МӘН Австријанын Гратс шәһәриндә боја-баша чатмышам. Једди јашым оланда валидејнләрим мәни дини јөнүмлү орта мәктәбә гојдулар. Орада раһибәләрлә каһинләрин арасындакы әхлагсызлығы ҝөрәндә дәһшәтә ҝәлмишдим. Һеч бир ил кечмәди ки, анамын разылығы илә орадан чыхдым.

Сонралар валидејнләрим мәни пансиона гојдулар. Бир ҝүн атам мәни ҝеҹә илә орадан апарды, чүнки шәһәримиз бомбардман едилирди. Биз Шладминг шәһәринә гачдыг. Шәһәрә чатачатда бир көрпү вар иди. Көрпүнү тәзәҹә кечмишдик ки, ону партлатдылар. Бир дәфә исә нәнәмлә бағчамызда оланда бир нечә тәјјарә бизи ҝүллә-борана тутду. Бүтүн мүһарибә илләри әрзиндә нә килсәдән, нә дә дөвләтдән көмәк ҝөрмәдик, онлар, санки бизи атмышдылар.

1950-ҹи илдә анам Мүгәддәс Китабдакы мүждәни ешитди. Јеһованын Шаһидләриндән бири анамла мүждә барәдә сөһбәт едирди. О ҝәләндә мән дә онларын сөһбәтинә гулаг асырдым. Һәтта анамла бир нечә дәфә онларын ибадәт ҝөрүшүнә ҝетмишдим. Анам Јеһованын Шаһидләринин дининин һәгигәт олдуғуна әмин оландан сонра 1952-ҹи илдә вәфтиз олду.

О вахт ҝетдијимиз јығынҹаг мәнә јашлы гадынлар клубуну хатырладырды. Бир дәфә биз башга бир јығынҹаға гонаг ҝетмишдик. Бу јығынҹаг тамам башга ҹүр иди. Орада чохлу ҝәнҹләр вар иди. Гратса ҝери гајыданда јығынҹаглара мүнтәзәм ҝетмәјә башладым вә чох кечмәмиш мән дә өјрәндикләримин һәгигәт олдуғуну баша дүшдүм. Мән һәмчинин Јеһованы, Өз хидмәтчиләринә етибарлы дајаг олан Аллаһы танымаға башладым. О Аллаһы ки, һәтта тәк галдығымызы дүшүндүјүмүз чәтинликләрдә белә, јанымызда олур (Зәб. 3:5, 6).

Өјрәндијим һәгигәтләри инсанларла бөлүшмәк истәјирдим. Мүждә барәдә илк дәфә баҹы-гардашларыма данышмышам. Мәндән бөјүк олан дөрд баҹым мүәллим ишләдикләри үчүн бизимлә галмырдылар. Мән мүхтәлиф кәндләрдә  јашајан бу баҹыларыма баш чәкиб онлары Мүгәддәс Китабы өјрәнмәјә тәшвиг едирдим. Нәтиҹәдә, баҹы-гардашларымын һамысы Јеһованын Шаһиди олду.

Ев-ев тәблиғ хидмәтинә бир һәфтә иди ки башламышдым 30 јашларында бир гадын Мүгәддәс Китабы өјрәнмәјә разылашды. Бир мүддәт сонра о, вәфтиз олунду. Сонралар онун һәјат јолдашы вә ики оғлу да Јеһованын Шаһиди олду. Бу гадынла дәрс кечә-кечә өз иманым мөһкәмләнди. Чүнки мәнимлә әмәлли-башлы Мүгәддәс Китаб дәрси кечирилмәмишди. Мән һәр дәрсә јахшы-јахшы һазырлашмалы олурдум. Беләҹә, биринҹи өзүмү өјрәдирдим ки, шаҝирдә дә нә исә өјрәдә билим. Бунун сајәсиндә һәгигәти дәриндән баша дүшдүм. 1954-ҹү илин апрел ајында һәјатымы Јеһоваја һәср едиб вәфтиз олдум.

Мән 1955-ҹи илдә Алманија, Франса вә Инҝилтәрәдә кечирилән бејнәлхалг топлантыларда иштирак етдим. Лондонда Алберт Шрөдер гардашла таныш олдум. О вахт гардаш Ҝилеад Мәктәбиндә дәрс дејирди. Сонралар о, Рәһбәрлик Шурасынын үзвү кими хидмәт етмишди. Британија музејини зијарәт едәндә Алберт гардаш бизә орадакы бир нечә Мүгәддәс Китаб әлјазмасы барәдә мәлумат верди. Бу әлјазмаларда ибрани һәрфләри илә Аллаһын ады јазылмышды. Гардаш бизә әлјазмаларын әһәмијјәти барәдә данышды. Бу сөһбәт мәнә һәм мәнәви, һәм дә руһани ҹәһәтдән тәкан вериб мәним Аллаһын Кәламындакы һәгигәти инсанлара данышмаг гәтијјәтими бирә-беш артырды.

1956-ҹы ил јанварын бири өнҹүл хидмәтинә башладым. Дөрд ајдан сонра Мистелбах шәһәринә хүсуси өнҹүл тәјин олундум. О вахтлар бу шәһәрдә бир нәфәр дә олсун Јеһованын Шаһиди јох иди. Бу хидмәтдә мән јени бир чәтинликлә растлашдым. Өнҹүл әмәкдашымла тамамилә фәргли инсанлар идик. Мәним 19, онун 25 јашы вар иди. Мән шәһәрдә бөјүмүшдүм, о, кәнддә. Мән сәһәрләр чох јатмағы севирдим, о исә тез дурмағы. Ахшамлар исә мән ҝеҹ јатырдым, о исә тез. Амма Мүгәддәс Китаб мәсләһәтләринин сајәсиндә арамыздакы бу фәрги нәзәрә алмағы өјрәндик вә беләҹә, өнҹүл кими әмәкдашлығымыз чох ҝөзәл алынды.

Сонра биз башга чәтинликләрлә гаршылашдыг. Һәрдән һәтта тәгиб дә олунурдуг, амма биз тәк дејилдик (2 Кор. 4:7—9). Бир дәфә бир кәндә тәблиғ етмәјә ҝедәндә кәнд ҹамааты итләри ачыб үстүмүзә бурахды. Бир ҝөз гырпымында ири-ири итләр бизи дөврәјә алыб үстүмүзә һүрмәјә вә дишләрини гыҹамаға башладылар. Өнҹүл әмәкдашымла бир-биримизин әлиндән тутдуг вә мән Јеһоваја јалварыб дедим: «Јеһова, нә олар, елә ет, онлар бизим үстүмүзә ҹуманда дәрһал өләк!» Итләр бизим бир аддымлығымызда оланда гәфил дајандылар вә гујругларыны булаја-булаја дөнүб ҝетдиләр. Биз буну Јеһованын мүдафиәси кими гәбул етдик. Сонра бүтүн кәнди долашыб тәблиғ етдик. Мараглысы о иди ки, ҹамаат чох һәвәслә гулаг асырды. Итләрин бизә дәјмәмәси вә бу дәһшәтли һадисәдән сонра бизим гәтијјәтлә тәблиғ етмәјимиз онлары мәәттәл гојмушду. Сонралар бу кәнддән бир нечә нәфәр Јеһованын Шаһиди олду.

Башымыза даһа бир дәһшәтли һадисә ҝәлмишди. Кирајә галдығымыз евин саһиби сәрхош һалда евә ҝәлиб гоншулары нараһат етдијимизи иддиа едәрәк бизи өлүмлә һәдәләди. Арвады ону сакитләшдирмәјә чалышса да, баҹармырды. Онларын сәси  дүз бизим отаға, евин икинҹи мәртәбәсинә кими ҝәлиб чатырды. Биз ҹәлд гапынын архасына стул дајајыб әшјаларымызы јығмаға башладыг. Гапыны ачыб чыхмаг истәјәндә ҝөрдүк ки, ев саһиби әлиндә ири бычаг пилләкәнин башында дуруб. Биз әшјаларымыз да әлимиздә ҹәлд арха гапыдан чыхдыг. Бағчанын ичиндән кечән узун јолла гачыб ҹанымызы гуртардыг вә бир дә о евә гајытмадыг.

Бир отелә ҝедиб орада отаг тутдуг. Бурада дүз бир ил галасы олдуг. Бунун хидмәтимизә мүсбәт тәсири олду. Чүнки отел шәһәрин дүз мәркәзиндә јерләширди. Мүгәддәс Китаб дәрси кечдијимиз инсанлар да дәрсләрини отелдә кечмәјимизи истәјирдиләр. Чох кечмәди ки, бизим отагда тәхминән 15 нәфәрин иштиракы илә китабөјрәнмә вә «Ҝөзәтчи гүлләси» мүзакирәси кечирилмәјә башлады.

Биз Мистелбахда бир илдән чох галдыг. Сонра мәни Гратсын ҹәнуб-шәргиндә јерләшән Фелдбах шәһәринә тәјин етдиләр. Бурада да јығынҹаг јох иди. Јени әмәкдашымла мән тахта евин икинҹи мәртәбәсиндәки балаҹа бир отагда јашајырдыг. Күләк әсәндә евин тахталарынын арасындан һава кечдији үчүн дәлмә-дешикләри гәзетлә тутмушдуг. Сују гујудан чәкирдик. Амма бу чәтинликләри јашамаға дәјәрди. Бир нечә ајын ичиндә бурада груп јаранды. Вә дәрс кечдијимиз бир аиләнин 30 нәфәр үзвү тәдриҹән һәгигәти гәбул етди.

Јашадығым бу һадисәләр мәним Јеһоваја миннәтдарлығымы артырды, чүнки Онун Падшаһлығы һәр шејдән үстүн тутан хидмәтчиләринә һәмишә дајаг олдуғуну ҝөрдүм. Һәјатда елә вәзијјәтләр ола биләр ки, һеч кимин бизә әли чатмаз, амма Јеһова һәмишә јанымыздадыр (Зәб. 121:1—3).

1958-ҹи илдә Нју-Јорк шәһәринин «Јанки» вә «Поло Граундс» стадионларында бејнәлхалг топланты кечирилирди. Топлантыда иштирак етмәк үчүн әризә долдурдум. Австрија филиалы мәндән Ҝилад Мәктәбинин 32-ҹи синфиндә охумаг истәјиб-истәмәдијими сорушду. Һеч белә шәрәфли дәвәтә «јох» демәк олар?! Тәбии ки, мән онлара дәрһал «һә» ҹавабы вердим.

Мәктәбдә Мартин Петсинҝер адлы гардашын јанында отурурдум. О, насист һәбс дүшәрҝәсиндә чохлу ишҝәнҹәләрә мәруз галмышды. Сонралар о да Рәһбәрлик Шурасынын үзвү олмушду. Мартин гардаш һәрдән дәрс вахты јавашҹа  мәндән сорушурду: «Ерика, Алманҹа бу нә демәкдир?»

Тәдрис мүддәтинин ортасында Нејтан Норр гардаш тәјинатларымызы елан етди. Мән Парагваја тәјин олунмушдум. Чох ҝәнҹ олдуғумдан бу өлкәјә дахил олмаг үчүн атамын иҹазәси лазым иди. Иҹазәни аландан сонра 1959-ҹу илин март ајында Парагваја јола дүшдүм. Мән вә јени әмәкдашым Асунсион шәһәриндә, хүсуси тәјинатлы мүждәчиләрин јашадығы евдә галырдыг.

Бураја ҝәләндән гыса мүддәт сонра Ҝилад Мәктәбинин 30-ҹу синфинин мәзуну Волтер Брајт гардашла таныш олдум. Бир мүддәт кечәндән сонра биз аилә гурдуг вә һәјатын чәтинликләринә бирҝә синә ҝәрмәјә башладыг. Һәр дәфә ағыр проблемләрлә растлашанда Јеһованын Әшија 41:10 ајәсиндә вердији вәди охујурдуг: «Горхма, Мән сәнинләјәм. Тәлаша дүшмә, сәнин Аллаһын Мәнәм. Сәнә гүввәт верәҹәјәм». Бу ајә бизи бир даһа әмин етди ки, нә гәдәр ки, биз Јеһоваја садигик вә Онун Падшаһлығыны һәр шејдән уҹа тутуруг О, бизи тәк гојмајаҹаг.

Биз Бразилија сәрһәдинә јахын әразијә тәјинат алдыг. Бурада кешишләр ҹаван ушаглары гызышдырыб өјрәтмишди ки, бизим галдығымыз хүсуси тәјинатлы мүждәчиләр үчүн еви даша бассынлар. Ев онсуз да јахшы вәзијјәтдә дејилди. Һәмин әрәфәләрдә Волтер полис рәиси илә Мүгәддәс Китаб дәрси кечмәјә башлады. О, полисләрә бир һәфтә евин кешијини чәкмәји тапшырды. Бундан сонра тәгибчиләр биздән әл чәкди. Бу һадисәдән гыса мүддәт сонра бизи Бразилија сәрһәдинин о тајына көчүрдүләр. Бурада ев шәраити даһа јахшы иди. Бураја көчмәјимизин мүсбәт тәрәфләри чох иди, чүнки бизим һәм Парагвајда, һәм дә Бразилијада ҝөрүшләр кечирмәк имканымыз јаранды. Бурадакы тәјинатымыз баша чатанда бу әразидә артыг ики кичик јығынҹаг вар иди.

Һәким мәнә демишди ки, һеч вахт ушағым олмајаҹаг. Буна ҝөрә дә 1962-ҹи илдә һамилә олдуғуму өјрәнәндә чох тәәҹҹүбләндим. Биз Флорида штатынын Һолливуд шәһәринә, Волтерин валидејнләринин јахынлығына көчдүк. Аилә мәсулијјәтләриндән ирәли ҝәләрәк, бир нечә ил өнҹүл кими хидмәт едә билмәдик. Амма һәмишә олдуғу кими Падшаһлығын иши һәјатымызда ән ваҹиб јери тутурду (Мәт. 6:33).

Флоридаја 1962-ҹи илин нојабр ајында ҝәлдик. Јығынҹаглардакы әһвал-руһијјә бизи чох тәәҹҹүбләндирмишди. Ҹамаатын дүшүнҹә тәрзи јығынҹаглара сирајәт етмишди: ағ дәрили вә гара дәрили баҹы-гардашлар ајры-ајры топлашыр, ајры-ајрылыгда тәблиғ едирдиләр. Анҹаг билдијимиз кими Јеһова иргләр арасында ајры-сечкилик етмәјән Аллаһдыр. Одур ки, гыса мүддәт сонра бу проблем арадан галхды. Артыг јығынҹагларда мүхтәлиф иргләрдән инсанлары ҝөрмәк оларды. Һал-һазырда бу әразидә онларла јығынҹағын фәалијјәт ҝөстәрмәси бу ишин Јеһовадан олдуғуну сүбут едир.

2015-ҹи илдә чох дәрин кәдәр јашадым. Волтер бејин хәрчәнҝиндән вәфат етди. О, мәнә 55 ил ҝөзәл һәјат јолдашы олуб. Волтер Јеһованы чох севирди вә нә гәдәр баҹы-гардаша көмәк етмишди. Онун јени дүнјада сағлам ҹанла дириләҹәји ҝүнү сәбирсизликлә ҝөзләјирәм (Һәв. 24:15).

Гырх илдән чохдур ки, тамвахтлы хидмәтдәјәм вә буна ҝөрә өзүмү чох хошбәхт сајырам. Бу илләр мәнә чохлу севинҹ вә немәтләр бәхш едиб. Мәсәлән, Волтерлә бирликдә 136 нәфәрә вәфтиз олмаға көмәк етмишик. Сөзсүз, бу илләр чәтинликсиз дә өтүшмәјиб. Амма бу проблемләрә ҝөрә вәфалы Аллаһымыз Јеһоваја хидмәти дајандырмаг ағлымызын уҹундан да кечмәјиб. Әксинә, белә анларда мәсәләни Јеһованын өһдәсинә бурахыб Она даһа да јахын олурдуг, инанырдыг ки, О, вәдәсиндә вә Өз билдији јолла мәсәләни јолуна гојаҹаг. Вә Јеһова бу ҹүр дә едирди (2 Тим. 4:16, 17).

Волтер үчүн чох дарыхырам. Амма өнҹүл хидмәти мәнә бу һәсрәтә дөзмәјә ҝүҹ верир. Инсанлара дәрс кечмәк, онлара дирилмә үмиди барәдә данышмаг мәнә бу иткијә таб ҝәтирмәјә хүсусилә көмәк едир. Јеһова мәни һеч вахт тәк гојмајыб. Буну тәсдиг едән һаллары сајмагла битмәз. Јеһова сөз вердији кими, һәмишә мәнә дајаг олуб, гүввәт вериб вә һагг олан сағ әли илә мәни бәрк-бәрк тутуб (Әшј. 41:10).