Әслиндә, бу ҝүн һеч бир инсан һәвари Булусун ҝөркәмини дәгиг тәсвир едә билмәз. Нәшрләримиздә Булусу тәсвир едән шәкилләр археоложи дәлилләрә әсасланмыр, садәҹә рәссам тәхәјјүлүнүн мәһсулудур.

Амма Булусун хариҹи ҝөркәми илә бағлы мүәјјән мәлуматлар мөвҹуддур. Мисал үчүн, «Сион Ҝөзәтчи гүлләси» журналынын 1902-ҹи ил 1 март сајында јазылмышды: «Булусун ҝөркәминә ҝәлинҹә,.. ерамызын тәхминән 150-ҹи илинә аид олан “Булусун вә Фекланын ишләри” китабында (инҝ.) онун ҝөркәми барәдә мәлумат вар вә еһтимал ки, бу, ән мөтәбәр вә узун илләрдир гәбул едилмиш мәлуматдыр. Китабда о, “бәстәбој, кечәл, ајаглары әјри, әзәләли, гашлары чатма вә бурну чох узун” тәсвир олунур».

Бир лүғәтдә бу гәдими китаб барәдә јазылыб: «Бу китабда бәзи тарихи сүбутларын олмасы тәәҹҹүблү дејил» («The Oxford Dictionary of the Christian Church» 1997). О, јазылдығы дөврдән сонракы бир нечә әср әрзиндә јүксәк гијмәтләндирилирди. Китабын јунан дилиндә 80 әлјазмасынын вә мүхтәлиф дилләрдә нүсхәләринин олмасы буна бир сүбутдур. Одур ки, нәшрләримиздәки рәсмләр бәзи гәдими мәнбәләрдә һәвари Булусун ҝөркәми илә бағлы јазылан тәсвирләрә ујғундур.

Һәтта һәваринин сағлығында она тәнгиди јанашанлар онун һаггында «ҝөркәми фағыр, нитги һечдир» дејирдиләр (2 Кор. 10:10). Амма һәвари Булусун ҝөркәминдән даһа ваҹиб шејләр вар. Биз онун мәсиһилији неҹә гәбул етдијини унутмамалыјыг: Иса Мәсиһ мөҹүзәви шәкилдә она ҝөрүнмүшдү. Һәмчинин онун Мәсиһин адыны халглара билдирмәк үчүн сечилмиш бир аләт кими һәјата кечирдији ишләри јадымыза сала биләрик (Һәв. 9:3—5, 15; 22:6—8). Һәваринин Аллаһын илһамы илә јаздығы мәктубларын фајдасыны да данмаг олмаз.

Һәвари Булус мәсиһи олмаздан әввәл газандығы наилијјәтләрлә өјүнмүрдү, өз ҝөркәми барәдә дә һеч нә данышмамышды (Һәв. 26:4, 5; Филип. 3:4—6). Мәктубларындан бириндә о демишди: «Мән һәвариләрин ән кичијијәм вә һәвари адланмаға лајиг дејиләм» (1 Кор. 15:9). Башга бир мәктубда исә јазмышды: «Бу лүтф мәнә, мүгәддәсләр арасында кичикләрин ән кичијинә верилмишдир ки, мән Мәсиһин ағласығмаз сәрвәти барәсиндәки мүждәни халглара бәјан едим» (Ефес. 3:8). Бәли, ваҹиб олан һәваринин ҝөркәми јох, онун тәблиғ етдији мүждәдир.