Мүгәддәс Китабда бунунла бағлы һеч нә дејилмир. Амма орада мараглы тәфсилатлар вар. Бунлар бизә онларын гәрарынын сәбәбини тәхмин етмәјә көмәк едә биләр.

Мәләк Мәрјәмә демишди ки, о, һамилә галаҹаг вә дүнјаја ушаг ҝәтирәҹәк. Мәләк бу хәбәри чатдыранда Јусифлә Мәрјәм Ҹәлиләнин Насирә шәһәриндә јашајырды (Лука 1:26—31; 2:4). Сонралар онлар бир мүддәт Мисирдә галыб Насирәјә гајытмышдылар. Иса Насирәдә бөјүмүшдү, буна ҝөрә дә нәсрани адланырды (Мәт. 2:19—23). Елә бу сәбәбдән Иса, Јусиф вә Мәрјәм барәдә дүшүнәндә ағлымыза илк нөвбәдә Насирә ҝәлир.

Мәрјәмин Јәһудада јашајан Илсәба адлы гоһуму вар иди. Илсәба каһин Зәкәријјәнин арвады вә Вәфтизчи Јәһјанын анасы иди (Лука 1:5, 9, 13, 36). Мәрјәм Илсәбаја баш чәкмәјә ҝетмишди вә үч ај Јәһудада онун јанында галмышды. Бу вахт әрзиндә Мәрјәм Јәһуда әразисини аз-чох танымышды. Сонра исә Насирәјә гајытмышды (Лука 1:39, 40, 56).

Бир мүддәт сонра ромалылар фәрман верди ки, «һәр кәс гејдијјатдан кечмәк үчүн өз шәһәринә» ҝетсин. Јусиф дә бу фәрмана ујғун олараг Насирәдән Бејтләһмә јола дүшдү. Бејтләһм Давудун шәһәри адланырды вә пејғәмбәрлијә әсасән Мәсиһ орада дүнјаја ҝәлмәли иди (Лука 2:3, 4; 1 Ишм. 17:15; 20:6; Мик. 5:2). Орада Мәрјәм Исаны дүнјаја ҝәтирди. Јусифин үрәји ҝәлмәди ки, Мәрјәми көрпә ушагла узун јола чыхарсын. Она ҝөрә дә онлар Насирәјә гајытмадылар, Бејтләһмдә галдылар. Бу шәһәр Јерусәлимдән тәхминән 9 километр узаглыгда олдуғу үчүн онлар раһатлыгла көрпәләрини мәбәдә апарыб тәләб олунан гурбанлары ҝәтирә биләрдиләр (Лав. 12:2, 6—8; Лука 2:22—24).

Бундан әввәл мәләк Мәрјәмлә данышанда демишди ки, онун оғлуна «Давудун тахты» вериләҹәк вә о, «һөкмранлыг едәҹәк». Бәлкә дә Јусифлә Мәрјәм белә гәнаәтә ҝәлмишди ки, Исанын Давудун шәһәриндә дүнјаја ҝәлмәси әбәс јерә дејил (Лука 1:32, 33; 2:11, 17). Она ҝөрә дә, јәгин, онлар дүшүнүрдүләр ки, јахшысы будур, Бејтләһмдә галсынлар вә Аллаһдан нөвбәти тапшырыг алана кими ҝөзләсинләр.

Мүнәҹҹимләр Мәрјәмҝилә ҝәләндә онлар бир мүддәт иди ки Бејтләһмдә идиләр, амма орада дәгиг нечә вахт олдугларыны билмирик. Бунунла белә, билирик ки, һәмин вахт онлар артыг евдә јашајырдылар (Мәт. 2:11). Демәли, онлар хејли вахтдыр бурда идиләр, Насирәјә гајытмајыб артыг бурада мәскунлашмышдылар.

Һирод әмр етди ки, «Бејтләһмдә… јашајан ики јаша гәдәрки оғлан ушагларынын һамысы» өлдүрүлсүн (Мәт. 2:16). Мәләк бу барәдә Јусифә хәбәр вердији үчүн о, Мәрјәми вә Исаны ҝөтүрүб Мисирә гачды. Онлар та Һирод өләнә кими орада галдылар. Сонра Јусиф аиләсини ҝөтүрүб Насирәјә ҝетди. Бәс нәјә ҝөрә онлар Бејтләһмә гајытмадылар? Чүнки һәмин вахт Јәһудијјәдә Һиродун оғлу Архелај һакимијјәт сүрүрдү вә о, чох залым инсан иди. Үстәлик, мәләк дә ора ҝери гајытмағын тәһлүкәли олдуғуну демишди. Насирә исә тәһлүкәсиз иди вә Јусиф орада раһат-раһат Исаны Аллаһын јолунда бөјүдә биләрди (Мәт. 2:19—22; 13:55; Лука 2:39, 52).

Ҝөрүнүр, Јусиф вәфат едәндә Иса һәлә ҝөјләр һәјатына јол ачмамышды. Буна ҝөрә дә о, јер үзүндә јашамаг үчүн дириләҹәк. Чохумузун Јусифлә таныш олмаг имканы олаҹаг. Һәмин вахт ондан әтрафлы өјрәнә биләрик, нәјә ҝөрә Иса дүнјаја ҝәләндән сонра онлар Бејтләһмдә галмаг гәрарына ҝәлмишдиләр.