1—3. а) Зәбур 5:4—6 ајәләринә әсасән, Јеһованын пислијә мүнасибәти неҹәдир? б) Нәјин әсасында дејә биләрик ки, ушаглара гаршы зоракылыг «Мәсиһин гануну»на зиддир?

ЈЕҺОВА АЛЛАҺ һәр ҹүр пислијә нифрәт едир. (Зәбур 5:4—6 ајәләрини охујун.) Тәсәввүр етмәк олар, О, ән мурдар әмәлдән — ушаглара гаршы ҹинси зоракылыгдан нә дәрәҹәдә икраһ едир! Јеһовадан өрнәк алан бизләр дә ушаглара гаршы зоракылыға нифрәт едирик. Биз мәсиһи јығынҹағында белә бир шејә ҝөз јуммуруг вә дәрһал онун гаршысыны алырыг (Ром. 12:9; Ибр. 12:15, 16).

² Ушаглара гаршы едилән һәр ҹүр зоракылыг «Мәсиһин гануну»на зиддир! (Гал. 6:2). Буну нәјин әсасында демәк олар? Өтән мәгаләдән өјрәндијимиз кими, «Мәсиһин гануну» — јәни Иса Мәсиһин сөзләри вә әмәлләри илә өјрәтдији бүтүн тәлимләр мәһәббәт үзәриндә гурулуб вә инсаны әдаләтә сәсләјир. Мәсиһиләр бу гануна итаәт едәрәк чалышырлар ки, ушаглар мүдафиә олундугларыны вә һәгигәтән севилдикләрини һисс етсинләр. Лакин ушаға гаршы зоракылыг худбин вә әдаләтсиз давранышдыр, буна мәруз галан ушаг өзүнү мүдафиәсиз вә севҝидән мәһрум һисс едир.

³ Әфсуслар олсун ки, ушаглара гаршы ҹинси зоракылыг глобал бир бәладыр вә һәтта мәсиһиләр арасында да зоракылыға мәруз галанлар вар. Бәс сәбәб нәдир? «Пис адамлар» дүнјаны бүрүјүб вә ола билсин, онлардан бәзиси өз мәкрли нијјәтләри илә јығынҹаға дахил олмаға чалышыр (2 Тим. 3:13). Диҝәр сәбәб исә одур ки, јығынҹагдакылардан бәзиләри позғун ҹисмани истәкләрә ујараг ушаглара ҹинси тәҹавүз етмишләр. Ҝәлин ушаға гаршы ҹинси зоракылығын нә үчүн олдугҹа ағыр ҝүнаһ олдуғуну  арашдыраг. Һәмчинин ушаг зоракылығы да дахил, ҹидди ҝүнаһ ишләнән заман ағсаггалларын мәсәләни неҹә һәлл етдикләрини вә валидејнләрин ушагларыны неҹә горуја биләҹәјини өјрәнәк. *

4, 5. Нә үчүн ушаг зоракылығы дәһшәтли ҝүнаһдыр?

⁴ Ушаглара гаршы зоракылығын вурдуғу зәрбә узун мүддәт өз тәсирини ҝөстәрир. Бу, һәм зәрәрчәкәнә, һәм дә онун гејдинә галанлара — аилә үзвләринә вә јығынҹагдакы баҹы-гардашлара дәрин јара вурур. Ушаг зоракылығы дәһшәтли ҝүнаһдыр.

⁵ Гурбана гаршы ҝүнаһ *. Башгасына јара вурмаг, әзаб чәкдирмәк ҝүнаһдыр. Нөвбәти мәгаләдән ҝөрәҹәјик ки, тәҹавүзкар мәһз белә бир һәрәкәти едир, о, ушаға олмазын јаралар вурур. Тәҹавүз едән шәхс ушағын етибарындан суи-истифадә едир вә беләҹә, ушаг артыг өзүнү тәһлүкәсизликдә һисс етмир. Ушаглары бу ҹүр ијрәнҹ әмәлләрдән горумаг лазымдыр. Артыг бу ҹүр әмәлләрин гурбаны оланлара исә тәсәлли вә көмәк етмәк ҝәрәкдир (1 Салон. 5:14).

6, 7. Нәјә ҝөрә демәк олар ки, ушаглара гаршы зоракылыг јығынҹаға вә һөкумәтә гаршы ҝүнаһдыр?

⁶ Јығынҹаға гаршы ҝүнаһдыр. Јығынҹагдан кимсә ушаға гаршы ҹинси зоракылыгда тәгсиркар билинибсә, о, јығынҹағын адына ләкә ҝәтирир (Мәт. 5:16; 1 Бут. 2:12). Бу, «иман уғрунда ҹидди мүбаризә» апаран милјонларла сәдагәтли мәсиһиләрә гаршы неҹә дә бөјүк һагсызлыгдыр! (Јһд. 3). Биз пис ишләр ҝөрүб төвбә етмәјән вә јығынҹағын тәмиз адына ләкә ҝәтирән шәхсләрин арамызда галмасына јол вермирик.

⁷ Һөкумәтә гаршы ҝүнаһдыр. Мәсиһиләр «һөкумәтә табе» олмалыдырлар (Ром. 13:1). Һөкумәтә табе олдуғумуз өлкәнин ганунларына һөрмәтлә јанашмағымыздан ҝөрүнүр. Әҝәр јығынҹагдан кимсә ҹинајәт мәҹәлләсини позмагда, мәсәлән, ушаға гаршы ҹинси зоракылыгда тәгсиркар билинирсә, о, һөкумәтә гаршы ҝүнаһ етмиш сајылыр. (Һәвариләрин ишләри 25:8 ајәси илә әлагәләндирин.) Өлкәнин ганунунун иҹрасыны тәмин етмәк ағсаггалларын сәлаһијјәтиндә олмаса да, онлар тәҹавүзкары ушаг зоракылығына ҝөрә ганунда нәзәрдә тутулан ҹәзадан горумајаҹаглар (Ром. 13:4). Тәгсиркар әкдијини бичәҹәк (Гал. 6:7).

8. Јеһова инсанлара гаршы едилән ҝүнаһа неҹә јанашыр?

⁸ Ән әсасы, Аллаһа гаршы ҝүнаһдыр (Зәб. 51:4). Инсан инсана гаршы ҝүнаһ едәндә Јеһоваја гаршы да ҝүнаһ етмиш олур. Ҝәлин Аллаһын исраиллиләрә вердији Гануна нәзәр салаг. Ганунда дејилирди ки, кимсә «башгасыны алдадар, јахуд кимдәнсә нәсә оғурлајарса,.. Јеһоваја сәдагәтсизлик» етмиш олар (Лав. 6:2—4). Одур ки, јығынҹагдан кимсә ушаға гаршы ҹинси зоракылыг едәрсә, ону алдатдығы, онун башгаларына етибар һиссини оғурладығы үчүн Аллаһа гаршы сәдагәтсизлик етмиш олур. Белә инсан Јеһованын адына бөјүк ләкә ҝәтирир. Мәһз бу сәбәбдән ушаглара гаршы ҹинси зоракылыг Јеһоваја гаршы ағыр ҝүнаһдыр, биз дә буна белә јанашмалыјыг.

9. Јеһованын тәшкилаты узун илләрдир халгыны һансы мәлуматларла тәмин едир вә нә үчүн?

⁹ Узун илләр боју Јеһованын тәшкилаты  ушаглара гаршы ҹинси зоракылыгла бағлы Мүгәддәс Китаба әсасланан чохлу мәлумат дәрҹ едиб. Мәсәлән, «Ҝөзәтчи гүлләси» вә «Ојанын!» журналларында ҹинси тәҹавүзә мәруз галан кәсләрин емосионал изтираблардан гуртулмасына, башгаларынын онлара неҹә көмәк едиб тәсәлли верә биләҹәјинә вә валидејнләрин ушагларыны неҹә горуја биләҹәјинә даир мәсләһәтләр јер алыр. Ушаг зоракылығына даир мәсәләләрин һәлли илә бағлы ағсаггаллара Мүгәддәс Китаба әсасланан тәфсилатлы ҝөстәришләр верилиб. Тәшкилат јығынҹагларын ушаг зоракылығы мәсәләсини һәлл етмәк үсулуну нәзәрдән кечирмәјә давам едир. Нә үчүн? Мәгсәд бу мәсәләнин Мәсиһин ганунуна ујғун шәкилдә һәлл олунмасыны тәмин етмәкдир.

10—12. а) Ҹидди ҝүнаһла бағлы мәсәләләрин һәллиндә ағсаггаллар нәји јадда сахлајыр вә онлары нараһат едән мәгамлар һансылардыр? б) Јагуб 5:14, 15 ајәләринә әсасән, ағсаггаллар нәјә ҹан атыр?

¹⁰ Ҹидди ҝүнаһла бағлы истәнилән мәсәләнин һәллиндә ағсаггаллар унутмамалыдыр ки, Мәсиһин гануну онлардан сүрүјә гаршы мәһәббәтлә, еләҹә дә Аллаһын дүзҝүн вә әдаләтли һесаб етдији тәрздә давранмағы тәләб едир. Одур ки, ҹидди ҝүнаһын ишләнмәси илә бағлы мәлумат аланда ағсаггаллары нараһат едән бир нечә мәгам олур. Ағсаггаллар илк нөвбәдә Јеһованын адынын мүгәддәслијини горумағы дүшүнүрләр (Лав. 22:31, 32; Мәт. 6:9). Онлары нараһат едән диҝәр мәгам јығынҹагдакыларын руһани вәзијјәтини горумаг вә зоракылығын гурбанларына дајаг олмагдыр.

¹¹ Бундан әлавә, әҝәр ҝүнаһ едән шәхс јығынҹагдандырса, төвбә етдији тәгдирдә, ағсаггаллар ону руһани ҹәһәтдән дирчәлтмәјә чалышыр. (Јагуб 5:14, 15 ајәләрини охујун.) Нәфсинә тәслим олуб ҹидди ҝүнаһ төрәдән мәсиһи руһани ҹәһәтдән нахош һесаб олунур. Бу онун Јеһова илә мүнасибәтләринин корландығындан хәбәр верир *. Ағсаггаллары мүәјјән мәнада һәкимләрә бәнзәтмәк олар. Онлар «нахош оланы [индики һалда, ҝүнаһ едәни]» сағалтмаға чалышаҹаг. Ағсаггалларын Мүгәддәс Китаба әсасланан мәсләһәтләри она Јеһова илә мүнасибәтләрини бәрпа етмәјә көмәк едә биләр, амма бунун үчүн о, сәмими-гәлбдән төвбә етмәлидир (Һәв. 3:19; 2 Кор. 2:5—10).

¹² Ајдындыр ки, ағсаггалларын үзәринә бөјүк мәсулијјәт дүшүр. Онлар Јеһованын онлара әманәт етдији сүрүнүн гејдинә галырлар (1 Бут. 5:1—3). Истәјирләр ки, баҹы-гардашлар јығынҹагда өзләрини тәһлүкәсиз һисс етсинләр. Она ҝөрә дә ушаглара гаршы ҹинси зоракылыг да дахил, ҹидди ҝүнаһа јол верилдији илә бағлы мәлумат аланда дәрһал тәдбир ҝөрүрләр. Бәс онлар һансы тәдбирләри ҝөрүрләр? Ҝәлин  13,  15 вә  17-ҹи абзасларын әввәлиндәки суаллара нәзәр салаг.

13, 14. Ағсаггаллар ушаг зоракылығы иддиасы һагда дөвләт органларына хәбәр вермәк барәдә гануна әмәл едирләр? Изаһ един.

 ¹³ Ағсаггаллар ушаг зоракылығы иддиасы һагда дөвләт органларына хәбәр вермәк барәдә гануна әмәл едирләр? Бәзи өлкәләрдә ганунвериҹилик ушаглара гаршы зоракылыг һалынын баш вердији һагда иддианы мүвафиг органлара хәбәр вермәји тәләб едир. Һәмин өлкәләрдә јашајан ағсаггаллар бу ҹүр ганунлара табе олур (Ром. 13:1). Бу ганунлар Аллаһын ганунуна зидд дејил (Һәв. 5:28, 29). Одур ки, ағсаггаллар ушағын зоракылыға мәруз галмасы иддиасы һагда хәбәр аланда дөвләтин ганунуна әмәл етмәклә бағлы мәсләһәт үчүн дәрһал филиалла әлагә сахлајырлар.

¹⁴ Ағсаггаллар зоракылығын гурбанына вә валидејнләринә, јахуд бу барәдә мәлуматы олан диҝәр шәхсләрә  ајдын шәкилдә билдирирләр ки, онларын бу һагда дөвләт органларына мәлумат вермәк һүгугу вар. Бәс тәгсиркар билинән шәхс јығынҹагдандырса, верилән хәбәр вә һадисә сонрадан јајыларса, онда неҹә? Һадисә илә бағлы хәбәр верән мәсиһи бунунла Аллаһын адына ләкә ҝәтирдијини дүшүнүб өзүнү ҝүнаһкар билмәлидир? Хејр. Аллаһын адыны бәднам едән о јох, ушаға гаршы зоракылыг едән шәхсдир.

15, 16. а) 1 Тимутијә 5:19 ајәсинә әсасән, интизам тәдбири ҝөрмәк үчүн нәјә ҝөрә азы ики нәфәрин шаһидлији лазымдыр? б) Ағсаггаллар јығынҹагдан киминсә ушаг зоракылығында иттиһам олундуғуну биләндә һансы аддымлары атырлар?

 ¹⁵ Нә үчүн ағсаггалларын интизам тәдбири ҝөрмәси үчүн азы ики шаһид тәләб олунур? Бу тәләб Мүгәддәс Китабдакы јүксәк әдаләт нормаларынын бир һиссәсидир. Әҝәр ҝүнаһкар ҝүнаһыны етираф етмирсә, ағсаггалларын интизам комитәси јаратмасы үчүн ики шаһид ҝүнаһын төрәдилдијини тәсдиг етмәлидир (Ган. 19:15; Мәт. 18:16; 1 Тимутијә 5:19 ајәсини охујун). Бәс бу о демәкдирми ки, ушаға гаршы зоракылыг һалынын баш вердији һагда иддианы дөвләт органларына хәбәр вермәк үчүн дә ики шаһид ҝәрәкдир? Хејр. Ағсаггалын вә ја башгаларынын бу кими мәсәләләрлә бағлы дөвләт органларына хәбәр вермәси үчүн ики шаһид тәләб олунмур.

¹⁶ Ағсаггаллар јығынҹагдан киминсә ушаг зоракылығында иттиһам олундуғуну биләндә дөвләтин ҹинајәт һагда хәбәр вермәк тәләбинә риајәт етмәјә чалышыр, сонра исә Мүгәддәс Китаб әсасында мәсәләни арашдырырлар. Тәгсиркар билинән шәхс иттиһамлары рәдд едәрсә, онда ағсаггаллар шаһидләрин ифадәләрини динләјәҹәк. Әҝәр ән азы ики нәфәр — иттиһам ирәли сүрән шәхс вә ушаг зоракылығында иттиһам олунанын бу вә ја диҝәр һалларда зоракылыг етдијинә шаһид олан башга бир шәхс варса, интизам комитәсинин јарадылмасы үчүн әсас вар *. Лакин икинҹи шаһидин олмамасы иттиһамын әсассыз олдуғуну билдирмир. Ҝүнаһын ишләндијини тәсдиг едән ики нәфәр олмадығы һалда белә, ағсаггаллар баша дүшүр ки, иттиһам олунан кәсин башгаларына дәрин јара вураҹаг ҹидди ҝүнаһ ишләдијинә еһтимал вар. Ағсаггаллар давамлы олараг зәрәрчәкәнләрә дајаг олаҹаглар. Бундан әлавә, онлар јығынҹағы потенсиал тәһлүкәдән горумаг үчүн иттиһам олунан кәси нәзәрдә сахлајаҹаглар (Һәв. 20:28).

17, 18. Интизам комитәсинин гурулмасында мәгсәд нәдир? Изаһ един.

 ¹⁷ Интизам комитәсинин гурулмасында мәгсәд нәдир? Ағсаггаллар тәрәфиндән гурулан интизам комитәсинин мәгсәди ганун позунтусуна ҝөрә ҝүнаһкарын дөвләт тәрәфиндән ҹәза алыб-алмамасыны мүәјјән етмәк дејил. Ағсаггаллар ганунун иҹра олунмасына мүдахилә етмирләр, онлар ҹинајәт мәсәләләрини дөвләтин өһдәсинә бурахырлар (Ром. 13:2—4; Тит. 3:1). Ағсаггалларын мәгсәди һәмин инсанын јығынҹагда галыб-галмајаҹағыны мүәјјәнләшдирмәкдир.

¹⁸ Интизам комитәсиндә хидмәт едән ағсаггаллар мәсәләнин руһани, јәни дини јөнү илә бағлы гәрар верирләр. Онлар Мүгәддәс Китаб әсасында ҝүнаһкарын төвбә едиб-етмәдијини мүәјјән едирләр. Әҝәр ҝүнаһ едән шәхс төвбә етмирсә, о, јығынҹагдан кәнар едилир вә бу барәдә елан олунур (1 Кор. 5:11—13). Әҝәр ҝүнаһкар төвбә едәрсә, јығынҹагда гала биләр. Лакин  ағсаггаллар она билдирәҹәкләр ки, ола билсин, она һеч вахт јығынҹагда һәр һансы иш тапшырылмасын вә ја о, һеч бир мәсулијјәт алмасын. Ушагларын тәһлүкәсизлијини дүшүнәрәк ағсаггаллар валидејнләри тәкликдә хәбәрдар едә биләр ки, өвладларынын һәмин кәслә мүнасибәтинә нәзарәт етсинләр. Ағсаггаллар бу кими тәдбирләр ҝөрән заман зәрәрчәкәнләрин ким олдуғуну ачыгламајаҹаглар.

19—22. Валидејнләр ушагларыны неҹә горуја биләр? (Үз габығындакы шәклә бахын.)

¹⁹ Ушағы зәрәрдән горумаг мәсулијјәти әсасән кимин үзәринә дүшүр? Валидејнләрин *. Өвладларыныз «Јеһованын вердији мирасдыр», мүгәддәс әнамдыр (Зәб. 127:3). Әзиз валидејнләр, бу әнамы горумаг сизин мәсулијјәтиниздир. Өвладынызы зоракылыгдан горумаг үчүн һансы тәдбирләри ҝөрә биләрсиниз?

²⁰ Биринҹиси, өзүнүз маарифләнин. Ушаглара гаршы зоракылыг едән шәхсләр вә онларын истифадә етдији фәндләр барәдә мәлумат алын. Һәр һансы потенсиал тәһлүкәјә гаршы ҝөздә-гулагда олун (Мәс. 22:3; 24:3). Јадда сахлајын ки, әксәр һалларда зоракылыг едән кәс ушағын таныдығы вә етибар етдији шәхс олур.

²¹ Икинҹиси, өвладынызла ачыг үнсијјәт гурун (Ган. 6:6, 7). Бу о демәкдир ки, ушағы диггәтлә динләмәк лазымдыр (Јаг. 1:19). Нәзәрә алын ки, адәтән ушаглар зоракылыға мәруз галдыгларыны демәк истәмирләр. Ола билсин, ушаг дедикләринә һеч кимин инанмајаҹағындан горхсун, јахуд, ола билсин, зоракылыг едән шәхс оланлары һеч кимә демәмәси үчүн ушағы һәдәләсин. Әҝәр ушағынызын өзүнү гәрибә апардығыны һисс етсәниз, мүлајимликлә суаллар верин вә ону сәбирлә динләјин.

²² Үчүнҹүсү, өвладынызы маарифләндирин. Ушаға јашына ујғун ҹинси тәрбијә верин. Кимсә онлара намүнасиб тәрздә тохунмаг истәјәндә нә демәли вә нә етмәли олдуғуну өјрәдин. Тәшкилатымызын ушаглары горумаг үчүн вердији мәлуматлардан фајдаланын. (« Өзүнүзү вә өвладынызы маарифләндирин» адлы чәрчивәјә бахын.)

23. Јеһованын Шаһидләри ушаглара гаршы ҹинси зоракылыға неҹә јанашыр вә нөвбәти мәгаләдә һансы суалын ҹавабы арашдырылыр?

²³ Јеһованын Шаһидләри олан бизләр ушаглара гаршы ҹинси зоракылығы дәһшәтли ҝүнаһ, ағыр ҹинајәт һесаб едирик. Биз Мәсиһин ганунуну рәһбәр тутараг зоракылыг едән шәхсләри ҝүнаһларынын бәдәлини өдәмәкдән горумуруг. Бәс зоракылығын гурбаны олмуш диндашымыза неҹә көмәк едә биләрик? Нөвбәти мәгаләдә бу суал арашдырылыр.