1. Зәбур 15:1—5 ајәләри бизә һансы саһәдә көмәк едә биләр?

 ӨТӘН мәгаләдә өјрәндик ки, Јеһованын һәср олунмуш хидмәтчиләри Онун мәҹази чадырында гонаг ола биләр. Бунун үчүн Јеһова илә мөһкәм достлуг мүнасибәти гурмаг лазымдыр. Бәс Онунла бу ҹүр мүнасибәти неҹә гура биләрик? Буну 15-ҹи мәзмурдан өјрәнмәк олар. (Зәбур 15:1—5 ајәләрини охујун.) Бу мәзмурда Јеһова илә јахын дост олмағын јоллары ачыгланыр.

2. Јеһованын чадыры дејәндә Давуд нәләри нәзәрдә тутмуш ола биләрди?

² 15-ҹи мәзмур бу сөзләрлә башлајыр: «Еј Јеһова, чадырында ким меһман олар? Мүгәддәс дағында ким јашајар?» (Зәб. 15:1). Давуд Јеһованын «чадыры» дејәндә, ола билсин, бир мүддәт Ҝибјонда олан Мүгәддәс чадыры нәзәрдә тутурду. «Мүгәддәс дағ» сөзүнү ишләдәндә исә, ҝөрүнүр, Јерусәлимдәки Сион дағына ишарә едирди. Бу дағ Ҝибјондан тәхминән 10 километр ҹәнубда јерләширди. Орада Давуд чадыр гурмушду вә мәбәд тикиләнә гәдәр әһд сандығыны бу чадырда сахлајырды (2 Ишм. 6:17).

3. 15-ҹи мәзмурдакы фикирләри нәјә ҝөрә баша дүшмәк истәјирик? (Һәмчинин шәклә бахын.)

³ Дүздүр, әксәр исраиллиләр Мүгәддәс чадырда һеч вахт хидмәт етмәмишди. Әһд сандығынын олдуғу чадыра исә бармаг сајы гәдәр адам дахил олмушду. Амма Јеһованын бүтүн садиг хидмәтчиләри Онун мәҹази чадырынын гонағы ола биләрди. Бунун үчүн онлар Јеһова илә достлуг мүнасибәти гуруб, ону горумалы идиләр. Биз дә буна ҹан атырыг. 15-ҹи мәзмурда Јеһова илә дост олмаг үчүн лазым олан бәзи хүсусијјәтләр садаланыр.

 КАМИЛЛИК ЈОЛУ ИЛӘ ҜЕДИН ВӘ ӘМӘЛЛӘРИНИЗ ДОҒРУ ОЛСУН

4. Јеһованын досту олмаг үчүн нәјә ҝөрә вәфтиз олунмаг кифајәт дејил? (Әшија 48:1).

⁴ Зәбур 15:2 ајәсиндә дејилир ки, Аллаһын досту «камиллик јолу илә ҝедир, әмәлләри доғрудур». Бу сөзләр давамлы просеси ҝөстәрир. Бәс әмәлләримизин даима доғру олмасы мүмкүндүрмү? Бәли, мүмкүндүр. Дүздүр, һеч бир инсан ҝүнаһсыз дејил, амма әҝәр биз Јеһоваја итаәт етмәк үчүн әлимиздән ҝәләни едириксә, О бизә «әмәлләри доғру» олан инсан кими бахаҹаг. Өзүмүзү Јеһоваја һәср едиб вәфтиз олунанда Онунла достлуғун һәлә тәмәлини гојуруг. Бир мәгам вар ки, гәдимдә инсанын исраилли олмасы ону автоматик Аллаһын чадырынын гонағы етмирди. Исраиллиләрдән бәзиләри Аллаһын адыны чағырса да, буну «һәгигәтә ујғун, салеһликлә» етмирдиләр. (Әшија 48:1 ајәсини охујун.) Сәмими-гәлбдән Аллаһын гонағы олмаг истәјән исраилли Онун әмрләрини өјрәнмәли вә онлара әмәл етмәли иди. Ејнилә, бу ҝүн дә садәҹә вәфтиз олунмаг вә Јеһованын Шаһиди адланмаг бәс дејил, биз камиллик јолу илә ҝетмәли вә әмәлләримиз доғру олмалыдыр. Буна неҹә наил ола биләрик?

5. Һәр саһәдә Јеһоваја итаәт етмәк дејиләндә нә нәзәрдә тутулур?

⁵ Јеһованын ҝөзүндә «камиллик јолу илә» ҝетмәк, доғру әмәл саһиби олмаг тәкҹә мүнтәзәм ибадәт евинә ҝедиб-ҝәлмәк дејил (1 Ишм. 15:22). Биз һәјатымызын һәр саһәсиндә, тәк оланда да Јеһоваја итаәт етмәјә чалышмалыјыг (Мәс. 3:6; Ваиз 12:13, 14). Хырда ҝөрүнән мәсәләләрдә белә Јеһоваја итаәт етмәјимиз чох ваҹибдир. Бундан ҝөрүнәҹәк ки, биз Јеһованы һәгигәтән севирик вә беләҹә, Онун да бизә мәһәббәти ашыб-дашаҹаг (Јәһ. 14:23; 1 Јәһ. 5:3).

6. Ибраниләрә 6:10—12 ајәләринә әсасән кечмишдә етдијимиз јахшы әмәлләрдән даһа ваҹиб олан нәдир?

 ⁶ Јеһова кечмишдә Онун јолунда ҝөрдүјүмүз ишләрә чох дәјәр верир. Амма даима Јеһованын гонағы олмаг үчүн кечмишдә ҝөрдүјүмүз салеһ ишләр кифајәт дејил. Ибраниләрә 6:10—12 ајәләриндән бу ајдын ҝөрүнүр. (Ајәләри охујун.) Јеһова вахтилә етдијимиз јахшы әмәлләримизи унутмур, амма О истәјир ки, биз «ахырадәк» бүтүн гәлбимизлә Она ибадәт едәк. Әҝәр «тагәтдән дүшмәсәк», О бизимлә әбәдијјән дост олаҹаг (Гал. 6:9).

ҮРӘЈИНИЗДӘ ҺӘГИГӘТИ ДАНЫШЫН

7. Үрәјимиздә һәгигәти данышмаг нә демәкдир?

⁷ Јеһованын чадырында гонаг олмаг истәјән инсан «үрәјиндә һәгигәти» данышмалыдыр (Зәб. 15:2). Амма бу, садәҹә јалан данышмамаг демәк дејил. Дедијимиз һәр кәлмә, атдығымыз һәр аддым дүрүст олмалыдыр (Ибр. 13:18). Бу, чох ваҹибдир, чүнки «Јеһова фитнәкардан икраһ едәр, амма салеһ адамла достлуг едәр» (Мәс. 3:32).

8. Һансы һәрәкәтләрдән узаг олмалыјыг?

⁸ Әҝәр инсан ҹамаат ичиндә оланда итаәткарлыг ҝөстәрирсә, амма ҝизлиндә Аллаһын ганунларыны позурса, демәк олармы ки, о, «үрәјиндә һәгигәти» данышыр? (Әшј. 29:13). Әлбәттә јох. Бәс мәсиһинин бу ҹүр икиүзлү давранмасына нә ҝәтириб чыхара биләр? Ола билсин, о, Аллаһын бәзи ганунларынын һикмәтли олдуғуна шүбһә илә јанашмаға башлајыб (Јаг. 1:5—8). Бәлкә дә ваҹиб сајмадығы мәсәләләрдә Јеһоваја итаәтсизлик едир, сонра исә итаәтсизлијинин пис нәтиҹәсини ҝөрмәјиб, Јеһованын башга ганунларыны да позмаға өзүндә ҹүрәт тапыр. Беләҹә, онун ибадәти Аллаһын ҝөзүндә ијрәнҹ олур (Ваиз 8:11). Биз исә һәр саһәдә дүрүст олмаг истәјирик.

9. Иса Мәсиһин Натанаиллә илк ҝөрүшүндән нә өјрәнирик? (Һәмчинин шәклә бахын.)

⁹ Дүрүст олмағын ваҹиблијини Иса Мәсиһин Натанаиллә илк ҝөрүшүндән өјрәнә биләрик. Филип досту Натанаили Иса Мәсиһлә ҝөрүшдүрәндә мараглы бир шеј баш верди. Иса бу вахта гәдәр Натанаиллә таныш  олмаса да, онун һаггында белә демишди: «Будур, зәррә гәдәр дә биҹлији олмајан әсл исраилли!» (Јәһ. 1:47). Дүздүр, Исанын ҝөзүндә о бири шаҝирдләри дә дүрүст иди, амма Натанаилдә ҝөрдүјү дүрүстлүк гејри-ади иди. Натанаил дә бизим кими ҝүнаһлы инсан иди, амма онда зәррә гәдәр дә олсун икиүзлүлүк, надүрүстлүк јох иди. Иса үчүн бу, дәјәрли хүсусијјәт иди вә буна ҝөрә ону тәрифләмишди. Һамымыз истәјәрдик ки, Иса бизим һаггымызда да ејни шеји десин!

10. Нәјә ҝөрә дедијимиз сөзләрә фикир вермәк ваҹибдир? (Јагуб 1:26).

¹⁰ 15-ҹи мәзмурда садаланан тәләбләрин әксәријјәти башгалары илә рәфтарымызла бағлыдыр. Зәбур 15:3 ајәсиндә Јеһованын чадырынын гонағы барәдә дејилир ки, онун «дилиндән бөһтан чыхмаз, башгасына пислик етмәз, достуна гара јахмаз». Кимәсә бөһтан атсаг, она ағыр зәрбә вурмуш оларыг вә артыг Јеһова бизи чадырынын гонағы кими ҝөрмәк истәмәз. (Јагуб 1:26 ајәсини охујун.)

11. Бөһтан нәдир вә төвбә етмәјән бөһтанчы барәдә һансы тәдбир ҝөрүлүр?

¹¹ Мәзмурчу бөһтан сөзүнү хүсусилә вурғулајыр. Бәс бөһтан нәдир? Үмуми десәк, бөһтан — киминсә адыны ләкәләмәк үчүн онун һаггында дејилән јалан мәлуматлардыр. Башгасына бөһтан атыб төвбә етмәјән инсан јығынҹагдан кәнар едилир (Әрм. 17:10).

12, 13. Һансы вәзијјәтләрдә биз өзүмүз дә билмәдән достумуза гара јахмыш ола биләрик? (Һәмчинин шәклә бахын.)

¹² Һәмчинин Зәбур 15:3 ајәсиндә гејд олунур ки, Јеһованын чадырынын гонағы «башгасына пислик етмәз, достуна гара јахмаз». Бәс бура нәләр дахилдир?

¹³ Киминсә һаггында мәнфи мәлуматлар јајмагла өзүмүз дә билмәдән она гара јахмыш ола биләрик. Мәсәлән, 1) баҹы өнҹүл хидмәтини дајандырыр; 2) әр-арвад  даһа Бејтелдә хидмәт етмир; 3) гардаш артыг ағсаггал вә ја јығынҹаг хидмәтчиси дејил. Әҝәр дүшүнсәк ки, һәмин дәјишиклијә сәбәб онларын һансыса сәһвидир вә бу фәрзијјәләримизи башгаларына јајсаг, нә дәрәҹәдә дүзҝүн олар? Онларын хидмәти бизим билмәдијимиз сәбәбләрә ҝөрә дајанмыш ола биләр. Доғрудан да, Јеһованын чадырынын гонағы «башгасына пислик етмәз, достуна гара јахмаз».

ЈЕҺОВАДАН ГОРХАНЛАРА ҺӨРМӘТ ЕДИН

14. Һансы мәнада Јеһованын достларынын «алчаг адамы ҝөрән ҝөзү јохдур»?

¹⁴ Зәбур 15:4 ајәсиндә јазылыб ки, Јеһованын достунун «алчаг адамы ҝөрән ҝөзү јохдур». Бәс кимин белә инсан олдуғуну нәдән билмәк олар? Буну өз фикирләримизлә, өз мејарларымызла өлчә билмәрик. Чүнки ҝүнаһлы олдуғумуз үчүн, ола билсин, хасијјәти үрәјимизә јатан инсанлардан хошумуз ҝәлир, һәрәкәти бизи гыҹыгландыран инсанлары исә бәјәнмирик. Буна ҝөрә дә биз Јеһованын алчаг, мәнфур һесаб етдији инсанлардан узаг дурмалыјыг (1 Кор. 5:11). Белә инсанларын сырасына пис ишләр ҝөрүб төвбә етмәјәнләр, иманымыза, етигадымыза һөрмәтсиз јанашанлар вә Јеһова илә мүнасибәтимизи корламаға чалышанлар дахилдир (Мәс. 13:20).

15. «Јеһовадан горханлара» һөрмәт етмәјин бир јолу һансыдыр?

¹⁵ Зәбур 15:4 ајәсиндә ејни заманда дејилир ки, биз «Јеһовадан горханлара һөрмәт» етмәлијик. Биз дә һәр фүрсәтдән истифадә едиб Јеһованын достларына хејирхаһлыг едирик вә һөрмәт ҝөстәририк (Ром. 12:10). Зәбур 15:4 ајәсиндә буну етмәјин бир јолу вурғуланыр. Орада дејилир ки, Јеһованын чадырынын гонағы «зәрәринә олса белә, әһдиндән дөнмәз». Вердијимиз сөзүн үстүндә дурмасаг, инсанларын гәлбини јаралаја биләрик (Мәт. 5:37). Мәсәлән, Јеһова истәјир ки, әрлә арвад никаһ әһдини позмасын. Ејнилә, валидејнләр дә ушагларына вердикләри сөзүн үстүндә дурмаг үчүн әлләриндән ҝәләни едәндә бу, Јеһоваја хош ҝедир. Јеһоваја вә инсанлара севҝи бизи сөвг едир ки, сөзүмүзүн үстүндә дурмаг үчүн әлимиздән ҝәләни едәк.

16. Јеһованын достларына башга һансы јолла һөрмәт ҝөстәрә биләрик?

¹⁶ Јеһованын достларына һөрмәт етмәјин диҝәр јолу гонагпәрвәр вә әлиачыг олмагдыр (Ром. 12:13). Асудә вахтларымызда баҹы-гардашларла бирҝә оланда һәм онларла, һәм дә Јеһова илә достлуғумузу мөһкәмләндиририк. Бундан башга, гонагпәрвәрлик ҝөстәрәндә Јеһованын нүмунәсини изләмиш олуруг.

ПУЛПӘРӘСТЛИЈӘ ЈЕР ВЕРМӘЈИН

17. Нәјә ҝөрә 15-ҹи мәзмурда пул мөвзусуна тохунулур?

¹⁷ Зәбур 15:5 ајәсиндә дејилир ки, Јеһованын чадырынын гонағы «сәләмлә пул вермәз, ҝүнаһсызын әлејһинә рүшвәт алмаз». Нәјә ҝөрә белә бир гыса мәзмурда пул мөвзусуна тохунулур? Чүнки пул инсанын ҝөзүнү елә тута биләр ки, о, башгаларынын һиссләрини нәзәрә алмаз, һәтта Аллаһла да мүнасибәти корланар (1 Тим. 6:10). Мүгәддәс Китабын јазылдығы дөврдә бәзиләри касыб сојдашларына борҹа пул верәндә мадди мараг ҝүдүрдүләр, онлара пулу сәләмлә верирдиләр. Бундан әлавә, бәзи һакимләр рүшвәт алыб ҝүнаһсыз инсана әдаләтсиз һөкм чыхарырдылар. Јеһова бу ҹүр һәрәкәтләрә нифрәт едир (Һизг. 22:12).

18. Һансы суаллар пула мүнасибәтимизи јохламаға көмәк едә биләр? (Ибраниләрә 13:5).

 ¹⁸ Јахшы оларды ки, һәр биримиз пула мүнасибәтимизи ҝөтүр-гој едәк. Бу суаллар үзәриндә дүшүнүн: «Пул һагда, она нәләр ала биләҹәјим барәдә тез-тез дүшүнүрәм? Борҹа пул ҝөтүрәндә һәмин инсанын пула еһтијаҹы олмадығыны саныб ону ҝеҹ гајтарырам? Имканым јахшы оланда башгаларына јухарыдан ашағы бахырам? Бу заман мәнә әлиачыг олмаг чәтин олмур ки? Мадди вәзијјәти јахшыдыр дејә һәмин баҹынын вә ја гардашын пулпәрәст олдуғуну дүшүнүрәм? Касыб баҹы-гардашлара лагејд јанашыб, јалныз варлыларла достлуг едирәм?» Бу суалларын үзәриндә дүшүнмәк чох ваҹибдир, чүнки Јеһова бизә чадырынын гонағы олмаг имканы вериб. Әҝәр һәјатымызда пулпәрәстлијә јер вермәсәк, һәмишә Јеһованын чадырынын гонағы олаҹағыг. Онда Јеһова да бизи һеч вахт тәрк етмәјәҹәк. (Ибраниләрә 13:5 ајәсини охујун.)

ЈЕҺОВА ДОСТЛАРЫНЫ СЕВИР

19. Јеһованын ганунлар вермәсинин әсас сәбәби нәдир?

¹⁹ 15-ҹи мәзмур бу вәдлә битир: «Бу ҹүр адам әсла сарсылмаз» (Зәб. 15:5). Бурада мәзмурчу Јеһованын вердији ганунларын әсас сәбәбини ачыглајыр. Јеһова бизим хошбәхт олмағымызы истәјир. Одур ки, Онун бујругларына әмәл етсәк, һәјатымыз даһа ҝөзәл олаҹаг вә Јеһованын чадыры алтында һифз олунаҹағыг (Әшј. 48:17).

20. Јеһованын гонаглары нәји сәбирсизликлә ҝөзләјир?

²⁰ Јеһованын чадырынын гонагларыны гаршыда ҝөзәл ҝәләҹәк ҝөзләјир. Мәсһ олунмуш мәсиһиләр ҝөјдә јашајаҹаглар, Иса онлар үчүн «јер» һазырлајыб (Јәһ. 14:2). Јер үзүндә јашамаға үмиди оланлар исә Вәһј 21:3 ајәсиндәки вәдин јеринә јетмәсини сәбирсизликлә ҝөзләјирләр. Биз фәхр едирик ки, Јеһова бизи Өзү илә дост олмаға, чадырынын әбәди гонағы олмаға дәвәт едиб!