:5). Чох ҝүман ки, Әјјуб бу сөзләри дејәркән һәлә дә күл ичиндә отурмушду, бәдәни јара-хора ичиндә иди, ушаглары исә мәзарда иди. Амма Јеһова Әјјубу әмин етди ки, ону севир вә ондан разыдыр (Әјј. 42:7, 8).

16. Әшија 49:15, 16 ајәләринә әсасән, сынаглар заманы нәји јадда сахламалыјыг?

¹⁶ Бу ҝүн дә, ола биләр, бәзи инсанлар бизи тәһгир етсин, бизә сајмазјана јанашсын. Онлар һәм бизим, һәм дә тәшкилатымыз һагда «һәр ҹүр јалан вә пис сөз» даныша биләрләр (Мәт. 5:11). Әјјубун һадисәсиндән ҝөрдүјүмүз кими, Јеһова сынаглар заманы Она садиг галаҹағымыза инаныр. Јеһова бизи севир вә Она үмид едәнләри һеч вахт тәрк етмәјәҹәк. (Әшија 49:15, 16 ајәләрини охујун.) Јеһованын дүшмәнләринин бөһтанларына гулаг асмајын! Түркијәдән олан Јагуб гардаш вә аиләси бөјүк сынагларла үзләшиб. О дејир: «Биз баша дүшүрдүк ки, Аллаһын халгы һаггында јаланлара гулаг асмаг бизи руһдан салаҹаг. Буна ҝөрә дә диггәтимизи ҝәләҹәјә олан үмидимизә ҹәмләдик вә фәал шәкилдә Јеһоваја хидмәт етдик. Беләҹә, севинҹимизи горуја билдик». Әјјуб кими, биз дә Јеһоваја гулаг асырыг! Дүшмәнләримизин јаланлары үмидимизи өлдүрә билмәз.

17. Ибраниләрә 11-ҹи фәсилдә ады чәкилән садиг киши вә гадынлардан нә өјрәнирсиниз?

¹⁷ Әјјуб пејғәмбәр ағыр сынаглар заманы ҹәсарәтли вә мөһкәм галан Јеһованын хидмәтчиләриндән садәҹә биридир. Һәвари Булус ибраниләрә мәктубунда «бөјүк шаһидләр булуду» адландырдығы бир чох Јеһованын хидмәтчисинин адыны чәкмишди (Ибр. 12:1). Онлар ағыр сынаглардан кечмишдиләр, буна бахмајараг, һәјатлары боју Јеһоваја сәдагәтләрини горумушдулар (Ибр. 11:36—40). Ҝөрәсән, онларын ҝөрдүјү ишләр, ҝөстәрдикләри дөзүм әбәс јерә иди? Гәтијјән јох! Онлар сағ олдуглары мүддәтдә Јеһованын бүтүн вәдләринин һәјата кечдијини ҝөрмәсәләр дә, үмидләрини һәмишә Јеһоваја бағламышдылар. Онлар Јеһованын разылығыны газандыгларына әмин олдуглары үчүн Онун вәдләринин јеринә јетдијини ҝөрәҹәкләринә дә әмин идиләр (Ибр. 11:4, 5). Онларын нүмунәси бизә ҝүҹ верир ки, бундан сонра да үмидимизи Јеһоваја бағлајаг.

18. Сиз нәјә гәти гәрарлысыныз? (Ибраниләрә 11:6).

¹⁸ Јашадығымыз бу дүнја ҝет-ҝедә даһа бетәр һала дүшүр (2 Тим. 3:13). Шејтан Аллаһын халгыны сынамаға һәлә дә давам едир. Ҝәләҹәкдә һансы чәтинликлә үзләшириксә-үзләшәк, Јеһованын јолунда вар ҝүҹүмүзлә чалышмаға гәтијјәтли олмалыјыг. Чүнки биз «үмидимизи... вар олан Аллаһа бағламышыг» (1 Тим. 4:10). Јадда сахлајын ки, Әјјубун сонда алдығы немәтләр ҝөстәрир ки, «Јеһова чох меһрибан вә мәрһәмәтлидир» (Јаг. 5:11). Ҝәлин биз дә Јеһоваја садиг галаг вә әмин олаг ки, Јеһова «Ону ҹидд-ҹәһдлә ахтаранлара мүкафат» верәҹәк. (Ибраниләрә 11:6 ајәсини охујун.)