1, 2. Шаҝирдин вәфтизә доғру ирәлиләмәсиндә кимләрин әмәји ола биләр?

«МҮГӘДДӘС КИТАБДАН өјрәндикләрим чох хошума ҝәлирди. Билирдим ки, бу, һәгигәтдир. Амма мән һәјатымда руһани аддымлары баҹы-гардашларла јахын мүнасибәт гурдугдан сонра атдым вә вәфтизә һазыр олдум», — дејә Фиҹидә јашајан Еми баҹы дејир. Онун һадисәсиндән бир шеји өјрәнирик: шаҝирдин вәфтизә доғру ирәлиләмәсиндә јығынҹагдакы диҝәр баҹы-гардашларын да бөјүк ролу вар.

² Һәр бир тәблиғчи јығынҹағын бөјүмәсинә көмәк едә биләр (Ефес. 4:16). Вануатуда јашајан Лејлани адлы бир өнҹүл баҹы дејир: «Белә бир дејим вар: “Бир ушағын бөјүмәсиндә бүтүн кәндин әмәји вар”. Мәнҹә, шаҝирд һазырламаг иши дә беләдир: “Бир инсанын һәгигәтә ҝәлмәсиндә бүтүн јығынҹағын әмәји вар”». Һәгигәтән дә, ушағын бөјүмәсиндә аилә үзвләри, достлар вә мүәллимләр ваҹиб рол ојнајыр. Онлар ушағы һәвәсләндирир, она ваҹиб өјүд-нәсиһәт верир. Ејнилә тәблиғчиләр мәсләһәтләри, руһландырыҹы сөзләри вә јахшы нүмунәләри илә Мүгәддәс Китабы өјрәнәнләрә вәфтиз олунмаға көмәк едә биләр (Мәс. 15:22).

3. Анна, Дорин вә Лејланинин сөзләриндән һансы нәтиҹәни чыхарырсыныз?

³ Нәјә ҝөрә шаҝирди олан тәблиғчи диҝәр тәблиғчиләрин көмәјини мәмнунијјәтлә гәбул етмәлидир? Молдовада хүсуси өнҹүл кими хидмәт едән Анна гејд едир: «Тәблиғчинин тәкбашына шаҝирдә һәртәрәфли көмәк етмәси чәтин мәсәләдир». Һәмин өлкәдә хүсуси өнҹүл кими хидмәт едән Дорин адлы гардаш дејир: «Бәзән башга тәблиғчиләр шаҝирдин үрәјинә тәсир едән елә сөзләр дејир ки, бу мәним һеч ағлыма да  ҝәлмәзди». Лејлани исә башга бир мәгамы гејд едир: «Баҹы-гардашларын шаҝирдә мәһәббәт вә диггәт ҝөстәрмәси сајәсиндә о ҝөрәҹәк ки, биз Јеһова Аллаһын халгыјыг» (Јәһ. 13:35).

4. Бу мәгаләдә нәји мүзакирә едәҹәјик?

⁴ Амма биздә суал јарана биләр. «Мүгәддәс Китабы өјрәнәнә мән дәрс кечмәдијим һалда неҹә көмәк едә биләрәм?» Ҝәлин ҝөрәк бизи Мүгәддәс Китаб дәрсинә дәвәт едәндә, јахуд өјрәнән шәхс јығынҹаглара ҝәлмәјә башлајанда биз өз тәрәфимиздән нә едә биләрик. Һәмчинин ҝөрәк ағсаггаллар шаҝирдин вәфтиз олунмасына неҹә көмәк едә биләр.

5. Мүгәддәс Китаб дәрсинә дәвәт олунанда сиздән нә ҝөзләнилир?

⁵ Аллаһын Кәламыны шаҝирдә өјрәтмәк илк нөвбәдә мүәллимин мәсулијјәтидир. Әҝәр мүәллим сизи шаҝирдинин дәрсинә дәвәт едирсә, бир әмәкдаш кими, она дәстәк олмалысыныз (Ваиз 4:9, 10). Бәс јахшы әмәкдаш олмаг үчүн нә едә биләрсиниз?

6. Мүгәддәс Китаб дәрсинә дәвәт алан заман Мәсәлләр 20:18 ајәсиндәки принсипи неҹә тәтбиг едә биләрсиниз?

⁶ Габагҹадан һазырлашын. Әввәла, шаҝирд һаггында мәлумат алын. (Мәсәлләр 20:18 ајәсини охујун.) Мүәллимдән соруша биләрсиниз: «Кимә дәрс кечәҹәјик? Һансы мөвзуну арашдыраҹағыг? Бу дәрс заманы шаҝирдә әсас һансы мәгамы вурғуламаг лазымдыр? Нә десәм вә ја демәсәм даһа јахшыдыр? Шаҝирди руһани аддымлар атмаға неҹә тәшвиг едә биләрәм?» Сөзсүз ки, мүәллим шаҝирди һагда шәхси мәлуматлары бөлүшмәјәҹәк, амма лазым олан шејләри сизә дејәҹәк. Ҹој адлы хүсуси тәјинатлы мүждәчи бу кими мәгамлары габагҹадан мүзакирә едир: «Бунун сајәсиндә әмәкдашым шаҝирдә даһа чох ҹаныјананлыг ҝөстәрир вә артыг о билир, дәрс заманы нә демәк лазымдыр».

7. Бир әмәкдаш кими, дәрсә нәјә ҝөрә һазырлашмалысыныз?

⁷ Һәмчинин јахшы оларды ки, арашдыраҹағыныз мөвзуја габагҹадан һазырлашасыныз (Үзр. 7:10). Дорин гардаш дејир: «Әмәкдашым дәрсә әввәлҹәдән һазырлашанда мән севинирәм. Чүнки онда о, фајдалы фикирләр сөјләјә билир». Һәм дә шаҝирд ҝөрәндә ки, икиниз дә дәрсә әввәлҹәдән јахшы һазырлашмысыныз, бу онун үчүн дә ҝөзәл нүмунә олур. Әҝәр дәрсә әтрафлы һазырлашмаг имканыныз јохдурса, ән азындан, вахт ајырыб әсас фикирләрә нәзәр сала биләрсиниз.

8. Дуанызын шаҝирдә хејри олмасы үчүн нә едә биләрсиниз?

⁸ Дуа Мүгәддәс Китаб дәрсинин ваҹиб  һиссәсидир. Ола билсин, әмәкдашыныз сиздән дуа етмәји хаһиш етсин. Буна ҝөрә дә дуада нә дејәҹәјинизи әввәлҹәдән дүшүнүн. Онда дуанызын шаҝирдә даһа чох хејри олаҹаг (Зәб. 141:2). Јапонијадан олан Һанае мүәллими илә она дәрс кечмәјә ҝәлән баҹынын дуасыны индијәдәк хатырлајыр. О дејир: «Һисс олунурду ки, онун Јеһова илә мөһкәм достлуг мүнасибәти вар, мән дә онун кими олмаг истәдим. Дуасында мәним адымы чәкмәси мәнә чох хош олду, өзүмү дәјәрли һисс етдим».

9. Јагуб 1:19 ајәсинә әсасән, дәрс заманы јахшы әмәкдаш олмаг үчүн нә едә биләрсиниз?

⁹ Дәрс вахты мүәллимә дәстәк олун. Ниҝеријадан олан хүсуси өнҹүл Омамујови баҹы дејир: «Јахшы әмәкдаш дәрсин ҝедишатыны диггәтлә изләјир. О, чох данышмыр, чүнки баша дүшүр ки, дәрси апармаг мүәллимин мәсулијјәтидир. Амма јери дүшдүкҹә фајдалы фикирләр дејир». Бәс неҹә мүәјјән етмәк олар ки, нә вахт данышасыныз вә нә дејәсиниз? (Мәс. 25:11). Мүәллим вә шаҝирд данышан заман диггәтлә гулаг асын. (Јагуб 1:19 ајәсини охујун.) Онда она лазыми көмәји ҝөстәрмәјә һазыр олаҹагсыныз. Әлбәттә, бу заман нә дејәҹәјинизә фикир вермәлисиниз. Мәсәлән, диггәт јетирин ки, чох данышмајасыныз, мүәллим нә исә изаһ едәндә сөзүнү кәсмәјәсиниз вә ја башга мөвзуја кечмәјәсиниз. Лакин гыса фикир, нүмунә вә суаллар васитәсилә шаҝирдә мөвзуну ајдын баша дүшмәјә көмәк едә биләрсиниз. Бәзән елә олаҹаг ки, әлавә етмәјә һеч бир фикриниз олмасын. Бу заман шаҝирди тәрифләмәклә, сәмими мараг ҝөстәрмәклә онун инкишаф етмәсинә көмәк едә биләрсиниз.

10. Өз һәјатыныздан данышмагла шаҝирдә неҹә көмәк едә биләрсиниз?

¹⁰ Өз һәјатыныздан данышын. Мүнасибдирсә, гыса олараг шаҝирдә һәгигәти неҹә өјрәндијинизи, һәр һансы чәтинлијин өһдәсиндән неҹә ҝәлдијинизи, јахуд да Јеһованын көмәк әлини һәјатынызда неҹә ҝөрдүјүнүзү данышын (Зәб. 78:4, 7). Сизин дедикләриниз мәһз шаҝирдә лазым олан фикирләр ола биләр. Бу онун иманыны мөһкәмләндирә вә вәфтиз олунмасы үчүн руһән инкишаф етмәјә тәшвиг едә биләр. Һәмчинин, ола билсин, данышдыгларынызын сајәсиндә һазырда үзләшдији сынағын өһдәсиндән ҝәлә биләҹәк (1 Бут. 5:9). Бразилијада јашајан вә өнҹүл кими хидмәт едән Габриел Мүгәддәс Китабы өјрәнәркән бунун она неҹә көмәк етдијини хатырлајыр. О дејир: «Баҹы-гардашлар өз һәјатларындан данышанда ҝөрүрдүм ки, Јеһова бизим үзләшдијимиз чәтинликләрдән  аҝаһдыр вә әмин олурдум ки, онлар буну баҹарыбса, мән дә баҹарарам».

11, 12. Јығынҹаға ҝәлән шаҝирдләри нә үчүн меһрибанлыгла гаршыламалыјыг?

¹¹ Шаҝирдин руһән инкишаф етмәси үчүн о, мүнтәзәм јығынҹаг ҝөрүшләринә ҝәлмәлидир (Ибр. 10:24, 25). Бунун она бөјүк көмәји дәјәҹәк. Сөзсүз ки, мүәллим ону јығынҹаға дәвәт едәҹәк. О ҝәләндә һәр биримиз ону бундан сонра да јығынҹаглара ҝәлмәјә тәшвиг едә биләрик. Буну неҹә едә биләрик?

¹² Шаҝирди меһрибан гаршылајын (Ром. 15:7). Әҝәр шаҝирд јығынҹаға ҝәләндә она хош мүнасибәт ҝөстәрилсә, чох еһтимал ки, бундан сонра да ҝөрүшләрә ҝәлмәк истәјәҹәк. Дүшүнмәјин ки, јәгин онунла мүәллими марагланар, ола биләр ки, мүәллимин иши вар вә ја һәлә јығынҹаға ҝәлмәјиб. Һәддән артыг ҹанфәшанлыг ҝөстәрмәдән шаҝирди меһрибанлыгла саламлајын вә башгалары илә таныш един. Сөһбәт едәркән ону динләјин вә диггәт ҝөстәрин. Шаҝирди меһрибанлыгла гаршыламағымыз она неҹә тәсир бағышлаја биләр? Ҝәлин бир нечә ил өнҹә вәфтиз олунмуш вә һал-һазырда јығынҹаг хидмәтчиси олан Дмитри гардашын нүмунәсинә бахаг. О, јығынҹаға ҝәлдији илк ҝүнү хатырлајараг дејир: «Мән ибадәт евинин јахынлығында дуруб ҝөзләјәндә бир гардаш мәним һәјәҹанлы олдуғуму ҝөрдү вә меһрибанҹасына мәни ичәри дәвәт етди. Һамы ҝәлиб мәнимлә саламлашды. Мән һејран галмышдым. О гәдәр хошума ҝәлмишди ки, истәјирдим һәр ҝүн јығынҹаг олсун. Белә шеј һеч јердә ҝөрмәмишдим».

13. Нүмунәнизлә шаҝирдә неҹә көмәк едә биләрсиниз?

¹³ Нүмунә гојун. Давранышымыз шаҝирди әмин едә биләр ки, бу јол һагг јолдур (Мәт. 5:16). Молдовада өнҹүл кими хидмәт едән Виталиј дејир: «Мән јығынҹагдакыларын һәјат тәрзини, мүхтәлиф мәсәләләрә даир бахышыны вә давранышыны ҝөрдүм. Бу мәни әмин етди ки, доғрудан да Јеһованын Шаһидләри Аллаһын јолу илә ҝедирләр».

14. Сизин нүмунәниз шаҝирдә руһән инкишаф етмәјә неҹә көмәк едә биләр?

¹⁴ Вәфтизә јарарлы олмаг үчүн шаҝирд өјрәндикләрини тәтбиг етмәлидир. Бу, һәмишә асан олмур. Амма ҝөрәндә ки, Мүгәддәс Китаб принсипләрини тәтбиг етмәк сизә хејир ҝәтирир, о да сиздән өрнәк ҝөтүрмәк истәјәҹәк (1 Кор. 11:1). Јухарыда ады чәкилән Һанае баҹынын нүмунәсинә бахаг. О дејир: «Баҹы-гардашлар өјрәндикләримин ҹанлы нүмунәси иди. Онлара бахыб руһландырмағы, бағышламағы вә севмәји  өјрәндим. Онлар башгалары һаггында һеч вахт пис данышмырдылар. Истәјирдим ки, онлар кими олум».

15. Мәсәлләр 27:17 ајәсинә әсасән, јығынҹаға ҝәлән шаҝирдләрлә нә үчүн достлашмалыјыг?

¹⁵ Шаҝирдлә достлашын. Һәр дәфә шаҝирд јығынҹаға ҝәләндә онунла марагланын. Диггәт ҝөстәрин (Филип. 2:4). Сөһбәт едиб бир-биринизи јахындан таныјын. Шәхси мәсәләләрә ҝирмәдән мүсбәт дәјишикликләрә ҝөрә ону тәрифләјә вә дәрсләри, аиләси, ишләри барәдә һал-әһвал тута биләрсиниз. Бу ҹүр үнсијјәт сизи бир-биринизә јахынлашдыра биләр. Шаҝирдлә достлашмагла она вәфтизә доғру ирәлиләмәјә көмәк едирсиниз. (Мәсәлләр 27:17 ајәсини охујун.) Һанае инди өнҹүл кими хидмәт едир. Јығынҹаға ҝәлмәјә башладығы вахты хатырлајараг о дејир: «Јығынҹагдакыларла достлашдыгҹа һәр јығынҹағы сәбирсизликлә ҝөзләјирдим вә һәтта јорғун олсам да, јығынҹаға гатылырдым. Јени достларымла вахт кечирмәк мәнә хош иди вә бу мәнә көмәк етди ки, иманыма шәрик олмајан көһнә достларымла мүнасибәтими кәсим. Мән Јеһоваја вә баҹы-гардашлара даһа јахын олмаг истәјирдим. Беләҹә, вәфтиз олунмаг гәрарына ҝәлдим».

16. Шаҝирдин өзүнү јығынҹаға доғма һисс етмәси үчүн даһа нә едә биләрсиниз?

¹⁶ Шаҝирд өзүндә дәјишиклик етдикҹә көмәк един ки, о өзүнү јығынҹаға доғма һисс етсин. Бунун үчүн она гонагпәрвәрлик ҝөстәрә биләрсиниз (Ибр. 13:2). Молдовада хидмәт едән Денис дәрс кечдији вахтлары хатырлајараг дејир: «Баҹы-гардашлар дәфәләрлә мәни вә һәјат јолдашымы бирҝә вахт кечирмәјә дәвәт едирдиләр вә бизә Јеһованын онлара неҹә көмәк етдијини данышырдылар. Бу бизи руһландырырды. Беләҹә, биз Јеһоваја хидмәт етмәјә гәрарлы олдуг вә әмин идик ки, бизи гаршыда ҝөзәл һәјат ҝөзләјир». Шаҝирд тәблиғчи оландан сонра ону хидмәтә дәвәт едә биләрсиниз. Бразилијадан олан Дијего адлы гардаш дејир: «Баҹы-гардашлар мәни тәблиғ етмәјә дәвәт едирди. Бу онлары јахындан танымағын ән јахшы јолу иди. Бунун сајәсиндә чох шеј өјрәндим, Јеһова вә Иса Мәсиһә даһа јахын олдум».

17. Ағсаггаллар Мүгәддәс Китабы өјрәнәнләрә неҹә көмәк едә биләр?

¹⁷ Шаҝирдләрә вахт ајырын. Әзиз ағсаггаллар, сизин шаҝирдә диггәт ҝөстәрмәјиниз ону вәфтиз олунмаға тәшвиг едә биләр. Чалышын, шаҝирд јығынҹаға ҝәләндә һәмишә онунла сөһбәт едәсиниз. Әҝәр онларын адыны јадынызда сахласаныз, хүсусилә шәрһ верән заман адлары илә мүраҹиәт етсәниз, онлар сизин диггәтинизи һисс едәҹәкләр. Шаҝирдин  дәрсини кечмәк үчүн ону өјрәдән тәблиғчи илә вахташыры әмәкдашлыг едә биләрсиниз? Бу, шаҝирдә тәсәввүрүнүзә ҝәтирә билмәјәҹәјиниз гәдәр көмәк едә биләр. Ниҝеријада јашајан Ҹаки адлы бир өнҹүл гејд едир: «Шаҝирдләрим биләндә ки, мәнимлә онларын дәрсини кечмәјә ҝәлән гардаш ағсаггалдыр, мәәттәл галырдылар. Бир шаҝирд демишди: “Мәним кешишим һеч вахт дуруб мәним евимә ҝәлмәз. О, тәкҹә варлылары вә она пул верәнләри зијарәт едир”». Бу шаҝирд инди јығынҹаглара ҝәлир.

18. Ағсаггаллар Һәвариләрин ишләри 20:28 ајәсиндә јазыланлара неҹә әмәл едә биләрләр?

¹⁸ Шаҝирди олан тәблиғчиләрә тәлим верин вә онлары руһландырын. Бир ағсаггал кими сизин үзәринизә бөјүк мәсулијјәт дүшүр. Сиз тәблиғчиләрә һәм тәблиғ ишиндә, һәм дә шаҝирд һазырламаг ишиндә сәриштәли мүждәчи олмаға көмәк етмәлисиниз. (Һәвариләрин ишләри 20:28 ајәсини охујун.) Әҝәр тәблиғчи сизин јанынызда дәрс кечмәјә чәкинирсә, дәрси сиз апара биләрсиниз. Јухарыда ады чәкилән Ҹаки гејд едир: «Ағсаггаллар һәмишә мәндән шаҝирдләрим һагда һал-әһвал тутурлар. Мүгәддәс Китаб дәрси илә бағлы чәтинликләрлә үзләшәндә онлар мәнә јахшы мәсләһәтләр верирләр». Ағсаггаллар мүәллимләри мөһкәмләндирмәк, дәрс кечмәјә давам етмәјә тәшвиг етмәк үчүн чох шеј едә биләр (1 Салон. 5:11). Ҹаки дејир: «Ағсаггаллар мәни руһландыранда, чәкдијим зәһмәти гијмәтләндирдикләрини дејәндә бу мәнә хош олур. Онларын сөзләри мәнә гызмар һавада ичилән сәрин су кими тәравәт верир. Ағсаггаллар мәни тәрифләјәндә өзүмә әминлијим артыр вә шаҝирд һазырламаг ишиндән даһа чох севинҹ дујурам» (Мәс. 25:25).

19. Нәјә ҝөрә һамымызын севинмәк үчүн сәбәби вар?

¹⁹ Һал-һазырда һеч кимә Мүгәддәс Китаб дәрси кечмәсәк дә, башга шаҝирдләрә руһани ҹәһәтдән инкишаф етмәјә көмәк едә биләрик. Дәрс заманы сөһбәти әлә алмадан, дүшүнүлмүш фикирләр сөјләјәрәк мүәллимә дәстәк ола биләрик. Ибадәт евинә ҝәлән шаҝирдләрлә достлаша вә онлара јахшы нүмунә гоја биләрик. Ағсаггаллар шаҝирдләрә вахт ајырараг онлары руһландыра биләр. Һәмчинин мүәллимләрә тәлим вермәклә, тәрифләмәклә үрәкләндирә биләрләр. Чох хошбәхтик ки, инсанларын Јеһованы севмәсиндә вә Она гуллуг етмәсиндә бизим дә, кичик дә олса, пајымыз вар.