ТӘЛИМ МӘГАЛӘСИ 23
НӘҒМӘ 28 Јеһованын досту олаг
Јеһова бизи чадырына дәвәт едир
«Чадырым онларла олаҹаг, Мән онларын Аллаһы олаҹағам» (ҺИЗГ. 37:27).
ӘСАС ФИКИР
Ҝөрәҹәјик ки, Јеһованын мәҹази чадырында гонаг олмаг нә демәкдир вә О, гонагларынын гајғысына неҹә галыр.
1, 2. Јеһованын садиг бәндәләри һансы дәвәти алырлар?
ЈЕҺОВА һәјатынызда һансы ролу ојнајыр? Бәлкә дә дејәҹәксиниз: «О мәним Атам, Аллаһым вә Достумдур». Јахуд, ола билсин, Ону тәсвир едән башга сөзләрдән истифадә едәҹәксиниз. Бәс Јеһованы сизи евинә гонаг дәвәт едән Ев саһиби кими тәсәввүр едирсиниз?
2 Давуд падшаһ Јеһованын Өз бәндәләри илә мүнасибәтини ев саһиби илә гонаг мүнасибәтинә бәнзәтмишди. О демишди: «Еј Јеһова, чадырында ким меһман олар? Мүгәддәс дағында ким јашајар?» (Зәб. 15:1). Бу сөзләрдән ҝөрмәк олар ки, биз Јеһованын меһманы, јәни гонағы ола биләрик. Бәли, Јеһова бизи Онунла дост олмаға дәвәт едир. Бундан ҝөзәл дәвәт ола билмәз!
ЈЕҺОВА ЧАДЫРЫНДА МӘСКУНЛАШМАҒЫМЫЗЫ ИСТӘЈИР
3. Јеһованын чадырынын илк гонағы кими иди вә гонағы илә Јеһова арасында һансы мүнасибәт вар иди?
3 Һәр шеји јаратмаға башламаздан әввәл Јеһова тәк иди, Ондан башга һеч ким јох иди. Амма сонра О, илк Оғлуну хәлг етди. О, Јеһованын чадырынын илк гонағы олду. Ев саһиби олмаг Јеһоваја чох хош иди. Буну Мүгәддәс Китабдан ајдын ҝөрүрүк. Орада дејилир ки, Оғлу Онун «көнлүнү шад едирди». Елә илк гонағын өзү дә Јеһованын «һүзурунда һәр заман севинирди» (Мәс. 8:30).
4. Јеһова заман кечдикҹә чадырына даһа кимләри дәвәт етди?
4 Јеһова сонралар башга руһани варлыглар да јаратды вә онлары да чадырынын гонағы етди. Мүгәддәс Китабда бу руһани варлыглар «Аллаһ оғуллары» адланыр вә Јеһованын јанында олмағын онлара севинҹ ҝәтирдији дејилир (Әјј. 38:7; Дән. 7:10). Узун илләр Јеһованын гонаглары Онунла бирликдә руһани аләмдә јашајанлардан ибарәт иди. Амма сонра Јеһова инсанлары да јаратды вә артыг онлар да бу чадырда гонаг олду. Онун гонагларынын сырасында Һәнуг, Нуһ, Ибраһим вә Әјјуб да вар иди. Онлар «Аллаһын јолу илә» ҝетдикләри үчүн Онун достлары адланырды (Јар. 5:24; 6:9; Әјј. 29:4; Әшј. 41:8).
5. Һизгијал 37:26, 27 ајәләриндәки пејғәмбәрликдән нә өјрәнирик?
5 Әсрләрдир ки, Јеһова инсанлары Өз чадырына гонаг дәвәт едир. (Һизгијал 37:26, 27 ајәләрини охујун.) Мәсәлән, Һизгијалын јаздығы пејғәмбәрликдән өјрәнирик ки, Јеһова садиг бәндәләринин Онунла сых мүнасибәтдә олмасыны чох истәјир. Одур ки, онларла «сүлһ әһди» бағлајаҹағыны вәд едир. Бу пејғәмбәрлик һансы дөврә аиддир? Һәм ҝөјдә, һәм дә јер үзүндә јашамаға үмид едән инсанларын Онун мәҹази чадырында «бир сүрүдә» бирләшәҹәји дөврә (Јәһ. 10:16). Биз һал-һазырда һәмин дөврдә јашајырыг!
ҺАРАДА ОЛУРУГСА ОЛАГ, АЛЛАҺЫН ЧАДЫРЫ АЛТЫНДАЈЫГ
6. Инсан нә заман Јеһованын чадырынын гонағы олур вә Онун чадыры һарададыр?
6 Гәдимдә инсанлар динҹәлмәк вә ја пис һавадан горунмаг истәјәндә чадыра сығынырды. Чадыра сығынан гонаг билирди ки, ев јијәси онун гуллуғунда дураҹаг. Өзүмүзү Јеһоваја һәср едәндә Онун мәҹази чадырынын гонағы олуруг (Зәб. 61:4). Бу чадыр руһани гида сарыдан болдур. Үстәлик, орада Јеһованын диҝәр гонаглары илә дә достлаша билирик. Амма Јеһованын чадыры һансыса конкрет бир јердә јерләшмир. Јәгин, башга өлкәјә сәјаһәт едәндә вә хүсуси топлантыда иштирак едәндә Јеһованын чадырында олан диҝәр инсанларла таныш олмусунуз. Бәли, Јеһованын чадыры итаәткар хидмәтчиләринин олдуғу јердәдир (Вәһј 21:3).
7. Өлән садиг инсанларын һәлә дә Јеһованын чадырында гонаг олдуғуну нәјә әсасән дејә биләрик? (Һәмчинин шәклә бахын.)
7 Һәјата ҝөзүнү јуман садиг инсанлар барәдә нә демәк олар? Онлар һәлә дә Јеһованын чадырында гонагдырлар? Бәли! Нәјә әсасән белә дејирик? Чүнки онлар Јеһованын јаддашындадырлар. Иса Мәсиһ демишди: «О ки галды өлүләрин дирилмәсинә, буну һәтта Муса кол һаггындакы әһвалатында Јеһованы “Ибраһимин Аллаһы, Исһагын Аллаһы вә Јагубун Аллаһы” адландырмагла ҝөстәриб. О, өлүләрин јох, дириләрин Аллаһыдыр, чүнки Онун үчүн онларын һамысы сағдыр» (Лука 20:37, 38).
Һәјата ҝөзләрини јуммуш садиг инсанлар һәлә дә Јеһованын чадырынын гонагларыдыр (7-ҹи абзаса бахын)
ГОНАГ ОЛМАҒЫН ҮСТҮНЛҮКЛӘРИ ВӘ МӘСУЛИЈЈӘТЛӘРИ
8. Јеһованын чадырында олмағын һансы үстүнлүјү вар?
8 Неҹә ки чадырда инсан истираһәт едир вә пис һавадан горунур, еләҹә дә Јеһованын мәҹази чадырында да биз руһани зәрәрдән вә үмидсизликдән горунуруг. Нә гәдәр ки Јеһова илә мөһкәм мүнасибәтимиз вар, Шејтан бизә сағалмаз јара вура билмәјәҹәк (Зәб. 31:23; 1 Јәһ. 3:8). Јени дүнјада исә Јеһова садиг достларыны тәкҹә руһани зәрәрдән јох, һәм дә өлүмдән горујаҹаг (Вәһј 21:4).
9. Јеһова гонагларынын неҹә давранмасыны истәјир?
9 Јеһованын чадырында гонаг олмаг, һәгигәтән дә, бөјүк шәрәфдир! Бизим Онунла мөһкәм достлуг мүнасибәтимиз вар вә бу мүнасибәт әбәдијјән давам едә биләр. Јеһованын чадырында галмаг истәјириксә, неҹә давранмалыјыг? Кимсә сизи евинә гонаг дәвәт едәндә онун сиздән разы галмасыны истәјәрдиниз. Мәсәлән, евә ҝирәндә ајаггабыларынызы чыхармағы хаһиш етсә, јәгин, етираз етмәзсиниз. Ејнилә, биз дә билмәк истәјирик ки, Јеһова Онун чадырында галмаг истәјән инсанлардан нә ҝөзләјир. Јеһоваја мәһәббәтимиз бизи әлимиздән ҝәлән һәр шеји едиб «Ону там разы» салмаға тәшвиг едир (Кол. 1:10). Дүздүр, Јеһова бизим Достумуздур, амма ејни заманда баша дүшүрүк ки, О һәм дә бизим Аллаһымыз вә Атамыздыр. Буна ҝөрә дә О, һөрмәтә лајигдир (Зәб. 25:14). Буну нәзәрә алараг Јеһоваја һәмишә дәрин еһтирам бәсләмәлијик. Онун ким олдуғуну унутмамалыјыг. Беләҹә, Јеһованы кәдәрләндирәҹәк һәрәкәтләрә јол вермәјәҹәјик вә һәр заман Онун «өнүндә тәвазөкарлыгла» јеријәҹәјик (Мик. 6:8).
ЈЕҺОВА ИСРАИЛЛИЛӘР АРАСЫНДА АЈРЫ-СЕЧКИЛИК ЕТМИРДИ
10, 11. Јеһованын исраиллиләр арасында ајры-сечкилик етмәдијини нә ҝөстәрир?
10 Јеһова гонаглары арасында ајры-сечкилик етмир (Ром. 2:11). Бу Онун Сина сәһрасында исраиллиләрлә рәфтарындан ајдын ҝөрүнүр.
11 Јеһова халгыны Мисир әсарәтиндән гуртарандан сонра чадырда хидмәт етмәләри үчүн каһинләр тәјин етди. Башга ишләри ҝөрмәк үчүн исә лавилиләр тәјин олунду. Бәс демәк олармы ки, Јеһова чадырда хидмәт едәнләрә вә ја ора јахын дүшәрҝә саланлара даһа чох гајғы ҝөстәрирди? Хејр! Јеһова ајры-сечкилик етмәјән Аллаһдыр.
12. Јеһованын ҝөрдүјү һансы тәдбирләр Онун исраиллиләр арасында ајры-сечкилик етмәдијини ҝөстәрирди? (Чыхыш 40:38). (Һәмчинин шәклә бахын.)
12 Дүшәрҝәдә һәр кәсин Јеһова илә достлуг етмәк үчүн ејни дәрәҹәдә имканы вар иди. Бу, инсанын чадырда хидмәт етмәсиндән, јахуд онун јахынлығында јашамасындан асылы дејилди. Мәсәлән, Јеһова елә етмишди ки, Мүгәддәс чадырын үзәриндәки булуд вә алов сүтунуну бүтүн халг ҝөрә билсин. (Чыхыш 40:38 ајәсини охујун.) Булуд сүтуну јени бир истигамәтә доғру һәрәкәт едәндә, һәтта чадырдан ән узаг мәсафәдә дүшәрҝә саланлар да ону ҝөрә билирди. Бу заман онларын јыр-јығыш етмәк, чадырларыны сөкмәк вә бүтүн халгла бирликдә ораны тәрк етмәк имканы олурду (Сај. 9:15—23). Бундан башга, ҝүмүшдән олан ики кәрәнај чалынанда һәр кәс онун ҝур, ајдын сәсини ешидиб јола дүшүрдү (Сај. 10:2). Ајдындыр ки, инсанын чадыра јахын јашамасы онун Јеһоваја даһа јахын олдуғунун ҝөстәриҹиси дејилди. Һәр бир исраиллинин имканы вар иди ки, Јеһованын гонағы олсун, Ондан ҝөстәриш алсын вә Онун мүдафиәсинә сығынсын. Ејни шеј бизә дә аиддир. Дүнјанын һарасында јашајырыгса јашајаг, Јеһованын мәһәббәтини, гајғысыны вә мүдафиәсини дуја биләрик.
Мүгәддәс чадырын дүшәрҝәнин мәркәзиндә гурулмасы Јеһованын ајры-сечкилик етмәдијини сүбут едирди (12-ҹи абзаса бахын)
ЈЕҺОВА БУ ҜҮН ДӘ АЈРЫ-СЕЧКИЛИК ЕТМИР
13. Јеһованын бу ҝүн дә ајры-сечкилик етмәдијини нә ҝөстәрир?
13 Бу ҝүн Аллаһын хидмәтчиләриндән бәзиләри баш идарәмизин вә ја филиалларымызын јахынлығында јашајыр. Башгалары исә һәмин биналарда хидмәт едирләр. Бунун сајәсиндә онлар һәмин јерләрдә тәшкил олунан бир чох тәдбирләрдә иштирак едә билирләр вә рәһбәрлик едән гардашларла шәхсән үнсијјәтдә олурлар. Бир башгалары сәјјар нәзарәтчи кими хидмәт едир вә ја хүсуси тамвахтлы хидмәтин диҝәр нөвләриндә иштирак едир. Әксәријјәт кими сиз дә бу баҹы-гардашларын сырасында олмасаныз белә әмин ола биләрсиниз ки, Јеһованын әзиз гонағысыныз вә О һәр биринизи чох севир. Јеһова ајры-ајрылыгда һәр бир гонағынын гејдинә галыр (1 Бут. 5:7). О, бүтүн хидмәтчиләринә руһани гида верир, јол ҝөстәрир вә онлары һифз едир.
14. Јеһованын гонаглары арасында ајры-сечкилик етмәдијини даһа нә ҝөстәрир?
14 Јеһованын Өз гонаглары арасында ајры-сечкилик етмәдијини ҝөстәрән башга бир нүмунә дә вар: бу ҝүн Онун Кәламыны дүнјанын дөрд тәрәфиндә јашајан бүтүн инсанлар охуја биләр. Дүздүр, Јеһова Кәламыны ибрани, арами вә јунан дилләриндә јаздырмышды. Бәс бу о демәкдир ки, ону бу дилләрдә охуја билән инсанларын Јеһова илә мүнасибәти даһа мөһкәмдир? Хејр, бу белә дејил (Мәт. 11:25).
15. Јеһованын ајры-сечкилик етмәдијинә даир башга һансы сүбут вар? (Һәмчинин шәклә бахын.)
15 Јеһова тәкҹә али тәһсилли, ја да јухарыда садаланан дилләри билән инсанлары чадырына гонаг гәбул етмир. Али савадлы олуб-олмамасындан асылы олмајараг, бүтүн дүнјадакы инсанлар Јеһованын һикмәтинә јијәләнә биләр. Онун Кәламы — Мүгәддәс Китаб минләрлә дилә тәрҹүмә олунуб. Бунун сајәсиндә бүтүн бәшәријјәт орадакы тәлимләри охујуб, Онунла дост олмағын јолларыны өјрәнә биләр (2 Тим. 3:16, 17).
Мүгәддәс Китабын чохлу дилләрә тәрҹүмә едилмәси Аллаһын ајры-сечкилик етмәдијини неҹә сүбут едир? (15-ҹи абзаса бахын)
ЈЕҺОВАНЫН РАЗЫЛЫҒЫНЫ ИТИРМӘЈИН
16. Һәвариләрин ишләри 10:34, 35 ајәләринә әсасән Јеһованын чадырында галмаг үчүн нә едә биләрик?
16 Јеһованын чадырында гонаг олмаг чох бөјүк шәрәфдир. О, тәсәввүр едә биләҹәјимиз ән хејирхаһ, ән мәһәббәтли, ән гонагпәрвәр Ев саһибидир. Үстәлик, О, ајры-сечкилик етмир. Јеһова үчүн инсанын һарада јашамасы, мәншәји, тәһсили, ирги, милләти, јашы вә ја ҹинси өнәм дашымыр, О һәр кәсин үзүнә гапысыны ачыр. Амма бир шәрт вар: Јеһованын гонағы Онун гајда-ганунларына әмәл етмәлидир. (Һәвариләрин ишләри 10:34, 35 ајәләрини охујун.)
17. Нөвбәти мәгаләдә нә һагда данышаҹағыг?
17 Зәбур 15:1 ајәсиндә Давуд сорушур: «Еј Јеһова, чадырында ким меһман олар? Мүгәддәс дағында ким јашајар?» Сонра о, Јеһованын илһамы илә бу суаллара ҹаваб верир. Нөвбәти мәгаләдә ҝөрәҹәјик ки, Јеһованын разылығыны итирмәмәк үчүн һансы тәләбләрә ҹаваб вермәлијик.
НӘҒМӘ 32 Јеһованын тәрәфини тут!
